Suma na tru Kresten?

„KRESTEN na sma di e teki den leri fu Yesus Krestes, èn den e handri akruderi den leri dati tu” (On Being a Christian). Den wortu disi di Hans Küng, wan sabiman fu kerkitori na ini Switserland, taki, e sori wan sani di tru srefisrefi, namku: Soso opregtisma di e handri akruderi den leri fu Yesus, na tru Kresten.

Ma fa a de dan nanga sma, noso kerki organisâsi di e taki dati den na bakaman fu Krestes, aladi den no e handri trutru akruderi den leri fu Yesus? Yesus srefi ben taki dati furu sma ben o taki dati den na Kresten. Den ben o taki fu den difrenti sani di den du, fu buweisi taki den ben dini en. Den ben o taki: „A no na ini yu nen wi ben puru ogri yeye na sma tapu? A no na ini yu nen wi ben du furu bigi wondru?” Ma san Yesus ben o piki den? Den krakti wortu fu en e sori krin fa a e si den: „Mi no sabi unu kwetikweti!  Komoto na mi fesi, un sma di e du kruktudu.”—Mateyus 7:22, 23.

Disi na trutru wan seryusu warskow gi „sma di e du kruktudu” èn di e taki dati den na bakaman fu Yesus! Meki wi go luku tu prenspari markitiki di Yesus wani sma fu doro, efu den no wani taki a e si den leki sma di e du kruktudu, ma leki tru Kresten

„Te unu lobi makandra”

Wan fu den markitiki di Yesus poti, na disi: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”—Yohanes 13:34, 35.

Yesus wani taki den bakaman fu en musu abi trutru lobi gi makandra èn gi tra sma. Furu Kresten doro a markitiki dati na ini den hondrohondro yari baka di Yesus ben de na grontapu. Ma fa a de nanga furu fu den kerki organisâsi di e taki dati den e horibaka gi den leri fu Krestes? Den sani di den du na ini a ten di pasa, sori taki den lobi makandra èn taki den lobi trawan? Kwetikweti. Na presi fu dati, den meki taki bun furu orloku nanga feti pasa pe sma di no abi noti fu du nanga den feti dati, lasi den libi.—Openbaring 18:24.

A sani disi e pasa te now ete. Pipel di e taki dati den na Kresten, ben e teki fesi na ini a kiri di sma kiri makandra na ini den tu grontapufeti fu a di fu 20 yarihondro. No so langa pasa, na ini a yari 1994, memre fu sokari Kresten kerki ben de den sma di bigin du tumusi ogri-ati sani nanga sma fu wan tra lo na ini Rwanda, soso fu di den ben wani kiri a heri lo. ’Den wan di ben du den ogri-ati sani nanga makandra, ben de fu a srefi bribi’, na so Desmond Tutu, di ben de na Anglikan Gran-beskopu fosi, ben skrifi. „Furu fu den ben de Kresten.”

„Efu unu tan du den sani di mi taki”

A di fu tu markitiki di tru Kresten musu doro, na a sani disi di Yesus ben taki: „Efu unu tan du den sani di mi taki, dan unu na mi disipel trutru; unu o sabi a waarheid èn a waarheid o meki unu kon fri.”—Yohanes 8:31, 32.

Yesus e fruwakti taki den bakaman fu en e tan du den sani di a taki, sobun, den abi fu hori densrefi na den leri fu en. Na presi fu dati, kerki leriman di e taki dati den e du san Krestes taki, „teki moro nanga moro Griki leri abra”, na so Küng, wan sabiman fu kerkitori, e taki. Na presi taki den e leri sma den sani di Yesus ben e leri, den e leri sma taki a sili no man dede, taki a vagevuur de tru, taki den musu anbegi Maria, taki wan grupu fu kerki tiriman musu de, èn moro sani sosrefi. Ala den leri disi e komoto fu heiden bribi èn fu heiden filosofiaman.—1 Korentesma 1:19-21; 3:18-20.

Kerki leriman kon nanga wan leri tu di sma no man frustan, namku a leri fu a Dri-wánfasi, èn a leri disi e taki dati Yesus abi wan moro hei posisi, aladi Yesus noiti ben taki dati a abi so wan posisi. Nanga a leri dati, den puru sma prakseri na a anbegi di den musu anbegi a sma di Yesus ben taki fu en ala ten, namku en Tata, Yehovah (Mateyus 5:16; 6:9; Yohanes 14:28; 20:17). „Te Yesus e taki fu Gado”, na so Hans Küng skrifi, dan „dati wani taki na owruten Gado fu den famiri-edeman Abraham, Isak,  nanga Yakob, namku: Yahweh . . . Gi en, a Sma disi na a wan-enkri Gado.” Omeni sma na ini a ten disi e denki wantewante taki a Gado nanga a Tata fu Yesus na Yahweh, noso Yehovah, soleki fa sma e skrifi en nen na ini Sranantongo?

Kerki fesiman no gi yesi kwetikweti na a komando di Yesus gi fu no abi noti fu du nanga politiek afersi. Na ini a ten fu Yesus, Galilea „ben de a moro prenspari presi pe sma ben e gi makandra deki-ati fu lobi a mamakondre fu den”, na so a skrifiman Trevor Morrow taki. Furu Dyu di ben lobi a kondre fu den, ben e teki prati na feti, fu di den ben wani tiri den eigi kondre, èn fu di den ben wani anbegi Gado soleki fa densrefi ben wani. Yesus ben taigi den disipel fu en fu teki prati na den sortu feti dati? Nôno. Kontrari fu dati, a ben taigi den: „Unu no de wan pisi fu grontapu” (Yohanes 15:19; 17:14). Ma na presi taki den kerki tiriman hori densrefi aparti fu politiek afersi, den kon nanga wan sani di a skrifiman Hubert Butler fu Ierland ben taki fu en. A ben taki dati „kerki e gi sma deki-ati fu feti gi a kondre fu den, èn fu abi wan prati na politiek afersi”. A man disi ben skrifi: „Nofo tron a de so taki te Kresten e horibaka fayafaya gi politiek afersi, dan den e horibaka fayafaya gi a legre tu. Èn te tiriman nanga kerki fesiman e meki kruderi nanga makandra, dan a de so ala ten taki a Kerki musu blesi a legre fu a kondre fosi, efu a wani kisi spesrutu grani.”

Falsi leriman e sori taki den no sabi Yesus

Na apostel Paulus ben warskow Kresten fu no fadon komoto na a tru Kresten bribi. A ben taki dati baka te a dede, „ogri busidagu” di ben o komoto na mindri den sokari Kresten, ben o „taki kruktu sani fu hari den disipel kon na den baka” (Tori fu den Apostel 20:29, 30). Den ben o „taigi sma taki den sabi Gado”, ma te yu luku en bun, dan „den sani di den e du e sori taki den no sabi en” (Titus 1:16). Na so na apostel Petrus ben warskow den disipel tu taki ’na wan kibri fasi den falsi leriman ben o kon nanga falsi leri di e tyari pori kon, èn den o sori taki den no sabi srefi na eiginari di bai den’. A ben taki dati a takru fasi fa den ben o tyari densrefi, ben o meki sma taki „ogri fu a waarheid” (2 Petrus 2:1, 2). Soleki fa a Griki sabiman W. E. Vine e taki, dan a sori di den sori taki den no sabi Krestes na a fasi disi, wani taki dati „den e weigri fu gi yesi na a Tata èn na a Manpikin, fu di den drai baka gi a bribi”.

San Yesus ben o du te sma di e taki dati den na en disipel, e weigri fu espresi fu „tan du san a taki”, èn fu doro den tra markitiki di a poti? A ben gi a warskow disi: „Efu wan sma e taigi trawan taki a no sabi mi, dan mi sa taigi a Tata na hemel tu taki mi no sabi a sma dati” (Mateyus 10:33). A no de fu taki, dati te wan sma di e meki opregti muiti fu de getrow e meki wan fowtu, dan Yesus no o taki dati a no sabi a sma dati. Fu eksempre, aladi na apostel Petrus ben taki dri leisi dati a no sabi Yesus, toku a ben kisi pardon di a sori berow (Mateyus 26:69-75). Ma Yesus e taki dati a no sabi den sma, noso den organisâsi di sori fu de ogri busidagu na ini krosi di e meki den gersi skapu. Iya, den sma disi e du neleki den e waka baka Krestes, ma den e weigri fu espresi fu teki den leri fu en. Yesus ben taki fu den sortu falsi leriman disi taki: „Na den froktu fu den, unu sa man si suma na den man dati trutru.”—Mateyus 7:15-20.

Den apostel dede, èn sma e fadon komoto na bribi

O ten falsi Kresten bigin sori taki den no sabi Krestes? Syatu baka di Yesus dede. Ensrefi ben warskow taki heri esi Satan Didibri ben o sai „takru wiwiri”, noso falsi Kresten, na mindri a „bun siri”, noso den tru Kresten, di Yesus ben prani na a pisi ten fu en diniwroko (Mateyus 13:24, 25, 37-39). Na apostel Paulus ben gi a warskow fu luku bun gi leriman di ben e kori sma kaba na ini a ten fu en. A ben taki dati a moro prenspari reide fu san ede den drai baka gi den leri fu Yesus Krestes, na fu di den no ben „lobi a waarheid” trutru.—2 Tesalonikasma 2:10.

Solanga den apostel fu Yesus Krestes ben de na libi, den ben sorgu taki den sma di fadon komoto na bribi no ben abi krakti tapu den tru Kresten. Ma baka di den apostel dede, kerki fesiman gebroiki ’ala sortu krakti wroko, èn den sori sma bigi marki nanga wondru, èn ala sortu  onregtfardiki fasi’ fu kori furu sma èn fu meki moro nanga moro sma drai baka gi den tru tori di Yesus nanga den apostel fu en ben e leri sma (2 Tesalonikasma 2:3, 6-12). Na Ingrisi filosofiaman Bertrand Russell skrifi taki a no teki langa di a fosi Kresten gemeente kenki kon tron wan kerki organisâsi di „ben o fruwondru Yesus, èn Paulus srefi”.

A tru Kresten bribi seti kon bun baka

A de krin taki a Kresten bribi no horibaka gi Krestes. Baka di den apostel dede, dan furu fu den sma di e taki dati den na Kresten, no handri akruderi den leri fu Krestes. Ma disi no wani taki dati Yesus no hori ensrefi na a pramisi di a gi taki a o de nanga den bakaman fu en „ala dei te na a kaba fu a grontapu sistema” (Mateyus 28:20). Wi kan de seiker taki sensi di a taki den wortu dati, getrowsma de „di e leri trawan, èn di e handri akruderi den sani di Yesus Krestes leri”. Yesus Krestes hori ensrefi na a pramisi di a gi taki a sa horibaka gi den sortu sma dati, fu di den meki muiti fu sori a lobi di tru Kresten musu sori, èn fu di den tan loyaal na den tru tori di Yesus ben leri sma.

Boiti dati, Yesus pramisi taki na ini den lasti dei fu a sistema disi, a o tyari den getrow disipel fu en kon na wán na ini wan Kresten gemeente, èn sma ben o man si krin taki a e gebroiki a gemeente disi fu du san a abi na prakseri (Mateyus 24:14, 45-47). Nownowde a e gebroiki a gemeente dati fu tyari „wan bigi ipi” fu man, uma, nanga pikin-nengre kon na wán, di „komoto fu ala kondre, lo, pipel, nanga tongo”. Boiti dati, a sa tyari den kon na wán fu tiri den leki „wán ipi” di de ondro a tiri fu „wán skapuman”.—Openbaring 7:9, 14-17; Yohanes 10:16; Efeisesma 4:11-16.

Fu dati ede, yu musu komoto na ini iniwan organisâsi di gi Krestes nanga a Kresten bribi porinen na ini den tu dusun yari di pasa. Efu yu no du dati, dan soleki fa Yesus ben taigi na apostel Yohanes, „den rampu fu [den]” kan kon na yu tapu tu te Gado o tyari krutu kon na den tapu heri esi na ini a ten di e kon (Openbaring 1:1; 18:4, 5). Abi a fasti bosroiti fu de wán fu den sma di a profeiti Mika ben taki fu den taki „na ini a lasti pisi fu den dei”, tru anbegiman, namku sma di e hori densrefi na a tru Kresten bribi, sa gi yesi na den leri fu Gado èn den sa „waka den pasi fu en” di e sori taki a soifri anbegi seti kon bun baka (Mika 4:1-4). Den sma di tyari a tijdschrift disi kon na doro sa prisiri fu yepi yu fu kon si suma na den tru anbegiman dati.

[Prenki na tapu bladzijde 5]

Fu san ede tru Kresten no e teki prati na feti?

[Sma di abi a reti fu a prenki]

Soldiers, left: U.S. National Archives photo; flamethrower, right: U.S. Army Photo

[Prenki na tapu bladzijde 7]

Tu prenspari markitiki di Yesus wani tru Kresten fu doro, na taki ’den musu lobi makandra’ èn ’den musu tan du den sani di a taki’