Yu wani abi bun mati?

FURU sma wani abi bun mati. A libi moro switi te yu man fruteri bun mati den sani di yu ondrofeni. Ma fa yu kan feni bun mati? Sowan 2000 yari pasa, Yesus ben sori taki te libisma wani abi wan bun banti nanga makandra, dan den musu lobi makandra sondro fu denki densrefi nomo. A ben leri: „San unu wani meki sma du gi unu, na dati un musu du gi den tu” (Lukas 6:31). A sani di Yesus taki dyaso e sori taki wan sma no musu denki ensrefi nomo, a musu lobi fu gi sani efu a wani abi mati. Fu taki en krin, te wan sma wani wan mati, dan ensrefi musu de wan mati. Fa a kan du dati?

Wan sma no e tron wan bun mati nanga wan trawan wantronso. Te yu e luku en bun, dan wan mati a no wan sma di yu sabi frafra. Mati na sma di e firi gi makandra. Yu musu du muiti fu kisi èn fu tan abi wan tranga banti nanga sma. Fu de wan bun mati nofo tron wani taki dati yu e luku fosi san a mati fu yu abi fanowdu bifo yu luku san yusrefi abi fanowdu. Mati no e prisiri wawan nanga makandra te sani e go bun, ma den e firi gi makandra tu te sani no e go bun.

Yu e sori taki yu na wan trutru mati te yu e horibaka gi wan sma di de na nowtu, èn te yu e yepi en nanga den sani di a abi fanowdu. Odo 17:17 e taki: „Wan trutru mati abi lobi ala ten, èn a de wan brada di en mama meki fu te banawtu de.” Fu taki en leti, a banti na mindri mati kan tranga moro a banti di sma abi nanga son sma fu den eigi famiri. Odo 18:24 e taki: „Kompe de, di de fu broko makandra na pisipisi, ma wan mati de, di de moro krosibei leki wan brada.” Yu wani sabi moro fa fu kisi so wan bun matifasi nanga trawan? Yu wani tron wan fu den sma di sma sabi leki den wan di lobi makandra? (Yohanes 13:35) Efu dati de so, dan Yehovah Kotoigi na ini a kontren fu yu, sa de klariklari fu sori yu fa fu feni trutru mati.