A wan-enkri fasi fa wan kaba sa kon na dede!

WAN man di nen Lasarus, nanga den sisa fu en, namku Marta nanga Maria, e libi na ini Betania. Dati na wan foto di de sowan dri kilometer moro fara fu Yerusalem. Wan dei te Yesus, a mati fu den, no de na ini a foto, dan Lasarus e kon siki te fu dede. Den sisa fu en e broko den ede nanga en trutru. Den e seni wan boskopu go gi Yesus. Wan pisi ten baka te Yesus e yere a nyunsu, dan a e go luku Lasarus. Te Yesus de na pasi fu go na Betania, dan a e taigi den disipel fu en taki a e go drape fu go wiki Lasarus fu di a e sribi. Na ini a bigin, den disipel no e frustan san Yesus e taki trutru, ma a e tyari a tori kon na krin, fu di a e taki: „Lasarus dede.”—Yohanes 11:1-14.

Te Yesus e doro na a grebi-olo fu Lasarus, dan a e taigi sma fu puru a ston di de na fesi na olo. Baka te a begi nanga tranga sten, dan a e taki: „Lasarus, kon na doro!” Ne Lasarus e kon na doro. A man di ben dede fo dei langa, kisi wan opobaka.—Yohanes 11:38-44.

A tori di e taki fu Lasarus e sori taki na opobaka na a wan-enkri sani di kan tyari wan kaba kon na dede. Ma a wondru di Yesus ben du fu gi Lasarus libi baka ben pasa trutru? Bijbel e taki dati a sani dati pasa trutru. Leisi a tori na Yohanes 11:1-44, èn yu sa si krin san ben pasa. Yu feni taki den sani dati no pasa trutru? Efu yu abi a denki dati, dan a kan taki yu e tweifri na ala den wondru di skrifi na ini Bijbel, sosrefi na a opobaka fu Yesus Krestes. Èn „efu Yesus no ben kisi wan opobaka”, na so Bijbel e taki, dan „na fu soso [yu] e bribi” (1 Korentesma 15:17). Na opobaka na wan prenspari Bijbel leri (Hebrewsma 6:1, 2). Ma san a wortu „opobaka” wani taki?

San a wortu „opobaka” wani taki?

Na ini den Kresten Griki Buku fu Bijbel, a wortu „opobaka” skrifi moro leki 40 leisi. A wortu disi vertaal komoto fu wan Grikitongo wortu di wani taki trutru „na opo di wan sma e opo baka”. Wan Hebrew wortu de di wani taki a srefi, namku „a wiki di wan dedesma e wiki”. Ma san e kisi wan opobaka, baka te wan sma dede? A no kan de a skin, fu di dati e pori gowe èn a e tron doti. Sobun na opobaka di a sma sa kisi, wani taki dati a sa abi den srefi fasi di a ben abi fosi, èn a sa du den srefi sani di a ben gwenti du, so taki sma kan sabi taki en na a srefi sma di ben dede.

Yehovah Gado, di man memre sani heri bun, sa memre fa a sma di dede ben de fosi (Yesaya 40:26). Fu di Yehovah na a Sma fu pe a libi e komoto, meki a kan gi libi makriki baka na a srefi sma na ini wan nyun skin (Psalm 36:9). Boiti dati, Bijbel e taki dati Yehovah Gado e „angri”, fu wiki den dedewan, iya, a wani du dati trutru (Yob 14:14, 15). Wi kan prisiri trutru taki a no de so nomo, taki Yehovah man gi sma libi baka, ma taki a wani du dati tu!

Yesus Krestes sa de wan tra prenspari sma di sa yepi fu wiki den dedewan. Pikinmoro wán yari baka di Yesus bigin nanga a diniwroko fu en, dan a taki: „Neleki fa a Tata e gi sma wan opobaka èn a e meki den kon na libi baka, na so a Manpikin e gi libi baka na suma a wani” (Yohanes 5:21). Na ondrofenitori fu Lasarus e sori taki Yesus Krestes wani gi dedesma wan opobaka èn taki a man du dati tu, a no so?

Fa a de nanga a denki di sma abi taki wan sani na ini wi skin e tan libi go doro baka te wan sma dede? Fu taki en leti, a leri fu na opobaka, èn a denki di sma abi taki a sili fu libisma  no man dede, no e kruderi nanga makandra. Efu a ben de so taki wan sani na ini wi skin e tan na libi baka te wi dede, dan fu san ede wi ben o abi wan opobaka fanowdu? Lasarus en sisa Marta no ben e bribi taki en brada tan libi go doro na ini wan yeye kondre, baka di a dede. A ben e bribi na ini na opobaka. Di Yesus gi Marta a dyaranti disi: „Yu brada o opo baka”, dan Marta taki: „Mi sabi taki a o kon na libi baka te na opobaka o de na tapu a lasti dei” (Yohanes 11:23, 24). Èn di Lasarus kisi wan opobaka, dan a no fruteri san a ondrofeni baka di a dede. A ben dede. „Den dedewan no sabi notinoti”, na so Bijbel e taki. „Nowan wroko noso prakseri noso sabi noso koni de na ini Syeol, a presi pe yu e go.”—Preikiman 9:5, 10.

Soleki fa Bijbel e sori, dan a wan-enkri sani di kan tyari wan kaba kon na dede, na a opobaka. Ma fu ala den sma di dede, suma fu den sa kisi wan opobaka, èn pe dati o pasa?

Suma o kisi wan opobaka?

„A yuru o kon te ala den sma di de na ini den grebi o yere [Yesus en] sten, èn den o komopo drape”, na so Yesus ben taki (Yohanes 5:28, 29). Soleki fa Yesus ben pramisi, dan den wan na ini den grebi-olo, namku den wan di de na ini Yehovah en prakseri, sa kisi wan opobaka. Sobun na aksi di wi sa luku now na disi: Fu ala den sma di dede, suma fu den de na ini Gado en prakseri now e wakti wan opobaka?

Kapitel 11 fu a Bijbel buku Hebrewsma e kari den nen fu mansma nanga umasma di dini Gado na wan getrow fasi. Den sma dati, nanga den getrow futuboi fu Gado di dede na ini den yari di pasa, sa de den wan di sa kisi wan opobaka. Fa a de nanga sma di no ben de regtfardiki soleki fa Yehovah wani dati, kande fu di den no ben abi nofo sabi? Den de na ini Gado en prakseri tu? Iya, furu fu den sma disi de na ini Gado en prakseri, bika Bijbel e pramisi: „Gado sa gi wan opobaka na den regtfardikiwan èn na den onregtfardikiwan.”—Tori fu den Apostel 24:15.

Ma a no ala sma di oiti ben de na libi, sa kisi wan opobaka. „Efu wi e tan du sondu fu espresi, baka di wi kon sabi a waarheid soifri kaba”, na so Bijbel e taki, „dan  nowan srakti-ofrandi no de moro gi sondu, ma wi kan fruwakti wan krutu di sa takru srefisrefi” (Hebrewsma 10:26, 27). Son sma du sondu di takru so te, taki Gado no sa gi den pardon. Den sma disi no de na ini Hades (a grebi fu ala libisma), ma den de na ini Gehena, wan presi di e prenki têgo pori (Mateyus 23:33). Ma wi musu luku bun fu no krutu suma nanga suma sa kisi wan opobaka èn suma no sa kisi dati. Na Gado wawan kan krutu dati. A sabi suma de na ini Hades èn suma de na ini Gehena. Wi fu wi sei musu sorgu taki wi e libi na a fasi fa Gado wani.

Suma sa kisi wan opobaka na hemel?

A moro aparti opobaka ben de a di fu Yesus Krestes. Sma ben ’kiri en di a ben de wan libisma, ma a kon na libi leki wan yeye’ (1 Petrus 3:18). Nowan libisma oiti ben kisi so wan opobaka. Yesus srefi ben taki: „Nowan sma opo go na hemel, boiti a sma di saka komoto fu hemel, namku a Manpikin fu libisma” (Yohanes 3:13). Iya, a Manpikin fu libisma ben de a fosiwan di kisi libi baka, leki wan yeye (Tori fu den Apostel 26:23). Èn baka en, tra sma kisi na opobaka dati tu. Bijbel e taki: „Ibri sma o opo te en ten doro: Krestes opo leki a fosiwan, èn baka dati den wan di de fu Krestes o opo na a ten fu en denoya.”—1 Korentesma 15:23.

Wan pikin grupu sma, namku „den wan di de fu Krestes”, sa kisi wan opobaka na hemel, èn dati sa de gi wan spesrutu marki (Romesma 6:5). Makandra nanga Krestes, den o tiri „grontapu leki kownu” (Openbaring 5:9, 10). Boiti dati, den sa dini leki priester fu di den sa yepi fu tyari wan kaba kon na den takru bakapisi fu a sondu di libisma kisi fu a fosi mansma, Adam (Romesma 5:12). Den wan di sa tiri makandra nanga Krestes leki kownu nanga priester, na wan grupu fu 144.000 sma (Openbaring 14:1, 3). Sortu skin den sa abi baka te den kisi wan opobaka? „Wan yeye skin”, na so Bijbel e taki. Na so fasi den sa man libi na hemel.—1 Korentesma 15:35, 38, 42-45.

O ten sma sa bigin kisi wan opobaka na hemel? „Na a ten fu [Krestes] en denoya”, na so 1 Korentesma 15:23 e piki. Den sani di pasa na grontapu sensi 1914 e sori krin taki a denoya fu Krestes nanga „a kaba fu a grontapu sistema disi” bigin na ini a yari dati (Mateyus 24:3-7). Sobun, wi kan bribi taki den getrow Kresten bigin kisi wan opobaka kaba na hemel, aladi a no de fu taki dati libisma no si dati. Dati wani taki dati den apostel nanga den fosi Kresten kisi libi na hemel. Fa a de nanga den Kresten di de na libi now èn di abi a trutru howpu di Gado gi den taki den sa tiri makandra nanga Krestes na ini hemel? Den e kisi wan opobaka „na ini wan momenti”, noso wantewante baka te den dede (1 Korentesma 15:52). Fu di na opobaka fu a pikin grupu disi fu 144.000 sma bigin fosi na opobaka fu a bigi grupu di sa kisi wan opobaka na grontapu, meki na opobaka dati nen na opobaka fu „den fosiwan” èn sosrefi „a fosi opobaka”.—Filipisma 3:11; Openbaring 20:6.

Suma sa kisi wan opobaka na grontapu?

Soleki fa Bijbel e taki, dan furu fu den dedewan sa kisi libi baka na grontapu (Psalm 37:29; Mateyus 6:10). Disi na san na apostel Yohanes ben skrifi fu sori o moi a fisyun de di a ben kisi fu den wan di kisi wan opobaka: „A se lusu den dedesma di ben de na ini en, èn dede nanga Hades lusu den dedesma di ben de na ini den, èn ibriwan fu den dedesma ben kisi krutu fu den sani di den du. Ne dede nanga Hades fringi go na ini a se di e bron nanga faya. Disi na a di fu tu dede: a se di e bron nanga faya” (Openbaring 20:11-14). Den wan di de na ini Hades, noso Syeol, namku a grebi fu ala libisma, de na ini Gado en prakseri. Ibriwan fu den sa kisi wan opobaka (Psalm 16:10; Tori fu den Apostel 2:31). Èn ibriwan fu den sa kisi krutu akruderi den sani di den e du baka te den kisi wan opobaka. San o pasa baka dati nanga dede èn nanga Hades? Den sa fringi go na ini „a se di e bron nanga faya”. Disi wani  taki dati dede di libisma kisi fu Adam, no sa abi krakti na den tapu moro.

Prakseri nomo sortu moi howpu den wan di lasi wan lobiwan na ini dede, e kisi fu di den e bribi na ini na opobaka! Di Yesus wiki a wan-enkri manpikin fu na uma fu Nain, dan na uma dati di a masra fu en ben dede kaba, ben musu fu firi prisiri! (Lukas 7:11-17) Èn Bijbel e taki disi fu a papa nanga mama fu wan meisje fu 12 yari di Yesus ben wiki: „Den sma bigin prisiri srefisrefi” (Markus 5:21-24, 35-42; Lukas 8:40-42, 49-56). Fu tru, a sa de wan prisiri fu miti den lobiwan fu wi baka na ini a nyun grontapu di Gado pramisi libisma.

Te wi e kon sabi san na a opobaka trutru, dan sortu krakti dati kan abi na wi tapu now? Wan buku e taki: „Furu sma e frede dede, èn den e pruberi fu no denki fu a tori dati” (The World Book Encyclopedia). Fu san ede? Fu di furu sma e si dede leki wan kibritori, iya, leki wan sani di den no sabi, èn gi san den musu frede. Te wi sabi san e pasa trutru nanga den dedewan, èn te wi abi na opobaka howpu, dan dati kan gi wi deki-ati te wi e miti nanga „a lasti feanti, dede” (1 Korentesma 15:26). A sabi disi e meki taki wi no sa sari tumusi te wan bun mati, noso wan famiriman fu wi dede.

O ten sma sa bigin kisi wan opobaka na grontapu? Grontapu fu tide lai nanga ogridu, sma e feti, den e kiri makandra, èn den e doti grontapu. Efu den dedewan ben o kisi wan opobaka na ini so wan grontapu, dan sma ben o de koloku fu wan syatu pisi ten nomo. Ma a Mekiman pramisi taki heri esi a sa tyari wan kaba kon na a disiten sistema di de ondro a makti fu Satan (Odo 2:21, 22; Danièl 2:44; 1 Yohanes 5:19). A prakseri di Gado abi gi grontapu sa kon tru heri esi. Te dati pasa, dan milyardmilyard sma di e sribi now na ini dede, sa wiki na ini a nyun grontapu fu Gado pe vrede sa de.

[Prenki na tapu bladzijde 7]

Furu fu den dedewan sa kisi wan opobaka na grontapu