Dede–Wan sani di kan miti ala sma!

„WAN sma di de na libi, kan dede iniwan momenti èn a sani disi de so sensi a gebore”, na so Arnold Toynbee, wan historia sabiman fu Ingrisikondre skrifi. A ben taki moro fara: „Èn te fu kaba ibri sma o dede.” Te wan lobi famiriman noso wan bun mati fu wi dede, dan wi e sari trutru!

Dede na wan takru sani di libisma e ondrofeni sowan dusundusun yari kaba. Te wan lobiwan fu wi dede, dan a hati wi srefisrefi taki wi no man du noti fu yepi a sma dati. Dede no abi pardon. Nowan sma kan wai pasi gi dede. „A sari di wi e sari e meki wi alamala kon de leki pikin-nengre, iya, awansi sortu skoroleri wi kisi, toku wi no sabi fa fu lusu a problema dati. A moro koni sma no sabi noti.” Na so wan skrifiman fu a di fu 19 yarihondro ben skrifi. Wi e kon de leki pikin-nengre, iya, wi no man du noti fu kenki a situwâsi. Gudu noso makti no e yepi tu. Den koniwan nanga den wan di teki hei skoroleri, no man lusu a problema. Den trangawan nanga den swakiwan e krei.

Kownu David fu owruten Israel ben ondrofeni a bigi sari disi di en manpikin Absalom dede. Di a kownu yere taki a manpikin fu en dede, dan a bigin krei èn a bari: „Mi manpikin Absalom, mi manpikin, mi manpikin Absalom! O moro betre mi ben dede, misrefi, na presi fu yu, Absalom mi manpikin, mi manpikin!” (2 Samuel 18:33) Wan makti kownu di ben wini tranga feanti, no ben man du noti moro leki fu winsi nomo taki na en ben gi ensrefi abra na „a lasti feanti, dede”, na presi fu en manpikin.—1 Korentesma 15:26.

Oiti wan ten sa kon pe dede no sa de moro? Efu dati de so, dan sortu howpu de gi den dedewan? Oiti wi sa si den lobiwan fu wi baka? Na artikel di e kon sa gi piki tapu den aksi disi nanga yepi fu Bijbel.