Wai pasi gi falsi anbegi!
Wai pasi gi falsi anbegi!
„’Komoto na den mindri, èn poti yusrefi aparti fu den’, na so Yehovah e taki, ’èn no fasi den sani moro di no krin.’”—2 KORENTESMA 6:17.
1. Sortu prenspari sani opregtisma musu kon sabi?
FURU opregtisma no sabi a waarheid fu Gado èn den no sabi tu san o pasa nanga a libisma famiri na ini a ten di e kon. Fu di den no kon sabi a prenspari waarheid fu Gado, meki den bruya srefisrefi èn den no sabi san den kan fruwakti. Milyunmilyun sma abi kruktu bribi, èn den e hori densrefi na seremonia, nanga fesa di e afrontu a Mekiman fu wi. Kande yu abi birtisma nanga famiriman di e bribi na ini wan faya hèl, di e bribi taki Gado na wan Dri-wánfasi, taki a sili no man dede, noso di e bribi tra sortu falsi leri.
2. San kerki fesiman du, èn san na a bakapisi?
2 San meki taki so furu sma no sabi noti fu Gado? We, a moi fu a tori na taki den kerki meki taki disi de so, spesrutu den kerki organisâsi nanga kerki fesiman di e leri sma sani di no e kruderi nanga a denki fu Gado (Markus 7:7, 8). Leki bakapisi fu dati, den leri dati gi furu sma a denki taki den e anbegi a tru Gado, aladi na afrontu den e afrontu en. Na falsi anbegi de frantwortu gi a sari situwâsi disi.
3. Suma na a moro prenspari sma di e horibaka gi falsi anbegi, èn san Bijbel e taki fu en?
3 Wan sma di wi no man si, e horibaka gi falsi anbegi. Na apostel Paulus ben taki fu a sma disi: „A gado fu a grontapu sistema disi breni den frustan, so taki a leti fu a tumusi moi bun nyunsu fu Krestes, di de a prenki fu Gado, no ben sa skèin go na ini” (2 Korentesma 4:4). Fu taki en leti, „a gado fu a grontapu sistema disi” na Satan Didibri. En na a moro prenspari sma di e horibaka gi falsi anbegi. Paulus ben skrifi: „Satan srefi e tan kenki ensrefi kon tron wan engel fu leti. Fu dati ede a no de wan fruwondru sani taki den dinari fu en e tan kenki densrefi tu kon tron dinari di e du san regtfardiki” (2 Korentesma 11:14, 15). Satan e meki sma denki taki ogri sani na bun sani, èn a e kori sma fu bribi lei.
4. San a Wet di Gado ben gi Israel fu owruten, ben taki fu falsi profeiti?
4 Wi kan frustan fu san ede Bijbel e krutu falsi anbegi krinkrin! Fu eksempre, a Wet fu Moses ben warskow a pipel fu Gado krinkrin gi falsi profeiti. Iniwan sma di ben horibaka gi falsi leri èn gi na anbegi fu falsi gado, ben ’musu dede fu di a gi sma deki-ati fu opo densrefi teige Yehovah’. Den Israelsma ben kisi a komando fu ’puru ala ogri na den mindri’ (Deuteronomium 13:1-5). Iya, Yehovah e si falsi anbegi leki wan ogri sani.—Esekièl 13:3.
5. Na sortu warskow wi musu gi yesi na ini a ten disi?
5 Neleki Yehovah, Yesus Krestes nanga den apostel fu en ben si falsi anbegi leki wan ogri sani tu. Yesus ben warskow den disipel fu en: „Luku bun nanga den falsi profeiti; den e kon na unu na ini krosi di e meki den gersi skapu, ma na ini den ati den na ogri busidagu” (Mateyus 7:15; Markus 13:22, 23). Paulus ben skrifi taki „Gado di de na hemel, e sori wi taki a e atibron trutru nanga ala den ogridu nanga kruktudu fu den sma di e gens a waarheid” (Romesma 1:18). A prenspari trutru taki tru Kresten gi yesi na den warskow disi èn taki den wai pasi gi iniwan sma di e gens a waarheid fu Gado Wortu, noso di e panya falsi leri!—1 Yohanes 4:1.
Komoto na ini „Babilon a Bigiwan”
6. San Bijbel e taki fu „Babilon a Bigiwan”?
6 Luku san a Bijbel buku Openbaring e taki fu falsi anbegi. A e agersi en nanga wan drungu huru-uma di abi krakti tapu furu kownukondre nanga a pipel fu den. Na agersi uma disi e du hurudu nanga furu kownu èn a drungu fu di a dringi a brudu fu den tru anbegiman fu Gado (Openbaring 17:1, 2, 6, 18). Wan nen skrifi na tapu en fesi-ede èn a nen disi e sori taki a e tyari ensrefi na wan tegu fasi. A nen dati na „Babilon a Bigiwan, a mama fu den huru-uma èn fu den tegu sani fu grontapu”.—Openbaring 17:5.
7, 8. Na sortu fasi falsi anbegi du hurudu, èn san ben de a bakapisi?
7 Den sani di Bijbel e taki fu Babilon a Bigiwan e fiti ala falsi anbegi na grontapu. Aladi den dusundusun kerki na grontapu no de na ini wán organisâsi, toku den abi a srefi marki èn den e handri na a srefi fasi. Soleki fa a de nanga a huru-uma na ini Openbaring, na so falsi anbegi abi furu krakti tapu tirimakti. Neleki wan uma di no de getrow na en trowpatna, na so falsi anbegi du hurudu fu di a sroto frubontu nanga furu tirimakti. A disipel Yakobus ben skrifi: „Un sutasma, unu no sabi taki te wan sma de wan mati fu grontapu, dan a de wan feanti fu Gado? Fu dati ede, iniwan sma di wani de wan mati fu grontapu, e tron wan feanti fu Gado.”—Yakobus 4:4.
8 A moksi di falsi anbegi e moksi nanga tirimakti, tyari furu pina kon gi libisma. Wan Afrikan sabiman fu politiek afersi, namku Xolela Mangcu ben taki dati „na ini a historia fu grontapu, a pasa furu tron taki sma kiri ipi-ipi tra sma, èn disi kon fu di kerki moksi nanga politiek”. No so langa pasa, wan koranti taki: „Den moro ogri-ati èn moro takru feti na ini a ten disi, abi furu fu du nanga kerki.” Milyunmilyun sma lasi den libi na ini feti di kerki ben horibaka gi. Babilon a Bigiwan frufolgu èn kiri den tru futuboi fu Gado srefi, èn na agersi fasi a kon drungu fu di a dringi a brudu fu den.—Openbaring 18:24.
9. Fa a buku Openbaring e sori taki Yehovah e tegu gi falsi anbegi?
9 Te wi e luku san e pasa nanga Babilon a Bigiwan, dan wi e si krin taki Yehovah e tegu gi falsi anbegi. Openbaring 17:16 e taki: „Den tin tutu di yu si, èn sosrefi na ogri meti, o abi bita-ati gi a huru-uma; den o teki ala san a abi èn den o libi en nanga sososkin, dan den o nyan a meti fu en skin èn den o bron en nanga faya èn noti no sa tan abra fu en.” A fosi sani di a bigi meti disi o du, na taki a o priti na uma na pisipisi èn a o nyan a meti fu en skin. Baka dati, sma o bron iniwan sani di tan abra fu en. Heri esi, den grontapu tirimakti sa du a srefi nanga falsi anbegi. Gado o meki taki den o du dati (Openbaring 17:17). Babilon a Bigiwan, a grontapumakti fu falsi bribi, sa kisi pori trutru. „Noiti moro sma o feni en.”—Openbaring 18:21.
10. Fa wi musu si falsi anbegi?
10 Fa tru anbegiman musu si Babilon a Bigiwan? Bijbel e gi wi a komando: „Komoto drape, mi pipel, efu unu no wani abi prati nanga en na den sondu fu en èn efu unu no wani taki den rampu fu en kon na un tapu tu” (Openbaring 18:4). Den wan di no wani ondrofeni den sani disi, musu komoto na ini falsi anbegi bifo a lati tumusi. Di Yesus Krestes ben de na grontapu, a ben taki dati na ini den lasti dei, furu sma ben o taki nomo dati den e gi yesi na en (Mateyus 24:3-5). A e taigi den sma disi: „Mi no sabi unu kwetikweti! Komoto na mi fesi, un sma di e du kruktudu” (Mateyus 7:23). Yesus Krestes, di de Kownu now, no abi noti fu du nanga falsi anbegi.
Fa wi kan wai pasi gi falsi anbegi?
11. Fa wi musu wai pasi gi falsi anbegi?
11 Tru Kresten e wai pasi gi falsi anbegi, èn fu dati ede den no abi noti fu du nanga falsi leri. Disi wani taki dati wi no e arki kerki programa tapu radio, wi no e luku den programa disi tu tapu telefisi, èn wi no e leisi kerki buku di e fruteri lei fu Gado èn fu a Wortu fu en (Psalm 119:37). Te wan organisâsi di abi fu du nanga falsi anbegi orga wan konmakandra noso wan prisiri demakandra, dan a de wan koni sani fu no teki prati na den sani disi. Boiti dati, wi no e horibaka gi falsi anbegi na nowan enkri fasi (1 Korentesma 10:21). Te wi e handri na a fasi disi, dan nowan sma o man „kisi [wi] nanga filosofia èn nanga soso sani di de fu bedrigi sma; den sani disi no abi fu du nanga den leri fu Krestes, ma nanga den gwenti fu libisma, èn nanga den sani di de prenspari gi grontapusma”.—Kolosesma 2:8.
12. San wan sma musu du efu a no wani abi noti fu du moro nanga wan falsi kerki?
12 San wan sma di wani tron wan Yehovah Kotoigi, musu du efu a de wan memre ete fu wan falsi kerki? Nofo tron, a de so taki wan sma kan skrifi wan brifi fu sori taki a no wani de wan memre moro fu wan falsi kerki. A de prenspari trutru taki a sma no e draidrai fu wai pasi krinkrin gi iniwan sani di abi fu du nanga falsi anbegi. Wan sma di wani tron wan Kotoigi musu handri na so wan fasi, taki a kerki organisâsi nanga tra sma musu frustan krin taki a no de wan memre moro fu a falsi kerki dati.
13. Sortu rai di Bijbel e gi wi, e sori o prenspari a de fu wai pasi gi falsi anbegi?
13 Na apostel Paulus ben skrifi: „No kon na ondro a srefi tyatyari nanga sma di no de na bribi. Bika, san regtfardikifasi abi fu du nanga kruktudu? Noso, san leti abi fu du nanga dungru? Moro fara, san Krestes abi fu du nanga Belial? Noso, san wan sma di de na bribi abi fu du nanga wan sma di no de na bribi? Èn san a tempel fu Gado abi fu du nanga kruktugado? . . . ’Fu dati ede, komoto na den mindri, èn poti yusrefi aparti fu den’, na so Yehovah e taki, ’èn no fasi den sani moro di no krin; èn mi sa teki unu’” (2 Korentesma 6:14-17). Te wi e wai pasi gi falsi anbegi, dan wi e gi yesi na den wortu disi. A de so taki a rai di Paulus gi wi, wani taki dati wi musu wai pasi tu gi sma di de na ini falsi anbegi?
„Tan waka nanga koni”
14. A de so taki wi musu wai pasi dorodoro gi sma di de na ini falsi anbegi? Fruklari dati.
14 A de so taki tru anbegiman musu wai pasi dorodoro gi sma di de na ini falsi anbegi? A de so taki wi no musu abi noti fu du nanga sma di no abi a srefi bribi leki wi? Nôno. Wan fu den tu moro prenspari komando e taki: „Yu musu lobi tra sma leki fa yu lobi yusrefi” (Mateyus 22:39). A no de fu taki dati, wi e sori lobi gi tra sma te wi e preiki a bun nyunsu fu a Kownukondre gi den. Wi e sori lobi gi den tu te wi e studeri Bijbel nanga den èn te wi e sori den o prenspari a de fu wai pasi gi falsi anbegi.
15. San a wani taki fu „no de wan pisi fu grontapu”?
15 Aladi wi e preiki a bun nyunsu gi tra sma, toku wi leki bakaman fu Yesus „no de wan pisi fu grontapu” (Yohanes 15:19). A wortu „grontapu” abi fu du nanga den libisma di no sabi Gado (Efeisesma 4:17-19; 1 Yohanes 5:19). Wi no de wan pisi fu grontapu, fu di wi no e denki, wi no e taki, èn wi no e tyari wisrefi na wan fasi di e afrontu Yehovah (1 Yohanes 2:15-17). Boiti dati, fu di wi sabi a gronprakseri di e taki dati „takru kompe e pori bun gwenti” meki wi no e tron mati nanga sma di no e libi akruderi den srefi Kresten markitiki leki wi (1 Korentesma 15:33). Fu no de wan pisi fu grontapu, wani taki dati ’wi no musu meki grontapu flaka wi’ (Yakobus 1:27). Sobun, fu no de wan pisi fu grontapu, no wani taki dati wi e hori wisrefi aparti fu ala tra sma.—Yohanes 17:15, 16; 1 Korentesma 5:9, 10.
16, 17. Fa Kresten musu handri nanga sma di no sabi a waarheid fu Bijbel?
16 Ma fa wi musu handri nanga sma di no sabi a waarheid fu Bijbel? Paulus ben skrifi a gemeente fu Kolose: „Tan waka nanga koni te unu de nanga den wan di de na dorosei, èn gebroiki ibri okasi bun. Un musu taki na wan switi fasi ala ten, iya, den wortu fu unu musu abi sowtu, so taki unu sabi fa un musu piki ibriwan sma” (Kolosesma 4:5, 6). Na apostel Petrus ben skrifi: „Santa a Krestes leki Masra na ini un ati, èn ala ten un musu de srekasreka fu opo taki gi unsrefi na fesi ala sma di e aksi unu fu a howpu di de na ini unu, ma du dati na wan safri fasi èn nanga bigi lespeki” (1 Petrus 3:15). Paulus ben gi Kresten a rai taki den ’no musu taki ogri fu nowan sma èn taki den no musu lobi strei. Den musu de sma di e fiti densrefi makriki na trawan èn den musu abi trutru safri-ati gi ala sma’.—Titus 3:2.
17 Fu di wi na Yehovah Kotoigi, meki wi no e handri grofu nanga trawan, èn wi no e gi den a firi tu taki wi prenspari moro den. Èn trutru, wi no wani wisiwasi sma fu tra bribi te wi e taki fu den. Na presi fu dati, wi e hori den firi fu sma na prakseri, srefi te na ososma, a birtisma fu wi, noso wan sma na wi wrokope no e sori switifasi gi wi, noso te a e kosi wi.—Kolosesma 4:6; 2 Timoteyus 2:24.
„Tan hori yusrefi na a eksempre di e sori yu den bun sani di yu leri”
18. Sortu takru bakapisi sma e ondrofeni te den fadon baka na ini falsi anbegi?
18 Te wan sma kon sabi a waarheid fu Bijbel, dan a de wan sari sani trutru te a e fadon baka na ini falsi anbegi! Bijbel e sori san na den takru bakapisi te wan sma e du dati: „Fu tru, efu a soifri sabi di den kisi fu a Masra nanga Frulusuman Yesus Krestes, yepi den fu lowe komoto fu den sani fu grontapu di e meki taki sma no krin, ma baka dati den e fadon baka na ini den trapu fu den srefi sani dati, so taki den sani dati e basi den, dan a fasi fa den de now, kon moro ogri leki fa den ben de fosi. . . . A sani di pasa nanga den, na soleki fa a tru odo e taki: ’A dagu drai go baka na en eigi pio, èn na agu di ben wasi kaba, go lolo baka na ini a tokotoko.’”—2 Petrus 2:20-22.
19. Fu san ede wi musu luku bun taki nowan sani e meki wi go na baka na yeye fasi?
19 Wi musu luku bun nanga iniwan sani di kan meki wi go na baka na yeye fasi. A sani disi kan pasa nanga iniwan sma! Na apostel Paulus e warskow: „Den sani di a yeye fu Gado e taki, e sori krin taki bakaten son sma o gowe libi a bribi fu di den o poti prakseri na sani di ogri yeye taki fu bedrigi sma èn den o poti prakseri sosrefi na den leri fu den ogri yeye” (1 Timoteyus 4:1). Na ini a ten dati wi e libi now. Den wan di no e wai pasi gi falsi anbegi, kan ’degedege neleki te winti e naki skwala go na ala sei èn sma sa bedrigi den nanga ala sortu leri, èn sma sa kori den nanga den triki fu den, noso nanga den lei di den sidon prakseri’.—Efeisesma 4:13, 14.
20. Fa wi kan sorgu taki falsi anbegi no abi krakti na wi tapu?
20 Fa wi kan sorgu taki falsi anbegi no abi krakti na wi tapu? Luku ala den sani di Yehovah gi wi. Wi abi Gado Wortu, Bijbel (2 Timoteyus 3:16, 17). Boiti dati, Yehovah gi wi bogobogo yeye nyanyan nanga yepi fu „a getrow èn koni srafu” (Mateyus 24:45). Aladi wi e go na fesi na ini waarheid, wi musu kon lobi ’tranga nyanyan di de gi lepi sma’ èn wi musu kon kisi na angri fu go na den Kresten konmakandra pe wi e leri a waarheid fu Bijbel, a no so? (Hebrewsma 5:13, 14; Psalm 26:8). Meki wi du ala san wi man fu kisi wini dorodoro fu den sani di Yehovah seti, so taki wi kan ’tan hori wisrefi na a eksempre di e sori wi den bun sani di wi leri’ (2 Timoteyus 1:13). Na so fasi wi kan wai pasi gi falsi anbegi.
San yu leri?
• San na „Babilon a Bigiwan”?
• Fa wi musu wai pasi gi falsi anbegi?
• Fa wi musu sorgu taki nowan sani e meki wi go na baka na yeye fasi?
[Aksi fu a tori disi]
[Prenki na tapu bladzijde 28]
Yu sabi fu san ede Bijbel e agersi „Babilon a Bigiwan” nanga wan huru-uma?
[Prenki na tapu bladzijde 29]
„Babilon a Bigiwan” sa kisi pori seiker
[Prenki na tapu bladzijde 31]
Wi e handri na „wan safri fasi èn nanga dipi lespeki” nanga den wan di no abi a srefi bribi leki wi