Yu kan dini na ini wan gemeente pe sma e taki wan tra tongo?

„MI SI wan tra engel e frei na loktu”, na so na apostel Yohanes skrifi, „èn a ben abi têgo bun nyunsu di a ben musu meki bekènti leki prisiri nyunsu na den sma di e libi na grontapu, èn gi ala kondre, lo, tongo, nanga pipel” (Openbaring 14:6). Leki kontru fu a profeititori disi di Yohanes ben kisi na ini wan fisyun, a bun nyunsu fu Gado Kownukondre e preiki na ini difrenti tongo na heri grontapu. Furu fu den sma di gowe libi a mamakondre fu den fu go libi na tra kondre, e taki den difrenti tongo disi. Sosrefi den sma disi e kon yere a bun nyunsu fu di fayafaya Kotoigi fu Yehovah di leri taki wan tra tongo, e preiki gi den.

Yu na wán fu den Kotoigi dati, di e dini na ini wan gemeente pe sma e taki wan tra tongo? Noso, yu e prakseri fu go du dati kande? Efu yu wani abi bun bakapisi, dan yu musu go dini na ini a gemeente dati, nanga a marki fu yepi trawan, èn nanga a yoisti fasi fu denki. Fu di a marki fu yu na fu yepi trawan fu kon sabi a waarheid fu Gado Wortu, meki yu abi a moro bun reide fu go dini drape, namku fu di yu lobi Gado nanga tra sma (Mateyus 22:37-39; 1 Korentesma 13:1). Te yu e go na wan gemeente pe sma e taki wan tra tongo, dan a no musu de soso fu di yu wani nyan bun fu a demakandra, a nyanyan, nanga a kulturu fu sma fu wan tra kondre noso grupu, ma a musu de fu di yu wani yepi trawan fu kon sabi Gado. Yu denki taki a sa muilek tumusi gi yu fu leri wan tra tongo? Efu dati de so, dan a sani di o yepi yu, na fu abi wan yoisti denki. „No frede fu leri a tongo”, na so James di leri Yapantongo, e taki. Te yu sabi taki furu tra sma ben man leri wan tra tongo, dan dati kan yepi yu fu horidoro èn fu tan abi wan bun denki fu a marki disi di yu poti. Ma fa yu kan leri wan tra tongo dan? San o yepi yu fu fiti yusrefi na wan gemeente pe den sma e taki a tongo dati? Èn san yu musu du fu tan tranga na yeye fasi?

Meki tranga muiti fu leri a tongo

Difrenti fasi de fa wan sma kan leri wan tongo. Ibri studenti abi en fasi fa a e leri sani, èn ibri leriman abi en fasi fa a e gi leri. Ma furu studenti e leri wan tongo moro gaw èn moro makriki te den e go teki leri wan tu leisi fu wan bun leriman. Yu kan leisi Bijbel nanga Bijbel publikâsi na ini a tongo di yu e leri, èn yu kan arki difrenti sortu sani na tapu cassette lolo. Den sani dati kan yepi yu fu leri moro wortu fu a tongo dati, èn fu kon sabi moro wortu di den Kotoigi e gebroiki na ini a gemeente. Radio, telefisi, nanga video programa di fiti kan yepi yu tu fu kon sabi a tongo nanga a kulturu dati moro bun. A moro bun fu studeri wan pikinso ibri dei, leki fu sidon wanwan leisi e studeri wan heri pisi ten, so taki te fu kaba a e weri yu ede.

Te wan sma e leri wan tongo, dan dati de neleki te a e leri swen. Yu no kan leisi wan buku nomo fu kon sabi fa fu swen. Yu musu go na ini a watra èn yu musu pruberi fu swen. Na so a de tu, te yu e leri wan tongo. A muilek fu leri a tongo te yu e studeri en nomo. Yu musu bemui nanga den sma dati so furu leki yu man, iya, yu musu arki san den e taki, yu musu abi demakandra nanga den, èn san moro prenspari, na taki yu musu taki nanga den! A Kresten diniwroko e  gi sma moro bun okasi fu du den sani disi. Furu tron yu kan gebroiki den sani di yu leri, wantewante na ini a preikiwroko. „Kande yu e frede fu du dati”, na so Midori di e leri Sneisitongo, e taki, „ma den ososma kan si taki wi leki Kotoigi e meki tranga muiti. Disi kan naki den ati. Te wi e taki : ’Mi breiti fu miti yu’ na ini a tongo fu den, dan yu kan si kaba na den fesi taki den e prisiri fu taki nanga yu!”

Kresten konmakandra e yepi furu tu. Pruberi fu gi awansi wán piki nomo na ibri konmakandra. Awansi a gersi na a bigin taki a sani dati muilek srefisrefi fu du, toku yu no musu broko yu ede tumusi nanga dati. A gemeente wani taki yu leri a tongo! Monifa, di e leri Koreatongo, e taki: „Wan sisa e sidon na mi sei na den konmakandra, èn a e skrifi gi mi san son wortu wani taki. Mi de a sisa disi tangi trutru. San e yepi mi trutru, na a switi fasi di a sori mi èn a pasensi di a abi nanga mi.” O moro wortu yu e leri, o moro yu o bigin denki na ini a tra tongo dati, sobun yu o denki wantewante san den wortu wani taki na presi fu vertaal ibriwan fu den wortu na ini yu prakseri.

A fosi marki di yu musu abi te yu e leri wan tra tongo, na fu ’taki sani di makriki fu frustan’ (1 Korentesma 14:8-11). Aladi sma o hori na prakseri taki na pruberi yu e pruberi fu taki a tongo, toku den no sa poti prakseri na a boskopu fu yu efu yu e meki fowtu, noso efu yu e taki na so wan fasi taki den no man frustan yu srefisrefi. Te yu e bigin luku bun na a bigin kaba fa fu taki den wortu na a yoisti fasi, dan yu no sa tan meki fowtu di yu no sa man kenki so makriki bakaten. Mark, di ben leri Swahilitongo, e gi a rai disi: „Aksi den sma di e taki a tongo bun, fu taigi yu te yu meki bigi fowtu, èn fa fu taki a sani dati bun. Baka dati yu kan taki den tangi fu di den yepi yu!” A no de fu taki dati yu no musu teki tumusi furu ten fu den sma di e yepi yu na a fasi disi, èn yu no musu aksi tumusi furu fu den tu. Aladi yu kan aksi wan sma fu luku efu yu skrifi den sani bun, toku yu musu pruberi fu sreka yusrefi gi den lezing di yu o hori èn gi den piki di yu o gi na den konmakandra. Fu du dati, yu kan gebroiki wortu di yu sabi kaba, noso wortu di yu suku na ini wan wortubuku. Disi o yepi yu fu leri a tongo moro gaw, èn a sa yepi yu tu fu taki sondro fu frede taki yu o meki fowtu.

Tan go na fesi

„A moro muilek sani di mi du oiti, na fu leri wan tra tongo”, na so Monifa taki. „Son leisi mi no wani go doro nanga a sani dati. Ma dan mi e memre fa a bijbelstudenti lobi fu yere den dipi yeye tori fu a waarheid na ini a brokobroko Koreatongo di mi e taki, èn mi e memre tu fa den e prisiri fu si taki mi go na fesi, awansi na pikinso nomo.” San de prenspari, na taki yu no musu gi abra so esi. A marki fu yu na fu man leri trawan den tru tori fu Bijbel di kan kibri a libi fu den (1 Korentesma 2:10). Fu dati ede, te yu e leri wan tra tongo fu man gi sma leri fu Bijbel, dan dati e teki ten, èn yu musu du dati nanga wan fasti bosroiti. Te yu e go na fesi, dan luku bun fu no teki yusrefi gersi nanga trawan fu di yu feni taki yu no e go na fesi so esi leki den. Sma no gaw a srefi te den e leri wan tra tongo, èn den e go na fesi na difrenti fasi. Ma a bun fu luku fa yusrefi e go na fesi (Galasiasma 6:4). „Te yu e leri wan tongo, dan dati na neleki te yu e kren wan trapu”, na so Joon di e leri Sneisitongo, e taki. „Na te yu feni taki yu no e go na fesi, dan yu e si wantronso taki yu go na fesi.”

 A leri di yu e leri wan tra tongo, na wan sani di yu sa musu tan du yu heri libi langa. Fu dati ede, suku fu nyan bun fu a leri di yu e leri a tra tongo, èn no fruwakti taki yu no sa meki fowtu (Psalm 100:2). A de sondro tweifri taki yu o meki fowtu. Na so sani e waka te sma e leri wan tongo. Wan Kresten di ben bigin preiki na ini Italiatongo, ben aksi wan ososma: „Yu sabi a sisibi fu a libi?” A ben wani taki „marki fu a libi”. Wan Kotoigi di ben e leri Pôlsutongo, ben aksi a gemeente fu singi a dagu na presi fu a singi. Èn wan sma di ben e leri Sneisitongo, ben taki wan wortu pikinso tra fasi, èn na so a gi den arkiman deki-ati fu abi bribi na ini Yesus en bukukasi na presi fu en lusu-paiman. A bun sei fu den fowtu di yu e meki, na taki te yu e leri fa fu taki den sani na a yoisti fasi, dan yu no sa frigiti den so makriki.

Wroko makandra nanga a gemeente

Wan tongo, a no a wan-enkri sani di e tyari pratifasi kon na mindri sma. Den sani di e tyari moro pratifasi kon srefi, na a kulturu fu den, a ras fu den, èn a kondre pe den komoto. Ma a no de so ala ten taki den sani disi e tapu sma fu de na ini wánfasi. Wan sabiman di e ondrosuku fa sani e waka na ini kerkigrupu di e taki Sneisitongo na ini Europa, kon si taki Yehovah Kotoigi „na wan organisâsi pe difrenti pipel de na ini”. A e taki dati den Kotoigi „no abi trobi fu sortu ras noso kulturu wan sma de, èn a tongo di sma e taki na wan sani nomo di den e gebroiki fu kon frustan Gado wortu”. Iya, a sani di e meki taki tru Kresten no abi trobi nanga a ras noso a kulturu fu trawan, na a hori di den e hori densrefi na Bijbel gronprakseri. Gi den wan di ’kisi nyun fasi, a no abi trobi efu wan sma na wan Grikisma, noso wan Dyu, noso wan trakondre sma’.—Kolosesma 3:10, 11.

Dati meki ala sma na ini a gemeente musu du muiti fu meki wánfasi de. Disi wani taki dati wan sma musu lespeki en taki trawan e denki na wan tra fasi, taki den abi tra sortu firi, èn taki den e du sani na wan tra fasi. Te yu no e poti tumusi furu prakseri na san yusrefi wani, dan yu kan sorgu taki a difrenti na mindri yu nanga sma fu wan tra ras no e tyari pratifasi kon na un mindri (1 Korentesma 1:10; 9:19-23). Pruberi fu kisi wini fu den bun sani fu ala kulturu. Hori na prakseri taki a moro prenspari sani di o meki taki yu abi wan bun banti nanga trawan èn taki wánfasi de trutru, na te yu e hori trawan na prakseri ala ten.

Furu fu den gemeente pe sma e taki wan tra tongo, ben de wan pikin grupu fosi. Na ini den grupu disi yu abi moro furu sma di e leri a tra tongo dati, èn wan tu sma di bigin leri Bijbel gronprakseri no so langa ete. Fu dati ede, pikinpikin trobi o pasa moro makriki na ini den sortu grupu disi, leki na ini bigi gemeente di seti kaba. Dati meki lepi Kresten musu du muiti fu meki vrede nanga wánfasi de na ini a gemeente. Den musu taki èn du sani na wan lobi-ati fasi èn nanga switifasi, fu di dati sa yepi fu meki sani waka bun na ini a gemeente, so taki nyunwan kan gro na yeye fasi.

Den wan di e gi densrefi fu dini na ini wan gemeente di e taki wan tra tongo, no musu fruwakti tumusi furu fu trawan tu. Rick, wan owruman na ini so wan gemeente, e taki: „Sonwan fu den sma di tron Kotoigi no so langa ete, kande no sabi fa fu du den sani na ini a gemeente so bun ete leki den sma na ini den gemeente di seti kaba. Ma toku a lobi nanga a faya fu den, de wan bigi yepi. Èn furu sma di wani kon sabi moro e kon na ini a waarheid.” Te yu de doronomo na den gemeente konmakandra èn na tra okasi, èn te yu e gi yusrefi na iniwan fasi fa yu man, dan yu sa de wan yepi gi a gemeente trutru, awansi yu e leri a tongo ete. Te ala sma e wroko makandra, dan dati kan meki a gemeente go na fesi na yeye fasi.

Tan tranga na yeye fasi

Wan brada di ben e dini no so langa ete na ini wan gemeente pe sma e taki wan tra tongo, ben yere fa wan mama ben e yepi en pikin fu sreka ensrefi fu gi wan piki. „Mama, mi no kan gi wan moro syatu piki?” na so a pikin ben aksi a mama. „Nôno, mi pikin”, na so a mama piki en. „Wi musu libi den syatu piki gi den sma di e leri a tongo.”

Gi wan bigisma, a kan de wan bigi tyalensi efu a no man taki a tra tongo bun nanga trawan omeni mun, noso omeni yari langa srefi. A sani dati kan meki taki a e lasi-ati, èn a kan go na baka tu na yeye fasi. „Mi ben e firi brokosaka esi-esi, fu di mi no ben man taki a tongo so bun”, na dati  Janet di e taki Spanyorotongo heri bun now, e memre. Hiroko, di ben e leri Ingrisitongo, e memre taki a ben e denki: ’Srefi den dagu nanga den pusipusi na ini a kontren e frustan Ingrisitongo moro bun leki mi.’ Èn Kathie e taki: „Fosi, mi ben abi difrenti bijbelstudie èn mi ben abi sosrefi wan pikin buku di ben lai nanga den nen fu den gobaka. Ma baka di mi go dini na ini wan Spanyorotongo gemeente, mi no ben abi nowan fu den sani dati. Mi ben e firi leki na fu soso mi ben de drape.”

Na ini den situwâsi disi, a de tumusi prenspari fu abi wan bun denki fu sani. Di Hiroko kon lasi-ati, dan a prakseri na ensrefi: „Efu trawan man leri wan tra tongo, dan mi man du dati tu.” Kathie e taki: „Mi prakseri mi masra, di ben e go na fesi so moi, èn a ben e du so furu na ini a gemeente. A sani dati gi mi deki-ati fu meki moro muiti fu go na fesi. Te now ete mi abi fu meki muiti, ma safrisafri mi e kisi a koni fu preiki, èn fu leri trawan, èn dati e gi mi prisiri.” En masra Jeff e taki moro fara: „A fruferi te yu no kan frustan ala sani di den brada e meki bekènti na den gemeente konmakandra èn na den owruman konmakandra. Te dati e pasa, dan mi no e du leki mi frustan den, ma mi e sori sakafasi fu di mi e aksi den fu tyari sani kon na krin gi mi, èn den brada de klariklari fu yepi mi.”

Fu sorgu taki yu no e kon weri na yeye fasi te yu e dini na ini wan gemeente di e taki wan tra tongo, dan yu musu luku bun taki yu no e go na baka na yeye fasi (Mateyus 5:3). Kazuyuki, di e dini furu yari kaba na ini gemeente pe sma e taki Potogisitongo, e taki: „A de prenspari taki wi e kisi nofo yeye nyanyan. Fu dati ede, wi e studeri leki osofamiri, èn te wi e sreka wisrefi gi den konmakandra, dan wi e du dati na ini wi eigi tongo, èn sosrefi na ini Potogisitongo.” Son sma e go wanwan leisi na den konmakandra pe sma e taki a tongo fu den. Boiti dati, a de tumusi prenspari fu rostu bun.—Markus 6:31.

Teri den kostu

Efu yu abi na prakseri fu go dini na ini wan gemeente di e taki wan tra tongo, dan yu musu teri den kostu fu dati (Lukas 14:28). Den moro prenspari sani di yu musu hori na prakseri ini a tori disi, na a yeyefasi fu yu, èn a banti di yu abi nanga Yehovah. Taki nanga Yehovah fu a tori disi na ini begi. Hori yu trowpatna nanga yu pikin na prakseri. Aksi yusrefi: ’A situwâsi fu mi e gi mi pasi fu du disi? Mi tranga nofo na yeye fasi, èn mi o man horidoro?’ A de wan koni sani fu du san de moro bun gi a yeyefasi fu yu nanga yu osofamiri. Furu de fu du ete, èn yu kan kisi furu prisiri, awansi pe yu e dini leki wan Kownukondre preikiman.

Moi bakapisi de gi den wan di man dini na ini wan gemeente pe sma e taki wan tra tongo. „Disi na wan fu den moro prisiri sani di mi ondrofeni na ini mi libi”, na so Barbara e taki. En nanga en masra go dini na ini wan Spanyorotongo gemeente. „A de leki mi e leri a Bijbel waarheid baka. Mi de nanga tangi taki mi kisi so wan okasi, spesrutu fu di wi no man dini leki zendeling na ini wan tra kondre.”

Na heri grontapu, dusundusun sma di abi difrenti yari, e teki a tyalensi fu leri wan tra tongo, so taki moro sma kan yere a bun nyunsu. Efu yu na wan fu den sma disi, dan tan du dati nanga a yoisti reide, èn tan abi wan bun denki fu a sani disi. Ma san de moro prenspari, na fu abi a frutrow taki Yehovah sa blesi a muiti di yu e meki.—2 Korentesma 4:7.

[Prenki na tapu bladzijde 18]

Yu sa leri wan tongo moro gaw èn moro makriki te yu e teki leri fu wan bun leriman

[Prenki na tapu bladzijde 20]

Yu musu luku bun taki yu no e go na baka na yeye fasi te yu e leri wan tra tongo