Fa fu doro den markitiki fu man teki dopu leki Kresten
Fa fu doro den markitiki fu man teki dopu leki Kresten
„San e tapu mi fu dopu?”—TORI FU DEN APOSTEL 8:36.
1, 2. Fa Filipus bigin wan takimakandra nanga na Etiopia heiman, èn san e sori taki a man disi ben wani kon sabi a tru anbegi?
WAN, noso tu yari baka di Yesus dede, wan lantiman ben e teki waka go na a zuidsei, na tapu a pasi di e go fu Yerusalem na Gasa. A ben musu rèi wan langa pasi fu 1500 kilometer, èn a ben e du dati nanga asiwagi. Na opregti man disi ben komoto te na Etiopia, fu go na Yerusalem fu anbegi Yehovah. Di a ben e teki a langa pasi go baka na a kondre fu en, dan a ben e gebroiki en ten na wan koni fasi fu di a ben e leisi a Wortu fu Gado. A sani disi e sori taki a man disi ben abi bribi. Yehovah ben si na opregti man disi, èn nanga yepi fu wan engel a taigi a disipel Filipus fu preiki gi a man dati.—Tori fu den Apostel 8:26-28.
2 A ben makriki gi Filipus fu bigin wan takimakandra nanga na Etiopia heiman, fu di a man disi ben e leisi nanga wan tranga sten, soleki fa sma ben gwenti fu du na ini a ten dati. Sobun, Filipus ben man yere taki a man ben e leisi a bukulolo fu Yesaya. A sani di Filipus aksi a man, hari en prakseri wantewante. A ben taki: „Yu sabi san yu e leisi?” Na so den bigin taki fu Yesaya 53:7, 8. Te fu kaba, Filipus „fruteri en a bun nyunsu fu Yesus”.—Tori fu den Apostel 8:29-35.
3, 4. (a) Fu san ede Filipus dopu na Etiopiaman wantewante? (b) Sortu aksi wi sa go luku now?
3 A no teki langa di na Etiopia heiman kon frustan fa Gado gebroiki Yesus fu meki a wani fu en kontru, èn fu san ede wan sma musu tron wan dopu disipel fu Krestes. „San e tapu mi fu dopu?”, na so a aksi Filipus, di a si wan presi pe nofo watra ben de fu kan teki dopu. A no de fu taki dati disi ben de wan aparti situwâsi. Na Etiopia heiman disi di ben abi bribi, ben e anbegi Gado kaba leki wan sma di ben teki a Dyu bribi. Kande a ben o abi fu wakti bun langa fosi a kisi wan tra okasi fu teki dopu. A sani di de moro prenspari, na taki a man disi ben frustan san Gado ben wani en fu du, èn a ben wani gi yesi na Gado nanga en heri ati. Filipus ben prisiri fu du san na Etiopia heiman aksi en, èn baka di a man disi dopu, a „teki pasi go moro fara nanga prisiri”. A de sondro tweifri taki a tron wan fayafaya preikiman fu a bun nyunsu na ini en eigi kondre.—Tori fu den Apostel 8:36-39.
4 Soleki fa wi sabi, dan wan sma musu si en leki wan seryusu sani fu gi ensrefi abra na Gado èn fu teki dopu, èn a no musu hasti ensrefi tu fu du den sani dati. Ma toku na eksempre fu na Etiopia heiman e sori taki son leisi sma ben teki dopu syatu baka di den kon sabi a waarheid fu Gado Wortu. * Sobun, a fiti fu poti prakseri na den aksi disi: Sortu sani wan sma musu du fosi a teki dopu? Omeni yari wan sma musu abi? Sortu markitiki wan sma musu doro fosi a teki dopu? Èn a moro prenspari aksi na: Fu san ede Yehovah wani taki den futuboi fu en teki dopu?
Wan sweri fu dini Gado
5, 6. (a) Fa den Israelsma sori warderi gi a lobi fu Yehovah? (b) Sortu banti wi kan abi nanga Gado baka te wi teki dopu?
5 Baka di Yehovah puru den Israelsma na ini katibo na Egepte, a ben de klariklari fu teki den leki en „spesrutu gudu”, fu lobi den, fu kibri den, èn fu meki den tron „wan santa nâsi”. Ma efu a pipel ben wani kisi den blesi disi, dan den ben musu sori trutru warderi gi a lobi fu Gado. Den sori a warderi disi fu di den agri fu du ’ala san Yehovah ben taki’, èn fu di den agri fu hori densrefi na a frubontu di Yehovah ben sroto nanga den (Exodus 19:4-9). Na ini a fosi yarihondro, Yesus ben gi den bakaman fu en a komando fu meki disipel fu sma fu ala kondre, èn den wan di ben teki den leri disi, ben dopu. Efu den ben wani abi wan bun banti nanga Gado, dan den ben musu poti bribi na ini Yesus Krestes èn baka dati den ben musu teki dopu.—Mateyus 28:19, 20; Tori fu den Apostel 2:38, 41.
6 Den Bijbel tori disi e sori taki Yehovah e blesi den wan di e meki wan sweri fu dini en, èn di e hori densrefi na a sweri dati tu. Kresten musu gi densrefi abra èn den musu teki dopu, efu den wani taki Yehovah blesi den. Wi musu abi a fasti bosroiti fu hori wisrefi na den markitiki fu en, èn fu suku tiri na en (Psalm 48:14). Te wi du dati, dan na wan agersi fasi Yehovah sa teki wi na wi anu èn a sa tyari wi na tapu a pasi di wi musu waka.—Psalm 73:23; Yesaya 30:21; 41:10, 13.
7. Fu san ede wisrefi musu teki a bosroiti fu gi wisrefi abra èn fu teki dopu?
7 A reide fu san ede wi musu du den sani disi, na fu di wi lobi Yehovah èn fu di wi e angri fu dini en. Nowan sma musu teki dopu soso fu di wan sma taigi en taki a studeri langa nofo, noso fu di den mati fu en e dopu. A no de fu taki dati papa nanga mama, noso tra lepi Kresten, kan gi wan sma deki-ati fu meki muiti fu gi ensrefi abra èn fu teki dopu. Na apostel Petrus ben gi den wan di ben yere san a ben taki na a Pinksterfesa, a deki-ati fu ’teki dopu’ (Tori fu den Apostel 2:38). Ma toku, a gi di wi e gi wisrefi abra na wan sani di wisrefi musu bosroiti fu du, èn nowan tra sma kan teki a bosroiti dati gi wi. Wisrefi musu teki a bosroiti fu du a wani fu Gado.—Psalm 40:8.
Den sani di wi musu du fosi wi teki dopu
8, 9. (a) Fu san ede a no fiti fu dopu wan beibi, soleki fa Bijbel e sori? (b) Sortu markitiki wan yonguwan musu doro fosi a teki dopu?
8 A de so taki pikin-nengre e frustan san a wani taki fu gi densrefi abra? Bijbel no e taki omeni yari wan sma musu abi fosi a kan teki dopu. Ma a no de fu taki dati beibi no kan tron bribiman, den no kan sori bribi, èn den no kan gi densrefi abra na Gado (Tori fu den Apostel 8:12). Na ini a buku fu en, a historia skrifiman Augustus Neander e taki fu den Kresten fu a fosi yarihondro taki: „Na a bigin, soso bigisma ben mag teki dopu, fu di den ben man frustan taki den musu abi bribi fosi den teki dopu” (General History of the Christian Religion and Church).
9 Ma son yonguwan, e frustan frukufruku kaba suma na Gado èn san na a wani fu en, èn den e angri fu du a wani fu en. Trawan baka, e kon frustan den sani disi te den de moro owru. Ma fosi wan yonguwan teki dopu, dan a musu abi wan banti nanga Yehovah, a musu frustan den moro prenspari leri fu Bijbel bun, èn a musu sabi san a wani taki fu gi ensrefi abra, neleki fa dati de nanga bigisma.
10. Sortu sani wan sma musu du fosi a gi ensrefi abra èn teki dopu?
10 Yesus ben taigi den disipel fu en fu leri den nyunwan ala den sani di a komanderi den (Mateyus 28:20). A fosi sani di den nyunwan musu du, na taki den musu kisi wan soifri sabi fu a waarheid, èn na so fasi den o man kisi bribi na ini Yehovah èn na ini a Wortu fu en (Romesma 10:17; 1 Timoteyus 2:4; Hebrewsma 11:6). Èn te a waarheid fu Bijbel doro wan sma en ati, dan dati sa meki taki a sori berow èn a sa drai en libi (Tori fu den Apostel 3:19). Te fu kaba, a sma sa kisi na angri fu gi ensrefi abra na Yehovah, èn a sa teki dopu soleki fa Yesus ben komanderi.
11. Fu san ede wi musu teki prati na a preikiwroko doronomo fosi wi dopu?
11 Wan tra prenspari sani di wan sma musu du fosi a teki dopu, na taki a musu preiki a bun nyunsu fu a Kownukondre. Disi na a moro prenspari wroko di Yehovah gi en pipel fu du na ini den lasti dei disi (Mateyus 24:14). Na so fasi, preikiman di no dopu ete kan abi a prisiri fu taki nanga trawan fu a bribi fu den. Te den e teki prati na a wroko disi, dan dati sa sreka den fu teki prati na a preikiwroko fayafaya èn doronomo, baka te den dopu.—Romesma 10:9, 10, 14, 15.
Wan sani e tapu yu fu teki dopu?
12. San kan tapu sonwan fu teki dopu?
12 Kande son sma no e teki dopu fu di den no wani teki a frantwortu di e kon baka te wan sma dopu. Den sabi taki den sa abi fu tyari bigi kenki kon na ini den libi fu man doro den markitiki fu Yehovah. A kan tu taki den e frede taki den no sa man hori densrefi na den markitiki fu Gado, baka te den dopu. Sonwan fu den kan denki srefi: „Kande mi sa du wan ogri wan dei, èn den sa puru mi fu a gemeente.”
13. San ben tapu son sma na ini a ten fu Yesus fu tron bakaman fu en?
13 Na ini a ten fu Yesus, son sma ben gi pasi taki den eigi afersi nanga a tranga banti di den ben abi nanga den famiriman fu den, tapu den fu tron disipel fu Yesus. Wan leriman fu Wet ben taki dati a ben o waka baka Yesus, awansi pe a ben o go. Ma Yesus taigi en taki nofo tron ensrefi no ben abi wan presi srefi fu sribi. Di Yesus aksi wan tra arkiman fu tron wan bakaman fu en, dan a man disi piki en taki a ben o abi fu „beri” en papa fosi. A kan taki a ben wani tan na oso fu wakti teleki en papa dede, na presi taki a waka baka Yesus èn beri en papa te a ten ben doro fu du dati. Te fu kaba, a di fu dri arkiman ben taki dati fosi a waka baka Yesus, a ben musu taki en osofamiri „adyosi”. Yesus ben taki dati a draidrai di den ben e draidrai, na a srefi leki te wan sma ben ’e luku go na den sani di de na en baka’. Soleki fa a sori dan den sma di e draidrai fu teki dopu, ala ten sa feni wan reide fu no teki a Kresten frantwortu fu den na den tapu.—Lukas 9:57-62.
14. (a) San Petrus, Andreas, Yakobus, nanga Yohanes du di Yesus aksi den fu tron fisiman fu libisma? (b) Fu san ede wi no musu draidrai fu teki a tyatyari fu Yesus na wi tapu?
14 Na eksempre fu Petrus, Andreas, Yakobus, nanga Yohanes, na wan heri tra wan. Bijbel e taki dati di Yesus aksi den fu tron bakaman fu en èn fu tron fisiman fu libisma, dan „wantewante den libi den fisinèt èn den go waka na en baka” (Mateyus 4:19-22). Fu di den teki a bosroiti wantewante fu tron bakaman fu Yesus, meki den ondrofeni san Yesus ben taigi den bakaten, namku: „Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka. Bika a tyatyari fu mi switi fu tyari èn mi lai lekti” (Mateyus 11:29, 30). Aladi a de so taki dopu e kon nanga wan frantwortu di de leki wan tyatyari, toku Yesus e gi wi a dyaranti taki wi sa man tyari a frantwortu disi di sa gi wi bun furu krakti baka.
15. Fa den eksempre fu Moses nanga Yeremia e sori taki wi kan abi a frutrow taki Gado o yepi wi?
15 A no de fu taki dati wi kan feni taki wi no o man tyari a frantwortu di e kon nanga dopu. Moses nanga Yeremia ben feni na a bigin taki den no ben o man du a wroko di Yehovah ben gi den fu du (Exodus 3:11; Yeremia 1:6). Sortu dyaranti Gado ben gi den? „Mi sa sori taki mi de nanga yu”, na so a taigi Moses. „Mi de nanga yu fu frulusu yu”, na so a ben pramisi Yeremia (Exodus 3:12; Yeremia 1:8). Sosrefi wi kan abi a frutrow taki Gado sa yepi wi. Te wi lobi Gado èn te wi e frutrow na en tapu, dan dati sa yepi wi fu no tweifri moro efu wi sa man du san wi pramisi Gado di wi gi wisrefi abra na en. Na apostel Yohanes ben skrifi: „Te wan sma abi lobi, dan a no e frede, ma te wan sma abi volmaakti lobi, dan dati e puru frede” (1 Yohanes 4:18). Kande wan pikin boi e frede te a e waka en wawan, ma te a e waka nanga en papa èn te a e hori na anu fu en, dan a no sa frede moro. Na so a de tu taki te wi e frutrow tapu Yehovah nanga wi heri ati, dan a e pramisi fu ’meki wi pasi kon reti’ aladi wi e waka nanga en.—Odo 3:5, 6.
Wan lespeki okasi
16. Fu san ede wan sma en heri skin musu dukrun na ini watra te a e teki dopu?
16 Furu tron a de so taki fosi sma e teki dopu, dan wan dopulezing e hori di e sori o prenspari a de fu teki dopu fu kan tron wan Kresten. Na a kaba fu a lezing, den sma di o teki dopu musu piki tu dopu aksi fu meki ala sma sabi taki den abi bribi (Romesma 10:10; luku a faki na tapu bladzijde 22). Baka dati, wan brada e dukrun den sma disi na ini watra, soleki fa dati ben pasa nanga Yesus. Bijbel e sori taki baka di Yesus dopu, dan a „opo komoto na ini a watra” (Mateyus 3:16; Markus 1:10). Disi e sori krin taki Yohanes a Dopuman ben dukrun Yesus en heri skin na ini a watra. * A fiti taki wi heri skin e dukrun na ini watra, fu di dati e prenki a bigi kenki di wi tyari kon na ini wi libi. Disi de neleki wi e dede te a abi fu du nanga a fasi fa wi ben e libi fosi, èn wi e bigin wan nyun libi leki futuboi fu Gado.
17. Fa den sma di o teki dopu èn sosrefi den sma di de drape kan sori lespeki gi na okasi disi?
17 Te wan sma e teki dopu, dan dati na wan seryusu okasi, ma sosrefi wan prisiri okasi. Bijbel e taki dati Yesus ben e begi di Yohanes dopu en na ini Yordanliba (Lukas 3:21, 22). Soleki fa na eksempre fu Yesus e sori, dan den sma di o teki dopu na ini a ten disi musu tyari densrefi na wan lespeki fasi. Èn fu di Bijbel e taigi wi fu weri krosi di musu meki sma lespeki wi, dan a de moro prenspari taki wi e teki a rai disi tapu a dei te wi o dopu! (1 Timoteyus 2:9) Den sma di de drape kan sori lespeki tu fu di den e arki a dopulezing bun, èn fu di den no e dyugudyugu te den e luku fa den sma e teki dopu.—1 Korentesma 14:40.
Den blesi di den dopu disipel o kisi
18, 19. Sortu grani nanga blesi wi e kisi te wi teki dopu?
18 Te wi gi wisrefi abra na Gado èn te wi teki dopu, dan wi e tron wan memre fu wan aparti famiri. A fosi blesi di wi o kisi, na taki Yehovah e tron wi Tata èn a e tron wi Mati. Fosi wi teki dopu, wi no ben sabi Gado, ma now wi e tron mati fu en (2 Korentesma 5:19; Kolosesma 1:20). Nanga yepi fu a srakti-ofrandi fu Krestes, wi kon krosibei na Gado, èn a e kon krosibei na wi (Yakobus 4:8). A profeiti Maleaki e sori taki Yehovah e poti prakseri na den wan di e gebroiki èn e tyari en nen, èn taki a e arki den sma disi tu. Boiti dati, Yehovah e poti a nen fu den sma disi na ini a buku fu en, so taki a kan memre den. „Fu tru den sa kon de fu mi”, na so Gado e taki, „èn mi sa abi sari-ati nanga den, neleki fa wan man abi sari-ati nanga en manpikin di e dini en.”—Maleaki 3:16-18.
19 Te wi teki dopu, dan dati e meki tu taki wi e tron wan memre fu a grupu fu brada nanga sisa na heri grontapu. Di na apostel Petrus aksi Yesus sortu blesi den disipel fu Krestes ben o kisi fu di den libi sani na baka, dan Yesus pramisi en: „Ibri sma di gowe libi en oso, noso en brada, noso en sisa, noso en papa, noso en mama, noso en pikin, noso en gron fu mi nen ede, o kisi moro leki dati, èn a sma dati o kisi têgo libi leki gudu” (Mateyus 19:29). Furu yari baka dati, Petrus ben skrifi fu ’a heri grupu fu brada nanga sisa’ di ben kon de „na heri grontapu”. Petrus srefi ben ondrofeni fa den lobi brada yepi en, èn fa den ben de wan blesi gi en. Wi kan ondrofeni dati tu.—1 Petrus 2:17; 5:9.
20. Sortu tumusi moi howpu wan sma e kisi te a teki dopu?
20 Boiti dati, Yesus ben sori taki den wan di e waka na en baka, „o kisi têgo libi leki gudu”. Fu tru, a gi di wi e gi wisrefi abra èn a teki di wi e teki dopu e gi wi a howpu taki wi sa man „grabu a trutru libi hori bun steifi”, iya, wi sa kisi têgo libi na ini a nyun grontapu fu Gado (1 Timoteyus 6:19). Disi na a moro bun fondamenti di wi kan bow gi wisrefi èn gi wi osofamiri gi a ten di de na wi fesi, a no so? A tumusi moi howpu disi sa meki taki wi sa man „waka na ini a nen fu Yehovah, wi Gado, te ten di no skotu, iya fu têgo”.—Mika 4:5.
[Futuwortu]
^ paragraaf 4 Baka di den dri dusun Dyu nanga den sma di teki a Dyu bribi yere a taki di Petrus ben hori na a Pinksterfesa, dan den teki dopu wantewante tu. A no de fu taki dati neleki na Etiopia heiman, den sma disi ben sabi den moro prenspari leri nanga gronprakseri fu Gado Wortu kaba.—Tori fu den Apostel 2:37-41.
^ paragraaf 16 Soleki fa wan wortubuku e taki, dan a Griki wortu di Bijbel e gebroiki gi „dopu” wani taki „a dukrun di wan sma en heri skin e dukrun na ini watra, a de di wan sma de na ondro watra, èn a komoto di wan sma e komoto na ini watra” (Vine’s Expository Dictionary of New Testament Words).
Yu kan tyari disi kon na krin?
• Fa wi musu sori warderi gi a lobi fu Yehovah, èn fu san ede wi musu du dati?
• Sortu markitiki wan sma musu doro fosi a teki dopu?
• Fu san ede a no musu de so taki wi no e teki dopu fu di wi e frede taki wi no sa man hori wisrefi na den markitiki fu Gado, noso fu di wi no wani teki frantwortu na wi tapu?
• Sortu aparti blesi den dopu disipel fu Yesus Krestes kan kisi?
[Aksi fu a tori disi]
[Prenki na tapu bladzijde 26]
„San e tapu mi fu dopu?”
[Prenki na tapu bladzijde 29]
Te wan sma e teki dopu, dan dati na wan seryusu okasi, ma sosrefi wan prisiri okasi