’Go èn meki disipel, èn dopu den’

„Fu dati ede, go na sma fu ala kondre èn meki den tron disipel, èn dopu den. . . . Leri den fu du ala san mi komanderi unu.”—MATEYUS 28:19, 20.

1. Sortu bosroiti a nâsi Israel ben teki na a futu fu Sinaibergi?

PIKINMORO 3500 yari pasa, wan heri nâsi ben meki wan sweri na Gado. Di den Israelsma ben kon makandra na a futu fu Sinaibergi, dan den meki bekènti na publiki: „Wi o du ala san Yehovah taki.” Sensi a momenti dati, Israel ben tron wan pipel di gi densrefi abra na Gado, iya den ben tron en „spesrutu gudu” (Exodus 19:5, 8; 24:3). Den ben kan fruwakti taki a ben o kibri den, èn taki den nanga den bakapikin fu den ben o libi na ini wan kondre „di lai nanga merki nanga oni”.—Lefitikus 20:24.

2. Sortu banti sma na ini a ten disi kan abi nanga Gado?

² Ma soleki fa a psalm skrifiman Asaf ben taki, dan den Israelsma „no ben hori densrefi na a frubontu di den ben meki nanga Gado, èn den weigri fu hori densrefi na a wet fu en” (Psalm 78:10). Den no ben hori densrefi na a sweri di den fositen tata fu den ben meki na Yehovah. Te fu kaba, na aparti banti dati di a nâsi ben abi nanga Gado, kon pori (Preikiman 5:4; Mateyus 23:37, 38). Fu dati ede, Gado „poti prakseri na den sma di no de Dyu, fu puru wan pipel na den mindri di musu tyari en nen” (Tori fu den Apostel 15:14). Èn na ini den lasti dei disi, a e tyari ’wan bigi ipi sma kon na wán di nowan sma man teri, èn den sma disi komoto fu ala kondre, lo, pipel, nanga tongo’. Den sma disi e taki nanga prisiri: „Tangi fu wi Gado di e sidon na tapu a kownusturu, èn tangi fu a Pikin Skapu, meki wi kisi frulusu.”—Openbaring 7:9, 10.

3. Sortu sani wan sma musu du fu man abi wan banti nanga Gado?

³ Te wan sma wani abi na aparti banti disi nanga Gado, dan a musu gi ensrefi abra na  Yehovah, èn a musu teki dopu na ini watra fu sori sma taki a du dati. A sani disi e kruderi nanga a komando di Yesus ben gi den disipel fu en. A ben taigi den: „Fu dati ede, go na sma fu ala kondre èn meki den tron disipel, èn dopu den na ini a nen fu a Tata, fu a Manpikin, èn fu a santa yeye. Leri den fu du ala san mi komanderi unu” (Mateyus 28:19, 20). Den Israelsma ben arki di Moses ben e leisi „a buku fu a frubontu” (Exodus 24:3, 7, 8). Na so den ben kon frustan san Yehovah ben wani den fu du. Na so a de tu na ini a ten disi, taki fosi wan sma teki dopu, dan a musu abi soifri sabi fu a wani fu Gado soleki fa a skrifi na ini Bijbel, a Wortu fu en.

4. San wan sma musu du fu man doro den markitiki fu teki dopu? (Luku a faki na tapusei.)

⁴ A no de fu taki dati Yesus ben wani taki fosi den disipel fu en teki dopu, dan den ben musu abi bribi fu di den ben abi wan tranga overtoigi. Boiti taki a taigi den bakaman fu en fu go èn meki disipel, a taigi den tu fu leri den disipel disi ’fu du ala san a komanderi’ (Mateyus 7:24, 25; Efeisesma 3:17-19). Fu dati ede, a de so nofo tron taki den wan di doro den markitiki fu teki dopu, studeri Bijbel wan tu mun, kande srefi wán noso tu yari langa, so taki den kan denki bun fosi den teki a bosroiti fu dopu. Na a dei te den sma o teki dopu, den e piki ’iya’ tapu tu prenspari aksi. Yesus ben poti krakti na tapu taki ’te wi e taki Iya, dan a musu tan Iya, èn te wi e taki Nôno, dan a musu tan Nôno’. Fu dati ede a bun te wi alamala e go luku baka finifini san den tu dopu aksi disi wani taki.—Mateyus 5:37.

Wi musu abi berow èn wi musu gi wisrefi abra

5. San na den tu prenspari sani di wan sma musu du, soleki fa dati e kon na krin na ini a fosi dopu aksi?

⁵ A fosi dopu aksi di a sma musu piki, na efu a abi berow fu a fasi fa a ben e libi fosi èn efu a gi en libi abra na Yehovah fu du a wani fu en. Na aksi disi e poti krakti tapu tu tumusi prenspari sani di wan sma musu du fosi a teki dopu, namku a musu abi berow èn a musu gi en libi abra.

6, 7. (a) Fu san ede ala den sma di o teki dopu musu abi berow? (b) Sortu kenki wan sma musu tyari kon, baka te a sori berow?

⁶ Fu san ede wan sma musu abi berow fosi a teki dopu? Na apostel Paulus e taki: ’Wan ten ben de di wi alamala ben e libi soleki fa den lostu fu wi skin ben tyari wi’ (Efeisesma 2:3). Fosi wi ben kisi soifri sabi fu a wani fu Gado, wi ben e libi akruderi den markitiki fu a grontapu. Satan, a gado fu a sistema disi, ben e tiri wi libi (2 Korentesma 4:4). Ma di wi kon sabi a wani fu Gado, dan wi bosroiti fu ’no libi moro gi den lostu fu libisma, ma wi sa libi fu du a wani fu Gado’.—1 Petrus 4:2.

⁷ A nyun fasi fu libi disi e tyari furu wini kon. A moro prenspari wini di wi e kisi, na taki wi kan abi wan spesrutu banti nanga Yehovah.  David ben agersi a sani disi nanga a kari di wi e kisi fu go na ini Gado en „tenti” èn na tapu en „santa bergi”. Disi na wan bigi grani trutru (Psalm 15:1). Wi kan frustan taki Yehovah no ben o gi iniwan sma wan kari, ma a e kari soso den wan „di e waka sondro fowtu, di e du retidu, èn di e taki waarheid na ini [den] ati” (Psalm 15:2). A tru taki a libi fu ibriwan fu wi ben de tra fasi fosi wi kon sabi a waarheid. Fu dati ede, a kan taki wi musu kenki a fasi fa wi e libi èn a fasi fa wi e denki, so taki wi kan doro den markitiki fu kisi a kari fu Gado (1 Korentesma 6:9-11; Kolosesma 3:5-10). Wi sa tyari den kenki disi kon te wi abi berow. Disi wani taki dati wi sa firi bigi sari fu a fasi fa wi ben e libi fosi, èn wi sa abi a fasti bosroiti fu plisi Yehovah. A sani disi sa meki taki wi kenki wi libi dorodoro, iya, wi no sa libi moro leki grontapusma di e suku wini gi densrefi nomo, ma wi sa libi na wan fasi di e plisi Gado.—Tori fu den Apostel 3:19.

8. Fa wi e gi wisrefi abra na Gado, èn fu san ede wi e teki dopu baka dati?

⁸ A di fu tu pisi fu a fosi dopu aksi di sma musu piki, na efu den gi densrefi abra na Yehovah fu du a wani fu en. A de prenspari taki wi e gi wisrefi abra, bifo wi teki dopu. Te wi e gi wisrefi abra, dan wi e du disi na ini begi, èn na ini a begi dati wi e taki dati wi e angri fu gi wi libi abra na Yehovah nanga yepi fu Krestes (Romesma 14:7, 8; 2 Korentesma 5:15). Na so Yehovah e tron wi Masra èn wi Eiginari, èn neleki Yesus wi e prisiri fu du a wani fu Gado (Psalm 40:8; Efeisesma 6:6). A sweri disi di wan sma e meki na Yehovah, na wan sani di e pasa wán leisi nomo. Ma fu di Yehovah wawan sabi taki wi gi wi libi abra na en, meki na a dei fu a dopu, ala sma musu kon sabi taki wi meki a sweri disi na wi hemel Tata.—Romesma 10:10.

9, 10. (a) San a wani taki fu du a wani fu Gado? (b) Fa Nazisma srefi ben frustan o prenspari a de taki wi gi wisrefi abra na Gado?

⁹ San wi musu du fu teki na eksempre di Yesus ben gi wi fu du a wani fu Gado? Yesus ben taigi den disipel fu en: „Efu wan sma wani kon na mi baka, dan a no musu teri ensrefi moro, ma meki a teki en pina-postu èn tan waka na mi baka” (Mateyus 16:24). Na ini a tekst disi a e taki fu dri sani di wi musu du. A fosi sani di wi musu du, na taki wi „no musu teri” wisrefi moro. Sobun, wi no e meki den sondu firi fu wi basi wi, ma wi e teki a rai nanga a tiri fu Gado. A di fu tu sani di wi musu du, na taki wi musu „teki [wi] pina-postu”. Na ini a ten fu Yesus, wan pina-postu ben e prenki syen nanga pina. Fu di wi na Kresten, meki wi sabi taki son leisi wi o nyan pina fu a bun nyunsu ede (2 Timoteyus 1:8). Aladi sma na grontapu kan spotu noso krutu wi, toku wi sa de leki Krestes fu di wi ’no sa broko wi ede taki wi e kisi syen’, ma wi sa de koloku fu di wi sabi taki wi e plisi Gado (Hebrewsma 12:2). Te fu kaba, a di fu dri sani di wi musu du, na taki wi musu „tan” waka na Yesus baka.—Psalm 73:26; 119:44; 145:2.

¹⁰ A moi fu sabi taki, srefi sonwan fu den gensman fu wi e frustan o prenspari a de gi Yehovah Kotoigi fu gi densrefi abra na Gado èn fu dini en wawan. Fu eksempre, na a ten di den Nazisma ben e tiri Doisrikondre, dan Kotoigi ben de na ini a strafuman kampu fu Buchenwald na ini a kondre dati. Den Kotoigi disi di ben weigri fu drai baka gi a bribi fu den, ben musu poti den nen na tapu wan papira pe ben  skrifi na tapu: „Mi na wan getrow Bijbel Ondrosukuman ete, èn noiti mi sa broko a sweri di mi meki na Yehovah.” Disi e sori krin sortu denki ala den getrow futuboi fu Gado abi!—Tori fu den Apostel 5:32.

Sma o sabi yu leki wan Kotoigi fu Yehovah

11. Sortu grani wan sma e kisi te a teki dopu?

¹¹ A di fu tu dopu aksi di a sma musu piki, na efu a e frustan taki te a teki dopu, dan sma o sabi en leki wan Kotoigi fu Yehovah. Baka te wan sma teki dopu na ini watra, dan a e tron wan dinari di e tyari a nen fu Yehovah. A sani disi na wan bigi grani èn sosrefi wan seryusu frantwortu. Boiti dati, a sma di teki dopu abi a howpu tu fu kisi têgo frulusu, efu a e tan getrow na Yehovah.—Mateyus 24:13.

12. Sortu frantwortu e kon nanga a grani di wan sma abi fu tyari Yehovah en nen?

¹² A no de fu taki dati a de wan tumusi moi grani fu tyari a nen fu na almakti Gado, Yehovah. A profeiti Mika ben taki: „Bika ala pipel, fu den sei, sa waka ibriwan fu den na ini a nen fu en gado; ma wi fu wi sei, sa waka na ini a nen fu Yehovah, wi Gado, te ten di no skotu, iya fu têgo” (Mika 4:5). Ma a grani disi e kon nanga wan frantwortu. Wi musu meki muiti fu libi na wan fasi di e meki taki a nen di wi e tyari e kisi grani. Paulus ben memre den Kresten na ini Rome taki te wan sma e tyari ensrefi na wan fasi di e gi Gado syen, dan na so fasi a e „pori” Gado nen.—Romesma 2:21-24.

13. Fu san ede den futuboi fu Yehovah di gi densrefi abra na en, abi a frantwortu fu gi kotoigi fu a Gado fu den?

¹³ Te wan sma e tron wan Kotoigi fu Yehovah, dan a e teki a frantwortu na en tapu tu fu gi kotoigi fu a Gado fu en. Yehovah ben gi a nâsi Israel di ben gi densrefi abra na en na okasi fu de kotoigi fu en, so taki den ben kan buweisi taki en na Gado fu têgo (Yesaya 43:10-12, 21). Ma a nâsi no ben tyari a frantwortu fu den na wan bun fasi, èn te fu kaba Yehovah no ben feni den bun moro. Na ini a ten disi, tru Kresten e si en leki wan grani fu gi kotoigi fu Yehovah. Wi e du disi fu di wi lobi en, èn fu di wi wani taki a nen fu en kon santa. Fa wi man tan pî aladi wi sabi a waarheid fu wi hemel Tata èn fu den sani di a abi na prakseri fu du? Wi abi a srefi denki leki na apostel Paulus, di ben taki: „Mi de fruplekti fu preiki. Fu tru, helu fu mi efu mi no preiki a bun nyunsu!”—1 Korentesma 9:16.

14, 15. (a) Fa na organisâsi fu Yehovah e yepi wi fu go na fesi na yeye fasi? (b) Sortu sani kan yepi wi fu go na fesi na yeye fasi?

¹⁴ A di fu tu aksi e memre a sma di o teki dopu tu, taki a abi a frantwortu fu wroko makandra nanga Yehovah en organisâsi di a e tiri nanga en santa yeye. Wi no kan dini Gado wi wawan, wi abi yepi nanga deki-ati fanowdu fu „ala brada” (1 Petrus 2:17; 1 Korentesma 12:12, 13). Wi abi na organisâsi fu Gado tranga fanowdu fu man go na fesi na yeye fasi. Na organisâsi dati e gi wi bogobogo Bijbel publikâsi di e yepi wi fu kisi moro soifri sabi, fu handri na wan koni fasi te wi e kisi fu du nanga problema, èn fu kon abi wan bun banti nanga Gado. Neleki fa wan mama e gi en pikin bun nyanyan èn e sorgu en bun, na so „a getrow èn koni srafu” e gi wi bogobogo yeye nyanyan na a yoisti ten, so taki wi kan go na fesi na yeye fasi.—Mateyus 24:45-47; 1 Tesalonikasma 2:7, 8.

¹⁵ Na den alawiki konmakandra, a pipel fu Yehovah e kisi leri nanga deki-ati fu de getrow Kotoigi fu Yehovah (Hebrewsma 10:24, 25). A  Theokrasia Diniwroko-skoro e leri wi fa fu taki na publiki, èn a Diniwroko Konmakandra e leri wi fu pristeri a boskopu fu wi na wan bun fasi. Te wi de na den konmakandra, èn te wi e studeri Bijbel publikâsi, dan wi kan si fa a yeye fu Yehovah e tiri na organisâsi fu en. Nanga yepi fu den sani disi di wi e kisi doronomo, Gado e warskow wi, a e leri wi fa fu de bun dinari, èn a e yepi wi fu tan na ai na yeye fasi.—Psalm 19:7, 8, 11; 1 Tesalonikasma 5:6, 11; 1 Timoteyus 4:13.

Fu san ede wan sma musu teki dopu?

16. Fu san ede wi wani gi wi libi abra na Yehovah?

¹⁶ Soleki fa wi si, dan den tu dopu aksi e memre den sma fu san ede den musu teki dopu na ini watra, èn sortu frantwortu e kon nanga dati. We, dan fu san ede den musu teki dopu? A no fu di wan sma dwengi wi meki wi e teki dopu fu tron disipel, ma na fu di Gado e „hari” wi (Yohanes 6:44). Fu di „Gado na lobi” meki a no e dwengi sma fu dini en, ma a wani sma fu gi yesi na en fu di den lobi en (1 Yohanes 4:8). Wi lobi Yehovah, fu di a abi bun fasi, èn fu di a e handri bun nanga wi. Yehovah gi wi en wan-enkri Manpikin di ensrefi meki, èn a wani wi fu abi a moro bun libi di wi kan abi (Yohanes 3:16). Na fu a sani disi ede, meki wi wani gi wi libi abra na en.—Odo 3:9; 2 Korentesma 5:14, 15.

17. Na sortu sani wi no gi wisrefi abra?

¹⁷ Wi no e gi wisrefi abra na wan gronprakseri noso na wan wroko, ma wi e gi wisrefi abra na Yehovah srefi. Te fu kaba, Gado sa gi en pipel wan tra wroko fu du, ma a getrowfasi fu den no sa kenki. Fu eksempre, a sani di a ben taigi Abraham fu du, na wan heri tra sani leki san a ben taigi Yeremia fu du (Genesis 13:17, 18; Yeremia 1:6, 7). Ma toku, den ala tu ben du a spesrutu wroko di Gado gi den fu du, fu di den ben lobi Yehovah, èn fu di den ben angri fu du a wani fu en na wan getrow fasi. Na ini a ten disi fu a kaba, ala den dopu bakaman fu Krestes e meki muiti fu gi yesi na a komando di Krestes gi den, namku fu preiki a Kownukondre bun nyunsu èn fu meki disipel (Mateyus 24:14; 28:19, 20). Te wi e du a wroko dati nanga wi heri ati, dan dati na wan moi fasi fu sori taki wi lobi wi hemel Tata èn taki wi gi wisrefi abra na en trutru.—1 Yohanes 5:3.

18, 19. (a) San wi e meki ala sma kon sabi te wi e teki dopu? (b) San wi sa go luku na ini na artikel di e kon?

¹⁸ A de sondro tweifri taki wi kan kisi furu blesi te wi e teki dopu, ma wi musu denki bun fosi wi teki a bosroiti disi (Lukas 14:26-33). Te wi teki dopu, dan dati e sori taki wi abi a fasti bosroiti fu si a dopu fu wi leki a moro prenspari frantwortu di wi abi (Lukas 9:62). Te wi e teki dopu, dan fu taki en leti wi e meki ala sma kon sabi taki: „Disi na wi Gado te ten di no skotu, iya fu têgo. Ensrefi sa tiri wi teleki wi dede.”—Psalm 48:14.

¹⁹ Na ini na artikel di e kon now, wi sa go luku tra aksi di kan opo kon te wan sma wani teki dopu na ini watra. A kan taki wan sma abi bun reide fu no teki dopu? Omeni yari wan sma musu abi? Fa ala sma kan sorgu taki sani e waka na wan lespeki fasi te sma e teki dopu?

Yu kan tyari disi kon na krin?

• Fu san ede ibri Kresten musu abi berow fosi a teki dopu?

• San a wani taki fu gi wisrefi abra na Gado?

• Sortu frantwortu e kon nanga a grani di wi abi fu tyari a nen fu Yehovah?

• Fu san ede wi musu teki dopu?

[Aksi fu a tori disi]

[Faki/​Prenki na tapu bladzijde 22]

Den tu dopu aksi

Yu abi berow fu yu sondu fu di yu poti bribi na ini a srakti-ofrandi fu Yesus Krestes, èn yu gi yusrefi abra na Yehovah fu du a wani fu en?

Yu e frustan taki a gi di yu gi yusrefi abra na Gado èn a dopu fu yu, e sori sma taki yu na wan Kotoigi fu Yehovah di de wan memre fu na organisâsi fu Gado di A e tiri nanga yepi fu en santa yeye?

[Prenki na tapu bladzijde 23]

A gi di wi gi wisrefi abra wani taki dati wi e meki wan sweri na Yehovah na ini begi

[Prenki na tapu bladzijde 25]

A preikiwroko fu wi e sori taki wi gi wisrefi abra na Gado