Aksi fu leisiman

San wan sma kan du fu meki taki ogri yeye no trobi en moro?

Gado Wortu e sori taki te ogri yeye e trobi wan sma, dan a sma kan du wan tu sani fu disi no pasa moro. Efu a sma no wani taki ogri yeye e trobi en moro, dan a de tumusi prenspari taki a e begi (Markus 9:25-29). Ma a kan taki so wan sma musu du moro sani. Den sani di pasa nanga den Kresten fu a fosi yarihondro e sori san moro kan de fanowdu.

Son sma na ini owruten Efeise ben e du afkodrei, fosi den tron bakaman fu Krestes. Ma baka di den teki a bosroiti fu dini Gado, dan „den sma di ben e du bonuwroko, tyari den buku fu den kon na wán èn den bron den na fesi ala sma” (Tori fu den Apostel 19:19). Den nyun anbegiman disi fu Efeise ben bron den buku fu den di ben abi fu du nanga lukuman-wroko. Fu di den du dati, meki den poti wan eksempre gi ala sma na ini a ten disi di wani komoto na ini a makti fu den ogri yeye. A de tumusi prenspari taki den sma disi e trowe ala sani di abi fu du nanga afkodrei, soleki buku, tijdschrift, felem, sani di den kan leisi na tapu Internet, noso poku di abi fu du nanga afkodrei. Na a srefi musu pasa tu nanga den sani di sma e weri leki wan tapu fu ’gi den kibri’, noso iniwan tra sani di abi fu du nanga bonu.—Deuteronomium 7:25, 26; 1 Korentesma 10:21.

Wan tu yari baka di den Kresten fu Efeise bron den buku fu den di ben abi fu du nanga bonu, na apostel Paulus skrifi: „Wi . . . e feti . . . nanga den ogri yeye” (Efeisesma 6:12). Paulus ben gi Kresten a deki-ati disi: „Un musu sorgu taki unu abi ala den sani di Gado gi unu fu feti, so taki unu kan tanapu kánkan gi den triki di Didibri e gebroiki fu kori sma” (Efeisesma 6:11). Te na a dei fu tide a rai disi e fiti. Kresten musu du ala san den man fu gebroiki den sani di Gado e gi wi fu kakafutu gi den ogri yeye. Paulus ben taki: „Teki spesrutu a bigi skelt, dati na a bribi, èn nanga dati unu sa man kiri a faya fu ala den peiri di na ogriwan e sutu kon na un tapu” (Efeisesma 6:16). Wan sma kan meki a bribi fu en kon moro tranga te a e studeri Bijbel (Romesma 10:17; Kolosesma 2:6, 7). Fu dati ede, te wi abi a gwenti fu studeri Bijbel, dan dati kan yepi wi fu kisi wan tranga bribi, so taki wi kan kakafutu gi den ogri yeye.—Psalm 91:4; 1 Yohanes 5:5.

Ma den Kresten fu Efeise ben musu du ete wan prenspari sani. Paulus ben taigi den: „Tan begi na ibri okasi èn na ala fasi, èn du dati fayafaya nanga yepi fu a yeye” (Efeisesma 6:18). Iya, efu sma na ini a ten disi no wani taki ogri yeye trobi den moro, dan a de prenspari taki den begi Yehovah fayafaya fu kibri den (Odo 18:10; Mateyus 6:13; 1 Yohanes 5:18, 19). Dati meki a fiti taki Bijbel e taki: „Fu dati ede, saka unsrefi na ondro Gado; ma kakafutu gi Didibri, èn a sa lon gowe fu unu.”—Yakobus 4:7.

Te ogri yeye e trobi wan sma, dan a sma disi musu begi fayafaya fu komoto na ini a makti fu den ogri yeye. Ma tra Kresten kan begi tu gi a sma di e angri fu dini Yehovah èn di e du ala muiti fu kakafutu gi ogri yeye. Den kan aksi Gado efu a sma dati kan kisi a krakti fu Gado fu man kakafutu gi den ogri yeye. Gado Wortu e taki dati „te wan regtfardiki sma e begi fayafaya, dan a begi dati abi furu krakti bika Gado yere a begi”. Fu dati ede, wi kan de seiker taki den begi fu den futuboi fu Gado o yepi den sortu sma dati di e du ala muiti fu „kakafutu gi Didibri”.—Yakobus 5:16.

[Prenki na tapu bladzijde 31]

Bribiman na ini Efeise ben bron den buku di ben abi fu du nanga bonu