Ala sma abi a reti fu abi wan nen

IBRI sma abi a reti fu abi wan nen. Na ini Tahiti, srefi wan nyunyun pikin di a papa nanga mama gowe libi en, e kisi wan nen. Lanti e gi so wan pikin wan fesinen nanga wan famirinen.

Toku wan sma de di abi reti fu abi wan nen neleki ala tra sma, ma sma no wani kari en na a nen fu en. Yu sa fruwondru fu sabi taki a sma disi na „a Tata, di gi ibri famiri na hemel èn na grontapu a nen fu den”! (Efeisesma 3:14, 15) Yu sabi, aladi a nen fu a Mekiman skrifi na ini Bijbel, toku furu sma no wani gebroiki en. Den feni taki a moro bun fu gebroiki den wortu „Gado”, „Masra”, noso „Almaktiwan” na presi fu en nen. Ma san na a nen fu Gado? A psalm skrifiman e gi piki tapu na aksi disi. A e taki: „Yu, di nen na Yehovah, yu wawan na a Moro Heiwan fu heri grontapu.”—Psalm 83:18.

Na ini a pisi ten fu den yari 1800 te go miti 1850, wan organisâsi (The London Missionary Society) ben seni wan tu sma fu go preiki na Tahiti. Na a ten dati, den sma fu na èilanti ben e anbegi difrenti gado. Ibriwan fu den gado ben abi en eigi nen èn den moro prenspari gado ben de Oro nanga Taaroa. Den sma di go preiki drape, ben wani sori taki a Gado di kari na ini Bijbel e difrenti nanga den tra gado, èn dati meki den no draidrai fu gebroiki a nen fu en furu leisi. Na ini Tahititongo a nen na Iehova.

Furu sma ben kon sabi a nen dati èn den ben gwenti fu gebroiki a nen te den ben e taki nanga trawan èn te den ben e skrifi brifi. Kownu Pomare II, di ben e tiri Tahiti na ini a pisi ten syatu baka a yari 1800, ben e gebroiki a nen disi furu te a ben skrifi brifi. A brifi di yu kan si dyaso, e buweisi dati. A skrifi na ini Ingrisitongo, èn a de fu si na ini a Museum fu Tahiti nanga den èilanti fu en. Disi na wan presi pe sma kan go luku owruten sani. A brifi disi e sori taki na a ten dati, sma ben de klariklari fu gebroiki a nen fu Gado. Boiti dati, a nen fu Gado skrifi dusundusun tron na ini a fosi Tahiti Bijbel, di sma kaba skrifi na ini a yari 1835.

[Prenki na tapu bladzijde 32]

Kownu Pomare II

[Sma di abi a reti fu a prenki na tapu bladzijde 32]

King and letter: Collection du Musée de Tahiti et de ses Îles, Punaauia, Tahiti