Fa wi kan teki bosroiti soleki fa Gado wani?

WAN man na ini Amerkankondre ben go na wan bangi nanga wan tyèk fu 25.000 Amerkan dala. A ben wani poti a moni na bangi. Ma a man di ben wroko na a bangi, gi en a rai fu gebroiki a moni fu du bisnis, fu di a ben feni taki te fu kaba a ben o meki moro moni. A man bosroiti fu teki a rai disi. Syatu baka dati a lasi furu fu en moni.

Na ondrofenitori disi e sori taki a muilek fu teki koni bosroiti. Fa a de nanga den difrenti bosroiti di wi musu teki na ini wi libi? Furu fu den bosroiti di wi e teki kan abi bun noso takru bakapisi, èn te fu kaba wi kan tan na libi noso dede srefi leki bakapisi fu den bosroiti dati. We, fa wi kan sabi seiker taki wi e teki koni bosroiti?

„Disi na a pasi”

Ala dei wi e bosroiti san wi o nyan, san wi o weri, pe wi o go, èn so moro fara. Kande a gersi leki son bosroiti no de so prenspari, ma toku den kan abi seryusu bakapisi. Fu eksempre, te wan sma e teki a bosroiti fu smoko wan sikaret fu a fosi leisi, dan dati kan tan wan gwenti gi en. Noiti wi musu denki taki den bosroiti di wi e si leki lawlaw bosroiti, no de so prenspari.

Pe wi kan feni rai te wi musu teki bosroiti, srefi te a gersi leki den bosroiti dati no de so prenspari? A ben o de wan tumusi moi sani efu wi ben o abi wan sma di e gi wi bun rai te wi musu teki wan muilek bosroiti! Yu kan feni so wan sma. Wan owruten buku abi rai na ini di wi kan gebroiki na ini a ten disi. A buku disi e taki: „Un eigi yesi sa yere wan wortu na un baka di e taki: ’Disi na a pasi. Waka na tapu, un pipel’, efu un musu go na un reti-anusei noso efu un musu go na un kruktu-anusei” (Yesaya 30:21). Suma taki den wortu disi? Èn fa yu kan de seiker taki a sma disi e gi bun rai?

A dyaranti di skrifi na tapusei, de fu feni na ini Bijbel. Disi na wan buku di milyunmilyun sma studeri, èn den kon frustan taki na Yehovah Gado, a Mekiman, meki sma skrifi a buku disi (2 Timoteyus 3:16, 17). Yehovah sabi fa wi meki, sobun en na a sma di kan gi wi a moro bun rai. A sabi tu san o pasa na ini a ten di e kon, fu di en na „a Sma di e fruteri na a bigin san sa de a kaba, èn di e fruteri langa ten na fesi kaba den sani di no du; a Sma di e taki: ’San misrefi bosroiti sa kon tru, èn ala san mi feni bun, mi sa du’” (Yesaya 46:10). Wan psalm skrifiman ben sori taki a e frutrow tapu a Wortu fu Yehovah, fu di a taki: „Yu wortu na wan lampu gi mi futu, èn wan leti na tapu mi pasi” (Psalm 119:105). Ma fa Yehovah e yepi wi fu  teki koni bosroiti na ini a bruya grontapu disi? Fa wi kan teki bosroiti soleki fa Gado wani?

Gebroiki Bijbel gronprakseri

Yehovah Gado gi Kresten Bijbel gronprakseri so taki den kan teki koni bosroiti. A leri di wi e leri Bijbel gronprakseri èn a gebroiki di wi e gebroiki den, na a srefi leki te wi e leri wan tongo èn e taki a tongo dati tu. Te yu sabi a tongo kaba, dan furu tron yu kan yere te wan sma meki wan fowtu, fu di a no taki wan sani na a yoisti fasi. Kande yu no man taigi a sma finifini fu san ede a no ben musu taki a sani so, ma yu sabi taki a no taki a sani bun. Te yu leri fu gebroiki Bijbel gronprakseri na a yoisti fasi, dan furu tron yu sa sabi efu a bosroiti no bun, èn efu a no e kruderi nanga Bijbel gronprakseri.

Luku na eksempre fu wan yonkuman di musu bosroiti fa a o seti en wiwiri. Nowan komando na ini Bijbel e taki dati sma no mag seti den wiwiri na wan spesrutu fasi. Ma luku wan Bijbel gronprakseri. Na apostel Paulus ben skrifi: „Mi wani tu taki den umasma musu moi densrefi nanga krosi di fiti, èn den musu du dati na wan lespeki fasi èn nanga krin frustan, ma den no musu moi densrefi fu di den e brei den ede-wiwiri nanga ala sortu modo, noso fu di den e weri gowtu, peri noso diri krosi, ma den musu du dati soleki fa a fiti umasma di e taki dati den e anbegi Gado, iya, fu di den e du bun wroko” (1 Timoteyus 2:9, 10). Dyaso Paulus skrifi fu umasma, ma a gronprakseri e fiti mansma nanga umasma. San na a gronprakseri? Wi musu weri krosi èn moi wisrefi na wan fasi di e sori taki wi abi lespeki gi wisrefi èn gi trawan, èn wi musu du dati nanga krin frustan. Sobun, a yonkuman kan aksi ensrefi: ’A fasi fa mi o seti mi wiwiri o sori taki mi abi lespeki, soleki fa wan Kresten musu abi dati?’

Èn sortu bun gronprakseri wan yonguwan kan feni na ini den wortu fu a disipel Yakobus? A disipel disi ben taki: „Un sutasma, unu no sabi taki te wan sma de wan mati fu grontapu, dan a de wan feanti fu Gado? Fu dati ede, iniwan sma di wani de wan mati fu grontapu, e tron wan feanti fu Gado” (Yakobus 4:4). Kresten no wani de wan mati fu grontapu kwetikweti, fu di dati o meki den tron wan feanti fu Gado. Efu a yonguwan seti en wiwiri soleki fa den speri fu en gwenti fu du, dan dati ben o meki taki a gersi wan mati fu Gado noso wan mati fu grontapu? A yonkuman dati di e aksi ensrefi fa a musu seti en wiwiri, kan gebroiki den sortu Bijbel gronprakseri disi fu teki koni bosroiti. Iya, Bijbel gronprakseri e yepi wi fu teki koni bosroiti. Èn te wi kon kisi a gwenti fu teki bosroiti akruderi Bijbel gronprakseri, dan a o kon moro makriki fu teki koni bosroiti di no sa abi takru bakapisi.

Wi kan feni furu gronprakseri na ini Gado Wortu. A no de fu taki, dati kande wi no sa feni wan gronprakseri di e taki spesrutu fu a situwâsi fu wi. Ma toku wi kan leisi na ini Bijbel fa son sma ben gi yesi na a rai fu Gado èn fa trawan  no ben arki di Gado warskow den (Genesis 4:6, 7, 13-16; Deuteronomium 30:15-20; 1 Korentesma 10:11). Te wi e leisi den sortu tori dati, èn te wi luku sortu bakapisi den abi, dan wi sa kon sabi den Bijbel gronprakseri di kan yepi wi fu teki bosroiti di Gado feni bun.

Luku fu eksempre wan syatu takimakandra di Yesus Krestes ben abi nanga na apostel Petrus. Den man di ben e teki tu drakmo leki belasting moni na sma, ben aksi Petrus: „A leriman fu unu no e pai lanti den tu drakmo?” Petrus ben piki den: „Iya.” Syatu baka dati, Yesus aksi Petrus: „Fu suma den kownu fu grontapu e kisi edemoni noso belasting moni? Fu den manpikin fu den, noso fu den freimdesma?” Di Petrus taigi en „fu den freimdesma”, dan Yesus piki en: „Sobun, den manpikin no abi fu pai belasting moni. Ma fu di wi no wani meki sma mandi, dan yu musu go na se, go uku, èn teki a fosi fisi di yu kisi. Te yu opo en mofo, dan yu o feni wan stater-moni. Teki dati èn gi den a moni dati gi yu nanga mi” (Mateyus 17:24-27). Sortu gronprakseri wi kan feni na ini a tori disi?

Den aksi di Yesus poti gi Petrus, yepi en fu frustan a sani disi: Fu di Yesus na a Manpikin fu Gado, meki a no abi fu pai belasting moni. Aladi Petrus no ben man frustan a sani disi na a bigin, toku Yesus yepi en na wan switifasi fu frustan a tori. Te trawan e meki wan fowtu, dan wi kan du neleki Yesus, fu di wi e hori den firi fu den na prakseri, na presi fu sori den na wan grofu fasi taki den meki wan fowtu, noso na presi fu krutu den.

Na so Petrus ben man frustan fu san ede Yesus ben pai edemoni, namku fu no meki trawan naki futu. Disi na wan tra gronprakseri di wi kan feni na ini a tori disi. A de moro prenspari fu hori a konsensi fu trawan na prakseri leki fu de nomonomo fu du san wi abi reti na tapu.

San musu meki taki wi teki bosroiti na wan fasi di o sori taki wi e lespeki a konsensi fu trawan? Na lobi gi tra sma o meki wi du dati. Yesus Krestes ben e leri sma taki a moro prenspari komando, na a lobi di wi musu lobi Gado nanga wi heri sili, ma wan tra prenspari komando na a lobi di wi musu lobi tra sma leki wisrefi (Mateyus 22:39). Ma wi e libi na ini wan grontapu pe sma e prakseri densrefi nomo, èn fu di wi na sondusma meki ten na ten wi e prakseri wisrefi nomo. Sobun, efu wan sma wani lobi trawan leki ensrefi, dan a musu kenki a denki fu en.—Romesma 12:2.

Furu sma tyari so wan kenki kon, èn den e hori trawan na prakseri te den e teki bosroiti, awansi na bigi noso pikin bosroiti. Paulus ben skrifi: „Brada, a no de fu taki dati Gado kari unu fu de fri; no gebroiki a fri disi fu du san a sondu skin wani, ma dini makandra leki srafu fu di un lobi makandra” (Galasiasma 5:13). Fa wi kan du san a tekst disi e taki? Luku na eksempre fu wan yongu uma di ben froisi go na wan boitipresi fu yepi sma fu kon sabi Gado Wortu. A ben gwenti fu weri den sortu modo krosi di sma e weri na ini a bigi foto, èn den krosi disi ben fiti gi wan Kresten. Toku a ben de so taki di a ben e preiki gi den sma fu a boitipresi, dan a kon si taki den ben e taki fu den  krosi di a ben e weri. Aladi a ben e weri krosi di fiti èn aladi a ben e moi ensrefi na wan fasi di fiti, toku a teki a bosroiti fu no weri den sortu modo krosi dati, „so taki sma no [ben o] taki takru fu a wortu fu Gado”.—Titus 2:5.

San yu ben o du efu yu ben musu teki bosroiti di abi fu du nanga den krosi di yu o weri, noso nanga wan tra sani di yu lobi? A no de fu taki dati Yehovah sa breiti te den bosroiti di yu e teki e sori taki yu e broko yu ede nanga a konsensi fu trawan.

Poti prakseri na den bakapisi fu den bosroiti di yu e teki

Soleki fa wi si, dan te wi e teki bosroiti, wi musu hori wisrefi na Bijbel gronprakseri èn wi musu hori a konsensi fu trawan na prakseri. Sortu tra sani wi kan hori na prakseri tu? A muilek fu libi leki wan Kresten, fu di so wan libi de neleki te wan sma e waka na tapu wan smara pasi di lai nanga ston. Gado e gi wi na okasi fu libi na difrenti fasi solanga wi no e pasa den wet fu en (Mateyus 7:13, 14). Wi musu luku sortu krakti den bosroiti di wi e teki o abi tapu a banti di wi abi nanga Gado, tapu a denki fu wi, tapu den firi fu wi, èn tapu a gosontu fu wi.

Kon meki wi taki dati yu ben prakseri fu teki wan wroko. Kande yu no sa abi fu du sani di no fiti, te yu teki a wroko dati. Yu sa man go na den Kresten konmakandra èn na den kongres. Yu sa meki moro moni leki san yu ben fruwakti. A wrokobasi e si taki yu abi a koni fu du a wroko bun, èn a sa gi yu na okasi fu gebroiki a koni dati dorodoro. Boiti dati, yu lobi a wroko dati. Wan sani de di musu tapu yu fu teki a wroko dati? We, kande yu e si kaba taki yu o gebroiki ala yu ten nanga krakti gi a wroko dati. A wrokobasi e taigi yu taki a no sa dwengi yu fu wroko moro langa. Ma yu ben o wroko moro tranga leki san de fanowdu, soso fu man klari a wroko? A san disi o pasa furu tron? A sani disi o meki taki yu no sa abi nofo ten gi yu osofamiri, èn taki te fu kaba yu no sa abi ten gi yeye afersi di yu no musu misi?

Luku fu eksempre sortu bigi bosroiti Jim ben musu teki. A bosroiti disi ben abi fu du nanga a wroko fu en. A ben wroko bun tranga, èn a kisi wan moro hei posisi na a presi pe a ben e wroko. Te fu kaba a kisi wan hei posisi na ini den bisnis di a wrokope ben abi na ini den Owstusei kondre, na ini Amerkankondre, èn na ini Europa. Ma di na ekonomia na ini Yapan ben go na baka, dan a kon frustan taki na fu soso a ben e feti fu kisi moni nanga makti. A moni di a ben wroko gi so tranga, ben kon kaba heri esi. A ben feni taki a no ben abi wan marki na ini a libi moro. ’Fa mi libi o de baka tin yari?’, na so a ben aksi ensrefi. Ne a kon si taki en wefi nanga den pikin fu en ben abi wan moro bun marki na ini a libi fu den. Wan tu yari kaba, den abi demakandra nanga Yehovah Kotoigi. Jim ben wani de koloku èn ben wani de tevrede neleki en osofamiri. Sobun a bigin studeri Bijbel.

Heri esi Jim kon si taki a fasi fa a ben e libi ben tapu en fu abi wan marki na ini a libi, soleki fa wan Kresten musu abi dati. Fu di a ben gwenti fu go-kon na Asia, Amerkankondre, nanga Europa, meki a no ben abi nofo ten fu studeri Bijbel èn fu abi demakandra nanga tra brada nanga sisa. A ben abi fu teki wan bosroiti, namku: ’Mi sa libi soleki fa mi ben gwenti libi na ini den 50 yari di pasa, noso mi sa kenki mi libi?’ A bosroiti fu kenki en libi, èn a begi Gado fu yepi en ini a tori disi. Baka dati a bosroiti fu libi ala den wroko fu en boiti wán fu den, so taki a ben o abi nofo ten gi yeye afersi (1 Timoteyus 6:6-8). A kon moro koloku fu di a teki a bosroiti disi, èn a ben kan gebroiki moro ten gi yeye afersi.

Den bosroiti di yu e teki de prenspari, awansi den pikin noso bigi. A bosroiti di yu e teki tide kan meki taki yu abi bun bakapisi noso takru bakapisi, iya, a kan meki taki yu tan na libi noso dede srefi. Yu kan teki koni bosroiti te yu e hori yusrefi na Bijbel gronprakseri, te yu e hori a konsensi fu trawan na prakseri, èn te yu e luku sortu bakapisi den bosroiti disi sa abi. Fu dati ede, yu musu teki bosroiti soleki fa Gado wani.

[Prenki na tapu bladzijde 13]

A kan gersi leki son bosroiti no de so prenspari, ma toku den kan abi seryusu bakapisi

[Prenki na tapu bladzijde 14]

Fa Bijbel gronprakseri ben o man yepi en fu teki koni bosroiti?

[Prenki na tapu bladzijde 15]

Yesus ben hori den firi fu Petrus na prakseri di a ben taki nanga en