Prenspari rai di kan yepi yu fu taki bun nanga yu trowpatna

’MI NO ben musu taki a sani dati.’ ’A no dati mi ben wani taki.’ Oiti yu denki so, baka di yu pruberi fu meki yu trowpatna frustan san yu wani taki? Wi alamala musu leri fa fu taki sani na so wan fasi taki trawan man frustan wi krin. A de neleki iniwan sani di yu musu leri. Son sma e leri wan sani esi-esi, ma trawan musu du furu muiti fu leri wan sani. Ma awinsi a muilek gi yu, toku yu kan leri fu taki na so wan fasi dati trawan o wani arki yu èn den o man frustan yu krin.

Son leisi, a kulturu fu wan sma e meki taki a e handri na wan spesrutu fasi nanga en trowpatna. Na ini son kulturu, den e leri taki mansma no musu taki tumusi furu. Efu wan man e taki furu, dan sma e wisiwasi en fu di den e  feni taki a no seryusu. A tru taki Bijbel e taki: „Ibri sma musu gaw fu yere, ma a no musu gaw fu taki” (Yakobus 1:19). A rai disi abi fu du nanga mansma èn nanga umasma. A e sori taki efu sma wani frustan makandra, dan a no taki den musu taki nomo. Fu eksempre, tu sma kan taki wan heri pisi ten nanga makandra. Ma san o pasa efu den no e arki makandra? Den no o frustan makandra, a no so? Sobun, a tekst e sori taki efu sma wani frustan makandra trutru, dan a de tumusi prenspari taki den arki makandra.

Son sma e frustan makandra sondro fu taki wan sani

Na ini son kulturu, sma feni taki den wefi no musu taki fa den e denki noso fa den e firi. Den masra no musu bumui nanga na osofamiri-libi kwetikweti. Na ini so wan libimakandra, masra nanga wefi no sabi krin san a patna fu den wani na ini son situwâsi. Son wefi leri fu frustan a masra fu den heri bun, èn wantewante den e du san a masra wani. Na ini den sortu trowlibi disi, masra nanga wefi e frustan makandra sondro fu taki wan sani. Ma nofo tron te disi de so, dan na wán sma nomo e frustan a trawan. Kande a wefi e du muiti fu kon sabi fa en masra e denki noso e firi, ma nofo tron sma no feni taki a masra musu du muiti fu kon sabi fa en wefi e firi.

A tru taki na ini son kulturu mansma e hori den firi fu den wefi na prakseri, èn den e du muiti fu meki den wefi firi bun. Ma srefi na ini den kulturu disi, furu trowlibi ben o waka moro bun efu den trowpatna ben o taki moro krin nanga makandra.

A de tumusi prenspari fu taki sani krin

Te wi e taki sani krin, dan sma o frustan wi moro bun, èn a no o pasa so makriki taki wi abi kesekese nanga trawan. Na a ten di den Israelsma doro na ini a Pramisi Kondre, dan den lo fu Ruben, Gad, nanga na afu lo fu Manase ben go libi na a owstusei fu a Yordanliba. Drape den bow „wan bigi altari di ben hari a prakseri fu sma”. Den tra lo no ben frustan fu san ede den ben du disi. Den ben denki taki den lo abrasei fu a Yordanliba ben drai baka gi a tru bribi. Sobun, den lo na a west-sei seti densrefi fu go feti nanga den lo abrasei fu a Yordanliba. Ma fosi den go feti, den seni wan tu sma fu go taki nanga den lo na owstusei. Dati ben de wan koni sani trutru! Den kon frustan taki na altari no ben de fu tyari bron-ofrandi nanga srakti-ofrandi gi falsi gado. Na presi fu dati, den lo fu owstusei ben du disi so taki den tra lo no ben o taki bakaten: „Unu no abi wan prati nanga Yehovah.” Na altari ben de wan buweisi taki den ben de anbegiman fu Yehovah tu (Yosua 22:10-29). Den kari na altari ’Kotoigi’, kande fu di a ben de leki wan kotoigi di e sori taki den e si Yehovah leki a tru Gado.—Yosua 22:34.

Nanga den sani di den ben taki, den ben man overtoigi den tra lo, èn na so den lo fu west-sei no go feti moro nanga den lo fu owstusei. Iya, fu di den taki sani krin, meki den no feti nanga makandra. Bakaten, di Israel opo ensrefi teige Yehovah Gado, di ben de leki wan masra gi den, dan a taigi den taki a ben o taki nanga switifasi fu man doro den ati (Hosea 2:14). Disi na wan heri moi eksempre gi trowpatna. Iya, meki muiti fu taki na so wan fasi dati yu trowpatna man frustan san yu e firi trutru. A sani disi prenspari, spesrutu te unu no e agri nanga makandra. Pattie Mihalik, wan uma na ini Amerkankondre di e skrifi nyunsu, e taki: „Son sma e taki dati wortu na soso sani, ma son leisi wortu kan warti srefisrefi. Kande son sma e feni en muilek fu taki fa den e firi, ma te den e meki muiti fu du dati, dan den wortu fu den kan warti moro iniwan sani di moni kan bai.”

Tan du muiti fu taki sani moro krin

Son sma e taki: ’Sensi a bigin, wi trowlibi ben pori kaba.’ Trawan e taki: ’A trowlibi disi noiti no o kon bun moro.’ Kande son trowpatna e denki taki baka a trowdei, den no man leri fu frustan makandra moro bun. Ma  prakseri den sma di e libi na ini kulturu pe famiriman suku wan trowpatna gi den. Te fu kaba furu fu den trowlibi disi e waka bun, fu di den patna leri fu taki na so wan fasi taki den e frustan makandra.

Sowan 4000 yari pasa, famiriman ben seti a trow fu wan man nanga wan uma na a owstusei fu Asia. Den ben aksi wan futuboi fu go na wan farawe presi fu suku wan wefi gi a man. Toku, a masra nanga a wefi disi ben man frustan makandra heri bun. A man di nen Isak ben go na wan gron fu miti a futuboi nanga na uma di ben o tron en wefi. Ne a futuboi „fruteri Isak ala san a ben du”. Bijbel e taki moro fara fa a trow disi waka: „Baka dati Isak tyari Rebeka go na ini a tenti fu en mama Sara [Disi e sori taki den tron masra nanga wefi]. Na so a teki Rebeka leki en wefi, èn a ben kon lobi en.”—Genesis 24:62-67.

Luku taki Isak ben arki fosi san a futuboi fruteri, èn „baka dati” a teki Rebeka leki en wefi. A futuboi ben man tyari frantwortu èn a ben e dini Yehovah, a Gado fu Isak. Sobun, Isak ben kan frutrow a man disi. Baka dati, Isak „ben kon lobi” Rebeka, na uma di ben tron en wefi.

A de so taki Isak nanga Rebeka ben man frustan makandra trutru? Baka di Esau, a manpikin fu den, trow nanga tu umapikin fu Hèt, wan bigi problema kon na ini a famiri. Rebeka „tan taigi” Isak: „Den umapikin fu Hèt meki taki mi e fuga fu a libi fu mi. Efu oiti Yakob [di ben yongu moro Esau] ben sa teki wan wefi na mindri den umapikin fu Hèt . . . , dan fu san ede mi de na libi ete?” (Genesis 26:34; 27:46) Wi kan si taki Rebeka ben taki krin san ben e gi en broko-ede.

Isak ben taigi Yakob, a twelengi brada fu Esau, taki a no ben musu teki wan uma fu Kanan leki wefi (Genesis 28:1, 2). Isak ben frustan krin fa Rebeka ben e firi. A masra nanga a wefi disi ben man taki krin nanga makandra fa den ben e denki fu wan muilek afersi na ini na osofamiri, èn na so den kon de wan moi eksempre gi wi na ini a ten disi. Ma fa a de te trowpatna no man agri nanga makandra? San den kan du?

Te trowpatna no e agri nanga makandra

Efu yu nanga yu patna meki trobi, dan a no musu de so taki yu no taki nanga en moro. Te yu luku en bun, dan na so wan fasi yu e sori krin taki yu no de koloku èn taki yu no wani dati yu patna de koloku. Ma kande yu trowpatna no e frustan krin san yu wani èn fa yu e firi.

Kande yu nanga yu patna musu taki krin nanga makandra. Efu mandimandi de ini a tori, dan kande a no o makriki fu hori yusrefi. Wan leisi, Abraham nanga Sara di ben de a papa nanga mama fu Isak, ben kisi wan problema. Sara no ben man meki pikin, èn soleki fa a gwenti ben de na a ten dati, dan Sara gi Abraham en umasrafu Hagar fu kisi pikin nanga Abraham. Ne Hagar kisi wan boi, Ismaèl. Ma bakaten, Sara ben kon de nanga bere tu, èn a kisi wan manpikin, Isak. Di Sara puru Isak na bobi, dan wan leisi a si fa Ismaèl ben e tanteri en boi. Sara ben si sortu problema a sani disi ben o tyari kon, sobun a begi Abraham fu seni Hagar nanga Ismaèl gowe. Iya, Sara ben taki krin fa a ben e denki fu a tori disi. Ma Abraham no ben lobi kwetikweti san a ben aksi en fu du.

Fa den ben seti a tori disi? Bijbel e taki: „Gado taigi Abraham: ’No mandi nanga den sani di Sara e taigi yu ibri tron baka fu a boi èn fu yu umasrafu. Arki san Sara e taigi yu, bika den bakapikin di mi pramisi yu, o komoto fu Isak.’” Abraham arki Yehovah Gado èn a du soleki fa Gado taki.—Genesis 16:1-4; 21:1-14.

Ma kande yu e denki: „Efu na Gado ben o taki nanga wi komoto fu hemel, dan wi ben o agri nanga makandra esi-esi!” We, disi e sori wi wan tra prenspari sani di kan yepi trowpatna fu lusu wan trobi, namku taki trowpatna kan arki Gado. Fa so? Den kan du disi te den e leisi Gado Wortu nanga makandra èn te den  e frustan taki den sani di den leisi, na rai fu Gado.—1 Tesalonikasma 2:13.

Wan Kresten wefi di abi ondrofeni, taki: „Furu tron te wan yongu uma e aksi mi fu gi en rai di abi fu du nanga en trowlibi, dan mi e aksi en efu en nanga en masra e leisi Bijbel nanga makandra. Furu fu den di abi problema na ini den trowlibi, no abi a gwenti fu leisi Bijbel” (Titus 2:3-5). Wi alamala kan leri wan sani fu den sani di a Kresten wefi disi taki. Leisi Gado Wortu doronomo makandra nanga yu patna. Na so fasi, yu o „yere” san Gado e taigi yu fu a fasi fa yu musu tyari yusrefi ibri dei (Yesaya 30:21). Ma luku taki yu no gebroiki Bijbel fu krutu yu trowpatna. A no musu de so taki ala yuru yu e leisi bijbeltekst gi en te yu feni taki a no e du san skrifi drape. Na presi fu dati, un musu luku fa unu ala tu kan du san unu leisi.

Efu unu e pruberi fu lusu wan muilek problema, dan unu kan suku rai na ini den buku di Yehovah Kotoigi tyari kon na doro, noso na ini na Index nanga tori fu A Waktitoren, di de fu feni na ini den Waktitoren fu december. Drape unu kan feni spesrutu artikel di abi fu du nanga a problema di unu abi. Fu eksempre, kande un musu sorgu gi papa nanga mama di kon owru kaba, èn a sani disi e tyari problema kon na ini a trowlibi fu unu. Na presi fu haritaki fu san yu patna musu du noso san a no musu du, dan unu kan go luku makandra san na Index e taki. Unu kan luku sosrefi san skrifi na ini a buku „A sroto gi wan kolokoe osofamiri”. * Unu kan leisi kapitel 15 di nen „Gi grani na den owroe papa nanga mama foe wi”. Kande yu o fruwondru fu si omeni wini yu nanga yu trowpatna kan kisi fu den sortu artikel disi di abi rai fu Bijbel na ini. Den yepi furu opregti Kresten kaba.

Te unu e leisi den artikel disi nanga makandra, dan dati sa yepi unu fu si krin sortu problema unu abi. Unu o feni bijbeltekst di e sori fa Gado e denki fu a problema fu unu. Suku den tekst na ini Bijbel, èn leisi den makandra. Iya, na so unu sa yere san Gado abi fu taki fu a problema fu unu.

Sorgu taki unu man taki krin nanga makandra ala ten

Oiti yu pruberi fu opo wan doro di ben tapu fu wan langa pisi ten? Fu di a doro frustu, yu o abi fu du furu muiti fu opo en. Ma fa a ben o de nanga wan doro di kisi oli èn di e opo furu tron? A ben o makriki fu opo so wan doro, a no so? Na so a de tu nanga trowpatna di e taki nanga makandra. Neleki fa wan doro e opo makriki te a kisi oli, na so unu o man frustan makandra tu te unu gwenti taki nanga makandra na wan lobi-ati fasi, soleki fa a fiti Kresten. Srefi te unu abi trobi, toku a no sa muilek gi unu fu fruteri makandra san unu e denki.

Na ini a bigin a no sa makriki fu du disi, ma te yu e tan du muiti, yu sa abi bun bakapisi. Te fu kaba, yu o abi wan moro bun banti nanga yu trowpatna, èn ala ten unu o man frustan makandra heri bun.

[Futuwortu]

[Prenki na tapu bladzijde 7]

Unu o suku rai na Gado te unu no e agri nanga makandra?