Un musu abi deki-ati fu du a wroko
Un musu abi deki-ati fu du a wroko
„Un musu abi deki-ati fu du a wroko, unu di e yere na ini den dei disi san den profeiti taki.”—SAKARIA 8:9.
1, 2. Fu san ede wi musu poti prakseri na den buku Hagai nanga Sakaria?
DEN profeiti Hagai nanga Sakaria ben skrifi den profeititori fu den sowan 2500 yari pasa, ma toku den profeititori disi prenspari gi yu. Den tu Bijbel buku disi no e taki nomo fu sani di pasa na ini a historia. Den buku disi na wan tu fu den „sani di sma skrifi fositen . . . fu leri wi wan sani” (Romesma 15:4). Furu fu den sani di wi e leisi na ini den buku disi, e meki wi prakseri fu trutru sani di pasa sensi a Kownukondre fu Gado bigin tiri na ini hemel, na ini 1914.
2 Di na apostel Paulus ben e taki fu den sani di a pipel fu Gado ondrofeni langa ten pasa, dan a taki: „Den sani disi ben pasa nanga den leki eksempre gi wi, èn den ben skrifi leki wan warskow gi wi di e libi na a kaba fu a grontapu sistema” (1 Korentesma 10:11). Sobun, kande yu e aksi yusrefi: „Fu san ede den buku fu Hagai nanga Sakaria prenspari gi wi na ini a ten disi?”
3. Na sortu sani Hagai nanga Sakaria ben poti prakseri?
3 Soleki fa a fosi studie-artikel sori, dan den profeititori fu Hagai nanga Sakaria ben abi fu du nanga a ten di den Dyu ben komoto na ini katibo na Babilon. Na a ten dati, den drai go baka na a kondre di Gado ben gi den. Den tu profeiti disi ben poti prakseri na a bow di den Dyu ben musu bow a tempel baka. Na ini 536 b.G.T., den Dyu seti a fondamenti fu a tempel. Son owru Dyu ben e sari fu di den ben prakseri fa sani ben de fosi, ma furu fu den tra Dyu ben „e bari fu prisiri”. Ma na ini a ten fu wi, wan moro prenspari sani pasa. Fa so?—Esra 3:3-13.
4. San pasa syatu baka a Fosi Grontapufeti?
4 Heri esi baka a Fosi Grontapufeti, den salfu anbegiman fu Yehovah ben komoto na ini katibo na Babilon a Bigiwan. Dati ben de wan bigi buweisi taki Yehovah ben e horibaka gi den salfuwan disi. Fosi a pisi ten dati, a ben gersi leki den kerki fesiman nanga den tiriman di ben e wroko makandra nanga den, ben tyari wan kaba kon na a preikiwroko nanga a leriwroko fu den Bijbel Ondrosukuman (Esra 4:8, 13, 21-24). Ma Yehovah Gado ben puru ala den problema dati, so taki den ben kan preiki èn meki disipel baka. Na ini den someni tenti yari sensi 1919, a Kownukondrewroko go na fesi, èn noti no ben man tapu den anbegiman fu Yehovah fu du a wroko disi.
5, 6. Sortu prenspari sani o pasa, soleki fa Sakaria 4:7 e sori?
5 Wi kan abi a dyaranti taki na ini a ten fu wi, Yehovah sa tan horibaka gi a preikiwroko nanga a leriwroko fu den futuboi di e gi yesi na en. Na ini Sakaria 4:7 wi e leisi: „Seiker a sa tyari na ukuston kon. Den sa bari taki: ’So moi! So moi!’” Den wortu disi abi fu du nanga wan prenspari sani di o pasa na ini a ten fu wi. San na a sani dati?
6 Na wan agersi fasi, Yehovah abi wan tempel tu na ini a ten disi. A tempel disi abi fu du nanga den sani di Yehovah seti fu meki sma anbegi en na wan yoisti fasi nanga yepi fu na ofrandi fu Krestes Yesus. Soleki fa Sakaria 4:7 e sori, dan wan ten o kon pe Gado o sorgu taki ala sma na heri grontapu o anbegi en na ini na agersi tempel dati. A tru taki a nyun seti disi bigin sensi a fosi yarihondro. Ma te fu kaba, a tru anbegi musu seti na heri grontapu. Milyunmilyun sma na grontapu de na ini a tru anbegi now. Na a ten fu a Dusun Yari Tiri fu Yesus Krestes, den sma disi èn sosrefi den sma di sa kisi wan opobaka, sa kon volmaakti. Na a kaba fu den dusun yari dati, soso den tru anbegiman fu Gado o libi na ini a nyun grontapu.
7. San Yesus o du fu seti a tru anbegi na heri grontapu na ini a ten fu wi? Fu san ede dati musu gi wi deki-ati?
7 Granman Serubabel nanga Granpriester Yosua ben de drape na ini Yerusalem di a tempel ben kaba bow na ini 515 b.G.T. Sakaria 6:12, 13 ben taki na fesi dati Yesus ben o abi a srefi frantwortu fu sorgu taki a tru anbegi seti na heri grontapu. Drape wi e leisi: „Disi na san Yehovah fu den legre taki: ’Disi na a man di abi a nen Sproiti. Èn a sa sproiti kon fu en eigi presi, èn trutru a sa bow a tempel fu Yehovah. Èn . . . na en sa abi a grani. A musu sidon na tapu en kownusturu fu tiri, èn a musu tron priester na tapu en kownusturu.’” Yesus, di de wan bakapikin fu David, e tiri leki kownu na ini hemel now, èn a e horibaka gi a Kownukondre wroko di abi fu du nanga a tru anbegi. Yu denki dan, taki wan sma o man gens a wroko disi? Kwetikweti! Yu no feni taki disi musu gi wi deki-ati fu horidoro na ini a diniwroko fu wi? Den broko-ede di wi abi ala dei no musu puru wi prakseri na a diniwroko fu wi.
San na a moro prenspari sani gi wi
8. Fu san ede wi musu poti a tru anbegi na a fosi presi na ini wi libi?
8 Efu wi wani taki Yehovah blesi wi, dan wi musu poti a tru anbegi na a fosi presi na ini wi libi. Wi no wani de leki den Dyu di ben taki dati ’a ten no ben doro ete’, ma wi wani hori na prakseri taki wi e libi na ini „den lasti dei” (Hagai 1:2; 2 Timoteyus 3:1). Yesus ben taki na fesi dati den loyaal bakaman fu en ben o preiki a bun nyunsu fu a Kownukondre èn taki den ben o meki disipel. Wi musu luku bun taki wi no e si a tumusi moi grani disi leki wan sani di no prenspari. Satan ben meki sma tapu a preikiwroko nanga a leriwroko fu wan pisi ten. Ma na ini 1919, den anbegiman fu Yehovah bigin du a wroko disi baka, èn a wroko disi no klari ete. Yu kan de seiker taki a pipel fu Yehovah sa klari a wroko disi!
9, 10. San wi musu du efu wi wani taki Yehovah blesi wi? San disi wani taki gi wi?
9 O moro wi e wroko tranga, o moro Yehovah sa blesi wi. A no sa blesi wi leki grupu nomo, ma a sa blesi ibriwan fu wi gi a tranga wroko di wi e du. A sani di Yehovah ben pramisi den Dyu, kan tranga a bribi fu wi na ini a ten disi. Di den Dyu bigin dini Yehovah nanga den heri ati baka, èn di den bigin du ala muiti baka fu klari a fondamenti fu a tempel, dan Yehovah pramisi den: „Bigin nanga a dei disi mi sa gi blesi” (Hagai 2:19). Yehovah ben o bigin blesi den baka. Luku now fa Gado pramisi fu blesi den: „A siri fu vrede sa de; a droifibon srefi sa gi en froktu, èn a gron srefi sa meki nyanyan, èn hemel srefi sa gi a dow fu en; èn trutru mi sa meki den wan di tan abra fu a pipel disi kisi ala den sani disi.”—Sakaria 8:9-13.
10 Yehovah ben blesi den Dyu dati, so taki den ben e go na fesi na ini a tru anbegi, èn a ben e gi den san den ben abi fanowdu ala dei. Na a srefi fasi, Yehovah sa blesi wi tu te wi e du wi diniwroko fayafaya èn nanga wi heri ati. Den blesi di wi sa kisi, na taki wi o man libi bun nanga makandra, wi no sa abi fu frede noti, wi o abi wan bun libi, èn wi o go na fesi na ini a diniwroko. Ma Yehovah sa tan blesi wi solanga wi e du a diniwroko fu wi soleki fa en wani.
11. Fa wi kan ondrosuku wisrefi?
11 Now na a ten fu ’poti prakseri na a fasi fa wi e libi’ (Hagai 1:5, 7). Wi musu teki a ten fu ondrosuku wisrefi fu si sortu sani wi e poti na a fosi presi na ini wi libi. Na ini a ten disi, Yehovah e blesi wi solanga wi e gi en nen glori, èn solanga wi e tan du a diniwroko fu wi. O moro wi e du dati, o moro Yehovah e blesi wi. Aksi yusrefi den sani disi: ’A de so taki mi e poti tra sani na a fosi presi now? Te mi e prakseri fa mi ben de fayafaya gi Yehovah, gi a waarheid, èn gi a wroko fu en, dan mi kan taki dati mi abi a srefi faya ete leki di mi ben teki dopu? A de so taki mi e du so furu muiti fu abi wan gudu libi, taki mi no e poti prakseri moro na Yehovah èn na a Kownukondre fu en? A de so taki mi no e gi glori na a nen fu Yehovah èn taki mi no e go na fesi na ini a diniwroko fu mi, fu di mi e frede san tra sma o prakseri fu mi?’—Openbaring 2:2-4.
12. San Hagai 1:6, 9 e taki fu a situwâsi fu den Dyu?
12 Wi wani taki Gado musu tan blesi wi, èn dati meki wi no sa weigri fu gi glori na a nen fu en. Memre taki na ini a bigin, den Dyu ben e wroko tranga fu bow a tempel. Ma soleki fa Hagai 1:9 e sori, dan den bigin ’feti e du sani gi den eigi oso’. Den ben e poti prakseri nomo na den aladei sani di den ben abi fanowdu èn na den eigi libi. Fu dati ede, den ’no ben e tyari furu sani kon na inisei’. Den no ben abi nofo bun sani fu nyan, bun sani fu dringi, èn bun krosi fu weri te a ben kowru (Hagai 1:6). Yehovah no ben blesi den moro. Wi kan leri wan sani fu disi?
13, 14. Fa wi kan du san wi leri na ini Hagai 1:6, 9, èn fu san ede a prenspari gi wi?
13 Efu wi wani taki Yehovah tan blesi wi, dan wi musu luku taki wi no poti na anbegi fu en na wan sei fu go suku wi eigi bun. Iya, wi musu kakafutu te sani e hari wi prakseri fu go suku wan gudu libi, fu wini moni esi-esi, fu go na heiskoro nomonomo fu kan feni wan bun grontapuwroko, noso fu gebroiki ala wi ten fu leri moro fu wan sani di wi lobi.
14 Den sani disi no abi fu de fowtu sani. Ma te yu luku en bun, den sani disi no man gi wi têgo libi, ma den „e tyari dede kon” (Hebrewsma 9:14). Fa den sani disi e tyari dede kon? We, den no e yepi wi fu kisi wan moro bun matifasi nanga Gado, noso fu go na fesi na ini na anbegi fu wi. Efu wan sma e tan feti baka den sani disi, dan a kan lasi en matifasi nanga Gado. Na ini a ten fu den apostel, disi ben pasa nanga wan tu fu den salfu Kresten (Filipisma 3:17-19). A sani disi pasa nanga wan tu sma na ini a ten disi tu. Kande yu sabi son sma di meki taki sani puru den prakseri fu a Kresten diniwroko èn fu a gemeente. Kande a gersi now leki den sma disi no sa kon dini Yehovah baka. Wi e howpu trutru taki den sa drai kon baka na Yehovah. Ma wi musu hori na prakseri taki ala ten te wan sma e feti baka sani di „e tyari dede kon”, dan dati kan meki taki a e lasi a blesi fu Yehovah. Yu kan frustan sortu sari sani kan miti wi te fu kaba. Wi kan lasi a prisiri nanga a vrede di a yeye fu Gado e gi wi. Prakseri tu fa a o de wan sari sani te wi no abi demakandra moro nanga wi lobi Kresten brada nanga sisa!—Galasiasma 1:6; 5:7, 13, 22-24.
15. Fa Hagai 2:14 e sori o seryusu wi musu si na anbegi fu wi?
15 Disi na wan tumusi seryusu sani. Na ini Hagai 2:14 wi e leisi fu den Dyu di ben libi a bow-wroko fu a tempel, soso fu go bow den eigi oso, noso fu moi den oso dati. „’Dati na fa a pipel disi de, èn dati na fa a nâsi disi de na mi fesi’, na so Yehovah taki, ’èn dati na fa ala a wroko fu den anu de, èn awansi san den e pristeri drape. A no krin.’” Den Dyu disi ben meki wan altari na ini Yerusalem. Ma den Dyu no ben de opregti èn den no ben e poti prakseri na a tru anbegi. Sobun, awinsi sortu ofrandi den Dyu disi ben e tyari na tapu na altari dati, Yehovah no ben feni den bun.—Esra 3:3.
Yehovah e gi a dyaranti taki a o blesi den wan di e gi yesi na en
16. Sortu dyaranti den Dyu ben kisi nanga yepi fu den fisyun di Sakaria ben kisi?
16 Den Dyu di ben e bow a tempel baka soleki fa Gado ben aksi fu den, ben abi a dyaranti taki Gado ben o horibaka gi den. Disi na san Gado ben tyari kon na krin na ini den aiti fisyun di Sakaria kisi. A fosi fisyun ben gi den Dyu a dyaranti taki den ben o klari a wroko na a tempel èn taki sani ben o waka bun na ini Yerusalem nanga Yuda, solanga den ben e tan du a wroko di den ben musu du (Sakaria 1:8-17). Na ini a di fu tu fisyun, Gado ben pramisi taki a ben o pori ala den tirimakti di ben e gens a tru anbegi (Sakaria 1:18-21). Den tra fisyun ben sori taki Gado ben o kibri den Dyu, so taki den ben kan du a bow-wroko. Den fisyun ben sori tu taki sma fu furu difrenti kondre ben o kon anbegi Yehovah na a tempel di ben bow kaba. Boiti dati, den ben sori taki den Dyu ben o abi vrede èn taki den no ben o abi fu frede noti. Den fisyun ben tyari kon na krin taki Gado ben o puru iniwan sani di ben o tapu den fu du a wroko di a gi den. Gado ben o puru ala ogri, èn den engel ben o luku den èn kibri den so taki ogri no miti den (Sakaria 2:5, 11; 3:10; 4:7; 5:6-11; 6:1-8). Iya, Gado ben gi a dyaranti taki a ben o horibaka gi den sma di e gi yesi na en. Sobun, yu kan frustan fu san ede den kenki den libi èn fu san ede den bigin poti prakseri na a wroko di den kisi, baka di Gado frulusu den.
17. Te wi e prakseri a dyaranti di wi abi, dan san wi musu aksi wisrefi?
17 Now di wisrefi abi a dyaranti taki a tru anbegi o wini te fu kaba, dan dati musu gi wi deki-ati tu fu wroko fayafaya na ini na anbegi fu Yehovah, èn fu luku efu na anbegi fu en de a moro prenspari sani gi wi ete. Aksi yusrefi: ’Efu mi sabi taki now na a ten fu preiki a bun nyunsu fu a Kownukondre èn fu meki disipel, dan den marki di mi poti gi misrefi èn a fasi fa mi e libi, e sori taki mi e bribi dati trutru? Mi e poti nofo ten na wan sei fu studeri Gado Wortu di lai profeititori? Mi e denki dipi fu Gado Wortu? Mi e taki fu Gado Wortu nanga tra Kresten èn nanga tra sma di mi e miti?’
18. San o pasa na ini a ten di e kon, soleki fa Sakaria kapitel 14 e sori?
18 Sakaria ben sori taki Babilon a Bigiwan o kisi pori, èn taki baka dati Armagedon o kon. Wi e leisi: „A musu de wan dei di sma sa sabi leki a dei fu Yehovah. Deiten no sa de, èn neti no sa de tu. Te neti, leti sa musu bigin skèin.” Iya, na a dei fu Yehovah, den feanti fu en di de na grontapu, o de na dungru, èn sani no o waka bun gi den! Ma Yehovah sa tan skèin leti na tapu den loyaal anbegiman fu Yehovah, èn a sa tan blesi den. Sakaria ben sori tu fa ala sani na ini a nyun grontapu o meki bekènti taki Yehovah santa. Soso a tru anbegi fu Gado o de na heri grontapu. Nowan tra fasi fu anbegi sa de moro (Sakaria 14:7, 16-19). Dati e tranga wi bribi trutru! Wi sa ondrofeni den sani di Gado ben taki na fesi, èn wi sa si fa Yehovah o buweisi taki na en abi a reti fu tiri hemel nanga grontapu. A no de fu taki dati a dei fu Yehovah sa de wan aparti dei trutru!
Yehovah sa blesi wi fu têgo
19, 20. Fu san ede Sakaria 14:8, 9 de wan deki-ati gi yu?
19 Baka te den tumusi moi sani disi pasa, dan Gado sa trowe Satan nanga den ogri yeye fu en na ini a peti di no abi gron, so taki den no sa abi krakti tapu sma (Openbaring 20:1-3, 7). Dan na a ten fu a Dusun Yari Tiri fu Krestes, sma sa kisi furu blesi. Sakaria 14:8, 9 e taki: „Na a dei dati, libi watra sa lon komoto na ini Yerusalem. Afu fu a watra sa lon go na a se di de na owstusei èn afu sa lon go na a se di de na westsei. Disi o pasa na ini a waran pisi ten èn na ini kowru pisi ten fu a yari. Èn Yehovah musu tron kownu fu heri grontapu. Na a dei dati, Yehovah sa sori fu de wán, èn en nen wán.”
20 Den „libi watra”, noso ’wan liba di abi watra di e gi libi’ e prenki den sani di Yehovah seti fu hori wi na libi. A watra disi sa lon komoto fu a kownusturu fu a Mesias Kownukondre doronomo (Openbaring 22:1, 2). A bigi ipi anbegiman fu Yehovah di pasa Armagedon libilibi, no sa dede moro leki bakapisi fu a sondu fu Adam. Srefi den wan di dede sa kisi wini, fu di den o kisi wan opobaka. Na so fasi, ala sma sa si taki na Yehovah e tiri grontapu baka. Ala sma na heri grontapu o anbegi Yehovah leki a Moro Heiwan di abi a reti fu tiri hemel nanga grontapu.
21. Sortu fasti bosroiti wi musu abi?
21 Te wi e luku ala den profeititori fu Hagai nanga Sakaria èn ala den sani di kon tru, dan dati e sori wi krin fu san ede wi musu tan du a wroko di wi kisi fu du na ini a tru anbegi dyaso na grontapu. Meki wi tan du muiti fu poti Kownukondre afersi na a fosi presi na ini wi libi, teleki a tru anbegi seti na heri grontapu. Sakaria 8:9 e gi wi a deki-ati: „Un musu abi deki-ati fu du a wroko, unu di e yere na ini den dei disi san den profeiti taki.”
Yu e memre disi ete?
• Sortu sani di pasa na ini a historia e sori taki den buku fu Hagai nanga Sakaria prenspari gi wi na ini a ten disi?
• Fa Hagai nanga Sakaria e sori wi sortu sani wi musu poti na a fosi presi na ini wi libi?
• Fu san ede wi kan taki dati den buku Hagai nanga Sakaria e gi wi a dyaranti taki sani o waka bun na ini a ten di e kon?
[Aksi fu a tori disi]
[Prenki na tapu bladzijde 26]
Hagai nanga Sakaria ben gi den Dyu deki-ati fu du a wroko fu den nanga den heri ati, bika na so fasi den ben o kisi blesi
[Prenki na tapu bladzijde 27]
Yu ’e feti e du sani gi yu eigi oso’?
[Prenki na tapu bladzijde 28]
Yehovah blesi a pipel fu en soleki fa a pramisi