Yehovah Kotoigi e yepi sma na ini Panama fu kon sabi a bun nyunsu

„PANAMA, a broki fu grontapu.” Feifitenti yari pasa, sma ben taki den wortu disi na ini wan pôpi radio programa fu a kondre dati di de na ini Mindri-Amerika. Na ini a ten disi, furu sma feni taki den wortu dati tru.

Panama de leki wan broki na mindri Noord-Amerika nanga Zuid-Amerika. Boiti dati, a trutru broki, namku Bridge of the Americas, de abra a Panama Kanaal di furu sma sabi. A Kanaal disi di meki na wan tumusi koni fasi, e lon pasa na ini a heri kondre. Nanga yepi fu a Kanaal disi na Atlantisch Se nanga a Stille Oceaan e miti makandra. A sani disi e meki taki sipi di e komoto fu ala sortu kondre, man pasa go na a tra se na ini wan tu yuru nomo. Efu a Kanaal disi no ben de, dan den sipi ben o abi fu waka wan tu dei noso wan tu wiki na se fu doro na a tra se. Iya, Panama de leki wan prenspari broki gi furu kondre.

 Wan kondre pe difrenti sortu pipel e tan

Na ini Panama, yu abi sma fu difrenti kondre nanga kulturu. Den sma disi, makandra nanga den difrenti grupu fu ingi di de fu a kondre dati srefi, moksi kon tron wán pipel di e libi na ala sei fu a moi kondre disi. Leki bakapisi fu dati, sma e libi na difrenti fasi, den abi difrenti kulturu, den abi difrenti bribi, èn den e taki difrenti tongo. Ma a de so taki den difrenti sma disi kan kon abi a srefi denki nanga a srefi marki na ini a libi nanga yepi fu den warti tru tori di de fu feni na ini Gado Wortu?

Iya, dati kan. Den wortu fu na apostel Paulus na ini Efeisesma 2:17, 18 e sori taki den Kresten fu a fosi yarihondro, namku Dyu èn sosrefi sma di no ben de Dyu, ben man du dati nanga yepi fu a srakti-ofrandi fu Krestes di e meki sma kon de na ini wánfasi. Paulus ben skrifi: „A [Yesus] kon èn a fruteri unu di ben de farawe, a bun nyunsu fu vrede, èn a ben taki fu vrede tu nanga den wan di ben de krosibei, bika nanga yepi fu en, meki wi, dati wani taki ala tu pipel, man kon na a Tata nanga wán yeye.”

Na so a de tu na ini a ten disi, taki Yehovah Kotoigi na ini Panama e preiki „a bun nyunsu fu vrede” gi sma èn gi grupu fu sma di komoto fu farawe presi èn di abi difrenti bribi. A moi fu si taki na ini a kondre disi, wánfasi e kon de na mindri den sma di e „kon na” Yehovah. Leki bakapisi fu dati, gemeente seti na ini Panama pe sma e taki siksi difrenti tongo, namku Spanyorotongo, Kantoneestongo, Dofusma-tongo fu Panama, Ingrisitongo, nanga tu fu den tongo di den ingi drape e taki, namku Kunatongo nanga Ngoberetongo (Guaymítongo). A e gi deki-ati fu kon sabi fa den sma di e taki den difrenti tongo disi kon de na ini wánfasi na ini na anbegi di den e anbegi Yehovah.

Den Kotoigi e kisi fu du nanga tyalensi na ini a comarca

A grupu fu ingi di e taki Ngoberetongo, na a moro bigiwan fu den aiti grupu fu ingi na ini Panama. Sowan 170.000 sma de na ini a grupu disi, èn moro furu fu den e libi na a bigi kontren di sma e kari wan comarca, noso wan presi di  lanti sreka gi wan spesrutu grupu. Wan bigi pisi fu a kontren disi lai busi nanga bergi, èn sma man go drape soso nanga futu. Yu abi sosrefi moi presi na sesyoro, èn sma man doro drape nanga boto. Furu tron sma e seti dorpu krosibei fu den liba, so taki den man go-kon moro makriki nanga lai, èn den e seti dorpu tu na sesyoro. Furu fu den sma di e libi na ini a comarca, e meki pikinso moni nanga a wroko di den e du na den kofigron na tapu den bergi. Den e meki pikinso moni tu nanga den fisi di den e fanga, noso nanga den sani di den e prani. Furu fu den sma disi na memre fu den kerki fu Krestenhèit. Ma sma de tu di abi a Mama Tata bribi. Trawan baka e go suku yepi na sukias noso bonuman te den siki, noso te ogri yeye e trobi den. Aladi furu fu den e taki Spanyorotongo, toku den e frustan Ngoberetongo moro bun.

Den Kotoigi e pari boto fu doro sma ati

Yehovah Kotoigi sabi taki a de prenspari fu yepi sma fu kon sabi a waarheid na so wan fasi taki den no e frustan dati wawan, ma taki a e doro na ati fu den tu. Te a waarheid doro wan sma en ati kaba, dan dati kan meki a tyari den kenki kon di de fanowdu, so taki a kan libi akruderi Bijbel gronprakseri. Fu dati ede, Kotoigi fu a comarca kontren di sabi a Ngoberetongo bun, leri a tongo disi na den spesrutu pionier di e wroko na ini aiti difrenti pisi fu a kontren dati.

A de krin fu si taki den 14 gemeente di seti na ini a kontren dati, sa gro. Fu eksempre, wan tu yari pasa Dimas nanga Gisela, wan trowpaar di de spesrutu pionier, ben musu go dini na ini wan pikin gemeente fu sowan 40 sma. A gemeente disi de na ini a kontren Tobobe di de krosibei fu a sesyoro. Den ben musu go-kon furu leisi nanga boto fu man preiki gi den sakafasi sma di e libi na a syoro fu na Atlantisch Se, èn a no ben makriki gi den fu kon gwenti a sani dati. Dimas nanga Gisela ben kon si taki te a watra fu a se tiri, dan wantewante dati kan kenki fu di bigi skwala e kon di kan meki a boto kanti. Furu tron den anu nanga den baka ben e hati den, baka te den ben pari boto go fu a wan dorpu na a trawan. Wan tra tyalensi di den ben abi, na taki den ben musu leri a tongo di den sma drape e taki. Ma fu di den du muiti èn fu di den horidoro, meki taki na ini 2001, sowan 552 sma kon na a Memrefesa fu Krestes dede.

Abrasei fu Tobobe yu abi a dorpu Punta Escondida. Wan pisi ten kaba, wan pikin grupu preikiman fu a dorpu dati, ben gwenti fu pari boto go na abrasei te a weer ben moi. Den ben e go na den konmakandra na ini Tobobe, èn soleki fa a sori dan wan nyun gemeente kan seti na ini a kontren disi. Fu di dati de so, meki Dimas nanga Gisela ben musu go dini na Punta Escondida. A no teki tu yari, di a grupu na ini Punta Escondida kon tron wan gemeente fu 28 preikiman, èn sowan 114 sma e kon arki na alawiki publikitaki. Na ini 2004 a nyun gemeente disi ben prisiri di 458 sma ben kon na a Memrefesa fu a dede fu Krestes.

Den Kotoigi e yepi sma di no man leisi èn skrifi

Furu opregtisma leri leisi èn skrifi, èn a sani dati yepi den fu kisi wan bun banti nanga Yehovah. Na dati pasa nanga Fermina, wan yongu uma di e libi na ini a kontren fu a comarca pe furu bergi de. Den zendeling di ben e wroko na ini a farawe kontren pe a e libi ben kon si  taki a ben e poti ala en prakseri na a Kownukondre boskopu. Di den aksi en efu a ben wani studeri Bijbel, dan a taigi den taki a wani kon sabi moro. Ma wan problema ben de. Fermina ben e taki Spanyorotongo nanga Ngoberetongo, ma a no ben man leisi èn skrifi den tongo disi. Wan fu den zendeling ben wani leri en fu leisi èn skrifi, nanga yepi fu a brochure Du Muiti fu Leisi èn fu Skrifi. *

Fermina ben de wan bun studenti, a ben e sreka ensrefi bun gi den les, èn a ben du muiti fu leisi èn skrifi na a yoisti fasi. Na ini wán yari ten, a go na fesi so bun taki a ben man studeri a brochure Yu Kan De Gado Mati! * Di sani ben seti fu hori konmakandra, dan Fermina bigin go na den. Ma fu di a famiri fu Fermina ben pôti so te, meki a ben muilek srefisrefi gi en fu pai fu go na den konmakandra makandra nanga den pikin fu en. Wan fu den pionier di ben sabi a situwâsi fu Fermina, aksi en fu san ede a no e meki krosi di den uma fu a Ngobe pipel gwenti fu weri, so taki a kan seri den. Fermina teki a rai fu a pionier, èn aladi a ben abi tra sani fanowdu, toku a sorgu taki a e gebroiki a moni dati soso fu go na den Kresten konmakandra. Now en nanga en osofamiri froisi go na wan tra kontren, èn a e tan go na fesi na yeye fasi. Den breiti taki den man leisi èn skrifi now, ma san e gi den moro prisiri na taki den kon sabi Yehovah.

Den Kotoigi e yepi sma di dofu

Na ini Panama, furu sma e syen te wan memre fu na osofamiri fu den dofu. Son leisi, den dofuwan disi no kisi nowan enkri skoroleri. Furu dofuwan e firi leki den de den wawan, èn den e firi leki sma no e teri den. Dati e kon fu di sma e feni en muilek srefisrefi fu taki nanga den.

Fu dati ede, den Kotoigi kon si taki den abi fu du wan sani fu meki den dofuwan kon sabi a bun nyunsu. Di wan kring-opziener gi den gemeente a deki-ati fu leri a Dofusma-tongo fu Panama, dan wan grupu fayafaya pionier èn sosrefi tra preikiman bigin du dati. A muiti di den ben meki ben abi bun bakapisi.

Na a kabapisi fu a yari 2001, wan dofusma-tongo grupu ben seti na ini Panama City. Sowan 20 sma ben e kon na den konmakandra. Fu di den brada nanga sisa ben kon sabi fa fu taki a tongo dati moro bun, meki den ben man preiki gi furu sma di ben kon sabi a Bijbel waarheid na ini den eigi tongo fu a fosi leisi. Furu Kotoigi di abi pikin di dofu ben bigin kon tu na den konmakandra, èn den kon si taki den pikin fu den man frustan den Bijbel leri moro makriki. Boiti dati, den pikin fu den ben kon abi moro faya gi a waarheid. Furu tron, papa nanga mama ben e leri a dofusma-tongo fu man taki moro bun nanga den pikin fu den. Na so papa nanga mama ben man yepi den pikin fu gro na yeye fasi, èn den ben kon si taki den kon abi wan moro tranga banti na ini na osofamiri. Na ondrofenitori  fu Elsa nanga en umapikin Iraida e sori a sani disi krin.

Wan Kotoigi di ben e wroko nanga a dofusma-tongo grupu, ben yere fu Iraida. A Kotoigi ben go na en èn a gi en a brochure Njan Boen Foe Tégo Foe A Libi Na Grontapoe! * Iraida trutru ben lobi den sani di a ben man leri fu den fowtow di ben abi fu du nanga a nyun grontapu. A Kotoigi bigin studeri a brochure nanga en. Di den kaba studeri a brochure dati, dan den studeri a brochure San Gado e aksi foe wi? * Na a ten dati Iraida bigin aksi en mama fu yepi en fu sreka gi a studie èn fu fruklari den sani gi en di skrifi na ini a brochure.

Elsa ben abi tu problema: Fu di a no ben de wan Kotoigi meki a no ben sabi Bijbel waarheid, èn a no ben e frustan dofusma-tongo. Sma ben taigi en taki a no musu taki dofusma-tongo nanga en umapikin, ma taki en umapikin ben musu leri taki. Leki bakapisi fu dati, Elsa nanga en umapikin no ben man frustan makandra bun. A ben naki Elsa en ati so te taki Iraida aksi en fu yepi en, èn fu dati ede Elsa aksi wan Kotoigi na ini a gemeente fu studeri nanga Iraida. Elsa ben taki: „Na fu a bun fu mi umapikin meki mi aksi taki a kisi studie, fu di noiti ete mi si taki Iraida ben lobi wan sani so te.” Elsa ben de makandra nanga en umapikin te a ben e studeri, èn a ben e leri a dofusma-tongo tu. Di Elsa poti moro prakseri na en umapikin, dan den bigin frustan makandra moro bun. Iraida bigin luku moro bun sortu sma a ben e teki leki en mati, èn a bigin abi demakandra nanga a gemeente. Now Elsa nanga en umapikin e go na den Kresten konmakandra doronomo. No so langa pasa Elsa teki dopu, èn Iraida e go na fesi moi tu so taki ensrefi kan teki dopu te fu kaba. Elsa e fruteri taki now fosi a e kon sabi en umapikin èn taki now den man taki fu furu prenspari sani di den ala tu e warderi.

Na ini april 2003, a dofusma-tongo grupu tron wan gemeente, di abi now 50 Kownukondre preikiman, èn moro sma leki dati e kon na den gemeente konmakandra. Pikinmoro afu fu den sma disi dofu. Tra dofusma-tongo grupu e seti na ini dri foto di de dorosei fu a bigi foto Panama City. Aladi furu de fu du ete gi den dofusma, toku a no de fu taki dati den Kotoigi du bun furu fu meki den opregti dofusma kon leri sabi Yehovah Gado, a lobi-ati Mekiman fu den.

Den sani disi e sori krin san e pasa na ini Panama. Aladi den sma na ini a kondre dati de fu difrenti kulturu, den e taki difrenti tongo, èn den kweki na difrenti fasi, toku furu fu den kon de na ini wánfasi na ini na anbegi fu a wan-enkri tru Gado. A tru taki den difrenti tongo di sma e taki na ini a kondre disi, e meki taki sma no man frustan makandra so bun. Toku den sma na ini a kondre disi, di de leki „a broki fu grontapu”, kon sabi a waarheid fu Yehovah en Wortu.—Efeisesma 4:4.

[Futuwortu]

[Karta na tapu bladzijde 8]

(Efu yu wani si pe den sani disi skrifi, luku a tijdschrift)

KRIBISI SE

PANAMA

Tobobe

STILLE OCEAAN

Panama Kanaal

[Prenki na tapu bladzijde 8]

Umasma fu a Kuna pipel e hori moi pisi krosi di den meki

[Prenki na tapu bladzijde 9]

Wan zendeling e preiki gi wan uma fu a Ngobe pipel

[Prenki na tapu bladzijde 10]

Kotoigi fu Ngobe e go na ini wan boto fu go na wan spesrutu dei konmakandra

[Prenki na tapu bladzijde 11]

Aladi sma na ini Panama de fu difrenti kulturu èn e taki difrenti tongo, toku den kon sabi a waarheid fu Bijbel

[Prenki na tapu bladzijde 12]

A Waktitoren-studie na ini dofusma-tongo

[Prenki na tapu bladzijde 12]

Elsa nanga en umapikin Iraida, man taki bun nanga makandra fu prenspari sani

[Sma di abi a reti fu a prenki na tapu bladzijde 8]

Ship and Kuna women: © William Floyd Holdman/Index Stock Imagery; village: © Timothy O’Keefe/Index Stock Imagery