A doro na ati fu wan pikin

OITI yu firi sari fu di yu si wan pikin-nengre e prei nanga preisani di abi fu du nanga orloku? Na ala sei yu kan si yonguyongu pikin, e prei nanga den sortu sani disi. A sani disi e pasa, fu di furu fu den sani di sma kan luku noso arki tapu telefisi, radio nanga computer na sani di abi fu du nanga ogridu. Fa yu ben o yepi wan pikin-nengre fu no prei nanga sani di e leri en fu feti, ma nanga sani di e leri en fu suku vrede? Waltraud, wan Yehovah Kotoigi di e dini leki zendeling na ini Afrika someni yari langa kaba, ben man yepi wan pikin boi nanga a tori disi.

Waltraud ben musu froisi go na wan tra kondre na ini Afrika, fu di orloku ben de na ini a kondre pe a ben e libi. Di a ben de na ini Afrika, a bigin studeri nanga wan uma di ben abi wan manpikin fu feifi yari. Ibri leisi te a ben e go na a uma disi, a ben e si a boi e prei nanga wan pikin plastik gon. Dati ben de a wan-enkri preisani di a boi ben abi. Noiti Waltraud si a boi e meki leki a wani sutu wan sani. Ma ala ten a boi disi ben e meki neleki a lai a gon nanga kugru.

Waltraud taigi a boi: „Werner, yu sabi fu san ede mi e libi na ini a kondre fu yu? Na fu di orloku ben de na ini a kondre fu mi. Mi ben musu lowe komoto na mi eigi kondre, fu di wan tu man ben e sutu tapu tra sma nanga gon di gersi a di fu yu. Yu denki taki a bun te sma e sutu trawan so?”

Werner piki nanga wan sari sten: „Nôno, a no bun.”

Waltraud piki en: „Yu abi leti.” Baka dati a aksi a boi: „Yu sabi fu san ede mi e kon na yu nanga yu mama ibri wiki? Na fu di Yehovah Kotoigi wani yepi sma fu abi wan bun matifasi nanga Gado, èn fu libi na ini vrede nanga tra sma.” Waltraud taigi en moro fara: „Efu yu gi mi a gon fu yu, dan mi o trowe en gowe. Ma mi sa sorgu taki yu kisi wan pikin truck nanga fo banti, fu prei nanga en.” A mama fu a boi ben agri nanga dati.

Werner gi Waltraud a gon fu en. Werner ben musu wakti fo wiki langa, ma te fu kaba a kisi a nyun preisani fu en. A ben de wan pikin truck di meki fu udu. A boi ben breiti nanga a nyun preisani fu en.

Yu e teki a ten fu taki nanga den pikin fu yu? Yu e pruberi fu doro na ati fu den, so taki den e trowe den preisani fu den di gersi fetisani di sma e gebroiki na ini orloku? Efu yu e du dati, dan yu e leri den wan sani di sa tyari wini kon gi den, den heri libi langa.