A situwâsi fu den pôtiwan na ini a ten disi

NOFO TRON yu kan si Vicente * na tapu den strati fu São Paulo, na ini Brasyonkondre, pe a e hari wan wagi di lai nanga someni sani. A e piki sani soleki karton, pisipisi isri, nanga plastik sani. Te neti e fadon, a e poti wan pisi karton na ondro a wagi fu en, èn a e go didon sribi na tapu a karton. A gersi leki a no e yere a babari fu den oto nanga den bus di e rèi pasa doronomo na ini a strati pe a e sribi. Fosi, a ben abi wan wroko, wan oso, nanga wan osofamiri, ma now a lasi ala den sani dati. Now, pinapina a e hori ensrefi na libi nanga a pikinso moni di a e meki na strati.

A de wan sari sani taki na heri grontapu milyunmilyun sma de di pôti srefisrefi, neleki Vicente. Na ini pôti kondre, furu sma musu libi na strati noso na ini bakabini. Nofo tron yu kan si sma e begi moni drape, namku malengrisma, brenisma, nanga umasma di e gi den pikin fu den bobi. Na den verkeerfaya, pikin-nengre e lon na mindri den oto di stop, fu di den e pruberi fu meki moni nanga den switisani di den e seri, awansi na pikinso moni nomo.

A muilek fu fruklari fu san ede sma musu pina so. Wan tijdschrift fu Ingrisikondre ben taki: „Noiti ete, libisma ben sabi so furu fu datratori leki now. Boiti dati, den sabi tu fa fu meki ala sortu kefalek sani, èn den abi bun furu koni. Fu dati ede libisma ben o musu man tyari wan kaba kon na pôtifasi” (The Economist). A no de fu taki dati furu sma kisi wini fu a koni disi. Na ini wan tu pôti kondre yu kan si furu kefalek nyun oto e rèi na tapu den strati fu den bigi foto. Bigi wenkri lai nanga kefalek nyun wrokosani di e meki a libi moro makriki gi sma, èn furu sma de di wani bai den sani disi. Na ini Brasyonkondre, yu abi tu presi pe furu wenkri de, èn na den presi disi wenkriman ben e meki reklame fu seri spesrutu sani. Den wenkri disi ben opo heri neti, fu 23 december te go miti 24 december 2004. Na wan fu den presi disi den wenkriman ben yuru sma fu dansi samba, soso fu hari sma kon na a wenkri fu den. A sani disi meki taki pikinmoro 500.000 sma kon na den wenkri!

 Ma toku, furu sma no e kisi wini fu a moni di den gudusma abi. A bigi difrenti di de na mindri gudusma nanga pôtisma, meki taki furu sma kon si taki a de fanowdu fu tyari wan kaba kon na pôtifasi. Wan tijdschrift fu Brasyonkondre ben taki: „A moro prenspari sani di den grontapu tiriman musu taki fu en a yari disi [2005], na fa den o tyari wan kaba kon na pôtifasi” (Veja). A tijdschrift ben taki sosrefi fu a prakseri di sma abi fu seti wan nyun Marshall Plan, nanga a marki fu yepi den moro pôti kondre, spesrutu den wan na ini Afrika. * Aladi a gersi leki den sani disi di sma abi na prakseri fu du, o waka bun, toku a srefi tijdschrift disi e taki tu: „Sma abi furu reide tu fu tweifri efu den sani disi o waka bun trutru. Efu a de so taki furu kondre no wani gi moni fu yepi den pôti kondre, dan nofo tron dati e kon fu di a moni no e doro den sma di musu kisi dati.” A de wan sari sani taki a moro bigi pisi fu a moni di tirimakti, bigi organisâsi, nanga sma e gi, no e doro den sma di abi dati fanowdu trutru. Dati e kon fu di furu sma kruka, èn fu di wan lo wet de di e meki taki sma no man kisi a moni makriki.

Yesus ben sabi taki pôtifasi ben o de ala ten. A ben taki: „Den pôtisma de nanga unu ala ten” (Mateyus 26:11). Ma disi wani taki dati ala ten pôtifasi ben o de na grontapu? Wan lusu de gi a problema dati? San Kresten kan du fu yepi den pôtiwan?

[Futuwortu]