Dini Krestes, a kownu, na wan loyaal fasi

„Na en den ben gi tirimakti nanga wartifasi nanga wan kownukondre, so taki den pipel, den grupu fu ala kondre nanga tongo, den alamala ben sa dini en.”—DANIÈL 7:14.

1, 2. Fa wi du sabi taki Krestes no bigin tiri leki Kownu abra heri grontapu na ini 33 G.T.?

YU DENKI taki wan tiriman de di ben o man dede gi den sma di a e tiri, èn di ben o man kon na libi baka fu tiri leki kownu? Sortu kownu ben o man libi na grontapu wan pisi ten fu sori den sma di a e tiri fu san ede den kan frutrow na en tapu èn fu san ede den kan de loyaal na en, èn baka dati a e go tiri na ini hemel? A wan-enkri sma di ben kan du disi èn di ben kan du someni tra sani tu, na Yesus Krestes (Lukas 1:32, 33). Baka di Krestes dede, dan a kisi wan opobaka èn a go na hemel. Na a Pinksterfesa fu 33 G.T., Gado „meki a tron edeman fu ala sani gi a bun fu a gemeente” (Efeisesma 1:20-22; Tori fu den Apostel 2:32-36). Na a fasi disi, Krestes kisi tirimakti, ma a ben e tiri wan pikin grupu nomo. Den fosi sma di a bigin tiri, na den Kresten di salfu nanga santa yeye, noso na Israel na yeye fasi. Bijbel e kari den salfu Kresten disi „na Israel fu Gado”.—Galasiasma 6:16; Kolosesma 1:13.

² Pikinmoro 30 yari baka a Pinksterfesa fu 33 G.T., na apostel Paulus ben sori tu taki Krestes no ben e tiri leki Kownu abra heri grontapu ete, ma taki a ben e „sidon na a reti-anusei fu Gado”. ’Sensi a ten dati, a wakti teleki Gado meki den feanti fu en tron leki wan bangi gi en futu’ (Hebrewsma 10:12, 13). Èn na a kaba fu a fosi yari hondro G.T., na owru apostel Yohanes ben si na ini wan fisyun san ben o pasa bakaten. A ben si taki Yehovah, a Moro Hei Tiriman, poti Krestes Yesus leki Kownu fu a nyun Kownukondre na hemel (Openbaring 11:15; 12:1-5). Te wi e luku san pasa na ini a ten disi, dan wi e si nofo buweisi di e sori taki Krestes bigin tiri leki Mesias Kownu na ini hemel na ini a yari 1914. *

3. (a) Sensi 1914 wi e preiki wan tra prenspari sani di abi fu du nanga a bun nyunsu fu a Kownukondre. San na a sani dati? (b) Sortu aksi wi kan poti gi wisrefi?

³ Iya, sensi 1914, wi bigin preiki fu ete wan tumusi moi sani di abi fu du nanga a bun nyunsu fu a Kownukondre. Wi e preiki taki Krestes bigin tiri fayafaya leki Kownu fu Gado en hemel Kownukondre, aladi a e du dati ’na mindri den feanti fu en’ (Psalm 110:1, 2; Mateyus 24:14; Openbaring 12:7-12). Ma na heri grontapu, den getrow bakaman fu en e saka densrefi na ondro a makti fu en. Dati meki den e du wan wroko di noiti no du bifo, namku taki den e gi sma leri nanga yepi fu Bijbel na heri grontapu (Danièl 7:13, 14; Mateyus 28:18). Kresten di salfu nanga santa yeye èn di de „manpikin fu a kownukondre”, e dini leki „boskopuman di e teki presi gi Krestes”. Wan bigi grupu „tra skapu” fu Krestes, di e saka densrefi tu na ondro Gado Kownukondre, e horibaka na wan getrow fasi gi den salfu Kresten disi (Mateyus 13:38; 2 Korentesma 5:20; Yohanes 10:16). Ma toku ibriwan fu wi musu aksi wisrefi efu wi e saka wisrefi trutru na ondro Krestes. Wi de ala ten loyaal na en? Fa wi kan sori taki wi de loyaal na wan Kownu di e tiri na ini hemel? Meki wi go luku fosi fu san ede wi musu de loyaal na Krestes.

 Wan Kownu di e gi sma deki-ati fu de loyaal na en

4. San Yesus du na grontapu di a no ben tiri ete leki Kownu?

⁴ Wi de loyaal na Krestes fu di wi e warderi den sani di a du èn fu di wi e warderi den moi fasi fu en (1 Petrus 1:8). Di Yesus ben de na grontapu, a no ben tiri leki Kownu ete. Ma den sani di a du na a ten dati, e sori san en leki Kownu fu heri grontapu o du te a dei fu Gado doro. A gi nyanyan na den sma di ben abi angri. A dresi den sikisma, den brenisma, den malengrisma, den dofusma, nanga den babawsma. A gi wan tu sma wan opobaka srefi (Mateyus 15:30, 31; Lukas 7:11-16; Yohanes 6:5-13). Na tapu fu dati, te wi sabi fa Yesus ben de di a ben libi na grontapu, dan wi o kon sabi fa a o tyari ensrefi te a o tiri grontapu na ini a ten di e kon. A moro moi wan fu den fasi fu en, na a bigi lobi di a sori gi trawan sondro fu prakseri ensrefi nomo (Markus 1:40-45). Napoléon Bonaparte ben taki fu a lobi fu Yesus: „Aleksander, Caesar, Karel a Bigiwan, nanga mi, seti bigi kownukondre. Ma fa wi ben kan du dati? We, wi gebroiki makti. Yesus Krestes na a wan-enkri sma di seti en kownukondre nanga yepi fu lobi, èn te nanga now milyunmilyun sma de klariklari fu dede gi en.”

5. Fu san ede furu sma ben lobi a fasi fa Yesus ben de?

⁵ Yesus ben abi safri-ati nanga sakafasi. Dati meki den sma di ben lasi-ati èn di ben musu tyari hebi lai ben kisi krakti baka fu den leri fu en èn fu a fasi fa a ben de (Mateyus 11:28-30). Pikin-nengre no ben frede fu go na Yesus. Man di ben abi sakafasi èn di ben man si suma Yesus ben de trutru, ben tron disipel fu en (Mateyus 4:18-22; Markus 10:13-16). A fasi fa a ben e poti prakseri na sma èn a lespeki di a ben abi gi sma, ben meki taki umasma di ben abi frede gi Gado, ben de loyaal na en. Furu fu den uma disi ben e meki furu muiti, den ben e gebroiki den ten nanga den gudu fu yepi Yesus te a ben e du a diniwroko fu en.—Lukas 8:1-3.

6. Sortu dipi firi Yesus sori di Lasarus dede?

⁶ Krestes ben sori den moro dipi firi fu en di en lobi mati Lasarus dede. Di a si fa Maria nanga Marta ben e sari srefisrefi, a no ben man hori ensrefi moro, a soktu dipi, èn a „bigin krei”. A situwâsi „ben kon hebi gi en trutru”. A ben sari srefisrefi, aladi a ben sabi taki heri esi a ben o meki Lasarus kon na libi baka. Ma na a lobi nanga a sari-ati fu en meki taki a gebroiki a makti di Gado gi en èn a gi Lasarus wan opobaka.—Yohanes 11:11-15, 33-35, 38-44.

7. Fu san ede a fiti taki wi de loyaal na Yesus? (Luku a faki tu na tapu bladzijde 31.)

⁷ Te wi e luku o furu lobi Yesus ben abi gi san bun èn te wi e luku fa a ben e tegu gi hoigrifasi nanga ogridu, dan dati e meki wi kisi bigi lespeki gi en. Tu tron a sori deki-ati di a puru den gridi seriman na ini a tempel (Mateyus 21:12, 13; Yohanes 2:14-17). Boiti dati, di a ben de wan libisma na grontapu, dan ensrefi ben kisi ala sortu tesi. Na so fasi, ensrefi ben ondrofeni den tesi nanga den problema di wi abi (Hebrewsma 5:7-9). Yesus srefi ben ondrofeni fa a de te sma no lobi yu èn te sma e handri na wan krukafasi nanga yu (Yohanes 5:15-18; 11:53, 54; 18:38–19:16). Te fu kaba, a sori taki a abi deki-ati di a gi pasi taki sma kiri en na wan ogri-ati fasi. Na so fasi a du san en Tata ben wani èn a opo a pasi gi den sma na en ondro fu kisi têgo libi (Yohanes 3:16). Den fasi disi fu Krestes e gi yu deki-ati fu tan dini en na wan loyaal fasi, a no so? (Hebrewsma 13:8; Openbaring 5:6-10). Ma fa wan sma kan tron wan borgu fu Krestes en Kownukondre?

San wan sma musu du fu tron wan borgu fu Krestes en Kownukondre

8. Sortu markitiki wan sma musu doro fu tron wan bakaman fu Krestes?

⁸ Prakseri na agersitori disi: Efu wan sma wani tron wan borgu fu wan tra kondre, dan furu tron a sma musu doro wan tu prenspari markitiki. Den sma di wani tron borgu fu a kondre, musu tyari densrefi na wan bun fasi èn den no musu abi son siki. Na a srefi fasi, borgu fu Krestes en Kownukondre musu tyari densrefi na wan fasi di fiti, èn den musu gosontu na yeye fasi.—1 Korentesma 6:9-11; Galasiasma 5:19-23.

9. Fa wi kan sori taki wi de loyaal na Krestes?

⁹ Yesus Krestes abi a reti tu fu fruwakti taki den bakaman fu en musu de loyaal na en èn na a Kownukondre fu en. Den e sori taki den de loyaal na en te den e libi soleki fa a leri den di a ben de na  grontapu èn di a no ben de Kownu ete. Fu eksempre, den no e feti baka gudu, ma den e poti Kownukondre afersi èn a wani fu Gado, na a fosi presi na ini den libi (Mateyus 6:31-34). Den e meki tranga muiti tu fu tyari densrefi neleki fa Krestes ben tyari ensrefi, srefi te den de na ini muilek situwâsi (1 Petrus 2:21-23). Boiti dati, den bakaman fu Krestes e du bun gi trawan, neleki fa Krestes ben e du dati.—Mateyus 7:12; Yohanes 13:3-17.

10. Fa wi kan sori taki wi de loyaal na Krestes na ini (a) na osofamiri èn (b) na ini a gemeente?

¹⁰ Den bakaman fu Yesus e sori taki den de loyaal na en, te den e pruberi fu sori den srefi fasi fu Yesus na ini na osofamiri libi. Fu eksempre, masra e sori taki den de loyaal na a hemel Kownu fu den, te den e handri nanga den wefi èn nanga den pikin fu den neleki fa Krestes ben o du dati (Efeisesma 5:25, 28-30; 6:4; 1 Petrus 3:7). Den wefi e sori taki den de loyaal na Krestes, te den e tyari densrefi na wan krin fasi èn te den „abi wan tiri èn safri fasi” (1 Petrus 3:1-4; Efeisesma 5:22-24). Pikin e sori taki den de loyaal na Krestes, te den e gi yesi na den papa nanga mama, neleki fa Yesus ben du dati. Di Yesus ben yongu, dan a ben tan gi yesi na en papa nanga mama, awinsi den no ben de volmaakti (Lukas 2:51, 52; Efeisesma 6:1). Na wan loyaal fasi, den bakaman fu Krestes e meki tranga muiti fu ’firi gi tra sma, fu lobi den brada fu den, èn fu sori sari-ati gi trawan’. Den e pruberi fu de neleki Krestes, di ’abi sakafasi, èn di no pai ogri nanga ogri, noso di no kosi sma te den ben e kosi en’.—1 Petrus 3:8, 9; 1 Korentesma 11:1.

Den bakaman fu Krestes e gi yesi na den wet fu en

11. Na sortu wet den bakaman fu Krestes e gi yesi?

¹¹ Sma di wani tron borgu fu wan tra kondre e gi yesi na den wet fu a kondre dati. Na a srefi fasi, den bakaman fu Krestes kan gi yesi na „a wet fu Krestes”, te den e du san Yesus leri den, èn san a komanderi den (Galasiasma 6:2). Den e gi yesi spesrutu na „a moro hei wet”, namku taki den musu lobi makandra (Yakobus 2:8). San den wet disi wani taki?

12, 13. Fa wi e gi yesi na „a wet fu Krestes” na wan getrow fasi?

¹² Den bakaman fu Krestes no volmaakti èn den e meki fowtu (Romesma 3:23). Fu dati ede, den musu tan meki muiti fu ’lobi den brada sondro fu hoigri’. Dati wani taki dati den musu ’lobi makandra komoto fu a dipi fu den ati’ (1 Petrus 1:22). „Te wan sma feni taki wan trawan du en wan ogri”, dan na wan loyaal fasi Kresten e gi yesi na a wet fu Krestes di e taki dati den musu ’tan frudrage makandra èn e gi makandra pardon nanga den heri ati’. Te den e gi yesi na a wet disi, dan dati o yepi den fu no poti prakseri na den fowtu fu trawan. Ma na presi fu dati, den o suku bun sani di e meki den kisi lobi gi makandra. Na wan loyaal fasi, den sma disi e gi yesi na wi lobi-ati Kownu èn den e sori lobi, a „volmaakti banti di e meki sma kon de wán”. Yu no breiti taki yu kan de nanga den sma disi?—Kolosesma 3:13, 14.

 ¹³ Boiti dati, Yesus ben sori taki a lobi di a abi, bigi moro a lobi di furu sma abi gi makandra (Yohanes 13:34, 35). Efu wi lobi soso den wan di lobi wi, dan wi no e du wan „spesrutu sani”. Te wi e du dati, dan wi no e sori lobi soleki fa Yesus leri wi. Yesus gi wi a deki-ati fu teki na eksempre fu en Tata. Yehovah wani taki wi musu sori lobi srefi gi den feanti fu wi di abi bita-ati gi wi èn di e frufolgu wi (Mateyus 5:46-48). A lobi disi e meki taki den wan di e saka densrefi na ondro a Kownukondre, kan tan du a moro prenspari wroko fu den na wan getrow fasi. San na a wroko dati?

Bakaman fu Krestes musu tan loyaal awinsi den e kisi tesi

14. Fu san ede a preikiwroko de so prenspari?

¹⁴ Den sma di e saka densrefi na ondro Gado Kownukondre na ini a ten disi, abi a tumusi prenspari wroko fu „gi kotoigi finifini fu a kownukondre fu Gado” (Tori fu den Apostel 28:23). A de tumusi prenspari taki den e du a wroko disi, fu di a Mesias Kownukondre o meki taki ala sma kon sabi taki Yehovah abi a reti fu tiri hemel nanga grontapu (1 Korentesma 15:24-28). Te wi e preiki a bun nyunsu, dan den wan di e arki wi e kisi na okasi fu saka densrefi na ondro Gado Kownukondre. Wan tra sani na taki a fasi fa sma e handri te den yere a boskopu, kan meki taki Krestes, a Kownu, o strafu den, noso taki a o gi den têgo libi (Mateyus 24:14; 2 Tesalonikasma 1:6-10). Dati meki, wán fu den moro prenspari fasi fa wi kan sori taki wi de loyaal na Krestes, na te wi e gi yesi na a komando di a gi wi fu fruteri trawan fu a Kownukondre.—Mateyus 28:18-20.

15. Fu san ede a o muilek gi Kresten fu tan loyaal?

¹⁵ A tru taki Satan e du ala san a man fu gens a preikiwroko, èn libisma tiriman no e si Krestes leki a sma di Gado poti leki Kownu (Psalm 2:1-3, 6-8). Fu dati ede, Yesus warskow den disipel fu en: „Wan srafu no bigi moro en masra. Efu den frufolgu mi, dan den o frufolgu unu tu” (Yohanes 15:20). Dati meki den bakaman fu Krestes de na ini wan feti na yeye fasi pe den musu sori efu den o tan loyaal.—2 Korentesma 10:3-5; Efeisesma 6:10-12.

16. Fa den sma di e saka densrefi na ondro a Kownukondre, e „pai Gado den sani di de fu Gado”?

¹⁶ Ma toku, den wan di e saka densrefi na ondro Gado Kownukondre, e tan loyaal na a Kownu fu den di den no man si, èn na a srefi ten den e sori lespeki gi libisma tirimakti (Titus 3:1, 2). Yesus ben taki: „Pai Caesar den sani di de fu Caesar, ma pai Gado den sani di de fu Gado” (Markus 12:13-17). Fu dati ede, den bakaman fu Krestes e gi yesi na den wet fu lanti, solanga den wet dati e kruderi nanga den wet fu Gado (Romesma 13:1-7). Wan leisi, a hei krutubangi fu den Dyu ben meki wan wet di no e kruderi nanga den wet fu Gado, fu di den komanderi den disipel fu Yesus fu no preiki moro. Ma nanga deki-ati èn na wan lespeki fasi den disipel taigi den: „Fu di Gado na wi tiriman, meki wi musu gi yesi na en na presi fu libisma.”—Tori fu den Apostel 1:8; 5:27-32.

17. Fu san ede wi kan abi a dyaranti taki wi man tan loyaal na Krestes, awinsi wi e kisi tesi?

¹⁷ A no de fu taki dati den bakaman fu Krestes musu abi deki-ati fu man tan loyaal na a Kownu fu den, te den e kisi frufolgu. Ma toku Yesus ben taki: „Koloku fu unu te sma e gi unu porinen èn te den e frufolgu unu, aladi den e lei èn e taki ala sortu ogri fu unu, fu mi ede. Un musu breiti èn prisiri pasa marki, fu di unu o kisi wan bigi pai na hemel” (Mateyus 5:11, 12). Den bakaman fu Krestes na ini a fosi yarihondro ben si taki den wortu disi tru. Srefi di den kisi fonfon fu di den ben tan preiki fu a Kownukondre, toku den ben e prisiri „fu di den ben warti nofo fu kisi syen fu Yesus nen ede. Ibri dei den ben e tan gi sma leri na ini a tempel èn na ibri oso, èn den ben e fruteri sma a bun nyunsu fu Yesus, a Krestes” (Tori fu den Apostel 5:41, 42). Wi e prèise unu, fu di unu e tan loyaal tu te unu e kisi problema, te unu siki, te lobiwan fu unu dede, noso te unu e kisi frufolgu.—Romesma 5:3-5; Hebrewsma 13:6.

18. San den sani di Yesus taigi Pontius Pilatus, wani taki gi wi?

 ¹⁸ Di Yesus no ben tron Kownu ete, dan a ben sori Granman Pontius Pilatus fu Rome: „Mi kownukondre no de fu a grontapu disi. Efu mi kownukondre ben de fu a grontapu disi, dan den dinari fu mi ben o feti, so taki den Dyu no ben o kisi mi. Ma soleki fa mi taki kaba, dan mi kownukondre no de fu a grontapu disi” (Yohanes 18:36). Fu dati ede, den wan di e saka densrefi na ondro a hemel Kownukondre no e teki prati na orloku, èn den no e teki sei na iniwan feti fu libisma. Fu di den de loyaal na a „Granman fu Vrede”, meki den no e teki sei na nowan feti fu grontapu.—Yesaya 2:2-4; 9:6, 7.

Den wan di e tan loyaal, sa kisi blesi fu têgo

19. Fu san ede den bakaman fu Krestes kan abi a howpu taki sani o waka bun nanga den na ini a ten di e kon?

¹⁹ Den wan di e tan loyaal na Krestes, a „Kownu fu den kownu”, abi a howpu taki sani o waka bun nanga den na ini a ten di e kon. Den e wakti a ten te Krestes o tiri grontapu leki kownu, komoto fu hemel (Openbaring 19:11–20:3; Mateyus 24:30). Den loyaal „manpikin fu a kownukondre” di de na grontapu ete èn di salfu nanga santa yeye, e wakti nanga prisiri teleki den kisi a tumusi moi grani fu tiri leki kownu makandra nanga Krestes na ini hemel (Mateyus 13:38; Lukas 12:32). Den „tra skapu” di de loyaal na Krestes, e wakti nanga prisiri teleki a Kownu fu den sa taigi den: ’Un kon, unu di mi Tata blesi, èn teki a Paradijs grontapu di a kownukondre sa tiri, èn di sreka gi unu sensi a ten di grontapu seti’ (Yohanes 10:16; Mateyus 25:34). Fu dati ede, meki ala den borgu fu a Kownukondre, teki a fasti bosroiti fu tan dini Krestes, a Kownu, na wan loyaal fasi.

[Futuwortu]

Yu kan tyari disi kon na krin?

• Fu san ede a fiti taki wi e tan loyaal na Krestes?

• Fa den bakaman fu Krestes e sori taki den de loyaal na en?

• Fu san ede wi musu de loyaal na Krestes, wi Kownu?

[Aksi fu a tori disi]

[Faki na tapu bladzijde 31]

TRA MOI FASI FU KRESTES

A no e teki sei—Yohanes 4:7-30.

A abi sari-ati—Mateyus 9:35-38; 12:18-21; Markus 6:30-34.

A lobi fu en e meki taki a e du sani gi trawan sondro fu denki ensrefi nomo—Yohanes 13:1; 15:12-15.

A de loyaal—Mateyus 4:1-11; 28:20; Markus 11:15-18.

A e firi gi trawan—Markus 7:32-35; Lukas 7:11-15; Hebrewsma 4:15, 16.

A e fiti ensrefi na sma—Mateyus 15:21-28.

[Prenki na tapu bladzijde 29]

Te wi e sori lobi gi makandra, dan na wan loyaal fasi wi e gi yesi na „a wet fu Krestes”

[Prenki na tapu bladzijde 31]

Den fasi fu Krestes e gi yu deki-ati fu dini en na wan loyaal fasi?