Skapuman di de wan „eksempre gi den skapu”
Skapuman di de wan „eksempre gi den skapu”
’Luku den skapu fu Gado di a gi unu fu sorgu. Du dati nanga prisiri, èn du en tu fu di unu e angri fu dini trawan. Un musu tron eksempre gi den skapu.’—1 PETRUS 5:2, 3.
1, 2. (a) Sortu frantwortu Yesus ben gi na apostel Petrus èn fu san ede Yesus ben abi leti fu frutrow tapu Petrus? (b) Fa Yehovah e denki fu den owruman di musu luku en skapu?
WAN pisi ten bifo a Pinksterfesa fu 33 G.T., Petrus nanga siksi tra disipel ben demakandra nanga Yesus na a syoro fu a Se fu Galilea. A mamanten dati, Yesus sreka wan nyanyan gi den, èn den disipel ben e nyan makandra nanga en. Disi no ben de a fosi leisi di Petrus si Yesus, baka di a kisi wan opobaka, èn a no de fu taki dati Petrus ben breiti trutru taki Yesus de na libi. Ma a kan taki Petrus ben e fredefrede pikinso tu, bika wan tu dei na fesi, a ben fruteri tra sma taki a no sabi Yesus kwetikweti (Lukas 22:55-60; 24:34; Yohanes 18:25-27; 21:1-14). Yesus ben piri-ai gi Petrus fu di a no sori bribi? Nôno. Petrus ben abi berow. Na presi fu piri-ai gi Petrus, Yesus gi en a frantwortu fu gi den „pikin skapu” nyanyan, èn fu sorgu gi den (Yohanes 21:15-17). Te wi e leisi na ini Bijbel fa sani waka nanga a Kresten gemeente na ini a fosi yarihondro, dan wi e si taki Yesus ben abi leti fu frutrow tapu Petrus. Makandra nanga den tra apostel èn den owruman na ini Yerusalem, Petrus tiri a Kresten gemeente na ini wan pisi ten di den kisi hebi tesi èn di a gemeente ben e gro esi.—Tori fu den Apostel 1:15-26; 2:14; 15:6-9.
2 Nanga yepi fu Yesus Krestes, Yehovah gi lepi brada na ini a ten disi a frantwortu fu dini leki owruman. Den brada disi de leki skapuman di e tiri den skapu fu Gado, na ini a moro tranga ten sensi libisma de na grontapu (Efeisesma 4:11, 12; 2 Timoteyus 3:1). Yu denki taki a de wan bun sani taki Gado bosroiti fu gi den brada disi a bigi frantwortu dati? Iya, a vrede di de na mindri den Kresten brada nanga sisa na heri grontapu, e buweisi taki a de wan bun sani. A tru taki den owruman disi e meki fowtu, neleki fa Petrus ben e meki fowtu (Galasiasma 2:11-14; Yakobus 3:2). Ma toku, Yehovah e frutrow taki den o sorgu bun gi den skapu di „a bai nanga a brudu fu en eigi Manpikin” (Tori fu den Apostel 20:28). Yehovah lobi den brada disi trutru, èn a wani taki den kisi „dobru grani”.—1 Timoteyus 5:17.
3. Owruman de klariklari fu dini trawan èn den e du dati nanga den heri ati. San e yepi den fu kan tan du dati?
3 Owruman de klariklari fu dini trawan èn den e du dati nanga den heri ati tu. Na so fasi den de wan eksempre gi na ipi. Ma san e yepi den fu kan tan du dati? Neleki Petrus nanga den tra owruman fu a fosi yarihondro, den owruman disi e frutrow tapu a santa yeye fu Gado. A santa yeye disi e gi den a krakti di den abi fanowdu fu tyari a bigi frantwortu di den kisi (2 Korentesma 4:7). Nanga yepi fu santa yeye, den kan sori den froktu fu a yeye, namku lobi, prisiri, vrede, langa pasensi, bun-ati, bunfasi, bribi, safri-ati, den man dwengi densrefi (Galasiasma 5:22, 23). Meki wi go luku wan tu eksempre di owruman e gi na ini a fasi fa den e sori den froktu fu a yeye, aladi den e sorgu gi na ipi fu Gado.
No lobi na ipi nomo, ma lobi ibriwan fu den skapu fu na ipi
4, 5. (a) Fa Yehovah nanga Yesus e sori lobi gi na ipi? (b) Gi wan tu eksempre di e sori fa den owruman e sori lobi gi na ipi.
4 A moro prenspari froktu fu a yeye fu Gado, na lobi. Yehovah e gi na ipi fu en furu leri komoto fu Bijbel. Na so fasi a e sori lobi gi na heri ipi (Yesaya 65:13, 14; Mateyus 24:45-47). Ma a no e gi leri na a heri ipi wawan. Yehovah lobi ibriwan fu den skapu, èn a e broko en ede nanga den (1 Petrus 5:6, 7). Yesus lobi na ipi tu. A dede gi na ipi, èn a sabi ’a nen’ fu ibriwan fu den skapu.—Yohanes 10:3, 14-16.
5 Owruman e teki na eksempre fu Yehovah nanga Yesus. Fu di den lobi a heri ipi fu Gado, meki den ’e tan du muiti fu gi leri’ na a gemeente. Den lezing fu den di abi fu du nanga Bijbel tori, de leki nyanyan gi na ipi. Den sani di den skapu e leri na ini den lezing disi, na fu kibri den. Ala sma kan si a tranga wroko fu den owruman disi (1 Timoteyus 4:13, 16). San sma no e si, na a papirawroko di den e du, den brifi di den e skrifi, den schema di den e meki, èn den someni tra sani di den e du fu sorgu taki den gemeente konmakandra nanga den tra afersi fu a gemeente e waka „na wan fasi di fiti èn soleki fa sani seti” (1 Korentesma 14:40). Furu fu den wroko disi di owruman e du, sma no e si, èn furu tron sma no e prèise den fu den wroko disi. Den owruman e du a wroko disi fu di den abi lobi trutru.—Galasiasma 5:13.
6, 7. (a) San owruman kan du fu kon sabi den brada nanga sisa na ini a gemeente moro bun? (b) Fu san ede a bun son leisi fu fruteri wan owruman fa wi e firi?
6 Lobi-ati Kresten owruman e meki muiti fu poti prakseri na ibri sma na ini a gemeente (Filipisma 2:4). Wán fasi fa owruman kan kon sabi den brada nanga sisa fu a gemeente moro bun, na fu wroko makandra nanga den na ini a preikiwroko. Furu tron, Yesus ben de nanga den bakaman fu en te a ben e du a preikiwroko, èn a ben e gebroiki den okasi dati fu gi den deki-ati (Lukas 8:1). Wan lepi Kresten owruman ben taki: „Mi si taki wan fu den moro bun sani di yu kan du fu kon sabi wan brada noso sisa moro bun èn fu gi en deki-ati, na fu wroko makandra nanga en na ini a preikiwroko.” Kande na ini a syatu pisi ten di pasa, yu no kisi na okasi ete fu go na ini a preikiwroko nanga wan fu den owruman fu yu gemeente. Yu no denki taki a ben o bun fu sreka sani fu du dati heri esi?
7 Fu di Yesus ben lobi den bakaman fu en, meki a ben e prisiri te den ben e prisiri, ma a ben e sari tu te den ben e sari. Fu eksempre, Yesus ben seni 70 disipel fu en fu go preiki. Di den drai kon baka, den ben prisiri. Dati meki Yesus srefi ben „prisiri pasa marki” (Lukas 10:17-21). Ma na wan tra okasi, Yesus ben si fa Maria, den famiri fu Maria, nanga den mati fu en ben e sari fu di Lasarus dede. Ne „Yesus bigin krei” (Yohanes 11:33-35). Na a srefi fasi, lobi-ati owruman na ini a ten disi e prisiri èn e sari makandra nanga den memre fu a gemeente. Fu di den abi lobi, meki den e „prisiri nanga sma di e prisiri” èn den e „krei nanga sma di e krei” (Romesma 12:15). Te yu e prisiri, noso te wan sani e meki yu firi sari, dan no frede fu fruteri Kresten owruman fa yu e firi. Te den e yere fa yu e prisiri, dan dati e gi den deki-ati (Romesma 1:11, 12). Te den sabi sortu tesi e meti yu, dan den o man gi yu deki-ati èn den o man trowstu yu.—1 Tesalonikasma 1:6; 3:1-3.
8, 9. (a) Fa wan owruman ben sori lobi gi a wefi fu en? (b) O prenspari a de taki wan owruman e sori lobi gi na osofamiri fu en?
8 A fasi fa wan owruman e handri nanga en eigi osofamiri, e sori fa a lobi a gemeente (1 Timoteyus 3:1, 4). Te wan owruman di trow e sori lobi nanga lespeki gi a wefi fu en, dan a de wan eksempre gi tra masra (Efeisesma 5:25; 1 Petrus 3:7). Luku san Linda, wan Kresten uma, e taki. A masra fu en dini leki owruman moro leki 20 yari langa. Now a dede. Linda e taki: „Ala ten mi masra ben abi furu wroko fu du na ini a gemeente. Ma a ben gi mi a firi taki mi ben de wan bigi yepi gi en. Furu tron a ben e taigi mi fa a e warderi a fasi fa mi ben e horibaka gi en. Èn te a no ben abi wroko fu du gi a gemeente, dan wi ben e abi switi momenti nanga makandra. Den sani disi ben e meki mi firi taki a lobi mi, èn mi no ben e dyarusu te a ben e du den frantwortu fu en na ini a gemeente.”
9 Wan Kresten owruman di abi pikin, sa de wan eksempre gi tra papa nanga mama, te a e gi den pikin fu en trangaleri na wan lobi-ati fasi èn te a e prèise den doronomo (Efeisesma 6:4). Fu taki en leti, te wan owruman e sori lobi gi na osofamiri fu en, dan dati e buweisi dorodoro taki a fiti fu tyari a frantwortu di Gado gi en nanga yepi fu santa yeye.—1 Timoteyus 3:4, 5.
Taki nanga makandra fu tyari vrede nanga prisiri kon na un mindri
10. (a) San kan pori a prisiri nanga a vrede fu a gemeente? (b) Sortu problema ben kan pori a vrede na ini a gemeente fu a fosi yarihondro, èn fa den brada lusu a problema disi?
10 Santa yeye kan meki taki wan Kresten abi vrede nanga prisiri na ini en ati. A kan sorgu tu taki vrede nanga prisiri de na mindri owruman, èn na ini a heri gemeente. Ma te sma no e taki krin nanga makandra, dan dati kan pori a prisiri nanga a vrede disi. Kownu Salomo ben taki: „Sani no sa waka bun te sma no e taki nanga makandra na wan frutrow fasi” (Odo 15:22). Ma te sma e taki krin nanga makandra èn te den e taki na wan lespeki fasi, dan dati kan tyari prisiri kon èn a kan meki taki den e libi bun nanga makandra. Fu eksempre, di den brada na ini a fosi yarihondro ben e haritaki fu a tori fu a besnijdenis, dan a grupu brada na ini Yerusalem di ben e tiri a wroko, ben e pruberi fu si san a santa yeye ben wani sori den. Den ben e taki tu fa den ben e prakseri fu a tori. Baka di den taki krin fu a tori, den teki wan bosroiti. Di den brada disi seni brifi gi den difrenti gemeente fu sori taki den alamala ben e horibaka gi a bosroiti di den teki, dan den brada nanga sisa ben e ’prisiri fu di den ben kisi deki-ati’ (Tori fu den Apostel 15:6-23, 25, 31; 16:4, 5). Na so fasi, prisiri nanga vrede ben de na mindri den brada nanga sisa.
11. Fa owruman kan meki taki prisiri nanga vrede de na ini a gemeente?
11 Na ini a ten disi, owruman e taki krin nanga makandra so taki a gemeente kan abi prisiri nanga vrede. Te problema de di kan pori a vrede fu a gemeente, dan den e kon na wan fu taki fu a tori, èn den e taki krin fa den e prakseri fu a tori. Na wan lespeki fasi, den e arki san den tra owruman e taki (Odo 13:10; 18:13). Baka te den aksi Gado fu tiri den nanga santa yeye, dan den e teki wan bosroiti di e kruderi nanga Bijbel gronprakseri èn nanga den rai di „a getrow èn koni srafu” skrifi na ini den buku fu den (Mateyus 24:45-47; 1 Korentesma 4:6). Te den owruman teki wan bosroiti di e kruderi nanga Bijbel gronprakseri, dan ibri owruman e horibaka gi a bosroiti dati, awinsi a e denki tra fasi fu a tori. Na so fasi den e meki a santa yeye tiri den. Te den e wroko nanga makandra na ini sakafasi, dan dati e tyari prisiri nanga vrede kon, èn den e gi a gemeente wan moi eksempre fa den musu waka nanga Gado (Mika 6:8). Yu e horibaka gi den owruman fu a gemeente te den teki wan bosroiti akruderi Bijbel gronprakseri?
Abi langa pasensi nanga switifasi
12. Fu san ede Yesus ben musu abi langa pasensi nanga switifasi gi den apostel fu en?
12 Yesus ben abi langa pasensi nanga switifasi gi den apostel, aladi den ben e meki a srefi fowtu ibri tron baka. Fu eksempre, ibri tron baka Yesus ben e pruberi fu sori den o prenspari a de fu abi sakafasi (Mateyus 18:1-4; 20:25-27). A lasti neti di Yesus ben de na grontapu, a ben wasi den futu fu sori den san a wani taki fu abi sakafasi. Ma a srefi neti dati, „den bigin meki wan bigi trobi suma fu den ben de a moro bigiwan” (Lukas 22:24; Yohanes 13:1-5). San Yesus du? A rigeri nanga den apostel? Nôno, ma na wan switi fasi a taki-go-taki-kon nanga den. A taigi den: „Suma moro bigi: a wan di e sidon na tafra, noso a wan di e dini trawan? A no a wan di e sidon na tafra? Ma mi de na un mindri leki a wan di e dini unu” (Lukas 22:27). Te fu kaba a langa pasensi, a switifasi, nanga a bun eksempre fu Yesus, ben doro na ati fu den apostel.
13, 14. O ten a de tumusi prenspari taki owruman musu sori switifasi?
13 Na so a kan pasa tu taki, wan owruman musu gi rai doronomo na wan sma di e meki a srefi fowtu ibri tron baka. Na owruman kan mandi nanga a sma. Ma te na owruman musu ’warskow a sma di no e tyari ensrefi soleki fa a fiti’, dan a e hori na prakseri taki a e meki fowtu tu. Na so fasi a o man sori langa pasensi nanga switifasi na en brada nanga sisa, èn gi owruman srefi, neleki fa Yesus nanga Yehovah e sori den fasi disi na ala Kresten.—1 Tesalonikasma 5:14; Yakobus 2:13.
14 Son leisi, owruman sa musu gi trangaleri na wan sma di du wan seryusu sondu. Efu a sma no e sori berow, dan den owruman sa musu puru so wan sma na ini a gemeente (1 Korentesma 5:11-13). Toku, a fasi fa den e handri nanga a sma, e sori taki den no e hori a sma na ati, ma taki den e tegu gi a sondu di a sma du (Yudas 23). Te den owruman e handri na wan switi fasi, dan dati kan meki en moro makriki gi so wan sma fu drai kon baka na a gemeente.—Lukas 15:11-24.
Bribi e meki taki wi e du bun wroko
15. Kari wán fasi fa owruman e sori bunfasi neleki Yehovah, èn fu san ede den e du dati?
15 „Yehovah bun gi ala sma”, srefi gi den wan di no e warderi den sani di a e du gi den (Psalm 145:9; Mateyus 5:45). Wán fu den moro prenspari fasi fa Yehovah e sori a bunfasi fu en, na taki a e seni a pipel fu en fu preiki ’a bun nyunsu fu a kownukondre’ (Mateyus 24:14). Owruman e sori bunfasi neleki Gado, fu di den e teki fesi na ini a preikiwroko disi. Fu san ede den e tan meki so furu muiti? Fu di den abi tranga bribi na ini Yehovah èn na ini den pramisi fu en.—Romesma 10:10, 13, 14.
16. Fa owruman kan „du bun” gi den brada nanga sisa na ini a gemeente?
16 Boiti taki owruman e „du bun gi ala sma” nanga yepi fu a preikiwroko, den abi a frantwortu fu du bun „spesrutu gi den wan di de na ini a srefi bribi leki [den]” (Galasiasma 6:10). Wán fasi fa den e du disi, na taki den e fisiti den brada nanga sisa fu gi den deki-ati. Wan owruman ben taki: „Mi lobi fu fisiti den brada nanga sisa na oso fu gi den deki-ati. Na den okasi dati mi kan prèise den gi a muiti di den e du, èn mi kan yepi den fu kon frustan taki wi e warderi a tranga wroko fu den.” Son leisi, owruman kan gi wan sma rai fu yepi en fu go na fesi na ini a diniwroko fu Yehovah. Te den owruman e du dati, dan a bun taki den e teki na eksempre fu na apostel Paulus. Luku fa a ben gi deki-ati na den brada nanga sisa na ini Tesalonika: „Wi de seiker taki unu sa du den sani di wi e taigi unu fu du èn taki unu sa tan du den” (2 Tesalonikasma 3:4). Te owruman e sori na a fasi disi taki den e frutrow tapu den brada nanga sisa, dan dati e gi a gemeente deki-ati, èn a moro makriki gi den brada nanga sisa fu „gi yesi na den wan di e teki fesi” (Hebrewsma 13:17). Te den owruman gi yu deki-ati fu di den fisiti yu na oso, dan yu kan sori den taki yu e warderi dati.
Yu musu man dwengi yusrefi fu kan sori safri-ati fasi
17. San Yesus ben leri Petrus?
17 Yesus ben abi safri-ati fasi, srefi te sma ben e spotu en (Mateyus 11:29). Di sma ben tori Yesus èn di den ben teki en leki strafuman, dan a ben sori safri-ati fasi, èn a ben dwengi ensrefi trutru. Petrus ben atibron srefisrefi, èn dati meki a hari wan feti-owru gi wan srudati èn a koti en yesi puru. Ma Yesus ben memre en: „Yu denki taki mi no man aksi mi Tata fu gi mi moro leki twarfu bigi legre engel nownowde?” (Mateyus 26:51-53; Yohanes 18:10) Petrus ben frustan san Yesus ben wani leri en, èn bakaten a memre tra Kresten: „Krestes ben nyan pina gi unu èn a libi wan eksempre gi unu, so taki unu kan waka soifri na en baka. . . . Te sma ben e kosi en, dan a no ben e kosi den baka. Te a ben e nyan pina, dan a no ben e taigi den sma taki a ben o du den ogri.”—1 Petrus 2:21-23.
18, 19. (a) O ten a prenspari trutru taki owruman e sori switifasi nanga langa pasensi? (b) Na sortu aksi wi sa poti prakseri?
18 Efu owruman wani tyari a frantwortu fu den na wan bun fasi, dan den musu abi safri-ati fasi tu te trawan e du sani nanga den di no switi. Fu eksempre, kande wan tu sma di den e suku fu yepi na ini a gemeente, no e teki a rai fu den. Kande den owruman kan gi rai na wan sma di abi yepi fanowdu. Ma fu di a sma swaki na yeye fasi, meki a kan ’taki sondro fu denki, neleki a e dyuku sma nanga wan feti-owru’ (Odo 12:18). Ma neleki Yesus, owruman no e taigi a sma hati sani baka, èn den no e du sani fu hati en tu. Na presi fu dati, den e hori densrefi èn den sori lobi ete. Te fu kaba, dati kan de wan blesi gi a sma di abi yepi fanowdu (1 Petrus 3:8, 9). Yu e teki na eksempre fu den owruman? Yu e sori switifasi nanga langa pasensi te yu e kisi rai?
19 A no de fu taki dati Yehovah nanga Yesus e warderi a wroko di den dusundusun owruman na heri grontapu e du nanga den heri ati. Yehovah nanga en Manpikin abi trutru lobi tu gi den dusundusun dinari ini a diniwroko di e horibaka gi den owruman disi ’di e dini den santawan’ (Hebrewsma 6:10). Ma fu san ede son dopu brada e tweifri fu meki muiti fu du a „tumusi bun wroko” disi? (1 Timoteyus 3:1). Èn fa Yehovah e gi leri na den wan di a e poti leki owruman? Wi sa poti prakseri na den aksi disi na ini a tra artikel.
Yu e memre disi ete?
• Kari wan tu fasi fa owruman e sori lobi gi a gemeente?
• Fa ala brada nanga sisa kan meki taki prisiri nanga vrede de na ini a gemeente?
• Fu san ede owruman abi langa pasensi èn fu san ede den e sori switifasi te den e gi rai?
• Fa owruman e sori taki den abi bunfasi, èn taki den abi bribi?
[Aksi fu a tori disi]
[Prenki na tapu bladzijde 18]
Owruman e dini a gemeente fu di den abi lobi
[Prenki na tapu bladzijde 18]
Den e meki prisiri makandra nanga na osofamiri fu den . . .
. . . èn den e go na ini a preikiwroko makandra nanga den
[Prenki na tapu bladzijde 20]
Te owruman e taki bun nanga makandra, dan dati e tyari prisiri nanga vrede kon na ini a gemeente