Yehovah e leri skapuman fa fu tiri na ipi fu en
Yehovah e leri skapuman fa fu tiri na ipi fu en
„Yehovah srefi e gi koni; na en e gi sabi nanga koni fu man si sani krin e komoto.”—ODO 2:6.
1, 2. Fu san ede dopu brada e meki muiti fu kisi moro frantwortu na ini a gemeente?
NICK, di e dini leki owruman sowan seibi yari kaba, e taki: „Mi ben breiti trutru di mi tron wan owruman. Mi ben si a grani disi leki wan okasi fu du moro gi Yehovah. Mi ben firi taki mi ben musu sori warderi gi ala den sani di a du gi mi. Mi ben wani yepi sosrefi den brada nanga sisa fu a gemeente so furu leki mi man. Mi ben wani yepi den na a srefi fasi fa den tra owruman yepi mi.” Ma aladi Nick ben breiti nanga a grani fu en, toku a ben e broko en ede nanga wan tu sani. A e taki: „Fu di mi no ben doro 30 yari ete di mi tron wan owruman, meki mi ben frede taki mi no ben o abi a frustan nanga a koni fu teki fesi na ini a gemeente na wan bun fasi.”
2 Furu sani de di kan meki den wan di Yehovah poti fu sorgu gi a gemeente fu en, de koloku. Na apostel Paulus ben gebroiki den wortu fu Yesus, fu sori den owruman fu Efeise san na wán fu den sani di e gi koloku. A ben taki: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Dopu brada di e dini leki dinari ini a diniwroko èn leki owruman, abi moro okasi fu du sani gi Yehovah èn gi a gemeente. Fu eksempre, dinari ini a diniwroko e wroko makandra nanga den owruman. Den dinari disi e du someni tra prenspari wroko di e teki furu ten. Na fu di den brada disi abi lobi gi Gado èn gi tra sma, meki den e du a prenspari wroko disi.—Markus 12:30, 31.
3. Fu san ede son brada kan tweifri fu du muiti fu kisi frantwortu na ini a gemeente?
3 Kande wan dopu brada e tweifri fu tron dinari noso owruman, fu di a e denki taki a no o man du a wroko. A kan taki a e broko en ede taki a no abi a koni fu man du a wroko fu wan owruman, na wan bun fasi, neleki fa Nick ben e broko en ede. Yu na wan fu den dopu brada disi di abi den srefi firi disi? A no fowtu fu broko yu ede nanga den sani disi, fu di Yehovah sa aksi frantwortu na den owruman fu a fasi fa den e tiri a gemeente. Yesus ben taki: „Efu wan sma kisi furu sani, dan den o aksi furu fu en tu; efu den poti wan sma fu luku furu sani, dan den o aksi moro fu en moro leki san den gwenti.”—Lukas 12:48.
4. Fa Yehovah e yepi den wan di a gi a frantwortu fu sorgu gi den skapu fu en?
4 Yu denki taki Yehovah e fruwakti taki den wan di a e poti leki dinari èn leki owruman musu tyari a frantwortu den wawan? Nôno. Na presi fu dati, a e yepi den fu tyari a frantwortu, èn a e yepi den tu fu du a wroko fu den na wan bun fasi. Soleki fa wi ben taki na ini a fosi artikel, dan Yehovah e gi den a santa yeye di e yepi den fu abi den fasi di de fanowdu fu sorgu gi a gemeente (Tori fu den Apostel 20:28; Galasiasma 5:22, 23). Boiti dati, Yehovah e gi den koni, sabi, nanga koni fu man si sani krin (Odo 2:6). Fa a e du disi? Meki wi poti prakseri na dri fasi fa Yehovah e leri den dinari nanga den owruman fu sorgu gi a gemeente fu en.
Lepi owruman e leri tra brada fu du a wroko
5. Fa a du kon taki Petrus nanga Yohanes ben de bun skapuman?
5 Na wán okasi, den apostel Petrus nanga Yohanes ben e tanapu na fesi a Sanhedrin, pe den sokari koni krutuman fu den Dyu ben de. Den krutuman disi ben e si den apostel leki sma di ’no ben kisi furu skoro, èn leki man di de neleki ala tra sma’. A no de so taki Petrus nanga Yohanes no ben man leisi, ma den no ben go na den kefalek skoro pe den Dyu ben kisi leri fu Hebrew Buku. Ma toku Petrus, Yohanes, nanga den tra disipel ben de bun leriman, fu di den ben man yepi furu fu den sma di ben e arki den, fu tron bribiman. Fa den man disi di no ben go na den kefalek skoro, ben tron so bun leriman? Baka di den krutuman arki Petrus nanga Yohanes, dan „den kon si taki den man disi ben gwenti fu de nanga Yesus” (Tori fu den Apostel 4:1-4, 13). A tru taki den ben kisi santa yeye (Tori fu den Apostel 1:8). Ma a ben de krin fu si tu taki Petrus nanga Yohanes ben kisi leri fu Yesus. Srefi den krutuman di no ben e frustan a leri fu Gado, ben kan si dati. Di Yesus ben de nanga den apostel na grontapu, a no ben leri den nomo fa fu meki sma tron skapu fu en, ma a ben leri den tu fa den musu sorgu gi den sma disi te den kon na ini a gemeente.—Mateyus 11:29; 20:24-28; 1 Petrus 5:4.
6. Fa Yesus nanga Paulus gi wan eksempre na ini a fasi fa den ben e leri trawan fu tyari a frantwortu fu den?
6 Baka di Yesus kisi wan opobaka, a ben tan leri den wan di kisi a frantwortu fu dini leki owruman, fa den musu tiri a gemeente (Openbaring 1:1; 2:1–3:22). Fu eksempre, ensrefi ben poti Paulus leki apostel, èn a ben sorgu taki Paulus ben kisi leri fu du a wroko fu en (Tori fu den Apostel 22:6-10). Paulus ben warderi a leri di a ben kisi, èn a ben e sori tra owruman san a ben leri (Tori fu den Apostel 20:17-35). Fu eksempre, a ben teki en ten èn a ben meki furu muiti fu leri Timoteyus fu de „wan wrokoman di no abi fu syen fu noti” na ini a diniwroko fu Gado (2 Timoteyus 2:15). Den tu brada disi ben tron bun mati. Na ini wan brifi, Paulus ben taki fu Timoteyus: „Neleki fa wan pikin de nanga en papa, na so a ben wroko tranga nanga mi, so taki a bun nyunsu ben kan go na fesi” (Filipisma 2:22). Paulus no ben suku fu meki Timoteyus noso tra sma, tron disipel fu en. Na presi fu dati, a ben gi tra bribiman a deki-ati fu ’waka baka na eksempre fu en, neleki fa ensrefi ben e waka baka na eksempre fu Krestes’.—1 Korentesma 11:1.
7, 8. (a) Sortu ondrofenitori e sori taki a bun te owruman e teki na eksempre fu Yesus nanga Paulus? (b) O ten owruman musu bigin leri brada fa fu du a wroko fu wan dinari ini a diniwroko, èn fu wan owruman?
7 Neleki Yesus nanga Paulus, lepi owruman e meki ten fu leri dopu brada fu du a wroko, èn den abi bun bakapisi tu. Luku na eksempre fu Chad. A kweki na ini wan osofamiri pe a no ala sma ben de anbegiman fu Yehovah. Ma no so langa pasa, a tron wan owruman. A e taki: „Na ini den yari di pasa, wan tu owruman yepi mi fu go na fesi na yeye fasi. Fu di mi papa no ben de wan Yehovah Kotoigi, meki den owruman dati ben e poti furu prakseri na mi, èn den ben de leki papa gi mi. Den ben teki a ten fu leri mi fa fu du a diniwroko fu mi, èn bakaten, wan fu den owruman leri mi fa fu du den difrenti wroko di mi ben abi na ini a gemeente.”
8 Neleki fa na ondrofenitori fu Chad e sori, dan koni skapuman e gi leri na den brada di kan tron dinari noso owruman. Èn langa ten bifo den brada disi doro den markitiki fu tron dinari noso owruman, den skapuman e bigin yepi den. Fu san ede disi de prenspari? Fu di Bijbel e sori taki wan brada no e tron dinari ini a diniwroko noso owruman wantronso. Bifo a kisi a grani dati, a musu abi a gwenti kaba fu tyari ensrefi na wan krin fasi èn a musu de wan lepi Kresten tu. Owruman musu „luku fosi efu den man disi bun nofo fu du a wroko”.—1 Timoteyus 3:1-10.
9. Sortu frantwortu lepi owruman abi, èn fu san ede den musu du dati?
9 A fiti fu leri dopu brada fa fu tyari frantwortu na ini a gemeente, bifo yu luku efu den bun nofo fu du a wroko. Fu eksempre: Kon meki wi taki dati wan skoromeester e aksi wan skoropikin fu meki wan muilek repetitie. Yu denki taki a pikin o man meki a repetitie efu a skoromeester no ben leri en fa fu du dati? We, a no de fu taki dati a no o man meki en. Dati meki a skoromeester musu leri en. Ma wan bun leriman no o leri a pikin wawan fa fu meki a repetitie, ma a o leri en tu fa fu gebroiki den sani di a leri. Na a srefi fasi, owruman di e wroko fayafaya, e yepi dopu brada fu doro den markitiki fu tron dinari ini a diniwroko nanga owruman. Den e leri den brada disi fa fu du spesrutu sani. Owruman no e du disi fu di den wani nomonomo taki a brada musu tron owruman noso dinari, ma fu di den wani leri a brada tu fa fu sorgu gi a gemeente (2 Timoteyus 2:2). A no de fu taki dati dopu brada musu meki tranga muiti tu fu doro den markitiki fu dini leki dinari noso owruman (Titus 1:5-9). Toku a de so taki den brada disi kan go na fesi moro esi, efu lepi owruman de klariklari fu yepi den di e du muiti fu go na fesi.
10, 11. Fa owruman kan yepi trawan fu go na fesi so taki den kan kisi moro grani?
10 San na wan tu sani di lepi owruman kan du fu leri trawan fa fu tyari frantwortu na ini a gemeente? We, a fosi sani di den kan du, na fu poti prakseri na den brada disi na ini a gemeente, fu di den e wroko doronomo nanga den na ini a preikiwroko, èn fu di den e yepi den fu „gebroiki a wortu fu waarheid na wan reti fasi” (2 Timoteyus 2:15). Lepi owruman e sori den brada dati sortu prisiri den kan kisi te den e dini trawan. Den kan sori den brada disi tu o furu prisiri densrefi leki owruman e kisi te den e doro den marki di den poti na ini a diniwroko. Na wan switifasi den e sori den brada tu sortu spesrutu sani den kan du moro bun, so taki den kan de ’eksempre gi na ipi’.—1 Petrus 5:3, 5.
11 Te wan brada kisi a grani fu dini leki dinari ini a diniwroko, dan lepi owruman o tan yepi a brada dati fu du a wroko moro bun. Bruce, di dini leki owruman sowan 50 yari langa, e taki: „Te wan brada tron dinari no so langa ete, dan mi lobi sidon nanga en fu luku den rai di a getrow èn koni srafu e gi. Wi e leisi den rai tu di abi fu du nanga a wroko di a brada kisi fu du na ini a gemeente. Èn mi lobi fu wroko nanga en teleki a man du den wroko fu en bun.” Te wan dinari e go na fesi, dan owruman kan leri en tu san a kan du fu gi den brada nanga sisa deki-ati te a dinari e go fisiti den makandra nanga wan tra owruman. Bruce e taki: „Te mi e tyari wan brada go na wan sma noso wan osofamiri fu gi den deki-ati, dan mi e yepi en fu suku spesrutu bijbeltekst di a kan gebroiki fu gi a sma deki-ati, noso na a osofamiri. Efu wan dinari wani tron wan bun skapuman, dan a musu leri fu gebroiki bijbeltekst na so wan fasi, taki a kan naki na ati fu a sma.”—Hebrewsma 4:12; 5:14.
12. Fa owruman di abi ondrofeni, kan yepi tra brada di tron owruman no so langa ete?
12 Brada di tron owruman no so langa ete, e kisi wini tu te trawan e tan yepi den. Nick, di wi ben taki fu en na a bigin, e taki: „Mi ben kisi kefalek bun yepi fu tu owruman di owru moro mi. Furu tron den brada disi ben frustan san den musu du na ini spesrutu situwâsi. Ala ten den ben e arki mi nanga pasensi, èn den ben e prakseri seryusu fu den sani di mi ben e taki, awinsi den no ben e agri nanga mi. Mi ben leri furu sosrefi fu a fasi fa den ben e handri nanga brada nanga sisa na ini a gemeente. Ala ten den ben e sori sakafasi nanga lespeki gi trawan na ini a gemeente. Den owruman disi ben sori mi o prenspari a de fu gebroiki Bijbel na wan koni fasi fu lusu problema na ini a gemeente, noso fu gi trawan deki-ati.”
Yepi fu Gado Wortu
13. (a) San de fanowdu efu wan brada wani tron wan bun skapuman? (b) Fu san ede Yesus no ben taki sani di ben kon fu ensrefi?
13 Iya, na ini Gado Wortu, Bijbel, yu kan feni wet, gronprakseri, nanga eksempre di kan yepi owruman fu „kon bun dorodoro èn de srekasreka fu du ibri bun wroko” (2 Timoteyus 3:16, 17). Kande wan brada kisi bun skoroleri. Ma efu a wani tron wan bun owruman, dan a musu sabi Bijbel bun èn a musu man gebroiki Bijbel bun. Luku na eksempre fu Yesus. Yesus ben abi moro sabi, moro frustan, èn moro koni, leki iniwan owruman na grontapu; toku a no ben frutrow tapu en eigi koni te a ben e gi leri na den futuboi fu Yehovah. A ben taki: „Den sani di mi e leri sma, a no fu misrefi, ma den de fu a sma di seni mi kon.” Fu san ede Yesus ben gi en hemel Tata ala grani? A e taki fu san ede a e du dati: „A sma di e taki sani di kon fu ensrefi, e suku en eigi glori.”—Yohanes 7:16, 18.
14. Fa owruman kan sorgu taki den no e suku den eigi glori?
14 Getrow owruman no e suku den eigi glori. Te den e gi rai nanga deki-ati, dan den no e gebroiki den eigi koni, ma den e gebroiki Gado Wortu. Den e frustan taki a frantwortu fu wan owruman, na fu yepi den brada nanga sisa fu „denki soleki fa Krestes e denki”, no fu denki fa den owruman e denki (1 Korentesma 2:14-16). Fu eksempre, kon meki wi taki dati wan owruman musu yepi wan trowpaar nanga problema di den abi na ini a trowlibi fu den. Te na owruman disi e gi rai, dan a musu gebroiki Bijbel gronprakseri èn den buku di a getrow èn koni srafu tyari kon na doro. A no musu gi rai akruderi den sani di a ondrofeni na ini en eigi trowlibi. Fu san ede a no musu du disi? Fu di a kan taki a rai di a e gi, o fiti soso gi sma di abi den srefi gwenti leki en, èn fu di a no sabi ala sani. A tru taki a no ala gwenti fowtu, èn a kan taki na owruman abi ondrofeni na ini a libi. Ma den brada nanga sisa e kisi moro wini te owruman e gi den deki-ati fu arki a sten fu Yesus èn fu arki den wortu fu Yehovah, na presi fu arki san libisma e taki, noso fu hori densrefi nomo na den gwenti fu a kondre.—Psalm 12:6; Odo 3:5, 6.
Yepi fu „a getrow èn koni srafu”
15. Sortu wroko Yesus gi „a getrow èn koni srafu”, èn san na wán sani di yepi den fu abi bun bakapisi nanga a wroko disi?
15 Owruman soleki na apostel Petrus, Yohanes, nanga Paulus ben de memre fu a grupu Kresten di Yesus kari „a getrow èn koni srafu” (Mateyus 24:45). A grupu disi na den brada fu Yesus na grontapu di salfu nanga santa yeye, èn di abi a howpu fu tiri makandra nanga Krestes na ini hemel (Openbaring 5:9, 10). Wi kan frustan taki na ini den lasti dei fu a sistema disi, a grupu fu den brada fu Krestes di de na grontapu ete, kon moro pikin. Ma noiti ete a wroko di Yesus gi den fu preiki a bun nyunsu fu a Kownukondre bifo a kaba kon, ben furu leki na ini a ten disi. Ma toku a srafu grupu abi tumusi moi bakapisi! Fa dati du kon? Wán fu den sani di yepi den, na taki den leri den „tra skapu” fu yepi den fu du a preikiwroko èn a leriwroko (Yohanes 10:16; Mateyus 24:14; 25:40). Na ini a ten disi, a getrow grupu disi e du a moro bigi pisi fu a wroko.
16. Fa a srafu-grupu e leri den tra brada fa fu tyari den frantwortu?
16 Fa a srafu-grupu e gi leri na den tra skapu? Na ini a fosi yarihondro, a srafu-grupu ben seni lepi brada fu poti owruman na ini den gemeente èn fu gi den leri. Èn den owruman fu den sei, ben e gi leri na den brada nanga sisa fu a gemeente (1 Korentesma 4:17). Na so a de tu na ini a ten disi. A Tiri Skin, noso a pikin grupu fu salfu owruman di e teki presi gi a srafu-grupu, e gi brada a frantwortu fu poti dinari nanga owruman na ini den dusundusun gemeente na heri grontapu, èn fu gi den leri. Boiti dati, a Tiri Skin e seti skoro fu leri brada fu a Bijkantoro Komte, opziener di e reis, owruman, nanga dinari ini a diniwroko, fa fu sorgu gi a gemeente. A srafu-grupu e gi tra leri nanga yepi fu A Waktitoren, èn nanga yepi fu tra buku, soleki a buku Wi orga fu du a wani fu Yehovah. *
17. (a) Fa Yesus sori taki a e frutrow a srafu-grupu? (b) Fa owruman kan sori taki den e frutrow a srafu-grupu?
17 Yesus abi so furu frutrow na ini a srafu-grupu, taki a gi den a frantwortu fu luku „ala den sani di a abi”, dati wani taki ala den sani na grontapu di abi fu du nanga a Kownukondre-wroko (Mateyus 24:47). Owruman e sori tu taki den e frutrow tapu a srafu-grupu, te den e gebroiki den rai di den e kisi fu a Tiri Skin. Iya, te owruman e gi leri na trawan, te den e teki leri fu Gado Wortu, èn te den e gebroiki den sani di den leri fu a srafu-grupu, dan den e sorgu taki wánfasi de na ini a gemeente. Fu tru, wi e taki Yehovah tangi fu di a gi leri na brada di lobi ibri memre fu a Kresten gemeente!
[Futuwortu]
^ paragraaf 16 Yehovah Kotoigi tyari a buku disi kon na doro.
San yu ben sa piki?
• Fa lepi owruman e leri trawan fa fu tyari frantwortu?
• Fu san ede skapuman no e gi leri akruderi den eigi denki?
• Fa owruman e sori taki den e frutrow a srafu-grupu, èn fu san ede den e du dati?
[Aksi fu a tori disi]
[Prenki na tapu bladzijde 24, 25]
Kresten owruman e leri tra yongu brada fa fu tyari a frantwortu fu den
[Prenki na tapu bladzijde 26]
„A getrow èn koni srafu” e gi bogobogo leri na owruman