„Fu di Gado na wi tiriman, meki wi musu gi yesi na en na presi fu libisma”

„A feti na fu Yehovah”

TU LEGRE e tanapu abrasei fu makandra na ini wan lagipresi. A wan legre e tanapu na a wan sei fu a lagipresi, a tra legre e tanapu na a tra sei. Fotenti dei kaba, den man fu Israel de drape èn den e frede srefisrefi. A heri pisi ten dati den e yere fa Goliat, a moro tranga fetiman fu den Filisteasma, e kosi den.—1 Samuel 17:1-4, 16.

Nanga wan tranga sten Goliat e kari den Israelsma fu kon feti nanga en. A e taki: „Un suku wan man na un mindri, meki a kon feti nanga mi. Efu a man feti nanga mi, èn a e kiri mi, dan wi o tron futuboi fu unu. Ma efu mi man wini en, èn mi e kiri en, dan unu o tron futuboi fu wi, èn un musu wroko gi wi. . . . Tide mi o lafu a legre fu Israel. We, meki wan man fu unu kon feti nanga mi dan!”—1 Samuel 17:8-10.

Na ini owruten, sma ben abi a gwenti fu seni a moro tranga srudati fu a legre fu den fu go feti nanga a moro tranga srudati fu wan tra legre. A legre fu a srudati di ben o wini a feti, na a legre dati ben o tron winiman. Ma Goliat, a man di e spotu Israel, de heri tra fasi leki tra srudati. A langa kefalek èn en skin bigi srefisrefi. A de wan ogri-ati feanti di e frede sma. Ma now di Goliat spotu a pipel fu Yehovah, a musu fruwakti taki ogri o miti en.

A feti disi no de leki den feti di den legre fu libisma gwenti feti. A de wan feti na mindri Yehovah nanga den gado fu den Filisteasma. Fu di Kownu Saul frede srefisrefi, meki a no abi a deki-ati fu seni a legre fu Israel go feti nanga den feanti fu Gado.—1 Samuel 17:11.

Wan yonguman e frutrow tapu Yehovah

Na a pisi ten di nowan fu den tu legre wani feti nanga makandra ete, wan yonguman di salfu kaba fu tron kownu fu Israel, e go luku den brada fu en di e feti na ini a legre fu Saul. A yonguman disi nen David. Te a e yere san Goliat e taki, dan a e aksi: „Suma na a Filistea man disi di no besnèi èn di e spotu a legre fu a libi Gado?” (1 Samuel 17:26) David e si Goliat leki wan sma di e horibaka gi den Filisteasma èn di e teki presi gi den gado fu den. David abi reti fu atibron. Dati meki a wani go feti nanga a bigiskin man di e anbegi falsi gado èn di e spotu Yehovah nanga Israel. Ma Kownu Saul e taki: „Yu no o man go feti nanga a Filistea man disi, fu di yu na wan boi ete.”—1 Samuel 17:33.

Saul e si sani heri tra fesi leki David! A e si David soso leki wan boi di de wan skapuman èn di wani go feti nanga wan ogri-ati man di langa srefisrefi. Ma David e si Goliat leki wan sma di e pori a nen fu Yehovah, a Moro Hei Masra. David de nanga deki-ati fu di a e bribi taki Gado sa strafu a sma di e spotu Gado nen èn a pipel fu En. Goliat e dyaf fu di a tranga, ma David e frutrow tapu Yehovah, fu di a e si a situwâsi soleki fa Gado e si en.

„Mi e waka kon miti yu na ini a nen fu Yehovah”

Wan tu sani pasa di meki taki David abi so wan bribi. A kan memre taki wan leisi di wan beer kisi wan skapu fu en, dan Gado ben yepi en fu fri a skapu disi. Gado ben yepi en tu di wan lew kisi wan tra skapu fu en. A yongu skapuman de seiker taki Yehovah o yepi en tu te a sa go feti nanga a bigiskin Filistea man disi di de wan feanti (1 Samuel 17:34-37). David abi soso wan slenger nanga feifi grati ston te a e go feti nanga Goliat.

A yongu David no e frede fu du a muilek sani disi fu di a de seiker taki Yehovah kan gi en a krakti. Nanga deki-ati a e taigi a Filistea man: „Yu e waka kon miti mi nanga wan feti-owru èn  nanga wan lansri, ma mi e waka kon miti yu na ini a nen fu Yehovah fu den legre, a Gado fu den legre fu Israel, di yu spotu. A dei disi Yehovah sa gi yu abra na mi, . . . Libisma fu heri grontapu sa sabi taki Israel abi wan Gado. Èn ala den sma disi di kon makandra sa sabi taki te Yehovah e frulusu sma, dan a no e du dati nanga feti-owru noso nanga lansri, bika a feti na fu Yehovah, èn a musu gi unu abra na wi.”—1 Samuel 17:45-47.

San na a bakapisi? A Bijbel tori e fruteri: „David di ben abi wan slenger nanga wan ston, ben tranga moro a Filistia man. A naki a Filistia man go na gron, dan a kiri en. David no ben abi nowan feti-owru” (1 Samuel 17:50). David no ben abi wan feti-owru, ma a ben abi a krakti fu feti nanga Goliat fu di Yehovah Gado ben e horibaka gi en. *

Fu tru, a no fu soso David ben e bribi taki Yehovah ben o yepi en na ini a feti dati. We, efu wi e kon na ini so wan situwâsi, dan san wi o du? Wi o frede libisma, noso wi o frutrow tapu Yehovah di abi a makti fu frulusu wi? A no de fu taki dati wi o du san skrifi na ini a tekst disi: „Wi musu gi yesi na [Gado] na presi fu libisma” (Tori fu den Apostel 5:29). Boiti dati, te wi de na ini muilek situwâsi, èn wi e si sani soleki fa Yehovah Gado e si en, dan dati sa yepi wi fu kakafutu gi problema, srefi te a gersi leki wi no man feni wan lusu gi den.

[Futuwortu]

[Faki/​Prenki na tapu bladzijde 9]

O BIGI GOLIAT BEN DE TRUTRU?

A tori na ini 1 Samuel 17:4-7 e fruteri wi taki Goliat ben langa sowan dri meter. Te a ben e feti, dan a ben e weri wan bosroko di ben meki fu pisipisi kopro èn di ben musu tapu en borsu fu a no kisi bigi mankeri. A bosroko disi e sori wi o bigi èn o tranga a Filistea man disi ben de. A bosroko ben e wegi 57 kilo! A tiki fu en lansri ben deki leki wan udu postu èn na isri penti fu a lansri disi ben e wegi seibi kilo. Te yu luku en bun, dan kande den fetisani fu Goliat ben hebi moro David srefi!