A prakseri di Gado abi gi grontapu sa kon tru heri esi

DI Adam nanga Eva ben de na ini Paradijs ete, dan Gado gi den a komando disi: „Meki pikin en kon furu, teleki unu kon lai na grontapu, èn poti grontapu na un ondro. Meki den fisi fu se, den meti di e frei na loktu, nanga ibri sortu libisani di e kroipi na grontapu, de na un ondro.”—Genesis 1:28.

A poti di den ben musu poti grontapu na den ondro, ben wani taki moro leki fu prani sani na tapu wan pikin pisi nomo fu a grontapu disi. Adam, Eva, nanga den pikin fu den ben musu meki a Paradijs kon moro bigi teleki a heri grontapu ben tron wan paradijs. Ma a fosi man nanga uma ben sondu, èn Gado puru den na ini a dyari fu Eden (Genesis 3:23, 24). Ma dati no ben wani taki dati noiti libisma ben o man poti grontapu na den ondro.

Fu di Gado sa blesi libisma di e gi yesi na en, meki den sa man poti grontapu na den ondro. Di Gado ben feni a pipel fu owruten Israel bun, dan den gron fu den ben e gi moi nyanyan, èn den froktubon fu den ben e gi switi froktu. Na den srefi sani disi o pasa te a grontapu fu wi safrisafri o tron wan paradijs. Soleki fa Gado Wortu, Bijbel, e pramisi, dan „grontapu srefi sa gi en froktu trutru; Gado, wi Gado, sa blesi wi” (Psalm 67:6). Fu taki en leti, den wei nanga den bergi fu grontapu, sosrefi den bon nanga den bromki, èn den liba nanga den se sa moi fu tru (Psalm 96:11-13; 98:7-9). A grontapu fu wi sa  lai nanga bon di e gro moi, sosrefi ala sortu kloru fowru, moi meti, nanga sma di abi switifasi.

Heri esi wan nyun grontapu o kon!

Now wi de na a mofodoro fu wan nyun grontapu di Yehovah Gado pramisi wi. „Wi e fruwakti nyun hemel nanga wan nyun grontapu, soleki fa a ben pramisi”, na so na apostel Petrus ben skrifi, „èn drape regtfardikifasi o tan” (2 Petrus 3:13). Te sma leisi den wortu fu Petrus, dan sonwan fu den kan feni taki a planeiti disi no sa tron wan paradijs noiti. Kande den e denki taki wan tra hemel nanga wan tra grontapu o kon. A sani dati tru?

San na den „nyun hemel”? Disi a no a trutru hemel di Gado ben meki (Psalm 19:1, 2). Na ini den vers na fesi, Petrus ben taki fu agersi „hemel”, namku libisma tirimakti di e tiri den sma di de na den ondro (2 Petrus 3:10-12). Den „hemel” disi no man tiri libisma na a yoisti fasi, èn den no sa de moro (Yeremia 10:23; Danièl 2:44). Den „nyun hemel” di sa kon na ini a presi fu den libisma tirimakti, na Gado en Kownukondre di abi Yesus Krestes leki Kownu, èn sosrefi den 144.000 tra memre di kisi wan opobaka na hemel fu tiri makandra nanga Yesus.—Romesma 8:16, 17; Openbaring 5:9, 10; 14:1, 3.

A „nyun grontapu” di Petrus e taki fu en, no de wan nyun planeiti. Yehovah meki grontapu na so wan fasi taki libisma sa man libi na en tapu fu têgo (Psalm 104:5). Son leisi, Bijbel e gebroiki a wortu „grontapu” te a e taki fu libisma (Genesis 11:1). A grontapu di sa kisi pori heri esi, na den sma di meki densrefi tron wan pisi fu na ogri grontapu disi. Na so a de tu taki wan grontapu fu sma di no ben e gi yesi na Gado, kisi pori na ini a Frudu fu a ten fu Noa (2 Petrus 3:5-7). Sobun, san na a „nyun grontapu”? A de wan nyun libimakandra fu sma, namku den tru anbegiman fu Gado. Den sma disi de „opregti na ini den ati” (Psalm 125:4; 1 Yohanes 2:17). Ala wet gi a „nyun grontapu” sa komoto fu den „nyun hemel”. Getrow man na grontapu sa sorgu taki sani e pasa soleki fa den wet disi taki.

Nyun kenki sa kon di moi fu tru!

A no de fu taki, dati Yehovah sorgu taki wi kisi wan tumusi moi tanpresi di a sreka grontapu fu meki libisma tan na tapu. Ensrefi ben taki dati ala wroko di a du na grontapu ben de „heri bun” (Genesis 1:31). Satan Didibri ben kisi Adam nanga Eva so fara fu opo densrefi teige Gado (Genesis 3:1-5; Openbaring 12:9). Ma heri esi Gado sa sorgu taki den opregtiwan e kisi „a trutru libi”. Dati wani taki dati den o kisi „têgo libi” na ini wan Paradijs pe ala sani o waka bun (1 Timoteyus 6:12, 19). Meki wi poti prakseri now na wan tu fu den blesi di wi sa kisi te a ten dati doro.

Na a ten fu a Dusun Yari Tiri fu Krestes, Gado sa tai Satan, èn Satan no o man pina libisma. Na apostel Yohanes e taki: „Mi si wan engel [a gran engel Mikael, noso Yesus Krestes] e saka komoto fu hemel, èn na ini en anu a ben hori a sroto fu a dipi peti di no abi gron, èn sosrefi wan bigi keti. Ne a grabu a bigi kaiman, a fosi sneki, dati na Didibri nanga Satan, èn a tai en dusun yari langa. A fringi en go na ini a dipi peti, dan a tapu a dipi peti èn a sroto en nanga wan lakstampu, so taki Didibri no ben man kori den pipel moro solanga den dusun yari no ben pasa” (Openbaring 20:1-3; 12:12). Te Satan de na ini a dipi peti, dan libisma sa kon fri fu a krakti di a abi na den tapu. Ma boiti dati, libisma sa kisi furu tra blesi tu te a Kownukondre sa tiri grontapu.

Sma no sa du ogridu moro, sma no sa pina noso kiri trawan moro, èn orloku no sa de moro. Bijbel e pramisi wi: „Ete wan syatu pisi  ten èn na ogri sma no sa de moro; èn yu sa luku seiker san na a presi pe a ben de, èn a no sa de. Ma den safri-atisma srefi sa abi grontapu leki a gudu fu den, èn trutru den sa feni switi prisiri na ini vrede di sa de pasa marki. Na den regtfardikisma srefi sa abi grontapu leki a gudu fu den, èn den sa libi na tapu fu têgo” (Psalm 37:10, 11, 29). Yehovah Gado ’sa meki feti kon na wan kaba te na a moro farawe presi fu grontapu’ (Psalm 46:9). Disi na trutru moi dyaranti taki sani sa waka bun na grontapu èn taki vrede sa de!

Bun furu switi èn gosontu nyanyan sa de fu nyan. „Aleisi sa de bogobogo na grontapu”, na so a psalm skrifiman ben e singi. „Na tapusei fu den bergi sani sa gro pasa marki” (Psalm 72:16). Na a ten dati, nowan sma sa abi fu pina fu angri.

Nowan sma sa siki. Iya, „nowan sma di e libi drape sa taki: ’Mi siki’” (Yesaya 33:24; 35:5, 6). Di Yesus Krestes ben de na grontapu, dan a meki gwasiman, lanman, nanga brenisma kon betre baka (Mateyus 9:35; Markus 1:40-42; Yohanes 5:5-9). Sobun, prakseri san a sa du na ini a nyun grontapu! Prakseri fa brenisma, dofusma, lanman, nanga babawsma sa de koloku te den kon betre baka.

Te libisma di e gi yesi e kon tron volmaakti sma, dan den no sa ondrofeni den takru bakapisi fu owrudei moro. Sma no sa abi fu weri bril moro, den no sa abi fu gebroiki wakatiki, kroku, noso rolstoel, èn ati-oso nanga dresi no sa de fanowdu moro. Sani sa de heri tra fasi te wi kon yongu baka! (Yob 33:25) Ibri neti wi sa sribi switi, èn wi sa wiki nanga nyun krakti, iya, wi sa de klariklari fu bigin wan nyun dei fu du sani di sa gi wi prisiri.

Wi ati sa prisiri te den lobiwan fu wi kisi wan opobaka (Yohanes 5:28, 29; Tori fu den Apostel 24:15). Wi sa prisiri srefisrefi fu gi wan switikon na Abel, Noa, Abraham, Sara, Yob, Moses, Rut, David, Elia, Ester, nanga furu trawan! Milyunmilyun tra sma sa kisi wan opobaka tu. Furu fu den sma disi no kon sabi Yehovah noiti, ma den sa kisi wan switikon fu sma di e angri fu meki den kon sabi moro fu Gado, fu den sani di Gado abi na prakseri, èn fu Gado en Manpikin, Yesus Krestes. Te den wan di o kisi wan opobaka e kon sabi a Mekiman fu den, dan grontapu sa kon furu trutru nanga a sabi fu Yehovah.

A moro prenspari sani, na taki wi sa man anbegi a wan-enkri tru Gado fu têgo. Wi sa abi a grani fu „dini Yehovah nanga prisiri”, èn wi sa wroko makandra na ini wánfasi te wi e bow moi oso, te wi e wroko a gron, èn te wi e poti a heri grontapu na wi ondro te fu kaba (Psalm 100:1-3; Yesaya 65:21-24). A sa de wan prisiri trutru fu libi fu têgo na ini wan moi paradijs pe ala sani e waka bun èn pe vrede de. Disi o gi glori na a santa nen fu Yehovah!—Psalm 145:21; Yohanes 17:3.

Wan lasti tesi gi a libisma famiri

Na a ten fu a Dusun Yari Tiri, Yesus sa meki ibri sma di e gi yesi, nyan bun fu den blesi di a lusu-paiman fu en e tyari kon. Te fu kaba, sondu no sa de kwetikweti moro, èn libisma sa kon tron volmaakti sma (1 Yohanes 2:2; Openbaring 21:1-4). Te den bakapisi fu a sondu fu Adam no de moro, dan a fasi fa volmaakti libisma e libi, e denki, e tyari densrefi, èn e anbegi Gado, sa de soleki fa Gado wani. Na so fasi den sa „kon na libi” dorodoro te den e  tron volmaakti sma di no abi sondu (Openbaring 20:5). A sani disi èn sosrefi grontapu di tron wan paradijs, sa gi Yehovah glori trutru!

Baka te a Dusun Yari Tiri fu Krestes kon na wan kaba, dan Satan nanga den ogri yeye fu en, sa lusu komoto na ini a dipi peti pe wan engel ben fringi den go na ini, dusun yari na fesi. Den sa lusu fu wan syatu pisi ten nomo (Openbaring 20:1-3). Den sa kisi pasi fu pruberi fu wan lasti leisi fu hari sma puru fu Gado. Aladi son sma sa meki den takru lostu fu den basi den, toku Satan no sa man meki ala sma drai baka gi Gado. Yehovah sa kiri den wan di e denki densrefi nomo, makandra nanga Satan nanga ala den ogri yeye fu en. Noiti moro ogridu o pasa na grontapu. Noiti moro ogriman sa de, èn den regtfardikiwan sa kisi têgo libi.—Openbaring 20:7-10.

Yu sa de drape?

Den wan di lobi Yehovah Gado kan abi a howpu fu de koloku fu ala ten. Têgo libi na ini wan Paradijs no sa soi kwetikweti. Fu taki en leti, o moro a ten e pasa, o moro a libi sa gi prisiri, bika a sabi fu Yehovah Gado no abi kaba (Romesma 11:33). Ala ten yu o abi wan nyun sani fu leri, èn yu sa abi bogobogo ten fu teki sabi. Fu san ede dati de so? Fu di yu no sa libi 70 noso 80 yari nomo, ma fu têgo.—Psalm 22:26; 90:10; Preikiman 3:11.

Efu yu lobi Gado, dan yu sa prisiri ala ten fu du san a wani. Na apostel Yohanes ben skrifi: „Disi na san a lobi fu Gado wani taki, dati wi e hori wisrefi na den komando fu en; ma toku den komando fu en no de wan hebi” (1 Yohanes 5:3). Sobun, efu yu wani plisi Yehovah Gado, dan no meki noti tapu yu fu du san reti. Hori na prakseri sortu tumusi moi howpu Gado Wortu, Bijbel, e gi yu. Teki a fasti bosroiti fu du san Yehovah wani, èn tan hori yusrefi na a bosroiti dati. Te yu e du dati, dan yu sa de drape te Gado o du san a abi na prakseri gi grontapu, èn te a grontapu pe wi e tan o tron wan paradijs fu têgo.

[Prenki na tapu bladzijde 4]

Den gron fu Israel ben e gi bogobogo nyanyan fu di Gado ben blesi a pipel

[Prenki na tapu bladzijde 7]

Sortu blesi yu e howpu fu kisi na ini a Paradijs?