A prisiri di wi abi te wi e du doronomo san Yehovah wani

„Na den blesi fu Yehovah e meki sma kon gudu, èn a no e meki wi firi sari.”—ODO 10:22.

1, 2. Fu san ede wi no musu poti tumusi furu prakseri na den sani di o pasa na ini a ten di e kon?

„TE WI e poti tumusi furu prakseri na a ten di e kon . . . dan dati e tapu wi fu prisiri nanga den sani di wi abi nownow kaba”, na dati wan sabiman fu Amerkankondre ben taki. Disi e pasa nanga pikin-nengre. Furu tron den e poti furu prakseri na den sani di den wani du te den tron bigisma. Disi e meki taki den no e si taki den yongu yari fu den na wan tumusi switi ten. Ma te den kon owru, a lati tumusi gi den fu kan nyan bun ete fu den yongu yari dati.

² Srefi wi leki Kotoigi fu Yehovah kan denki na a fasi disi son tron. Luku san kan pasa. Wi e angri fu a ten te Gado o meki grontapu tron wan paradijs, soleki fa a ben pramisi. Wi no man wakti fu libi na ini a ten te siki no sa de moro, te sma no sa owru moro, èn te pen nanga pina no sa de moro. A no fowtu fu fruwakti den sortu sani disi. Ma fa a ben o de efu wi ben sa poti so furu prakseri na den blesi di wi o kisi na ini a ten di e kon, taki wi no e si den blesi di Gado e gi wi nownow kaba? A ben o de wan sari sani srefisrefi! A ben o meki taki wi lasi-ati esi-esi, èn a ben o ’meki wi firi sari fu di den sani di wi ben howpu fu kisi’ no kon na a ten di wi ben prakseri (Odo 13:12). Den problema di wi e kisi na ini a libi ben kan meki wi firi sari èn brokosaka srefisrefi. Na presi taki wi ben o kakafutu gi den takru situwâsi disi, dan wi ben o bigin krutukrutu. Den sani disi no abi fu miti wi efu wi e warderi den blesi di wi e kisi nownow kaba èn efu wi e prakseri dipi fu den.

3. Na sortu sani wi o poti prakseri na ini na artikel disi?

³ „Na a blesi fu Yehovah e meki sma kon gudu, èn a no e meki wi firi sari”, na so Odo 10:22 e taki. Sani e go bun nanga na anbegi fu den disiten  futuboi fu Yehovah. Dati na wan blesi di musu gi wi prisiri, a no so? Meki wi go luku wan tu sani di e sori taki a e go bun nanga na anbegi fu wi, èn meki wi go luku sosrefi san den blesi dati wani taki gi ibriwan fu wi. Te wi e teki ten fu prakseri den furu blesi di Yehovah e gi ’regtfardikisma di e du doronomo san a wani’, dan dati sa tranga a bosroiti di wi teki fu tan dini wi hemel Tata nanga prisiri.—Odo 20:7.

Den blesi di e gi wi prisiri nownow kaba

4, 5. Sortu sani di Bijbel e leri, yu lobi srefisrefi, èn fu san ede?

⁴ Wi abi soifri sabi fu den sani di Bijbel e leri. Furu kerki fu Krestenhèit e taki dati den e bribi na ini Bijbel. Ma toku den no e agri nanga den sani di Bijbel e leri sma. Srefi memre fu a srefi kerki no e agri nanga makandra fu a fasi fa den e frustan den leri fu Bijbel. Ma a de heri tra fasi nanga den futuboi fu Yehovah! Awinsi fu sortu kondre wi de, awinsi sortu kulturu wi abi, noso awinsi fu sortu ras wi de, wi alamala e anbegi a tru Gado èn wi sabi a nen fu en. A no de so taki en na dri gado na ini wán, di sma no man frustan (Deuteronomium 6:4; Psalm 83:18; Markus 12:29). Wi sabi tu taki heri esi a sa de krin taki na Gado abi a reti fu tiri hemel nanga grontapu. Wi sabi tu taki ibriwan fu wi kan yepi fu sori taki na Gado na a moro hei tiriman, te wi e du doronomo san a e taigi wi fu du. Furu sma e bribi taki Gado e pina libisma na ini helfaya èn na tra fasi tu. Ma wi sabi san e pasa trutru nanga den dedewan, èn fu dati ede wi no e frede Gado.—Preikiman 9:5, 10.

⁵ Boiti dati, a e gi wi prisiri srefisrefi fu sabi taki libisma no komoto fu kesikesi, soleki fa sabiman e leri sma. Ma wi e bribi taki na Gado meki wi, èn taki wi meki leki a prenki fu en (Genesis 1:26; Maleaki 2:10). A psalm skrifiman ben singi a psalm disi gi Gado: „Mi sa prèise yu fu di yu meki mi na wan tumusi fruwondru fasi di e gi mi frede. Den wroko fu yu na wondruwroko, dati mi sabi heri bun.”—Psalm 139:14.

6, 7. Sortu sani di kenki na ini yu libi, noso di kenki na ini a libi fu trawan di yu sabi, ben tyari blesi kon bakaten?

⁶ Wi man wai pasi gi takru gwenti. Na radio, telefisi, nanga koranti furu warskow e gi fu den ogri di kan miti sma te sma e smoko, te den e dringi pasa marki, èn te den e libi wan morsu sekslibi. Toku furu sma no e gi yesi na den warskow disi. Ma san e pasa te wan opregti sma e leri taki a tru Gado e krutu den sortu sani disi èn taki Gado e firi sari te sma e du den sani disi? We, a no de fu taki dati den sani di a sma leri o yepi en fu no du den ogri disi moro! (Yesaya 63:10; 1 Korentesma 6:9, 10; 2 Korentesma 7:1; Efeisesma 4:30) Na a fosi presi, a no e du den sani disi moro fu di a wani plisi Yehovah Gado. Toku a e kisi tra winimarki tu, soleki wan moro bun gosontu èn wan moro bun konsensi.

⁷ Gi furu sma a muilek srefisrefi fu tapu nanga den takru gwenti fu den. Toku a de so taki, ibri yari dusundusun sma e tapu nanga den takru gwenti disi. Den e gi densrefi abra na Yehovah èn den teki dopu fu meki ala sma sabi taki den tapu nanga den sani di no e plisi Gado. Disi e gi wi alamala deki-ati trutru! Wi e kisi wan moro fasti bosroiti fu no tron srafu fu sondu èn fu no du sani di no bun gi wi.

8. Sortu Bijbel rai e yepi osofamiri fu de koloku?

⁸ Wi kan abi wan koloku osofamiri-libi. Na ini furu kondre na osofamiri-libi e go na baka. Furu trowlibi e broko, èn nofo tron a sani disi e meki den pikin sari srefisrefi. Na ini wan tu kondre na Europa, pikinmoro 20 procent fu  den osofamiri abi soso a papa, noso a mama. Fa Yehovah yepi wi fu tan du en wani na ini wi osofamiri-libi? Grantangi leisi Efeisesma 5:22–6:4, èn luku a moi rai di Gado Wortu e gi den masra, den wefi, nanga den pikin. Te wi e du san skrifi na ini den tekst disi èn na ini tra tekst na ini Bijbel, dan dati sa meki a trowlibi fu man nanga uma kon moro bun. A sa yepi papa nanga mama fu kweki den pikin na wan yoisti fasi, èn a sa meki na osofamiri firi koloku. Disi na wan blesi di e gi wi prisiri, a no so?

9, 10. Fa a fasi fa wi e si a tamara fu wi, e difrenti fu a fasi fa grontapu sma e si a tamara?

⁹ Wi de seiker taki heri esi problema no sa de moro na grontapu. Na ini a ten disi sabidensi go na fesi, sma meki ala sortu kefalek wrokosani, èn son tiriman fu kondre e du muiti trutru fu lusu den problema. Toku wan tu bigi problema fu a ten disi no lusu ete. Klaus Schwab, wan fesiman fu na organisâsi World Economic Forum, ben taki no so langa pasa taki „den problema na grontapu e kon moro furu, ma a ten di de fanowdu fu lusu den problema, e kon moro syatu”. A ben taki fu „problema di e miti sma na ini ala kondre, problema soleki ogriman di e gens den tiriman fu a kondre, a pori di sma e pori grontapu, èn ekonomia problema”. Schwab e taki te fu kaba: „Now a situwâsi na grontapu de so ogri taki ala sma musu bondru kon na wán èn du wan sani esi-esi fu lusu den problema.” Now wi e libi na ini a di fu tutenti na wan yarihondro, ma soleki fa a sori nownow kaba, dan sani no o waka bun gi libisma na ini a ten di de na wi fesi.

¹⁰ A e gi wi furu prisiri fu sabi taki Yehovah sreka sani fu lusu ala den problema fu libisma. A sani di a seti fu du dati na a Mesias Kownukondre fu Gado! Gado o gebroiki a Kownukondre disi fu meki taki „feti kon na wan kaba” èn fu meki ’vrede de pasa marki’ (Psalm 46:9; 72:7). A Kownu di Gado salfu, namku Yesus Krestes, ’sa sorgu taki den pôtiwan, den wan di e kisi kwinsi, nanga den mofinawan, sa kon fri fu pina èn fu ogridu’ (Psalm 72:12-14). Te a Kownukondre e tiri, dan nyanyan no o mankeri (Psalm 72:16). Yehovah „o figi ala watra puru na den ai, èn dede no sa de moro; nowan sari, noso krei, noso pen no sa de moro. Den fositen sani pasa gowe” (Openbaring 21:4). A Kownukondre seti kaba na ini hemel, èn heri esi a sa du san de fanowdu fu lusu ala problema na grontapu.—Danièl 2:44; Openbaring 11:15.

11, 12. (a) Wan sma kan de koloku ala ten te a e meki furu prisiri? Taki sosrefi fu san ede. (b) San e gi wan sma trutru koloku?

¹¹ Wi sabi san e meki sma de koloku trutru. San e meki wan sma de koloku trutru? Wan datra ben taki dati dri sani de fanowdu fu meki wan sma firi koloku, namku taki a musu abi prisiriten, a musu abi sani fu du (sani soleki wan wroko èn sorgu wan osofamiri), èn taki a musu abi wan marki na ini a libi (no fu kisi wini gi ensrefi nomo, ma fu du bun gi trawan). Fu den dri sani disi, a taki dati prisiriten no de so prenspari leki den trawan, èn a taki: „Disi bun fu sabi fu di furu sma e prakseri soso fa den kan meki prisiri.” San Bijbel e taki fu a tori disi?

¹² Kownu Salomo fu owruten Israel ben taki: „Mi, iya mi ben taki na ini mi ati: ’Kon now, meki mi tesi misrefi nanga sani di e gi sma prisiri. Meki mi ai si sani di bun gi mi.’ Fu taki en leti, disi ben de fu soso tu. Te sma ben e lafu, dan mi ben e taki: ’Den e law!’ èn te den ben e prisiri mi ben e taki: ’Sortu bun disi e du gi den?’” (Preikiman 2:1, 2) Soleki fa Bijbel e sori,  dan awinsi o bun wan sma e firi te a e meki prisiri, toku a prisiri dati de gi wan syatu ten nomo. Wroko kan gi wi prisiri? Wi e du a moro prenspari wroko di de fu du, namku fu preiki fu a Kownukondre èn fu meki disipel (Mateyus 24:14; 28:19, 20). Te wi e sori tra sma san Bijbel e taki fu a fasi fa den kan kisi frulusu, dan wi e du wan wroko di kan meki wi kisi frulusu, èn sosrefi den sma di e arki wi (1 Timoteyus 4:16). Fu di wi „e wroko makandra nanga Gado”, meki wi e kon si taki „wan sma sa de moro koloku te a e gi sani, leki te a e kisi sani” (1 Korentesma 3:9; Tori fu den Apostel 20:35). A wroko disi e meki taki a libi fu wi abi waarde èn a e gi a Mekiman na okasi fu piki Satan Didibri di e spotu en (Odo 27:11). Iya, Yehovah sori wi taki te wi e dini en fayafaya, dan dati sa gi wi trutru koloku fu têgo.—1 Timoteyus 4:8.

13. (a) Fu san ede wi kan taki dati a Theokrasia Diniwroko-skoro na wan blesi di e gi wi prisiri? (b) Sortu wini yu kisi fu a Theokrasia Diniwroko-skoro?

¹³ Wi e kisi prenspari leri di e yepi wi fu du wi wroko bun. Gerhard e dini leki owruman na ini wan gemeente fu Yehovah Kotoigi. A e fruteri fa sani ben de di a ben yongu: „Di mi ben yongu, mi no ben man taki bun. Te senwe ben e naki mi, dan mi no ben man taki bun èn mi ben e bigin gagu. Mi ben firi brokosaka fu di mi ben bigin denki taki trawan bun moro mi. Mi papa nanga mama ben seti sani gi mi fu go na wan skoro fu leri taki bun, ma dati no ben yepi. A sani di ben meki taki mi no ben man taki bun ben abi fu du nanga mi frustan, a no ben de wan siki. Ma Yehovah ben seti wan moi sani, namku a Theokrasia Diniwroko-skoro. Mi kisi deki-ati di mi go na a skoro disi. Mi meki muiti trutru fu du san mi leri. Disi ben yepi mi! Mi ben man taki moro grati, mi no ben firi brokosaka moro, èn mi ben abi moro deki-ati fu taki nanga sma na ini a diniwroko. Now mi e hori publikitaki srefi. Mi e taki Yehovah tangi taki a skoro disi meki mi libi kon moro bun.” A e gi wi prisiri trutru taki Yehovah e leri wi fa fu du a wroko fu en, a no so?

14, 15. Sortu yepi de fu feni wantewante te wi de na ini nowtu? Gi wan eksempre.

¹⁴ Wi e tron mati fu Yehovah, èn wi brada nanga sisa na heri grontapu e horibaka gi wi. Katrin di e libi na ini Doisrikondre, ben broko en ede srefisrefi di a yere fu a bigi gronseki nanga a bigi frudu di ben de na a zuid-owstusei fu Asia. Na umapikin fu en ben de na Thailand di a rampu disi pasa. Katrin ben wakti 32 yuru sondro taki a ben sabi efu en umapikin ben de na libi, noso efu a ben lasi en libi makandra nanga den tra sma. Wi kan frustan o bun Katrin ben firi di a kisi wan telefon taki ala sani de bun nanga en umapikin!

¹⁵ San ben yepi Katrin na ini a muilek pisi ten dati? A skrifi: „Pikinmoro a heri pisi ten dati mi ben e begi Yehovah. Ibri leisi te mi ben e du dati, dan mi ben e firi taki mi e kisi krakti baka èn taki mi no ben e broko mi ede so furu moro. Boiti dati, lepi brada nanga sisa sori taki den lobi mi, fu di den fisiti mi èn den tranga mi” (Filipisma 4:6, 7). A situwâsi ben o moro hebi gi en efu a no ben begi na ini a muilek pisi ten dati èn efu a no ben kisi trowstu fu den brada  nanga sisa! A krosibei matifasi di wi abi nanga Yehovah èn nanga en Manpikin, èn sosrefi a demakandra di wi abi nanga wi Kresten brada nanga sisa, na wan trutru blesi, èn wi no musu si den blesi disi leki soso sani.

16. Gi wan eksempre di e sori o prenspari na opobaka howpu de.

¹⁶ Wi abi a howpu fu miti den lobiwan fu wi di dede (Yohanes 5:28, 29). Wan yonguman di nen Matthias, ben gro kon na ini wan osofamiri fu Kotoigi fu Yehovah. Ma fu di a no ben frustan taki dati ben de wan bigi blesi, meki a gowe libi a Kresten gemeente, di a ben de wan tini ete. A e skrifi now: „Noiti mi ben abi wan seryusu takimakandra nanga mi papa. Na ini a pisi ten di pasa, wi ben abi furu kesekese. Ma toku mi papa ben wani taki sani waka bun gi mi. A lobi mi srefisrefi, ma mi no ben frustan disi na a ten dati. Na ini 1996, mi ben sidon na sei en bedi èn mi ben e hori en anu, aladi mi ben e krei. Mi taigi en fa mi e sari fu ala den sani di mi du, èn taki mi lobi en srefisrefi. Ma a no ben man yere mi. Baka di a siki wan syatu pisi ten, a dede. Efu mi de na libi te mi papa o kisi wan opobaka, dan wi o du ala sani di wi no ben man du. Èn mi papa sa breiti srefisrefi fu yere taki now mi e dini leki owruman, èn taki mi nanga mi wefi e pionier.” A howpu fu na opobaka na wan trutru blesi gi wi!

„A no e meki wi firi sari”

17. Sortu wini a sa abi gi wi te wi e prakseri den blesi fu Yehovah?

¹⁷ Yesus Krestes ben taki fu en hemel Tata: „A e meki a son fu en opo gi takru sma èn gi bun sma; a e meki alen fadon gi regtfardiki sma èn gi sma di no regtfardiki” (Mateyus 5:45). Efu Yehovah Gado e blesi srefi den sma di no de regtfardiki èn sosrefi den ogrisma, dan seiker a sa blesi den wan di e tan gi yesi na en! Psalm 84:11 e taki: „Yehovah srefi sa gi bun sani na den sma di e tyari densrefi sondro fowtu.” Te wi e prakseri fa a ben e sorgu den wan di lobi en èn fa a ben e broko en ede nanga den, dan dati e meki wi de nanga tangi èn a e meki wi prisiri!

18. (a) Na sortu fasi wi kan taki dati Yehovah no e meki wi firi sari te a e blesi wi? (b) Fu san ede furu loyaal anbegiman fu Gado e pina?

¹⁸ Na „a blesi fu Yehovah” e meki taki sani e go bun nanga na anbegi fu a pipel fu en. Èn wi sabi seiker taki „a no e meki wi firi sari” (Odo 10:22). Ma den loyaal anbegiman fu Gado e kisi bun furu tesi èn problema, di e meki taki den e sari srefisrefi èn taki den e pina. Fu san ede dati e pasa nanga den dan? Dri prenspari sani e meki taki wi e kisi problema èn broko-ede. (1) Wi eigi sondu firi (Genesis 6:5; 8:21; Yakobus 1:14, 15). (2) Satan nanga den ogri yeye fu en (Efeisesma 6:11, 12). (3) Na ogri grontapu (Yohanes 15:19). Aladi Yehovah e gi pasi taki ogri sani miti wi, toku a no en e tyari ogri kon na wi tapu. Fu taki en leti, „ibri bun presenti nanga ibri volmaakti kado e kon fu tapusei, bika a e saka kon fu a Tata fu den sani di e skèin leti na hemel” (Yakobus 1:17). Den blesi fu Yehovah no e meki wi firi sari.

19. San den sma di e tan du san Gado wani, o kisi?

¹⁹ Efu wi wani taki sani waka bun nanga na anbegi fu wi, dan a de fanowdu fu abi wan krosibei banti nanga Gado. Te wi abi wan krosibei matifasi nanga en, dan wi ’e poti wan bun fondamenti gi a tamara, neleki wan gudu di kibri bun, so taki wi kan grabu a trutru libi hori bun steifi’. Iya, na so fasi wi kan kisi têgo libi (1 Timoteyus 6:12, 17-19). Na ini a nyun grontapu di Gado o meki, wi no sa abi blesi na yeye fasi wawan, ma wi o kisi blesi na skin fasi tu. Ala sma di „e tan arki a sten fu Yehovah” sa kisi a trutru libi (Deuteronomium 28:2). Meki wi tan waka nanga prisiri aladi wi e tan du a wani fu Gado.

San yu leri?

• Fu san ede a de wan don sani fu broko wi ede tumusi nanga a ten di e kon?

• Sortu blesi wi e kisi nownow kaba?

• Fu san ede den getrow futuboi fu Gado e pina?

[Aksi fu a tori disi]