Aksi fu leisiman

San e meki taki „den warti sani fu ala den pipel” e kon na ini na „oso” fu a tru anbegi?—Hagai 2:7.

Yehovah ben meki a profeiti Hagai skrifi wan sani di ben o pasa bakaten. A ben skrifi: „Mi wani seki ala den pipel, èn den warti sani fu ala den pipel musu kon na ini; èn mi wani furu na oso disi nanga glori” (Hagai 2:7). Den „warti sani fu ala den pipel” na den opregtisma di e kon na ini a tru anbegi. Ma a de so taki den sma disi e kon na ini a tru anbegi fu di Gado e seki „ala den nâsi”? Nôno.

Luku san e seki den nâsi, èn san na a bakapisi fu dati. Bijbel e taki dati ’den pipel e bruya èn den sma fu den kondre e tan krutukrutu fu wan soso sani’ (Psalm 2:1). A „soso sani” di den e tan „krutukrutu” fu en, na a feti di den e feti fu no lasi a makti fu den. A wan-enkri sani di e seki den nâsi disi trutru, na te den e si taki den o lasi a makti fu den.

Na heri grontapu, Yehovah Kotoigi e preiki fu a Kownukondre di Gado seti, èn a sani disi e meki den nâsi kon frede. Iya, a Mesias Kownukondre fu Gado di abi Yesus Krestes leki edeman, o ’broko ala den libisma kownukondre disi na pisipisi èn a o tyari wan kaba kon na den’ (Danièl 2:44). A preiki di wi e preiki tu taki Gado o krutu sma, e seki den nâsi srefisrefi (Yesaya 61:2). Ma wan sani di e seki den nâsi moro hebi, na taki wi e du a preikiwroko nanga moro faya èn na moro presi fu grontapu. San o pasa na ini a ten di e kon, soleki fa Hagai 2:7 e sori?

Na ini Hagai 2:6 skrifi: „Disi na san Yehovah fu den legre taki: ’Ete wan leisi — a no o teki langa moro — èn mi o seki hemel nanga grontapu nanga se nanga a drei gron.’” Na apostel Paulus ben abi a tekst disi na prakseri, di a taki: „A pramisi taki: ’Mi o seki grontapu ete wan leisi; mi no o seki grontapu wawan, ma mi o seki hemel tu.’ We, den wortu ’ete wan leisi’, e sori taki Gado o puru den sani di man seki, namku den sani di sma meki, so taki den sani di no man seki [namku a Kownukondre], kan tan” (Hebrewsma 12:26, 27). Iya, a heri sistema disi o kisi pori, so taki Gado kan seti a nyun grontapu fu en.

Opregtisma e kon na ini a tru anbegi, ma disi no e kon fu di Gado e seki den nâsi. A sani di e meki taki den sma disi wani kon sabi Yehovah èn taki den wani anbegi en, na a srefi sani di e seki den nâsi. A sani dati na a preiki di wi e preiki na heri grontapu fu a Kownukondre di Gado seti kaba. A ’têgo bun nyunsu di wi e meki bekènti leki prisiri nyunsu’, e hari opregtisma fu kon dini a tru Gado.—Openbaring 14:6, 7.

A Kownukondre boskopu e sori taki son sma o kisi krutu, èn taki tra sma o kisi frulusu (Yesaya 61:1, 2). Fu di a boskopu disi e preiki na heri grontapu, meki tu sani e pasa. A fosi sani na taki a e seki den nâsi, èn a di fu tu sani na taki den warti sani fu ala den pipel e kon na ini a tru anbegi fu gi glori na Yehovah.