San Gado abi na prakseri gi grontapu?

FU SAN EDE yu lobi waka na ini wan presi pe sma e go koiri, noso na ini wan gron di lai nanga bromki di e smeri switi? Fu san ede yu e firi switi te yu e si wan moi kriki, noso te yu e si hei bergi di gersi leki den e doro te na hemel? Fu san ede yu e poti yesi arki te pikin fowru e singi so moi, hei na ini den bon? Èn fu san ede a e gi prisiri fu si fa wan dia e dyompo gowe so moi, noso fa wan grupu skapu e nyan grasi na ini wan wei?

Wán piki de gi ala den aksi disi. Gado ben meki wi fu libi na ini wan Paradijs! Na drape a fosi papa nanga mama fu wi, Adam nanga Eva, bigin a libi fu den. Na fu den wi kisi na angri fu libi na ini Paradijs, èn den ben kisi na angri dati fu a Mekiman fu den, Yehovah Gado. A ben sabi taki wi leki libisma ben o de koloku na ini Paradijs, bika a meki wi na so wan fasi taki wi man nyan bun fu a libi na tapu so wan moi grontapu.

Fu san ede Yehovah meki grontapu? A „seti en fu sma libi na tapu” (Yesaya 45:18). „A Mekiman fu grontapu” gi Adam nanga Eva wan moi paradijs fu tan na ini, namku a dyari fu Eden (Yeremia 10:12; Genesis 2:7-9, 15, 21, 22). A ben musu de so taki den ben lobi den liba, den bromki, nanga den bon fu a dyari disi! Den ben kan si fowru di ben e frei so moi na loktu. Difrenti sortu meti ben e waka lontu drape, ma toku nowan fu den ben e suku fu du libisma ogri. Fisi nanga tra sortu meti ben e swen na ini a krin watra fu den liba nanga den se fu grontapu. Ma a moro prenspari sani ben de taki Adam nanga Eva ben de makandra. Den ben kan meki pikin, èn den ben kan abi a prisiri fu meki a heri grontapu kon tron wan Paradijs, makandra nanga na osofamiri fu den di ben e kon moro bigi.

Aladi grontapu no de wan paradijs now, toku wi kan agersi en nanga a tumusi moi tanpresi fu wan koloku osofamiri. A grontapu disi di wi kisi leki tanpresi fu Gado, abi ala sani di wi abi fanowdu, namku leti, faya, watra, nanga nyanyan. Wi e warderi a leti nanga a faya fu a son trutru, sosrefi a leti fu a mun di e skèin so moi te neti! (Genesis 1: 14-18) Na ini a gron fu grontapu, yu abi oli nanga tra sani di wi kan gebroiki fu waran wi oso. Fu di watra e fadon komoto na hemel èn fu di liba, kriki, nanga se de na grontapu, meki wi abi watra di wi kan gebroiki. Èn grontapu abi grun grasi di de leki wan matamata.

Neleki fa sma e kibri nyanyan na ini wan oso fu kan gebroiki dati bakaten, na so grontapu abi furu nyanyan di wi kan gebroiki. Yehovah e meki nyanyan gro na ini den gron èn a e meki froktu gro na den froktubon. Na so fasi a ’e meki taki wi abi bun furu nyanyan èn taki wi e firi prisiri’ (Tori fu den Apostel 14:16, 17). Now di grontapu de so wan moi tanpresi kaba, dan prakseri fa a sa de te „a koloku Gado”, Yehovah, o meki a kon tron wan paradijs!—1 Timoteyus 1:11.

 [Sma di abi a reti fu a prenki na tapu bladzijde 2]

COVER: Earth: NASA photo; Stars: NASA, ESA and AURA/Caltech