Yu de srekasreka fu kisi frulusu?
Yu de srekasreka fu kisi frulusu?
„Go na ini na ark, yu, makandra nanga yu heri osofamiri, bika fu ala libisma di e libi na grontapu, mi si taki yu wawan de regtfardiki.”—GENESIS 7:1.
1. San Yehovah ben seti na ini a ten fu Noa so taki sma ben kan kisi frulusu?
YEHOVAH „ben tyari wan bigi frudu kon tapu wan libimakandra fu ogri sma” na ini a ten fu Noa, ma a ben seti sani tu so taki sma ben kan kisi frulusu (2 Petrus 2:5). Yehovah, a tru Gado, ben taigi a regtfardiki man Noa krinkrin fa a ben musu bow wan ark, so taki sma ben kan kisi frulusu te wan frudu ben o kon na heri grontapu (Genesis 6:14-16). Soleki fa wi ben kan fruwakti fu wan getrow futuboi fu Yehovah, dan „Noa du ala san Gado taigi en fu du”. Iya, „leti so a ben du”. Wi kan taki tu dati wan fu den sani di meki taki wi de na libi now, na a fasi fa Noa ben gi yesi na Gado.—Genesis 6:22.
2, 3. (a) Fa den sma na ini a ten fu Noa ben handri di den si san Noa ben e du? (b) Fu san ede Noa go na ini na ark?
2 A no ben de wan makriki wroko fu bow na ark. Wi kan de seiker taki furu sma ben fruwondru fu si san Noa nanga en osofamiri ben e du. Ma toku dati no ben nofo fu meki den bribi taki den ben musu go na ini na ark fu kisi frulusu. Te fu kaba, Gado no ben abi pasensi moro nanga den ogrisma fu a ten dati.—Genesis 6:3; 1 Petrus 3:20.
3 Baka di Noa nanga en osofamiri wroko tranga someni tenti yari, dan Yehovah taigi Noa: „Go na ini na ark, yu, makandra nanga yu heri osofamiri, bika fu ala libisma di e libi na grontapu, mi si taki yu wawan de regtfardiki.” Fu di Noa bribi den sani di Yehovah ben taigi en, meki a „go na ini na ark, makandra nanga den manpikin fu en, a wefi fu en, nanga den wefi fu en manpikin”. Dan Yehovah tapu a doro fu na ark fu kibri den anbegiman fu en. Di a Frudu kon na grontapu, dan na ark di Yehovah ben meki Noa bow, ben bun èn ben man yepi den sma fu kisi frulusu.—Genesis 7:1, 7, 10, 16.
A situwâsi na ini a ten fu Noa, de a srefi leki a di fu wi
4, 5. (a) Nanga san Yesus ben agersi a denoya fu en? (b) Fu san ede wi kan taki dati a ten fu wi de a srefi leki a ten fu Noa?
4 „Neleki fa sani ben de na ini a ten fu Noa, na so a denoya fu a Manpikin fu libisma o de” (Mateyus 24:37). Den sani disi di Yesus taki, e sori taki a situwâsi na ini a ten fu en denoya, ben o de a srefi leki a di fu Noa, èn na so a de trutru. Spesrutu sensi a yari 1919, sma na ala sei fu grontapu kisi wan srefi sortu warskow leki a wan di Noa ben e gi sma na ini owruten. Furu sma na ini a ten disi e handri na a srefi fasi leki den sma na ini a ten fu Noa.
5 Yehovah gebroiki a bigi Frudu fu strafu den sma di ben meki taki grontapu ben „lai nanga ogridu” (Genesis 6:13). Ala sma ben kan si krin taki Noa nanga en osofamiri no ben e du ogri, ma taki den ben tan bow na ark sondro fu broko den ede nanga san den tra sma ben e du. Na a srefi sani disi wi e si na ini a ten fu wi. Opregtisma na ini a ten disi kan si „a difrenti na mindri wan regtfardiki sma èn wan ogri sma, na mindri wan sma di e dini Gado èn wan sma di no dini en” (Maleaki 3:18). Sma di de opregti e fruwondru te den e si taki den Kotoigi fu Yehovah no e bedrigi trawan, taki den abi bunfasi, èn taki den e libi na ini vrede. Den sani disi e meki taki Gado pipel de heri tra fasi leki furu fu den grontapusma. Den Kotoigi no lobi nowan sortu ogridu, èn den e meki a yeye fu Yehovah tiri den. Dati meki den e libi na ini vrede èn na wan regtfardiki fasi.—Yesaya 60:17.
6, 7. (a) San den sma na ini a ten fu Noa no ben frustan, èn fa a de na ini a ten disi? (b) Sortu eksempre e sori taki furu sma sabi taki Yehovah Kotoigi de tra fasi leki sma fu tra kerki?
6 Den sma na ini a ten fu Noa no ben man si taki Gado ben e horibaka gi Noa èn taki na Gado ben e tiri en. Dati meki den no ben teki a preikiwroko fu Noa leki wan seryusu sani, so taki den no gi yesi na a warskow fu en. Fa sma na ini a ten disi e prakseri fu a pipel fu Gado èn fu a boskopu di den e tyari? Furu sma e fruwondru fu a wroko di Yehovah Kotoigi e du èn sosrefi fu a fasi fa den e tyari densrefi. Toku a moro bigi pisi fu den no e si a bun nyunsu nanga den warskow fu Bijbel leki wan seryusu sani. Furu birtisma, sma na wrokope, nanga famiriman e taki bun fu den moi fasi fa tru Kresten e tyari densrefi. Ma dan den e taki: „A wan-enkri sani di mi no lobi, na taki den na Yehovah Kotoigi!” San den sma disi no e frustan, na taki na Gado yeye e tiri den Kotoigi, èn taki na dati e meki taki den Kotoigi abi lobi, vrede, switifasi, bunfasi, safrifasi, èn taki den man dwengi densrefi (Galasiasma 5:22-25). Te yu luku en bun, dan den sani disi ben musu meki taki den sma bribi a boskopu fu den Kotoigi moro esi.
7 Fu eksempre, na ini Rosiakondre, Kotoigi fu Yehovah ben e bow wan Kownukondre zaal. Wan man di ben tan tanapu fu taki nanga wan fu den brada di ben e wroko drape, ben taki: „Fosi tron mi si so wan sani. Nowan fu den wrokoman e smoko, nowan sma e taki grofu, èn nowan sma drungu! Yu na wan Yehovah Kotoigi tu?” A brada aksi en: „Yu ben o bribi mi efu mi ben o taigi yu taki mi a no wan Yehovah Kotoigi?” Wantewante a man piki: „Nôno, mi no ben o bribi yu.” Na ini wan tra foto na Rosiakondre, a komsarsi ben fruwondru srefisrefi di a si fa den Kotoigi ben e bow a nyun Kownukondre zaal fu den. A ben taki dati a ben denki fosi taki ala kerki de a srefi, ma now di a si taki den Kotoigi fu Yehovah no e prakseri densrefi nomo, dan a kon sabi taki a no tru taki ala kerki de a srefi. Disi na soso tu eksempre di e sori taki a pipel fu Yehovah de heri tra fasi leki den sma di no e hori densrefi na Bijbel markitiki.
8. San wi musu du efu wi wani kisi frulusu te na ogri grontapu disi o kon na wan kaba?
8 Na ini a lasti pisi ten fosi a Frudu pori na „owru grontapu”, Noa ben de wan getrow „preikiman fu regtfardikifasi” (2 Petrus 2:5). Na ini den lasti dei fu a grontapu disi, a pipel fu Yehovah e meki den regtfardiki markitiki fu Gado bekènti èn den e fruteri tra sma a bun nyunsu taki den kan kisi frulusu èn taki den kan go na ini a nyun grontapu (2 Petrus 3:9-13). Fu di Noa nanga en osofamiri ben abi lespeki gi Gado, meki den kisi frulusu na ini na ark. Na so sma kan kisi frulusu na ini a ten disi, efu den abi bribi èn efu den de loyaal na a organisâsi fu Yehovah di de dyaso na grontapu.
Wi musu abi bribi fu man kisi frulusu
9, 10. Fu san ede a de prenspari fu abi bribi efu wi wani tan na libi te a grontapu fu Satan o kon na wan kaba?
9 San wan sma musu du efu a wani tan na libi te a grontapu di de na ini a makti fu Satan, o kisi pori heri esi? (1 Yohanes 5:19) A sma musu frustan fosi taki a kan lasi en libi èn taki a musu kisi kibri. Dan a musu sorgu taki a kisi kibri tu. Den sma na ini a ten fu Noa tan du den sani di den ben gwenti du ibri dei, èn den no ben feni taki a de fanowdu fu kisi kibri fu a rampu di ben o kon na den tapu. Ete wan sani ben de di den no ben abi, namku bribi na ini Gado.
10 Ma Noa nanga en osofamiri ben si taki a de fanowdu fu kisi kibri èn fu kisi frulusu. Den ben bribi tu na ini Yehovah Gado, a Moro Hei Tiriman. Na apostel Paulus ben skrifi: „Sondro bribi wan sma no kan prisiri Gado, bika a sma di e anbegi Gado musu bribi taki a de trutru èn taki a sa pai den sma di e suku en fayafaya.” Paulus ben taki tu: „Na fu di Noa ben abi bribi, meki a ben frede Gado èn a ben bow wan ark fu frulusu en osofamiri, baka di Gado warskow en gi sani di a no ben si ete; nanga a bribi disi Noa ben krutu grontapu, èn a ben tron wan sma di regtfardiki na ini Gado ai, fu di a ben abi bribi.”—Hebrewsma 11:6, 7.
11. San wi kan leri fu a fasi fa Yehovah kibri sma na ini owruten?
11 Efu wi wani tan na libi, dan wi musu du moro leki fu bribi nomo taki na ogri grontapu disi o kisi pori. Wi musu sori taki wi e bribi taki den sani di Yehovah seti kan yepi wi fu kisi frulusu, èn wi musu gebroiki ala den sani di a seti. A no de fu taki dati wi musu bribi tu na ini a lusu-paiman fu a Manpikin fu Gado, Yesus Krestes (Yohanes 3:16, 36). Ma wi musu hori na prakseri taki na soso den sma di ben de trutru na ini na ark fu Noa, pasa a Frudu libilibi. Na a srefi fasi, wan man di ben kiri wan trawan èn di no ben du dati fu espresi, ben kan kisi kibri na ini den loweman foto fu owruten Israel. A man ben kan kisi kibri soso efu a ben lowe go na so wan foto èn efu a ben tan drape teleki granpriester dede (Numeri 35:11-32). Di a di fu tin rampu kon tapu Egepte na ini a ten fu Moses, dan soso den fosi pikin fu den Egeptesma lasi den libi, ma den pikin fu den Israelsma ben tan na libi. Fu san ede? Yehovah ben taigi Moses: „Den [Israelsma] musu teki pikinso fu a brudu [fu a pikin skapu] èn lobi en na den tu doropostu èn na tapusei fu a doromofo fu den oso pe den sa nyan en. . . . Nowan fu unu musu komoto na ini en oso teleki mamanten” (Exodus 12:7, 22). Nowan fu den fosi pikin fu den Israelsma ben o abi a deki-ati fu trangayesi a komando disi fu Gado. Nowan fu den ben o go na dorosei fu wan oso pe brudu ben poti na den tu doropostu èn na tapusei fu a doromofo!
12. Sortu aksi ibriwan fu wi musu poti gi wisrefi, èn fu san ede?
12 Fu dati ede, ibriwan fu wi musu prakseri finifini fa a de nanga wi. Wi e gebroiki den seti fu Yehovah trutru, di musu kibri wi na yeye fasi? Te a bigi banawtu bigin, dan den sma di suku a kibri disi o krei fu di den o prisiri èn fu di den o de nanga tangi. Den trawan sa krei fu sari.
Den kenki na ini na organisâsi e sreka wi fu kisi frulusu
13. (a) Fu san ede son sani kenki na ini na organisâsi? (b) Taki fu wan tu fu den sani di kenki kon moro bun na ini a ten di pasa.
13 Safrisafri Yehovah tyari kenki kon na ini na organisâsi fu en na grontapu. A du disi fu seti sani moro bun so taki wi kan kisi kibri na yeye fasi. Fu 1870 te go miti 1932, den memre fu a gemeente ben e stem fu poti owruman nanga dinari ini a diniwroko, na ini a gemeente. Na ini 1932, den gemeente no ben e stem moro fu poti owruman. Na presi fu dati den ben e stem fu poti wan diniwroko komte. A komte disi ben e yepi a diniwroko fesiman di na edekantoro ben poti na wroko na ini a gemeente. Na ini 1938, na organisâsi fu Yehovah ben seti sani so, taki ala brada di ben o dini na ini a gemeente ben kan poti na wroko soleki fa Bijbel e taki. Sensi 1972, a de so taki te den owruman e si taki wan brada kan tron owruman noso dinari ini a diniwroko, dan den e meki a Tiri Skin fu Yehovah Kotoigi kon sabi dati. Efu a Tiri Skin e feni a brada disi bun, dan den e seni wan brifi gi den gemeente pe den e skrifi sortu brada tron owruman noso dinari ini a diniwroko. Na so fasi sani e go soleki fa Bijbel e taki. Na ini den yari di pasa, a wroko fu a Tiri Skin kon moro furu. Dati meki den kenki wan tu sani fu meki a wroko kon moro makriki gi den.
14. Sortu programa fu gi sma leri ben bigin na ini 1959?
14 Baka di den brada ondrosuku Psalm 45:16 finifini na ini 1950, dan den seti wan programa fu gi leri na den brada di abi frantwortu na ini den gemeente. A tekst e taki: „Un manpikin sa teki a presi fu den fositata fu unu, èn unu sa poti den leki granman na heri grontapu.” Den owruman di e teki fesi na ini a gemeente na ini a ten disi, e kisi leri fu man du a wroko di den musu du fosi Armagedon èn baka Armagedon (Openbaring 16:14, 16). A Kownukondre Diniwroko-skoro bigin na ini a yari 1959. Na a ten dati den brada ben seti sani, so taki spesrutu den gemeente dinari, soleki fa den ben e kari den fesiman-opziener na a ten dati, ben kan kisi leri wan heri mun langa. Now ala den owruman nanga den dinari ini a diniwroko e kisi leri na a skoro disi. Den brada disi e teki fesi fu gi leri na brada nanga sisa na ini a gemeente fu den. Na so fasi ala sma e kisi yepi fu abi wan bun banti nanga Gado, so taki den kan abi moro bun bakapisi na ini a diniwroko fu den leki preikiman fu a bun nyunsu fu a Kownukondre.—Markus 13:10.
15. San na den tu seti di e meki taki a Kresten gemeente e tan krin?
15 Sma di wani tron memre fu a Kresten gemeente musu doro wan tu markitiki. Wi kan frustan taki spotuman na ini a ten disi no e kisi na okasi fu tron memre fu a Kresten gemeente, neleki fa den sortu sma dati no ben mag go na ini na ark fu Noa (2 Petrus 3:3-7). Spesrutu sensi 1952, Yehovah Kotoigi bigin horibaka gi a seti di abi leki marki fu kibri a gemeente, namku fu puru den wan di e du ogri èn di no abi berow. A no de fu taki dati den wan di ben du ogri èn di abi trutru berow, e kisi yepi fu ’meki reti pasi gi den futu’.—Hebrewsma 12:12, 13; Odo 28:13; Galasiasma 6:1.
16. Fa a e go nanga na anbegi fu Yehovah en pipel?
16 A no e fruwondru wi taki a pipel fu Yehovah e go na fesi na ini na anbegi fu den. Ma disi no kon fu ensrefi tu. Yehovah ben meki a profeiti Yesaya taki: „Luku! Mi eigi futuboi sa nyan, ma unu sa tan nanga angri. Luku! Mi eigi futuboi sa dringi, ma unu sa abi dreiwatra. Luku! Mi eigi futuboi sa prisiri, ma unu sa kisi syen. Luku! Mi eigi futuboi sa bari fu prisiri bika den ati bun, ma unu sa bari bika un ati e sari, èn unu sa bari krei bika un brokosaka srefisrefi” (Yesaya 65:13, 14). Yehovah e tan gi wi bogobogo yeye nyanyan di de gosontu, èn wi e kisi dati na a yoisti ten. A yeye nyanyan disi e tranga a bribi fu wi.—Mateyus 24:45.
Sreka yusrefi fu kisi frulusu
17. San o yepi wi fu de srekasreka fu kisi frulusu?
17 Now, moro leki oiti bifo, wi musu „poti prakseri na makandra tu, so taki wi kan gi makandra deki-ati fu abi lobi èn fu du bun wroko. No meki wi misi konmakandra, soleki fa son sma gwenti du, ma gi makandra deki-ati” (Hebrewsma 10:23-25). Te wi e tan krosibei fu wan fu den moro leki 98.000 gemeente fu Yehovah Kotoigi, èn te wi e wroko makandra nanga a gemeente, dan dati sa yepi wi fu sreka wisrefi fu kan kisi frulusu. Wi Kresten brada nanga sisa sa yepi wi te wi e du muiti fu tron „wan nyun sma” èn te wi e du tranga muiti fu sori tra sma san na den sani di Yehovah seti fu den kan kisi frulusu.—Efeisesma 4:22-24; Kolosesma 3:9, 10; 1 Timoteyus 4:16.
18. Fu san ede yu teki a fasti bosroiti fu tan krosibei fu a Kresten gemeente?
18 Satan nanga na ogri grontapu fu en e du ala muiti fu kori wi èn fu puru wi fu a Kresten gemeente. Ma wi kan tan wan pisi fu a gemeente èn wi kan tan na libi te na ogri grontapu disi o kisi pori. Meki a lobi di wi abi gi Yehovah èn a warderi di wi e warderi den sani di a seti gi wi, pusu wi fu teki wan moro fasti bosroiti fu kakafutu gi den muiti di Satan e du. Te wi e prakseri dipi fu den blesi di wi e kisi na ini a ten disi, dan dati sa tranga a bosroiti di wi teki. Na ini a tra artikel wi sa taki fu wan tu fu den blesi disi.
San yu ben o piki?
• Na sortu fasi a ten fu wi de a srefi leki di fu Noa?
• Fa wan sma musu de efu a wani kisi frulusu?
• Sortu kenki di ben feni presi na ini na organisâsi fu Yehovah, ben meki taki den sani di Yehovah seti fu kibri wi, kon moro bun?
• Fa wi kan sreka wisrefi fu kan kisi frulusu?
[Aksi fu a tori disi]
[Prenki na tapu bladzijde 22]
Den sma na ini a ten fu Noa, no ben si a boskopu fu Noa leki wan seryusu sani
[Prenki na tapu bladzijde 23]
A abi bun bakapisi te wi e si a boskopu fu Gado leki wan seryusu sani
[Prenki na tapu bladzijde 24]
San na a marki fu a Kownukondre Diniwroko-skoro?
[Prenki na tapu bladzijde 25]
Now na a ten fu tan krosibei fu a Kresten gemeente