Aksi fu leisiman

A Wet di Gado ben gi Moses ben e sori taki wan man „no krin” te skiti komoto fu en syenpresi, èn taki wan uma „no krin” te a abi en munsiki, èn baka te a meki wan pikin. Fu san ede dati ben de so?

Gado meki libisma na so wan fasi taki den kan abi seks demakandra, so taki den kan meki pikin, èn so taki trowpatna kan prisiri nanga makandra (Genesis 1:28; Odo 5:15-18). Ma na ini Lefitikus kapitel 12 nanga 15, yu abi wet di e sori finifini taki wan sma no de krin te skiti e komoto fu wan man en syenpresi, te wan uma abi en munsiki, èn baka te wan uma meki wan pikin (Lefitikus 12:1-6; 15:16-24). Den sortu wet disi di Gado ben gi den Israelsma fu owruten ben meki taki den ben e libi wan gosontu libi, èn taki den ben e tyari densrefi akruderi hei markitiki. Boiti dati, den wet ben e sori krin taki brudu santa èn taki libisma musu kisi pardon gi sondu.

Fu di a Wet di Gado ben gi Moses ben e sori sma taki den no ben krin te den ben de na ini den situwâsi di kari na fesi, meki a pipel fu Israel ben e tan gosontu. Wan buku e taki: „A wet di e tapu sma fu abi seks demakandra na a ten te wan uma abi en munsiki, ben sorgu taki sma no ben e kisi siki leki bakapisi fu seks demakandra, . . . èn a ben sorgu tu taki den no ben e kisi kanker na den muru” (The Bible and Modern Medicine). Den sortu wet disi ben e kibri a pipel fu Gado fu no kisi siki di den no ben sabi na a ten dati, èn fu no kisi siki sondro fu den sabi dati srefi. Gado ben pramisi den Israelsma taki den ben o tron wan bigi nâsi, èn taki sani ben o waka bun gi den. Te den ben o hori densrefi krin akruderi den wet disi di Gado ben gi den, dan den ben o man kisi moro pikin (Genesis 15:5; 22:17). Den wet disi ben e leri a pipel fu Gado tu fu dwengi densrefi. Te masra nanga wefi ben e hori densrefi na den wet disi, dan dati ben e yepi den fu hori densrefi fu no abi seks demakandra te dati no fiti.

Ma a moro prenspari sani di ben e meki taki wan sma no de krin, na te brudu ben e komoto fu en syenpresi. Den wet fu Yehovah di abi fu du nanga brudu, ben e meki den Israelsma frustan krin taki brudu santa, èn taki brudu na wan prenspari sani te sma e tyari ofrandi gi Yehovah èn te sma wani kisi pardon fu sondu.—Lefitikus 17:11; Deuteronomium 12:23, 24, 27.

Fu di libisma no de volmaakti, meki a Wet ben e sori finifini fa sma ben musu hori densrefi krin te a abi fu du nanga den sortu tori disi. Den Israelsma ben sabi taki Adam nanga Eva no ben man meki volmaakti pikin baka di den sondu. Ala den bakapikin fu den ben o kisi fu du nanga den bakapisi fu sondu di den ben kisi fu a fosi papa nanga mama fu den, iya, den no ben o de volmaakti, èn den ben o dede (Romesma 5:12). Na fu a sani disi ede meki papa nanga mama kan meki soso sondu pikin, aladi Gado ben meki libisma na so wan fasi taki papa nanga mama di trow ben musu meki volmaakti pikin.

Na so fasi a Wet di ben e sori den Israelsma taki den ben musu hori densrefi krin, no ben e memre den nomo taki den ben kisi sondu fu a fosi papa nanga mama fu den, ma a ben e memre den tu taki den ben abi wan frulusu-ofrandi fanowdu fu tapu den sondu fu den èn fu meki den tron volmaakti sma baka. A no de fu taki dati den meti di den ben e gi leki srakti-ofrandi no ben man du den sani disi (Hebrewsma 10:3, 4). A marki fu a Wet di Gado ben gi Moses ben de fu meki den Israelsma fruwakti Krestes, èn fu meki den frustan taki den ben kan kisi trutru pardon soso nanga yepi fu Yesus en volmaakti libi di a ben gi leki srakti-ofrandi. Disi ben o gi getrow sma na okasi fu kisi têgo libi.—Galasiasma 3:24; Hebrewsma 9:13, 14.