A Wortu fu Yehovah de libilibi

Edepenti fu a di fu tu buku fu Psalm

LEKI futuboi fu Yehovah, wi sabi taki wi sa kisi tesi. Na apostel Paulus ben skrifi: „Ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu” (2 Timoteyus 3:12). San o yepi wi fu horidoro te wi e kisi tesi nanga frufolgu, di sa gi wi na okasi fu buweisi taki wi de getrow na Gado?

A buku Psalm abi feifi pisi, èn a di fu tu pisi, namku kapitel 42 te go miti 72, e yepi wi fu horidoro. Den kapitel disi e sori wi taki efu wi wani horidoro te wi e kisi tesi, dan wi musu frutrow tapu Yehovah dorodoro, èn wi musu leri fu wakti Yehovah fu a yepi wi. Wi kan leri wan tumusi moi sani fu den psalm disi! Neleki den tra buku fu Gado Wortu, a boskopu di skrifi na ini a di fu tu buku fu Psalm, de ’na libi, èn a abi krakti’ trutru, srefi na ini a ten disi.—Hebrewsma 4:12.

YEHOVAH NA WI „KIBRIPE NANGA WI KRAKTI”

(Psalm 42:1–50:23)

Wan Leifisma de na ini katibo. A e sari taki a no man go na a santa presi fu anbegi Yehovah, èn fu dati ede a e trowstu ensrefi nanga den wortu disi: „Fu san ede yu lasi-ati, o mi sili, èn fu san ede yu e bruya so na inisei fu mi? Wakti Gado” (Psalm 42:5, 11; 43:5). Den wortu disi di e kon ibri leisi baka, e meki taki Psalm 42 nanga 43 e tron wán puwema. Psalm 44 na wan begi fu a bun fu Yuda. A pipel disi de na ini banawtu, èn kande dati e kon fu di den Asiriasma wani broko kon na ini a foto fu den na a ten fu Kownu Heskia.

Psalm 45 na wan singi di abi fu du nanga a trow fu wan kownu, èn a de wan profeititori di e taki fu a Mesias Kownu. Den dri psalm baka dati e sori taki Yehovah na „wi kibripe nanga wi krakti”, sosrefi „wan bigi Kownu fu heri grontapu”, èn „wan hei kibripe” (Psalm 46:1; 47:2; 48:3). Psalm 49 e sori na wan tumusi moi fasi taki nowan libisma „kan frulusu wan brada srefi na nowan enkri fasi”! (Psalm 49:7) Den manpikin fu Korak skrifi Psalm 42 te go miti 49. Asaf skrifi Psalm 50.

Piki tapu den aksi fu Bijbel

44:19—San ben de „a presi pe den busidagu de”? A kan taki a psalm skrifiman ben taki fu a presi pe sma ben e feti, èn pe den busidagu ben e nyan den sma di ben lasi den libi.

45:13, 14a—Suma na ’a umapikin fu a kownu’ di ’sma sa tyari go na a kownu’? En na a umapikin fu a „Kownu fu têgo”, namku Yehovah Gado (Openbaring 15:3). Na umapikin e prenki a gemeente fu 144.000 Kresten di kisi glori, èn di Yehovah teki leki en pikin fu di a salfu den nanga en santa yeye (Romesma 8:16). Den ben sreka na „umapikin” disi fu Yehovah, „leki wan trowmisi di ben meki ensrefi moi gi a man di ben o tron en masra”, èn den o tyari en gi a trowmasra, namku a Mesias Kownu.—Openbaring 21:2.

45:14b, 15—Suma „den nyunwenke” e prenki? Den na a „bigi ipi” tru anbegiman di e wroko makandra nanga a salfu fikapisi, èn den e horibaka gi a salfu fikapisi. Fu di den ’komoto  libilibi na ini a bigi banawtu’, meki den sa de na grontapu te a Mesias Kownu trow nanga „na umapikin” na ini hemel (Openbaring 7:9, 13, 14). Na a okasi dati, a bigi ipi sa „breiti èn den sa prisiri” trutru.

45:16—Na sortu fasi manpikin sa teki a presi fu den fositen tata fu den kownu? Di Yesus gebore na grontapu, a ben abi fositen tata. Den fositen tata disi sa tron en manpikin te a o gi den wan opobaka na a ten fu a Dusun Yari Tiri fu en. Sonwan fu den sa de na ini a grupu fu den wan di Gado poti leki „granman na heri grontapu”.

50:2—Fu san ede Bijbel e kari Yerusalem „a moro moi foto”? Disi no ben de fu di a foto srefi ben moi. Yerusalem ben moi fu di Yehovah ben gebroiki en, fu di a bow en tempel drape, èn fu di a meki a foto dati tron a foto fu den salfu kownu fu en.

Sani di wi kan leri:

42:1-3. Neleki fa wan dia di de na ini wan drei kontren e angri gi watra, na so a Leifisma ben e angri fu Yehovah. A man disi ben sari so te taki a no ben man go anbegi Yehovah na a santapresi fu En, taki ’en watra-ai tron en nyanyan dei nanga neti’, sobun, a no ben e lostu fu nyan. Wi musu kon kisi bigi warderi gi na anbegi di wi man anbegi Yehovah makandra nanga tra brada nanga sisa, a no so?

42:4, 5, 11; 43:3-5. Efu wan sani e meki taki wi no man abi demakandra nanga a Kresten gemeente fu wan pisi ten, dan a sani di kan yepi wi, na te wi e prakseri a prisiri di wi ben abi na den konmakandra dati. Awansi wi e firi na a bigin taki wi de wi wawan, toku a situwâsi di wi de na ini o memre wi tu taki Gado na wi kibripe èn taki wi musu wakti en fu yepi wi.

46:1-3. Awansi sortu rampu e miti wi, wi musu abi a fasti frutrow taki „Gado na wi kibripe nanga wi krakti”.

50:16-19. Iniwan sma di e fruteri lei èn di e du sani di no fiti, no abi a reti fu taki gi Gado.

50:20. Na presi fu tan taki fu den fowtu fu trawan, wi musu gi den sma dati pardon.—Kolosesma 3:13.

„TAN TIRI ÈN WAKTI GADO, O MI SILI”

(Psalm 51:1–71:24)

Psalm 51 te go miti 71, e bigin nanga a begi di David ben begi Gado fayafaya, baka di a ben du sondu nanga Batseiba. Psalm 52 te go miti 57, e sori taki Yehovah sa yepi den wan di e trowe den hebi fu den na en tapu èn di e wakti en fu a yepi den. Soleki fa Psalm 58 te go miti 64 e sori, dan a heri pisi ten di David ben de na ini banawtu, a meki Yehovah tron en kibripe. A e singi: „Iya, tan tiri èn wakti Gado, o mi sili, bika na en e gi mi howpu.”—Psalm 62:5.

Te wi abi wan tranga banti nanga wi Frulusuman, dan wi sa „meki poku fu gi en nen glori” (Psalm 66:2). Na ini Psalm 65, Yehovah e kisi prèise fu di a lobi fu gi sani, na ini Psalm 67 nanga 68 a e kisi prèise fu di a de wan Gado di e du sani fu kibri sma, èn na ini Psalm 70 nanga 71 a e kisi prèise fu di a de a Sma di e gi frulusu.

Piki tapu den aksi fu Bijbel:

51:12—San David ben aksi di a taki: „meki mi kisi wan yeye di de klariklari fu du a wani fu yu”? Disi no wani taki dati a ben aksi Gado fu de klariklari fu yepi en, èn a no wani taki tu dati a ben aksi fu kisi Yehovah en santa yeye. David ben e taki fu en eigi yeye, namku a denki fu en. A e aksi Gado fu a meki a kisi na angri fu du san bun.

53:1—Fu san ede a sma di e taki dati Gado no de, na wan „don sma”? Disi no wani taki  dati a sma no koni. Te wi e luku den takru sani di a sma disi e du, soleki fa Psalm 53:1-4 e sori dati, dan wi kan si taki a don fu di a no e tyari ensrefi na wan fasi di fiti.

58:3-5—Fa den ogrisma de leki wan sneki? Den lei di den e fruteri fu trawan de leki a vergif fu wan sneki. Den e pori a bun nen fu den sma neleki fa a vergif fu wan sneki e pori a skin fu wan sma. „Neleki a cobra di e tapu en yesi”, den ogrisma no e arki rai èn den no e teki trangaleri.

58:7—Fa den ogrisma „e lasi gowe na ini watra di e lon”? A kan taki David ben e prakseri a watra fu den someni liba di de na ini sonwan fu den lagipresi na ini a Pramisi Kondre. Aladi wan bigi sibibusi ben kan hei a watra na ini den liba fu a lagipresi, toku a watra heri esi ben kan hari gowe. David ben e begi Gado fu meki den ogriwan lasi gowe heri esi.

68:13—Fu san ede Bijbel e taki dati „den frei fu wan doifi sa abi solfru na tapu, èn den wiwiri fu den frei fu en sa abi geri gowtu na tapu”? Son doifi ben abi wan sortu blawblaw kloru, èn sonwan fu den wiwiri fu den ben e brenki. Den wiwiri fu den doifi disi e brenki leki solfru te son e skèin na den tapu. A kan taki David ben e agersi den fetiman fu Israel di ben kon na oso baka di den ben wini wan strei, nanga den sortu doifi disi, fu di den doifi disi e naki den frei na wan krakti fasi, èn fu di den ben moi fu si. Soleki fa son sabiman e taki, dan den wortu fu a tekst disi kan abi fu du tu nanga wan moi sani di den ben teki fu a feanti di den ben wini. Awansi fa a no fa, David ben e taki fu a wini di Yehovah ben meki a pipel fu en wini den feanti fu den.

68:18—Suma ben de den ’libisma di teki leki presenti’? Disi ben de sonwan fu den man di den Israelsma ben teki leki katiboman na a ten di den ben e teki a Pramisi Kondre abra. Bakaten den man dati ben musu yepi den Leifisma nanga a wroko fu den.—Esra 8:20.

68:30—David aksi Gado fu „piri-ai gi den busimeti di e tan na mindri warimbo”. San dati wani taki? David e agersi den feanti fu Yehovah en pipel nanga busimeti, èn a e aksi Gado fu piri-ai gi den, noso fu tapu den fu du ogri.

69:23—San den wortu ’meki den dyonku fu den feanti seki doronomo’ wani taki? Den titei na ini a dyonku de prenspari fu man du hebi wroko, soleki fu opo, noso fu tyari hebi lai. Te wan sma en dyonku no steifi, dan dati wani taki dati a sma e lasi krakti. David ben begi Gado fu meki den feanti fu en lasi krakti.

Sani di wi kan leri:

51:1-4, 17. Te wi e du sondu, dan dati no abi fu pori a banti di wi abi nanga Yehovah Gado. Te wi abi berow, dan wi kan de seiker taki a sa gi wi pardon.

 51:5, 7-10. Te wi du sondu, dan wi kan aksi Yehovah pardon fu di wi na sondu libisma. Boiti dati, wi musu begi en fu meki wi kon krin, fu meki wi kon abi wan bun banti baka nanga en, fu yepi wi fu puru sondu firi na ini wi ati, èn fu meki wi abi a fasti bosroiti fu dini en getrow.

51:18. Den sondu di David ben du ben kan tyari takru bakapisi kon gi a heri pipel. Fu dati ede a begi Gado fu sori Sion bun-ati. Te wi e du seryusu sondu, dan nofo tron dati e pori a nen fu Yehovah nanga a di fu a gemeente. Wi musu begi Gado fu meki sani kon bun baka.

52:8. Wi kan de „leki wan moi olèifbon na ini na oso fu Gado”, iya wi kan tan krosibei na Yehovah èn wi kan abi bun bakapisi na ini a diniwroko fu en, te wi gi yesi na en, èn te wi e teki a trangaleri fu en.—Hebrewsma 12:5, 6.

55:4, 5, 12-14, 16-18. Di David en eigi manpikin Absalom, seti sani fu kiri en, èn di Akitofel, a lespeki raiman fu en tori en, dan dati hati David srefisrefi. Ma den sani disi no ben meki David lasi en frutrow na ini Yehovah. Wi no musu gi pasi taki wi e lasi frutrow na ini Gado fu di wi e sari, noso fu di wi lasi-ati.

55:22. Fa wi e trowe wi hebi tapu Yehovah? Wi musu (1) taki nanga en na ini begi fu den sani di e gi wi broko-ede, (2) wi musu suku rai nanga yepi na ini a Wortu fu en, èn na en organisâsi, èn (3) wi musu du ala san wi man fu tyari wan kenki kon na ini a situwâsi fu wi.—Odo 3:5, 6; 11:14; 15:22; Filipisma 4:6, 7.

56:8. Boiti taki Yehovah sabi sortu situwâsi wi de na ini, a sabi tu fa wi e firi.

62:11. Gado no abi krakti fanowdu fu iniwan sma noso iniwan sani. Ensrefi na a sma fu pe ala krakti e komoto. ’Na en abi ala krakti.’

63:3. ’A lobi bun-ati fu Gado bun moro a libi’ bika sondro dati, wi no ben o abi wan marki na ini a libi. A ben o bun te wi e suku fu tron wan mati fu Yehovah.

63:6. Neti ten kan de wan bun ten fu denki dipi fu sani, fu di ala sani tiri na a ten dati, èn nowan sani sa puru wi prakseri.

64:2-4. Te wi e taki ogri fu tra sma, dan dati kan pori a bun nen fu a sma dati, aladi a sma dati no du nowan ogri. Wi no musu arki den sani dati èn wi no musu fruteri trawan den sani dati tu.

69:4. Fu man meki vrede de, dan a bun son leisi fu ’gi baka’, noso fu aksi trawan pardon, awansi wi feni taki wi no du nowan ogri.

70:1-5. Yehovah e yere wi te wi e begi en fayafaya fu yepi wi (1 Tesalonikasma 5:17; Yakobus 1:13; 2 Petrus 2:9). Gado kan gi pasi taki wi e tan kisi tesi, ma a sa gi wi a koni fu du a yoisti sani na ini a situwâsi dati, èn a sa gi wi krakti fu horidoro. A no sa gi pasi taki wi e kisi tesi di hebi moro leki san wi man frudrage.—1 Korentesma 10:13; Hebrewsma 10:36; Yakobus 1:5-8.

71:5, 17. David ben kon abi deki-ati nanga krakti fu di a ben frutrow tapu Yehovah di a ben yongu, èn dati ben de so, srefi bifo a ben go feti nanga Goliat, a langa bigi-skin Filistiasma (1 Samuel 17:34-37). A bun te yonguwan e frutrow tapu Yehovah na ini ala san den e du.

„Meki a glori fu en furu heri grontapu”

Psalm 72 na wan singi di abi fu du nanga a tirimakti fu Salomo, èn a e sori san sa de a situwâsi na grontapu te a Mesias sa tiri. A psalm disi e taki fu tumusi moi situwâsi, iya, vrede sa de na ala sei, sma no sa kwinsi trawan moro, ogridu no sa de, èn bogobogo nyanyan sa de na grontapu! Wi sa de wan fu den sma di sa kisi den blesi disi, èn sosrefi tra blesi di a Kownukondre sa tyari kon? Wi kan de wan fu den sma disi efu wi de klariklari fu wakti Yehovah, èn efu wi e meki Yehovah tron wi kibripe nanga wi krakti, neleki fa a psalm skrifiman ben du dati.

„Den begi fu David,  . . . kon na wan kaba” nanga den wortu disi: „Blesi fu Yehovah Gado, a Gado fu Israel, di en wawan e du wondruwroko. Èn blesi fu a glori nen fu en fu têgo, èn meki a glori fu en furu heri grontapu. Amen nanga Amen” (Psalm 72:18-20). Meki wi du leki David, fu di wi e blesi Yehovah nanga wi heri ati èn fu di wi e prèise en glori nen.

[Prenki na tapu bladzijde 9]

Yu sabi suma „na umapikin fu a kownu” e prenki?

[Prenki na tapu bladzijde 10 11]

Bijbel e kari Yerusalem „a moro moi foto”. Yu sabi fu san ede?