Ondrofenitori

Mi e dini Yehovah nanga prisiri aladi mi siki

SOLEKI FA VARNAVAS SPETSIOTIS FRUTERI

Na ini 1990, di mi ben abi 68 yari, dan mi kon lan. Ma now a de 15 yari kaba taki mi e prisiri fu dini leki wan furuten preikiman na tapu na èilanti Siprus. San gi mi a krakti fu tan teki prati na a diniwroko fu Yehovah aladi mi e siki?

MI GEBORE tapu 11 oktober 1922. Mi papa nanga mama ben abi neigi pikin, namku fo boi nanga feifi meisje. Wi ben e libi na ini a dorpu Xylophagou, na ini Siprus. Aladi mi papa nanga mama ben gudu, toku den ben musu wroko tranga na ini a gron fu den, fu man sorgu a bigi osofamiri fu wi.

Mi papa, Antonis, ben lobi fu studeri èn a ben lobi fu kon sabi nyun sani. Syatu baka di mi gebore, mi papa go luku a skoromeester fu a dorpu, èn di a ben de drape a si wan traktaat di nen De Volkskansel di den Bijbel Ondrosukuman ben tyari kon na doro (soleki fa sma ben sabi Yehovah Kotoigi na ini a ten dati). A bigin leisi a traktaat, èn fosi yu denki a ben e poti ala en prakseri na den sani di skrifi na ini. Leki bakapisi fu dati, mi papa nanga wan fu den mati fu en, Andreas Christou, ben de tu fu den fosi sma di bigin abi demakandra nanga Yehovah Kotoigi.

A wroko e go na fesi aladi den e kisi gens

Baka wan pisi ten, mi papa nanga Andreas kisi moro Bijbel publikâsi fu Yehovah Kotoigi. Heri esi, den bigin prati den tru tori di den ben e leri fu Bijbel, nanga den tra sma na ini a dorpu. Den kerki fesiman fu a Griki Orthodox Kerki nanga tra sma, ben feni taki Yehovah  Kotoigi ben e pori a denki fu sma, èn fu dati ede den ben e gens a preikiwroko fayafaya.

Aladi den tu Bijbel leriman disi ben e kisi gens, toku furu sma drape ben abi lespeki gi den. Sma ben sabi mi papa leki wan man di ben abi switifasi èn di ben lobi fu du bun gi sma. Furu leisi a yepi pôti osofamiri. Son leisi, a ben e go poti nyanyan na fesi a doro fu pôti famiri na neti, sondro taki wi sabi. Fu di a ben e tyari ensrefi leki wan Kresten di no e prakseri ensrefi nomo, meki moro sma ben wani arki a boskopu.—Mateyus 5:16.

A sani disi meki taki sowan 12 sma ben wani sabi moro fu a Bijbel boskopu. Di den kon frustan a waarheid moro bun, dan den kon si taki den ben musu kon makandra na difrenti oso fu studeri Bijbel leki wan grupu. Na a ten fu 1934, Nikos Matheakis, wan furuten preikiman fu Grikikondre, kon na Siprus, èn a miti nanga a Xylophagou grupu. Brada Matheakis ben abi pasensi di a yepi fu orga a grupu, èn di a yepi den frustan Bijbel moro bun, èn a du dati nanga wan fasti bosroiti. Bakaten a grupu disi tron a fosi gemeente fu Yehovah Kotoigi na ini Siprus.

A Kresten wroko ben e go na fesi, èn moro nanga moro sma ben kon na ini a waarheid. Fu dati ede meki den brada kon si taki den abi wan fasti presi fanowdu fu hori konmakandra. A moro owru brada fu mi, George, nanga en wefi, Eleni, gi den brada wan pikin oso di den ben gebroiki leki maksin. Den brada sreka a presi disi di ben de sei na oso fu George nanga Eleni, so taki den ben kan hori konmakandra drape. Na so den brada ben kon abi a fosi Konmakandra presi fu den na tapu na èilanti. Den ben de nanga tangi srefisrefi! Èn a sani disi meki taki a wroko go na fesi srefisrefi!

Mi bigin poti bribi na ini a waarheid fu Bijbel

Na ini 1938, di mi ben abi 16 yari, mi bosroiti fu tron temreman. Fu dati ede, mi papa seni mi go na Nikosia, a mamafoto fu Siprus. Fu di a ben wani taki sani waka bun nanga mi, meki a seti sani so taki mi ben kan tan nanga Nikos Matheakis. Furu sma na a èilanti  sabi a getrow brada disi ete, fu di a ben de fayafaya èn fu di a ben abi switifasi. A faya di a brada disi ben abi èn a deki-ati fu en, ben de sani di iniwan Kresten na ini Siprus ben musu abi na a ten di sma ben bigin nanga a preikiwroko drape.

Brada Matheakis yepi mi bun furu fu kon sabi den moro prenspari sani fu Bijbel, èn fu go na fesi na yeye fasi. Di mi ben e tan nanga en, dan mi ben e go na ala den konmakandra di ben e hori na en oso. Fu a fosi leisi na ini mi libi, mi ben e firi taki mi ben e kisi moro nanga moro lobi gi Yehovah. Mi kon kisi a fasti bosroiti fu abi wan bun banti nanga Gado. Baka wan tu mun, mi aksi Brada Matheakis efu mi ben kan go nanga en na ini a preikiwroko. Disi pasa na ini 1939.

Baka wan pisi ten, mi drai go baka na oso fu go luku mi famiri. Na ini a pisi ten dati di mi ben de nanga mi papa, mi kon kisi wan moro tranga overtoigi taki mi feni a waarheid, èn taki mi kon sabi san na a marki fu a libi. Na ini september 1939, a di fu Tu Grontapufeti bigin. Furu yonkuman di ben abi a srefi yari leki mi, ben de klariklari fu go feti, ma fu di mi gi yesi na Bijbel rai, meki mi bosroiti fu no teki prati na a feti (Yesaya 2:4; Yohanes 15:19). A srefi yari dati, mi gi misrefi abra na Yehovah, èn na ini 1940 mi teki dopu. Fu a fosi leisi mi ben e firi taki mi no ben e frede libisma moro!

Na ini 1948 mi trow nanga Efprepia, èn wi kisi fo pikin. Syatu baka di wi kisi den pikin, wi kon si taki wi ben musu wroko tranga fu kweki den „nanga a leri fu Yehovah èn frumane den, so taki den kan kisi a denki fu en” (Efeisesma 6:4). Wi ben e begi Yehovah fu yepi wi, èn wi ben e meki tranga muiti fu meki den pikin fu wi kisi wan tranga lobi gi Yehovah èn fu lespeki den wet nanga den gronprakseri fu en.

A siki di mi kisi e tron wan tyalensi gi mi

Na ini 1964, di mi ben abi 42 yari, mi bigin firi taki nowan firi ben de na ini mi retisei anu nanga mi retisei futu. Safrisafri, a srefi sani bigin pasa tu nanga mi kruktusei anu èn nanga mi kruktusei futu. Datra kon si taki mi abi spieratrofie, wan siki di e meki taki wan sma en heri skin e kon lan te fu kaba, èn a siki disi no abi dresi. Mi skreki srefisrefi di mi yere a sani dati. Wantronso a situwâsi fu mi kon kenki èn mi no ben fruwakti dati kwetikweti!  Mi ben atibron èn mi no ben bribi taki a sani disi ben miti mi. Mi ben aksi misrefi: ’Fu san ede a sani disi ben musu pasa nanga mi? Fu san ede mi e kisi a strafu disi?’ Ma baka wan pisi ten, mi no ben atibron so moro leki na a bigin. Ne mi bigin broko mi ede fu di mi no ben sabi fa sani ben o waka. Mi ben broko mi ede nanga wan lo sani. A de so taki mi heri skin ben o kon lan, èn trawan ben sa musu du ala sani gi mi? Fa mi ben o du? Mi ben o man sorgu gi mi wefi nanga den fo pikin fu mi? Te mi ben e prakseri den sani dati, dan mi ben e kisi ede-ati.

Na ini a muilek pisi ten disi fu mi libi, mi ben e firi moro leki oiti bifo taki mi ben musu begi Yehovah, èn taki mi ben musu taigi en krin san na ala den broko-ede fu mi. Nanga watra-ai mi ben e begi dei nanga neti. Heri esi mi firi taki mi kisi trowstu. Den wortu na ini Filipisma 4:6, 7 gi mi trowstu trutru. Drape skrifi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma man frustan, sa kibri un ati èn un frustan nanga yepi fu Krestes Yesus.”

Mi e horidoro aladi mi kon lan

A gosontu fu mi ben e go na baka moro nanga moro. Mi kon si taki mi ben musu fiti misrefi heri esi na a nyun situwâsi fu mi. Fu di mi no ben man du mi temreman-wroko moro, meki mi bosroiti fu suku wan tra wroko di mi ben o man du na ini a situwâsi fu mi, so taki mi ben o man sorgu gi mi osofamiri ete. Mi bigin seri ijsje na ini wan pikin oto. Mi du a wroko disi sowan siksi yari langa teleki mi ben musu sidon na ini wan rolsturu. Baka dati mi du difrenti lekti wroko.

A gosontu fu mi go na baka so te, taki sensi 1990 mi no ben man du nowan wroko moro. Now, trawan musu du ala sani gi mi, èn den musu yepi mi nanga pikinpikin sani srefi di wan gosontu sma gwenti fu du. Sma musu yepi mi fu go didon na ini mi bedi, fu wasi, èn fu weri krosi. Te mi e go na den Kresten konmakandra, dan sma musu pusu a rolsturu pe mi e sidon na ini go na a oto, èn den musu opo mi poti na ini na oto. Te mi doro na a Kownukondre zaal, dan sma musu opo mi puru na ini na oto, den musu poti mi na ini wan rolsturu, èn den musu pusu a rolsturu go na ini a zaal. Na a konmakandra, mi abi wan wrokosani na mi sei di e waran mi futu.

Ma aladi mi lan, toku mi e go na ala den konmakandra doronomo. Mi sabi taki na drape Yehovah e gi wi leri, èn te mi de nanga den Kresten brada nanga sisa fu mi, dan mi e firi bun, mi e kisi krakti, nanga deki-ati (Hebrewsma 10:24, 25). Lepi Kresten e kon luku mi doronomo, èn a sani dati e yepi mi trutru. Iya, mi e firi leki fa David ben e firi di a ben taki: „Mi beker furu srefisrefi.”

Mi lobi wefi yepi mi na wan tumusi moi fasi ala den yari disi. Den pikin fu mi du dati tu. Wan tu yari kaba, den e yepi mi nanga aladei sani. A no makriki gi den fu du ala den sani dati, èn ibri yari a e kon moro muilek fu sorgu mi. Den de trutru wan bun eksempre, fu di den abi pasensi èn fu di den e du ala san den man fu yepi mi. Mi e begi Yehovah taki a e tan blesi den.

Wan tra tumusi moi sani di Yehovah seti fu gi den futuboi fu en deki-ati, na a begi di den man begi en (Psalm 65:2). Fu di mi begi Yehovah nanga mi heri ati, meki a gi mi krakti fu horidoro ala den yari disi. Spesrutu te mi lasi-ati, dan begi e yepi mi fu firi bun baka èn fu tan abi prisiri. Fu di mi e taki doronomo nanga Yehovah, meki mi e kisi krakti baka èn mi e kisi wan moro fasti bosroiti fu horidoro. Mi de seiker taki Yehovah e yere den begi fu den futuboi fu en, èn taki a e gi den wan korostu firi te den abi dati fanowdu.—Psalm 51:17; 1 Petrus 5:7.

Ma san de moro prenspari, na taki mi e kisi krakti ibri leisi, te mi e prakseri taki te fu kaba Gado sa dresi ala sma di sa kisi a grani fu libi na ini a Paradijs. Dati sa de na a ten te a  Manpikin fu en, Yesus Krestes, sa tiri leki Kownu fu a Kownukondre. Furu leisi, mi e krei te mi e prakseri a tumusi moi howpu dati.—Psalm 37:11, 29; Lukas 23:43; Openbaring 21:3, 4.

Mi e dini leki wan furuten preikiman

Na a ten fu 1991, mi luku a situwâsi fu mi, èn mi kon si taki a moro bun sani di o yepi mi fu no firi sari gi misrefi, na fu tan prati a tumusi prenspari Kownukondre bun nyunsu nanga trawan. A yari dati mi bigin dini leki wan furuten preikiman.

Fu di mi lan, meki moro furu mi e skrifi brifi fu man gi kotoigi na sma. Ma mi musu meki tranga muiti fu skrifi den brifi disi. A muilek gi mi fu hori a pen bun na ini mi anu, fu di a siki di mi abi meki taki mi anu kon swaki. Ma fu di mi horidoro èn fu di mi tan begi Gado, meki mi ben man skrifi brifi fu gi kotoigi na sma, moro leki 15 yari kaba. Mi e preiki tu gi sma nanga yepi fu telefon. Mi e teki ibri okasi di mi feni, fu taki fu a howpu di mi abi taki wan nyun grontapu o kon, èn taki a Paradijs o de na grontapu. Mi e taki fu den sani disi nanga famiriman, mati, nanga birtisma di e kon luku mi na oso.

Leki bakapisi fu dati, mi ondrofeni wan lo sani di gi mi deki-ati. Mi ben breiti fu si taki wan fu den granpikin fu mi, go na fesi na yeye fasi èn taki a teki a waarheid. Mi ben studeri sowan 12 yari pasa nanga en. Fu di Bijbel ben abi krakti tapu a konsensi fu en, meki a tan loyaal èn a tan hori ensrefi na a bosroiti di a ben teki fu no teki prati leki Kresten na politiek afersi.

Mi breiti srefisrefi te sma di mi ben skrifi brifi gi, e skrifi mi baka fu di den wani sabi moro fu Bijbel. Son tron wan tu fu den e aksi fu kisi moro Bijbel publikâsi. Fu eksempre, wan uma ben bel mi fu taigi mi tangi gi a moi brifi di mi ben seni gi en masra. A ben lobi den sani di ben skrifi na ini a brifi. Leki bakapisi fu dati mi ben man taki furu leisi fu Bijbel nanga a trowpaar disi te den ben kon luku mi.

Mi abi wan tumusi moi howpu

Na ini den yari di pasa, mi si fa a nomru fu Kownukondre preikiman gro na a pisi disi fu grontapu. Den brada e gebroiki a pikin Kownukondre zaal sei na oso fu mi brada George te now ete, èn wan tu leisi kaba den meki en kon moro bigi, èn den seti en kon moro bun. A presi disi na wan heri moi presi fu anbegi, èn tu gemeente fu Yehovah Kotoigi e gebroiki en.

Mi papa dede na ini 1943, di a ben abi 52 yari. Ma a libi wan tumusi moi yeye gudu gi den pikin fu en! Aiti fu den pikin fu en teki a waarheid èn te now ete den e dini Yehovah. Na ini a dorpu Xylophagou, pe mi papa gebore, èn sosrefi na ini den dorpu di de krosibei, dri gemeente de now di abi ala nanga ala 230 Kownukondre preikiman!

Den tumusi moi bakapisi disi gi mi bigi prisiri. Now di mi abi 83 yari, mi abi tranga frutrow na ini den wortu fu a psalm skrifiman, di ben taki: „Den yongu lew nanga neki wiwiri abi pikinso fu nyan èn angri e kiri den, ma den wan di e suku Yehovah no sa mankeri iniwan bun sani” (Psalm 34:10). Mi e wakti fayafaya fu a ten kon te a profeititori di skrifi na ini Yesaya 35:6, e kon tru. Drape skrifi: „Na a ten dati a malengriwan sa kren neleki wan dia.” Aladi mi siki, mi abi a fasti bosroiti fu tan dini Yehovah teleki a ten dati.

[Karta na tapu bladzijde 17]

(Efu yu wani si pe den sani disi skrifi, luku a tijdschrift)

TORKUKONDRE

SIRIA

LIBANON

SIPRUS

Nikosia

Xylophagou

Mindrikondre Se

[Prenki na tapu bladzijde 17]

A fosi Kownukondre zaal na ini Xylophagou, di den brada e gebroiki te now ete

[Prenki na tapu bladzijde 18]

Mi nanga Efprepia na ini 1946, èn na ini a ten disi

[Prenki na tapu bladzijde 20]

Mi lobi fu gi kotoigi nanga yepi fu telefon èn nanga yepi fu brifi