„Teki a libi so taki yu kan tan na libi”
„Teki a libi so taki yu kan tan na libi”
„Mi poti libi nanga dede na yu fesi, blesi nanga fluku; èn yu musu teki a libi so taki yu kan tan na libi.”—DEUTERONOMIUM 30:19.
1, 2. San libisma man du fu di den meki leki wan prenki fu Gado?
„MEKI wi meki libisma leki wan prenki fu wisrefi, soleki fa wi de.” Den wortu disi di Gado taki, skrifi na ini a fosi kapitel fu Bijbel. Fu dati ede, Genesis 1:26, 27 e taki dati „Gado meki a man leki wan prenki fu ensrefi; soleki fa Gado de, na so a meki a man”. Dati meki a fosi libisma ben e difrenti fu ala tra mekisani na grontapu. A libisma disi ben de leki a Mekiman fu en, fu di a ben man teki na eksempre fu Gado na ini a fasi fa a ben e prakseri fu wan tori, na ini a fasi fa a ben e sori lobi, fa a ben e du retidu, fa a ben e sori taki a abi koni, èn fa a ben e gebroiki makti. A ben abi wan konsensi fu yepi en teki bosroiti di ben o tyari bun bakapisi gi en, èn di ben o plisi en hemel Tata (Romesma 2:15). Fu taki en leti, Adam ben kan teki en eigi bosroiti. Baka di Yehovah meki a manpikin fu en na grontapu, dan a luku en èn a taki: ’A de heri bun.’—Genesis 1:31; Psalm 95:6.
2 Leki bakapikin fu Adam, wi sosrefi meki leki wan prenki fu Gado, soleki fa En de. Ma a de so trutru taki wi kan teki wi eigi bosroiti? Aladi Yehovah man sabi na fesi san o pasa, toku a no e bosroiti na fesi fa ibriwan fu wi o handri èn san sa de den bakapisi fu dati. A bosroiti fu no gebroiki a koni di a abi fu sabi sani na fesi, so taki den pikin fu en na grontapu kan gebroiki a reti di den abi fu teki den eigi bosroiti. Fu man kon frustan o prenspari a de fu gebroiki a reti dati fu teki yoisti bosroiti, dan meki wi go luku fosi san wi kan leri fu a pipel fu Israel.—Romesma 15:4.
Den Israelsma ben kan teki den eigi bosroiti
3. San ben de a fosiwan fu den Tin Komando, èn fa den getrow Israelsma sori taki den ben wani gi yesi na a komando disi?
3 Yehovah ben taigi den Israelsma: „Mi na Yehovah yu Gado, di tyari yu komoto na ini a kondre Egepte, komoto na ini a srafu-oso” (Deuteronomium 5:6). Na ini 1513 b.G.T., a pipel Israel ondrofeni fa Gado puru den na wan wondru fasi na ini katibo na Egepte, èn fu dati ede den no ben abi fu tweifri na den wortu dati di Gado ben taki. Na ini a fosiwan fu den Tin Komando, Yehovah ben meki Moses taigi a pipel fu en: „Yu no musu anbegi nowan tra gado boiti mi” (Exodus 20:1, 3). Na a okasi dati, a pipel Israel bosroiti fu gi yesi na Yehovah. Den ben de klariklari fu anbegi Yehovah wawan.—Exodus 20:5; Numeri 25:11.
4. (a) Soleki fa Moses ben sori, dan sortu bosroiti den Israelsma ben kan teki? (b) Sortu bosroiti wi kan teki na ini a ten disi?
4 Sowan 40 yari baka dati, Moses ben memre den bakapikin fu den Israelsma na a bosroiti di den ben musu teki now. A ben taki: „Fu tru, mi e teki hemel nanga grontapu leki kotoigi teige unu tide, taki mi poti libi nanga dede na yu fesi, blesi nanga fluku; èn yu musu teki a libi so taki yu kan tan na libi, yu nanga yu bakapikin” (Deuteronomium 30:19). Na so a de tu, taki na ini a ten disi wi kan bosroiti tu fu dini Yehovah getrow èn kisi têgo libi leki bakapisi fu dati, noso fu trangayesi en èn ondrofeni den takru bakapisi fu dati. Luku tu eksempre fu sma di teki bosroiti di e difrenti fu makandra.
5, 6. Sortu bosroiti Yosua teki, èn san ben de a bakapisi?
5 Na ini 1473 b.G.T., Yosua tyari den Israelsma go na ini a Pramisi Kondre. Fosi Yosua dede, dan a gi a heri pipel a seryusu rai disi: „Efu unu feni taki a no bun fu dini Yehovah, dan bosroiti gi unsrefi suma unu sa dini, efu na den gado di un fositen tata na a tra sei fu a Liba ben dini, noso den gado fu den Amorietsma di unu e tan na ini a kondre fu den.” Baka dati a taki: „Mi nanga mi osofamiri, wi sa dini Yehovah.”—Yosua 24:15.
6 Wan pisi ten na fesi, Yehovah ben taigi Yosua fu abi deki-ati èn fu no frede, èn a taigi en sosrefi fu no drai baka gi a Wet fu Gado. Na presi fu dati, Yosua ben musu leisi a Wet nanga wan safri sten dei nanga neti, èn na so fasi sani ben o waka bun gi en (Yosua 1:7, 8). Yosua du dati, èn a ben abi bun bakapisi trutru. A bosroiti di Yosua ben teki ben tyari blesi kon gi en. Yosua ben taki: „Fu ala den bun pramisi di Yehovah ben gi na oso fu Israel, nowan no de di no kon tru; den alamala ben kon tru.”—Yosua 21:45.
7. Sortu bosroiti son Israelsma ben teki na ini a ten fu Yesaya, èn san ben de a bakapisi?
7 Ma sowan 700 yari baka dati, den Israelsma handri na wan heri tra fasi. Na a ten dati, furu Israelsma ben e hori densrefi na heiden gwenti. Fu eksempre, tapu a lasti dei fu a yari, sma ben e hori wan fesa, pe den ben e nyan switi nyanyan èn ben e dringi switi win. A no ben de so nomo taki den famiri ben kon makandra fu abi prisiri. Den ben kon makandra fu gi grani na tu heiden gado. A profeiti Yesaya ben skrifi fa Gado ben si a sani disi di ben e sori taki den Israelsma no ben de getrow. A ben skrifi: „Na unu e gowe libi Yehovah, na unu e frigiti mi santa bergi, na unu e sreka wan tafra gi a gado fu Koloku èn na unu e kanti win di moksi, gi a gado di e taki na fesi fa sani o waka.” Den Israelsma ben e bribi taki den ben musu plisi a „gado fu Koloku”, èn „a gado di e taki na fesi fa sani o waka”, bika a no Yehovah ben o meki den koti furu nyanyan, ma na den gado dati. Fu taki en leti, fu di den bosroiti fu no gi yesi na Yehovah, meki sani no waka bun gi den. Yehovah ben taki: „Mi sa poti unu gi a feti-owru, èn un alamala sa boigi unsrefi fu den kiri unu; bika mi ben kari unu, ma unu no ben piki, mi ben taki, ma unu no ben arki; èn unu ben tan du san no bun na mi ai, èn unu ben bosroiti fu du a sani di no ben plisi mi” (Yesaya 65:11, 12). A don bosroiti di den ben teki ben tyari pori kon gi den, èn a gado fu Koloku èn a gado di e taki na fesi fa sani o waka, no ben kibri den gi dati.
Fa fu teki a yoisti bosroiti
8. San wi musu du fu man teki a yoisti bosroiti, soleki fa Deuteronomium 30:20 e taki?
8 Di Moses gi Israel a rai fu teki libi, dan a sori den taki den ben musu du den dri sani disi: „Fu di yu lobi Yehovah, yu Gado, fu di yu e arki en sten èn fu di yu e tai hori na en” (Deuteronomium 30:20). Meki wi go luku ibri wan fu den sani disi so taki wi kan teki a yoisti bosroiti.
9. Fa wi kan sori taki wi lobi Yehovah?
9 Wi musu lobi Yehovah wi Gado: Wi wani dini Yehovah fu di wi lobi en. Den eksempre fu a ten fu Israel de leki wan warskow gi wi, èn fu dati ede wi e kakafutu te wi e kisi tesi fu du hurudu, èn wi e weigri fu libi na wan fasi di kan meki taki wi e kon de leki den grontapusma di lobi gudu (1 Korentesma 10:11; 1 Timoteyus 6:6-10). Wi e tai hori na Yehovah, èn wi e hori wisrefi na den wet fu en (Yosua 23:8; Psalm 119:5, 8). Fosi den Israelsma ben go na ini a Pramisi Kondre, Moses gi den a rai disi: „Luku, mi leri unu wet nanga krutu bosroiti, soleki fa Yehovah mi Gado ben taigi mi fu du, so taki unu kan hori unsrefi na den sani dati te unu de na ini a kondre di unu o go teki abra. Èn un musu hori unsrefi na den èn un musu du den, bika disi sa sori den pipel di sa yere fu ala den wet disi, taki unu koni èn taki unu abi frustan” (Deuteronomium 4:5, 6). Now na a ten fu sori taki wi lobi Yehovah, èn fu dati ede wi musu poti a wani fu en na a fosi presi na ini wi libi. Te wi e du dati, dan wi sa kisi blesi trutru.—Mateyus 6:33.
10-12. San wi e leri fu den sani di pasa na ini a ten fu Noa?
10 Wi musu arki a sten fu Gado: Noa ben de „wan preikiman fu regtfardikifasi” (2 Petrus 2:5). Pikinmoro ala den sma di ben e libi na grontapu na a ten bifo a Frudu, „no ben poti prakseri” na den warskow di Noa ben gi, fu di tra sani ben e puru den prakseri na san de prenspari. San ben de a bakapisi? „A frudu kon èn a wai den alamala puru.” Yesus ben warskow taki na ini a ten fu wi, namku a pisi ten fu „a denoya fu a Manpikin fu libisma”, wan srefi sortu sani ben o pasa. Den sani di pasa na ini a ten fu Noa, de wan seryusu warskow gi sma na ini a ten disi, di no wani gi yesi na a boskopu fu Gado.—Mateyus 24:39.
11 Den wan di e spotu nanga den warskow fu Gado di den futuboi fu Gado na ini a ten disi e gi, musu frustan san sa de den bakapisi te den no e gi yesi na den warskow. Disi na san na apostel Petrus e taki fu den spotuman dati: „Fu espresi den no wani sabi a sani disi, namku taki nanga yepi fu a wortu fu Gado hemel kon de fu sensi owruten, èn sosrefi wan grontapu di ben opo komoto na ini a watra leki drei gron, èn soso watra ben de na en lontu; nanga yepi fu den sani dati, a grontapu fu a ten dati ben kisi pori di watra sungu en. Ma nanga yepi fu a srefi wortu dati, Gado libi den hemel nanga a grontapu fu now fu bron den nanga faya, èn a e libi den teleki a dei te a o krutu èn pori den ogrisma.”—2 Petrus 3:3-7.
12 A bosroiti di den sma dati ben teki, ben de heri tra fasi leki a wan di Noa nanga en osofamiri ben teki. ’Gado ben warskow Noa gi sani di a no ben si ete, èn fu di Noa ben abi bribi, meki a frede Gado èn a bow wan ark.’ Fu di a ben gi yesi na a warskow dati, meki en nanga en osofamiri kisi frulusu (Hebrewsma 11:7). Meki a de so taki wi no e draidrai fu arki a boskopu fu Gado, èn a de so taki wi e handri akruderi a boskopu dati.—Yakobus 1:19, 22-25.
13, 14. (a) Fu san ede a de tumusi prenspari fu ’tai hori na Yehovah’? (b) Fa wi musu gi pasi taki Yehovah „wi Patubakriman” kenki a denki fu wi?
13 Wi musu tai hori na Yehovah: Fu man ’teki libi so taki wi kan tan na libi’, dan a no musu de so nomo taki wi lobi Yehovah èn taki wi e arki en, ma wi musu ’tai hori tu na Yehovah’. Dati wani taki wi musu tan du a wani fu Yehovah. Yesus ben taki: „Te unu horidoro, dan unu o kisi libi” (Lukas 21:19). Fu taki en leti, a bosroiti di wi e teki ini a tori disi e sori san de na ini wi ati. Odo 28:14 e taki: „Koloku a sma de di e frede doronomo, ma a sma di tranga en ati, sa ondrofeni rampu.” Na disi ben pasa nanga Farao fu owruten Egepte. Ibri leisi te wan fu den Tin Rampu ben pasa na ini Egepte, dan Farao ben e tranga en ati moro nanga moro, na presi fu sori frede gi Gado. A no Yehovah meki taki Farao trangayesi en, ma A gi a heimemre tiriman disi na okasi fu teki wan bosroiti. Awansi fa a no fa, a wani fu Yehovah ben kon tru. Paulus ben tyari disi kon na krin di a taki fa Yehovah ben e si Farao: „Na fu dati ede mi meki yu tan na libi, so taki mi kan teki yu leki eksempre fu sori sma a krakti fu mi, èn so taki mi nen ben sa meki bekènti na heri grontapu.”—Romesma 9:17.
14 Hondrohondro yari baka di Gado puru Israel na ondro a makti fu Farao, a profeiti Yesaya ben taki: „O Yehovah, yu na wi Tata. Wi na a doti, èn yu na wi Patubakriman; èn wi alamala na a wroko fu yu anu” (Yesaya 64:8). Wi e sori taki wi e gi pasi taki Yehovah e kenki a denki fu wi te e wi studeri Gado Wortu, èn te wi e du san a wortu fu en e taki, èn dati sa meki taki safrisafri wi e tron wan nyun sma. Wi e kisi moro sakafasi, èn wi sa de klariklari fu teki rai fu Yehovah. Disi sa meki en moro makriki gi wi fu tai hori getrow na Yehovah, fu di wi wani plisi en trutru.—Efeisesma 4:23, 24; Kolosesma 3:8-10.
’Yu musu meki den kon sabi den sani disi’
15. Soleki fa Deuteronomium 4:9 e sori, dan sortu tu sani Moses ben memre den Israelsma fu du?
15 Di a pipel fu Israel ben de fu go na ini a Pramisi Kondre, dan Moses taigi den: „Ma yu musu luku bun èn yu musu libi bun, so taki yu no e frigiti den sani di yu si, èn so taki den sani dati e tan na ini yu ati yu heri libi langa; èn yu musu meki yu manpikin nanga yu granpikin kon sabi den sani disi” (Deuteronomium 4:9). Efu a pipel ben wani taki Yehovah blesi den èn efu den ben wani sani waka bun gi den na ini a kondre di den ben o kisi, dan den ben musu du tu sani di Yehovah, a Gado fu den, ben fruwakti fu den. Den no ben musu frigiti den kefalek sani di Yehovah ben du èn di den ben si nanga den eigi ai, èn den ben musu meki den bakapikin fu den kon sabi den sani disi. Na ini a ten disi, wi leki a pipel fu Gado musu du a srefi, efu wi wani ’teki libi so taki wi kan tan na libi’. San na den sani di Yehovah du gi wi èn di wi si nanga wi eigi ai?
16, 17. (a) San den zendeling fu a Gileadskoro ben man du na ini a Kownukondre preikiwroko? (b) Yu kan kari wan tu sma di de wan eksempre fu di den e tan preiki fayafaya?
16 Wi e prisiri fu si fa Yehovah blesi a preikiwroko fu wi èn a wroko di wi e du fu meki disipel. Sensi a Waktitoren Bijbelskoro Gilead bigin na ini 1943, zendeling go na furu kondre fu teki fesi na ini a wroko di Kotoigi e du fu meki disipel. Te na a dei fu tide, den fosi zendeling di klari a skoro dati e tan preiki a Kownukondre fayafaya, aladi den kon owru kaba èn aladi sonwan fu den no man du furu fu di den siki. Wan fu den zendeling disi di de wan moi eksempre, na Mary Olson, di klari a Gileadskoro na ini 1944. A dini leki zendeling na ini Urugwei fosi, baka dati na ini Kolombia, èn now a e dini na ini Porto Riko. Aladi Sisa Olson no man du so furu moro fu di a kon owru, toku a e tan preiki fayafaya. Fu di a leri taki Spanyorotongo, meki a e go ibri wiki makandra nanga den preikiman na ini a preikiwroko.
17 Nancy Porter di lasi en masra na ini dede, klari a Gileadskoro na ini 1947, e dini te now ete leki zendeling na ini den Bahamas èilanti. A sisa disi na ete wan fu den zendeling di e wroko tranga na ini a preikiwroko. Sisa Porter e taki na ini na ondrofenitori fu en: „Mi kisi spesrutu prisiri fu di mi leri trawan Bijbel waarheid. A e yepi mi fu poti yeye afersi na a fosi presi, èn a sani dati meki taki mi libi seti èn taki mi no e bruya.” * Te Sisa Porter nanga tra getrow futuboi fu Yehovah e prakseri fu a ten di pasa, dan den no e frigiti san Yehovah du. Fa a de nanga wi? Wi e warderi en taki Yehovah blesi a Kownukondre wroko na ini wi kontren?—Psalm 68:11.
18. Te wi e leisi den ondrofenitori fu den zendeling, dan san wi kan leri fu den?
18 Te wi e luku san den brada nanga sisa disi di e dini Yehovah langa ten kaba, du na ini a preikiwroko, èn san den e du te now ete, dan dati e naki wi ati. A e gi wi deki-ati te wi e leisi na ondrofenitori fu den, bika te wi e si san Yehovah du gi den getrowsma disi, dan dati e gi wi wan moro fasti bosroiti fu dini Yehovah. Yu gwenti fu leisi den moi ondrofenitori dati di de fu feni na ini A Waktitoren? Yu e denki dipi fu den?
19. Fa Kresten papa nanga mama kan gebroiki den ondrofenitori na ini A Waktitoren?
19 Moses ben memre den Israelsma taki den no ben musu frigiti nowan fu den sani di Yehovah ben du gi den, èn a ben memre den tu taki den sani disi ben musu tan na ini den ati den heri libi langa. A ben taigi den fu du ete wan sani: „Yu musu meki yu manpikin nanga yu granpikin kon sabi den sani disi” (Deuteronomium 4:9). Ondrofenitori e hari sma prakseri ala ten. Yonguwan di e gro kon bigi, abi bun eksempre fanowdu na ini den libi. Sisa di no trow kan leri wan sani fu den ondrofenitori fu getrow owru sisa, èn den ondrofenitori dati skrifi na ini A Waktitoren. Brada nanga sisa kan du moro na ini a preikiwroko te den e go dini na kontren pe sma e taki wan tra tongo. Kresten papa nanga mama, fu san ede unu no e gebroiki den ondrofenitori fu getrow zendeling fu a Gileadskoro èn fu trawan, fu gi yu pikin deki-ati fu go na ini a furuten diniwroko?
20. San wi musu du fu man „teki libi”?
20 Ma fa ibriwan fu wi kan „teki libi”? Wi kan du dati te wi e gebroiki a moi presenti di wi kisi, namku a reti di wi abi fu teki wi eigi bosroiti, fu sori Yehovah taki wi lobi en. Boiti dati, wi musu tan du ala san wi man na ini a diniwroko fu en, so langa leki a e gi wi na okasi dati. „Bika”, soleki fa Moses ben taki, Yehovah „e gi libi, èn a kan meki yu libi fu wan langa pisi ten.”—Deuteronomium 30:19, 20.
[Futuwortu]
^ paragraaf 17 Luku na artikel „Mi de nanga prisiri èn nanga tangi na ati aladi a dede fu mi masra gi mi bigi sari”, na ini A Waktitoren fu 1 yuni 2001, bladzijde 23-27.
Yu kan memre disi ete?
• San yu leri fu den eksempre na ini na artikel disi di e sori fa sma teki bosroiti di e difrenti fu makandra?
• Sortu sani wi musu du fu man „teki libi”?
• San na den tu sani di Yehovah e fruwakti fu wi?
[Aksi fu a tori disi]
[Prenki na tapu bladzijde 26]
„Mi poti libi nanga dede na yu fesi”
[Prenki na tapu bladzijde 29]
Noa nanga en osofamiri kisi kibri fu di den arki a sten fu Gado
[Prenki na tapu bladzijde 30]
Mary Olson
[Prenki na tapu bladzijde 30]
Nancy Porter