Yehovah e fruteri „na a bigin san sa de a kaba”
Yehovah e fruteri „na a bigin san sa de a kaba”
„A Sma di e fruteri na a bigin san sa de a kaba, èn di e fruteri langa ten na fesi kaba san na den sani di no du.”—YESAYA 46:10.
1, 2. San na a moi fu a tori, te wi e luku a fasi fa Babilon fadon, èn san den sani disi e leri wi fu Yehovah?
NA INI a dungru fu a neti, srudati fu a legre fu Persia e waka safrisafri na a syoro fu na Eufraatliba fu go teki a makti foto Babilon abra. Te den e doro krosibei fu den portu fu a foto, dan den e fruwondru fu a sani di den e si. Den tu bun bigi doro fu a skotu fu Babilon tan opo! Den e kren go na ini a foto. Heri esi den e teki a foto abra. Sirus, a fesiman fu den srudati, wantewante e teki a makti abra na ini a kondre, èn bakaten a e meki wan wet di e sori taki den Israelsma di ben de na ini katibo, musu kon fri. Dusundusun sma di ben de na ini katibo e go baka na Yerusalem, fu seti na anbegi fu Yehovah baka na ini a kondre fu den.—2 Kroniki 36:22, 23; Esra 1:1-4.
2 Historia skrifiman taki dati den sani dati di pasa na ini den yari 539-537 b.G.T., na sani di pasa trutru. Ma a moi fu a tori, na taki sma ben sabi sowan 200 yari na fesi kaba taki den sani dati ben o pasa. Na so langa na fesi kaba Yehovah ben meki a profeiti Yesaya skrifi fa Babilon ben o fadon (Yesaya 44:24–45:7). Gado no tyari kon na krin wawan fa Babilon ben o fadon, ma a ben taki tu fa a sma ben o nen di ben o teki Babilon abra. * Yehovah ben taigi den Israelsma di ben si den sani di a du na ini a ten dati: „Memre den fosi sani fu langa ten pasa kaba, taki mi na a Sma di de Gado, èn nowan tra Gado no de, noso wan sma di de leki mi; a Sma di e fruteri na a bigin san sa de a kaba, èn di e fruteri langa ten na fesi kaba san na den sani di no du” (Yesaya 46:9, 10a). Fu tru, Yehovah na wan Gado di man sabi na fesi san o pasa.
3. Tapu sortu aksi wi sa kisi piki?
3 San Gado sabi fu a ten di e kon? Yehovah sabi na fesi san ibriwan fu wi o du? A de so trutru taki a bosroiti na fesi fa wi libi o waka? Na ini na artikel disi, èn na ini a wan di e kon, wi sa luku fa Bijbel e gi piki tapu den aksi disi èn sosrefi tapu tra aksi di abi fu du nanga a tori disi.
Yehovah na wan Gado di e taki profeititori
4. Suma ben taki den profeititori di skrifi na ini Bijbel?
4 Fu di Yehovah man sabi san o pasa na ini a ten di e kon, meki a taigi den futuboi fu en na ini Bijbel ten fu skrifi furu profeititori. Den profeititori disi e meki wi kon sabi na fesi san Yehovah abi na prakseri fu du. Yehovah e taki: „Den fosi sani kon tru, ma mi e taki fu nyun sani di o pasa. Fosi den sani dati pasa, mi e meki unu kon sabi fu den” (Yesaya 42:9). A pipel fu Gado abi wan tumusi moi grani trutru!
5. Sortu frantwortu sma abi te den kon sabi san Yehovah o du na ini a ten di e kon?
5 A profeiti Amos e gi wi a dyaranti disi: „A Moro Hei Masra Yehovah no sa du noti, sondro fu tyari den afersi fu en kon na krin gi den futuboi fu en, namku den profeiti.” Fu di den ben sabi den sani disi na fesi, meki den ben abi wan frantwortu. Luku a tumusi moi agersitori di Amos e fruteri baka dati: „Wan lew bari! Suma no sa frede?” Neleki fa libisma nanga meti e handri wantewante te wan lew e bari na ini a birti fu den, na so profeiti soleki Amos handri wantewante fu meki sma kon sabi san Yehovah ben taki. „A Moro Hei Masra Yehovah srefi taki! Suma no sa taki profeititori?”—Amos 3:7, 8.
A „wortu” fu Yehovah ’trutru sa du a sani di a musu du’
6. Fa a „bosroiti” fu Yehovah di ben abi fu du nanga a fadon fu Babilon, kon tru?
6 Yehovah ben taki nanga yepi fu en profeiti Yesaya: „San misrefi bosroiti sa kon tru, èn ala san mi feni bun, mi sa du” (Yesaya 46:10b). A „bosroiti” fu Yehovah, noso a sani di a ben abi na prakseri fu du ini a tori fu Babilon, ben de taki Sirus ben musu komoto na Persia fu go teki Babilon abra èn fu meki a kondre dati fadon. Yehovah ben taki dati langa ten na fesi. Soleki fa wi ben si kaba, dan a sani dati kon tru dorodoro na ini a yari 539 b.G.T.
7. Fu san ede wi kan abi a frutrow taki Yehovah en „wortu” e kon tru ala ten?
7 Pikinmoro fo yarihondro bifo Sirus teki Babilon abra, den legre fu Amon nanga Moab span anu makandra fu feti nanga Kownu Yosafat fu Yuda. Yosafat ben e frutrow tapu Yehovah, èn a begi:,,O Yehovah, a Gado fu wi fositen tata, a no yu na Gado na hemel, èn a no yu e tiri ala den kownukondre fu den nâsi, èn a no na ini yu anu krakti nanga makti de, aladi nowan sma kan kakafutu gi yu?” (2 Kroniki 20:6) Yesaya ben sori tu taki a ben e frutrow tapu Yehovah di a taki: „Yehovah fu den legre srefi teki a bosroiti, èn suma kan kenki dati? Èn na anu fu en na a wan di a langa, èn suma kan meki a drai baka?” (Yesaya 14:27) Wan pisi ten Kownu Nebukadnesar fu Babilon ben lasi en frustan, ma di a kisi ensrefi baka, dan a taki nanga sakafasi: „Nowan sma no de di kan tapu [Gado en] anu noso di kan taigi en: ’San yu du?’” (Danièl 4:35) Iya, Yehovah e gi a pipel fu en a dyaranti disi: „A wortu di e komoto na mi mofo . . . no sa drai kon baka na mi sondro fu du wan sani, ma seiker a sa du a sani di mi feni bun, èn trutru a sa du a sani di mi seni en fu go du” (Yesaya 55:11). Wi kan frutrow dorodoro taki a „wortu” fu Yehovah e kon tru ala ten. Den sani di Yehovah abi na prakseri sa kon tru seiker.
A sani di Gado „abi na prakseri ala ten”
8. San na a sani di Gado ’abi na prakseri fu ala ten’?
8 Na ini a brifi di na apostel Paulus ben skrifi gi den Kresten na ini Efeise, a ben sori taki Gado ’abi wan sani na prakseri fu ala ten’ (Efeisesma 3:11). A prakseri disi abi fu du nanga a fasti bosroiti di Yehovah abi fu du a sani di a ben abi na prakseri sensi ten gi libisma, èn gi grontapu (Genesis 1:28). Te wi e luku a fosi profeititori di skrifi na ini Bijbel, dan dati sa yepi wi fu frustan taki den sani di Yehovah abi na prakseri e kon tru ala ten.
9. San na a prakseri fu Gado, soleki fa Genesis 3:15 e sori dati?
9 A pramisi di Yehovah e gi na ini Genesis 3:15 e sori taki baka di Adam nanga Eva sondu, dan Yehovah bosroiti wantewante taki na agersi uma fu en ben o kisi wan siri, noso wan manpikin. Yehovah ben sabi na fesi tu san ben o de a bakapisi fu a feantifasi na mindri na uma fu en nanga Satan, èn na mindri den manpikin fu den. Yehovah ben o gi pasi taki a Manpikin fu na uma fu En ben o masi na en bakafutu, ma na wan ten di Gado feni bun, a Manpikin ben o masi a sneki, noso Satan Didibri, na en ede. Na ini den hondrohondro yari baka di Yehovah teki a bosroiti, dan a prakseri fu en kon tru dorodoro nanga yepi fu a famirilin di a gebroiki, teleki Yesus sori ensrefi leki a pramisi Mesias.—Lukas 3:15, 23-38; Galasiasma 4:4.
Yehovah bosroiti na fesi san o pasa
10. A de so taki Yehovah ben bosroiti sensi a bigin taki Adam nanga Eva ben o sondu? Fruklari dati.
10 Na apostel Petrus ben sori fa Gado gebroiki Yesus fu meki a prakseri fu en kon tru. Petrus ben skrifi: „Gado ben sabi [Yesus] kaba bifo grontapu ben seti, ma Gado tyari en kon na krin na ini den lasti dei, fu a bun fu unu” (1 Petrus 1:20). A de so taki Yehovah ben bosroiti sensi a bigin taki Adam nanga Eva ben o sondu èn taki Yesus Krestes ben o abi fu pai a lusu-paiman? Nôno. A wortu „seti” na a vertaling fu wan Griki wortu di wani taki trutru ’a sai di sma e sai siri’. A de so taki sma ben sai siri, noso taki libisma ben meki pikin bifo Adam nanga Eva sondu? Nôno. Na baka di Adam nanga Eva sondu, dan fosi den meki pikin (Genesis 4:1). Sobun, baka di Adam nanga Eva opo densrefi teige Gado, èn fosi den meki pikin, dan Yehovah bosroiti taki a „Manpikin” ben o kon. A dede nanga na opobaka fu Yesus meki taki a lusu-paiman di Yehovah seti na wan lobi-ati fasi, ben pai. Nanga yepi fu a lusu-paiman disi, wan kaba sa kon na sondu di wi kisi èn na ala den takru sani di Satan wani du.—Mateyus 20:28; Hebrewsma 2:14; 1 Yohanes 3:8.
11. Sortu sani Yehovah ben bosroiti na fesi fu meki a prakseri fu en kon tru?
11 Wan tra sani de di Gado ben bosroiti na fesi so taki a prakseri fu en kan kon tru. Wi kan kon sabi dati te wi e leisi san Paulus ben skrifi gi den Efeisesma. A ben skrifi taki Gado sa „tyari ala sani kon makandra baka na ondro Krestes, namku den sani di de na ini hemel nanga den sani di de na grontapu”. Baka dati, Paulus e poti prakseri na „den sani di de na ini hemel”, namku den wan di Gado teki fu tiri makandra nanga Krestes. Paulus e taki: „Gado meki taki wi o de den sma tu di o kisi wan gudu makandra nanga Yesus, fu di a ben bosroiti disi na fesi kaba soleki fa a ben abi na prakseri; en na a sma di e du ala sani soleki fa a wani” (Efeisesma 1:10, 11). Iya, Yehovah bosroiti na fesi taki wan pikin grupu fu libisma ben o tron tra manpikin fu na uma fu Gado, èn taki makandra nanga Krestes den ben o meki libisma kisi wini fu a lusu-paiman (Romesma 8:28-30). Na apostel e kari den sma disi „wan santa pipel” (1 Petrus 2:9). Na apostel Yohanes ben kisi a grani fu kon sabi nanga yepi fu wan fisyun omeni sma ben o tiri makandra nanga Krestes. A nomru dati na 144.000 (Openbaring 7:4-8; 14:1, 3). Makandra nanga Krestes di e tiri leki Kownu, den e dini Gado ’so taki den kan prèise en èn gi en glori’.—Efeisesma 1:12-14.
12. Fa wi du sabi taki Gado no ben bosroiti na fesi suma ben o de na ini a grupu fu 144.000 sma?
12 Di Gado bosroiti taki den 144.000 sma ben o tiri makandra nanga Krestes, dan dati no wani taki dati a ben bosroiti na fesi taki son sma ben dini en na wan getrow fasi leki memre fu a grupu dati. A tru taki a rai di gi na ini den Kresten Griki Buku fu Bijbel, moro furu ben de fu tiri èn fu tranga den salfuwan. Na so fasi den ben kan tan getrow, èn den ben kan sori taki den warti fu kisi a kari fu go na hemel (Filipisma 2:12; 2 Tesalonikasma 1:5, 11; 2 Petrus 1:10, 11). Yehovah sabi na fesi taki a sa gebroiki 144.000 sma fu meki a prakseri fu en kon tru. A fasi fa den sma disi e libi sa sori efu den warti fu kisi a kari fu go na hemel, èn ibriwan fu den sma disi musu sorgu taki den e libi na a fasi fa Gado wani.—Mateyus 24:13.
Den sani di Yehovah sabi na fesi
13, 14. Te Yehovah e gebroiki a koni fu sabi sani na fesi, dan a e handri akruderi sortu sani, èn fu san ede a e du dati?
13 Soleki fa wi sabi, dan Yehovah na wan Gado di e taki profeititori èn di abi wan marki na prakseri. Fu di dati de so, dan fa a e gebroiki a koni di a abi fu sabi sani na fesi? Na a fosi presi, wi abi a dyaranti taki ala sani di Yehovah e du de tru, a e du sani na wan regtfardiki fasi, èn na wan lobi-ati fasi. Di na apostel Paulus ben skrifi den Hebrew Kresten fu a fosi yarihondro, dan a sori taki a sweri nanga a pramisi fu Gado na trutru ’tu sani di no man kenki, èn fu den tu sani dati Gado no man lei kwetikweti’ (Hebrewsma 6:17, 18). Na ini a brifi di na apostel Paulus ben skrifi gi a disipel Titus, a ben sori a srefi sani disi di a skrifi taki Gado „no kan lei”.—Titus 1:2.
14 Wan tra sani di wi sabi tu fu Yehovah, na taki a abi krakti pasa marki, ma aladi dati de so, toku noiti a no e handri na wan kruktu fasi. Moses ben kari Yehovah „wan Gado fu getrowfasi, èn na en kruktudu no de; a de regtfardiki èn opregti” (Deuteronomium 32:4). Ala sani di Yehovah e du, a e du akruderi den tumusi moi fasi fu en. A fasi fa Yehovah e du sani, ala ten e sori taki a e gebroiki den fo moro prenspari fasi fu en, namku lobi, koni, retidu, nanga krakti, na a yoisti fasi.
15, 16. Sortu bosroiti Adam ben kan teki na ini a dyari fu Eden?
15 Luku fa Yehovah sori den fasi disi na ini a dyari fu Eden. Leki wan lobi-ati Tata, Yehovah sorgu taki libisma abi ala sani di den abi fanowdu. A gi Adam a koni fu denki, èn a koni fu prakseri fu wan tori so taki a kan frustan a tori dati. Tra fasi leki den meti di moro furu e du sani akruderi a koni di Gado poti na ini den, Adam ben man teki bosroiti. Baka di Gado meki Adam, dan A luku komoto fu en kownusturu na hemel, èn a si „ala den sani di a meki, èn a si taki den ben de heri bun”.—Genesis 1:26-31; 2 Petrus 2:12.
16 Di Yehovah gi Adam a komando fu no nyan fu „a bon fu sabi san na bun èn san na ogri”, dan a gi Adam nofo rai so taki a ben kan bosroiti san a ben o du. Adam ben mag nyan fu „ala den bon na ini a dyari”, boiti wán fu den, èn Gado warskow en taki a ben o dede efu a nyan a froktu fu a bon di a no ben mag fasi (Genesis 2:16, 17). A sori Adam krin san ben o de den bakapisi efu a ben o nyan fu a bon dati. San Adam ben o du?
17. Fu san ede wi kan taki dati Yehovah e bosroiti san a wani sabi na fesi?
17 Soleki fa a sori, dan Yehovah bosroiti fu no sabi na fesi san Adam nanga Eva ben o du, aladi a abi a koni fu sabi ala sani na fesi. Sobun, san de prenspari, a no efu Yehovah man sabi na fesi san o pasa, ma efu a e bosroiti fu sabi dati na fesi. Boiti dati, wi kan frustan taki, fu di Yehovah na wan Gado fu lobi, meki a no ben o du na espresi sani fu bosroiti na fesi taki Adam nanga Eva ben o opo densrefi teige en, èn leki bakapisi fu dati libisma ben o ondrofeni bun furu sari sani (Mateyus 7:11; 1 Yohanes 4:8). Sobun, Yehovah e bosroiti san a wani sabi na fesi.
18. Fu san ede a bosroiti di Yehovah e bosroiti san a wani sabi na fesi no wani taki dati a no abi a makti fu du ala sani?
18 We, fu di a de so taki Yehovah e bosroiti fu no sabi ala sani na fesi, dan dati wani taki dati a no abi a makti fu du ala sani? Nôno. Moses ben kari Yehovah „a Klepston”, èn a ben taki tu: „Den wroko fu en bun dorodoro.” A no en de frantwortu gi den bakapisi fu a sondu di libisma du. Den takru bakapisi di wi alamala e ondrofeni na ini a ten disi, e kon fu di Adam du wan onregtfardiki sani di a no gi yesi na Gado. Na apostel Paulus ben sori krin taki „wán man meki sondu kon na grontapu èn sondu fu en sei tyari dede kon, èn na so fasi ala sma e dede, bika den alamala sondu”.—Deuteronomium 32:4, 5; Romesma 5:12; Yeremia 10:23.
19. Sortu aksi wi sa go luku na ini na artikel di e kon?
19 Den sani di kon na krin na ini na artikel disi e sori taki Yehovah no e du kruktudu (Psalm 33:5). Na presi fu dati, den sani di Yehovah man du, den fasi fu en, nanga den markitiki di a e hori ensrefi na den, e kruderi nanga a prakseri fu en (Romesma 8:28). Fu di Yehovah na wan Gado di e taki profeititori, meki a e fruteri „na a bigin san sa de a kaba, èn di e fruteri langa ten na fesi kaba san na den sani di no du” (Yesaya 46:9, 10). Wi kon si tu taki ensrefi e bosroiti san a wani sabi na fesi. Fa a sani disi abi krakti na wi tapu? Fa wi kan de seiker taki den bosroiti di wi e teki e kruderi nanga a prakseri fu Gado di e sori taki a lobi wi? Èn sortu blesi wi sa kisi te wi e du dati? Wi sa go luku den aksi disi na ini na artikel di e kon.
[Futuwortu]
^ paragraaf 2 Luku bladzijde 28 fu a brochure Een boek voor alle mensen, di Yehovah Kotoigi tyari kon na doro.
Yu kan tyari disi kon na krin?
• Sortu owruten eksempre e sori taki Gado „wortu” ala ten ben e du ’san a musu du’?
• San Yehovah ben bosroiti na fesi fu meki a sani di a „abi na prakseri fu ala ten”, kon tru?
• Fa Yehovah e gebroiki a koni di a abi fu sabi sani na fesi?
[Aksi fu a tori disi]
[Prenki na tapu bladzijde 22]
Yosafat ben e frutrow tapu Yehovah
[Prenki na tapu bladzijde 23]
Gado ben taki na fesi taki Yesus ben o dede èn taki a ben o kisi wan opobaka
[Prenki na tapu bladzijde 24]
A de so taki Yehovah ben bosroiti na fesi san Adam nanga Eva ben o du?