Yu kan de koloku te yu e gebroiki Bijbel gronprakseri

A NO de fu taki dati yu si kaba fa wan pusipusi e didon so switi na wan presi. A sani dati e sori taki a pusipusi disi e firi bun. A ben o switi srefisrefi efu yu ben kan didon neleki a pusipusi dati èn ben kan firi leki en. A sani dati ben o sori taki yu e firi koloku! Ma furu sma no de koloku, èn te den de koloku dan dati na fu wan syatu pisi ten. Fu san ede disi de so?

Disi de so fu di wi na sondusma di e meki furu fowtu, èn wi e kisi fu du nanga den swakifasi fu trawan. Boiti dati, wi e libi na ini wan pisi ten di Bijbel e kari „den lasti dei” di sa de ’muilek ten di tranga fu pasa’ (2 Timoteyus 3:1-5). Srefi efu wi e memre fa wi ben de koloku di wi ben de pikin, toku na ini a ten disi furu fu wi e kisi hebi kwinsi leki bakapisi fu den „muilek ten” disi. Wi kan de koloku na ini a ten disi?

Luku taki Bijbel no e taki dati wi no kan pasa den muilek ten disi, ma a e taki dati den o de tranga fu pasa. Wi kan pasa den ten disi te wi e gebroiki Bijbel gronprakseri. Kande wi no sa man lusu den problema fu wi ala ten, ma wi sa de koloku. Meki wi go luku dri fu den Bijbel gronprakseri dati.

No fruwakti tumusi furu fu yusrefi

Efu wi wani de koloku, dan wi no musu fruwakti tumusi fu wisrefi, noso fu trawan. Na ini a brifi di na apostel Paulus ben skrifi gi den Romesma, a ben taki: „Ala sma sondu èn den no man doro a glori fu Gado” (Romesma 3:23). Wi no man frustan dorodoro o bigi a glori fu Yehovah de. Wan eksempre di e sori dati, na a tru tori di skrifi na ini Genesis 1:31: „Gado luku ala den sani di a meki èn a si taki den ben de heri bun.” Ibri leisi te Yehovah e prakseri den sani di a du na ini a ten di pasa, dan ala ten a kan taki dati den „ben de heri bun”. Nowan libisma kan taki dati ala ten fu den sani di ensrefi du. Te wi e agri taki wi no man du ala sani, dan dati e yepi wi kaba fu de koloku. Ma dati a no ala ete. Wi musu frustan fa Yehovah e si a tori, èn wi musu kisi a srefi denki leki en.

A Griki wortu di vertaal leki „sondu” e komoto fu wan wortu di wani taki dati wan sma e misi a marki (Romesma 3:9). Leki eksempre: Prakseri wan sma di e sutu wan sani nanga peiri, fu di a wani wini wan prijs. A sma dati abi dri peiri. A e sutu a fosi peiri, ma a peiri e doro wan meter na sei a sani di a musu sutu. A e marki moro bun fu sutu a di fu tu peiri, ma toku a peiri e doro 30 centimeter na sei a sani di a musu sutu. Now a no e meki nowan sani puru en prakseri te a e sutu a lasti peiri, ma te a e sutu a peiri dati, a e misi a sani di a wani sutu nanga tu centimeter nomo. A ben doro en so krosibei, ma toku a misi.

A man dati ben musu fu firi brokosaka fu di a misi a marki. Wi alamala e firi brokosaka tu ten na ten. Son leisi a gersi leki wi no e doro a marki srefisrefi. Tra leisi baka, a de so taki pikinmoro wi e doro a marki, ma toku wi e misi en. Wi e firi brokosaka fu di wi ben meki tranga muiti fu doro a marki, ma toku dati no ben  bun nofo. Meki wi go luku na agersitori baka fu a man di ben sutu den peiri.

A e drai gowe safrisafri, aladi a e firi brokosaka. Iya, a ben wani wini a prijs trutru. Wantronso, a man di orga a strei e kari en kon baka, èn a e gi en wan prijs. A man dati e taigi en: „Mi wani gi yu a prijs disi fu di mi lobi fa yu de, èn mi si fa yu meki tranga muiti.” A man di ben sutu den peiri e prisiri srefisrefi!

Iya, a man disi e prisiri trutru! Na so ibri sma sa firi di e kisi „a presenti” fu Gado fu libi fu têgo leki wan volmaakti libisma (Romesma 6:23). Baka te den sma disi kisi a presenti dati, dan den sa man du ala sani heri bun, iya, noiti moro den sa misi a marki. Den sa de koloku trutru. Efu wi e hori a sani disi na prakseri now, dan wi no sa fruwakti tumusi fu wisrefi èn fu trawan.

Yu musu frustan taki ala sani e teki ten

A tru taki ala sani e teki ten. Ma a muilek fu tan firi koloku te a gersi leki yu musu wakti moro langa fu kisi wan sani di yu wani abi, noso te a gersi leki wan fruferi situwâsi e tan moro langa leki san yu ben e fruwakti. Yu no feni dati tu? Toku son sma ben man tan firi koloku na ini den sortu situwâsi dati. Luku na eksempre fu Yesus.

Bifo Yesus kon na grontapu, a ben de wan tumusi bun eksempre na ini hemel, fu di a ben e gi yesi. Ma na dyaso na grontapu a ’leri fu gi yesi’. Fa a leri dati? Fu den „pina di miti en”. Bifo a kon na grontapu, a ben si fa sma ben e pina, ma noiti ete ensrefi ben ondrofeni pina. Di a ben de na grontapu, a ben de na ini bun furu muilek situwâsi, spesrutu fu a ten di a teki dopu na ini Yordanliba te go miti a ten di a dede na Golgota. Wi no sabi finifini fa Yesus „kon volmaakti” ini a tori disi, ma wi sabi taki a leri di a ben leri fu gi yesi na ini den muilek situwâsi, ben teki ten.—Hebrewsma 5:8, 9.

Yesus ben man horidoro fu di a ben e denki dipi fu „a prisiri di ben e wakti en”, namku a sani di a ben o kisi efu a ben tan getrow (Hebrewsma 12:2). Ma toku a ben de so, taki son leisi a ’ben e begi fayafaya, a ben e bari tranga, èn a ben e krei watra-ai’ (Hebrewsma 5:7). Kande wi e begi na a srefi fasi disi son leisi. Fa Yehovah e si disi? A srefi tekst e sori taki Yehovah ben „arki” den begi fu Yesus. Gado sa arki tu te wi e begi. Fu san ede a sa du dati?

Yehovah sa du dati fu di a sabi san wi no man du, èn a e yepi wi te dati de fanowdu. Ibri sma no man frudrage a srefi. Sma na ini Benin, na Afrika abi wan odo di e taki: „Tumusi furu watra sa kiri srefi todo te fu kaba.” Yehovah sabi moro bun leki wisrefi o furu wi man frudrage. Na wan lobi-ati fasi a sori taki a abi ’sari-ati gi wi, èn a e sori wi no-frudini bun-ati fu yepi wi na a yoisti ten’ (Hebrewsma 4:16). Na so a ben du gi Yesus, èn A du dati gi bun furu trawan. Luku fa Monika ondrofeni disi.

Monika no ben abi broko-ede di a ben e gro kon bigi, èn a ben de nanga prisiri ala ten. Na ini 1968, di a ben abi pikinmoro 20 yari, dan a skreki srefisrefi di a kon sabi taki a abi multiple sclerosis, wan siki di e meki wan sma kon lan. A sani disi kenki en libi dorodoro, èn a ben musu tyari bigi kenki kon fu man du a furuten diniwroko fu en. Monika kon frustan taki  safrisafri a ben o kon moro siki. Baka 16 yari a e taki: „Datra no feni dresi ete gi a siki fu mi èn kande dati sa tan so teleki a nyun sistema fu Gado sa meki ala sani kon nyun baka.” A e agri taki a situwâsi fu en no ben makriki. A e taki: „Aladi den mati fu mi e taki dati mi de nanga prisiri ete, . . . toku den bun mati fu mi sabi taki son leisi mi e krei langalanga watra-ai.”

Ma Monika ben taki: „Mi leri fu abi pasensi èn fu prisiri te a gosontu fu mi e go na fesi awansi na pikinso nomo. A banti di mi abi nanga Yehovah kon moro tranga fu di mi kon si taki awansi o furu muiti libisma e du, toku den no man dresi ala siki. Na Yehovah wawan kan dresi ala siki.” Yehovah yepi Monika fu tan firi koloku èn now a e du furuten diniwroko moro leki 40 yari kaba.

A no de fu taki, dati Monika no de na ini wan makriki situwâsi. Ma yu kan de seiker taki yu sa firi moro bun te yu e frustan taki son sani e teki moro langa leki san yu ben fruwakti. Neleki Monika, yu kan abi a dyaranti tu taki Yehovah sa ’yepi yu na a yoisti ten’.

No teki yusrefi gersi nanga trawan, ma poti marki di yu man doro

Yu abi yu eigi fasi nanga yu eigi denki. Nowan tra sma de a srefi leki yu. Wan odo na ini na Afrikan Guntongo e taki disi: „A no ala finga langa a srefi.” A ben o de wan don sani fu teki a wan finga gersi a trawan. Yu no ben o wani Yehovah fu teki yu gersi nanga wan tra sma, èn noiti A sa du dati. Ma wi leki libisma abi a gwenti fu teki wisrefi gersi nanga trawan, èn a sani dati kan meki taki wan sma no e firi koloku moro. Meki wi leisi Mateyus 20:1-16, fu si fa Yesus e gi wan agersitori di e tyari disi kon na krin.

Yesus ben taki fu wan „masra” di ben abi wrokoman fanowdu fu wroko na ini en droifigron. A ben si wan tu man di no ben abi wroko èn a teki den fu wroko gi en „frukufruku mamanten”, kande na wan ten fu siksi yuru mamanten. Den man agri taki den ben o wroko gi a moni di sma ben gwenti kisi gi wán dei, namku wán denari gi wan wrokodei fu 12 yuru. A no de fu taki dati den man ben breiti fu feni wan wroko, èn taki den ben o kisi a pai di sma ben gwenti fu kisi. Bakaten a masra si tra grupu man sondro wroko, èn a teki wan tu fu den man fu wroko gi en. Sonwan fu den bigin wroko neigi yuru mamanten, trawan twarfu yuru bakadina, wan tu trawan bigin dri yuru bakadina, èn wan tra grupu bigin wroko latilati feifi yuru bakadina srefi. Nowan fu den man disi ben o wroko 12 yuru langa. A masra ben pramisi den taki a ben o pai den „san fiti”, èn den wrokoman ben agri nanga dati.

Na a kaba fu a dei, a masra taigi a man di ben luku den moni afersi fu en, fu pai den wrokoman. A masra taigi en tu fu kari den wrokoman, èn den fosiwan di a ben musu pai, na den wan di bigin wroko leki lasti. Den wan di wroko leki lasti, ben wroko wán yuru nomo, ma toku den kisi a moni fu wan heri wrokodei. Wi kan frustan sortu dyugudyugu ben kon leki bakapisi fu a sani disi. Den wan di ben wroko 12 yuru, ben denki taki den ben o kisi moro, fu di den ben wroko moro langa leki den tra wrokoman. Ma den kisi a srefi pai tu.

San den du? „Di den kisi a moni, den bigin krutu nanga a masra fu na oso. Den taki: ’Den lastiwan wroko wán yuru, ma toku yu du nanga den leki fa yu du nanga wi; wi ben musu wroko tranga heri dei na ini a faya son!’”

Ma a masra ben si a tori tra fasi. A taigi den taki na a moni dati den ben agri fu kisi leki pai! A masra bosroiti fu pai den trawan a moni gi wan heri wrokodei, èn a no de fu taki dati den wrokoman dati kisi moro leki san den ben fruwakti. Te yu luku en bun, dan den alamala kisi a moni di den ben musu kisi, èn fu taki en leti furu fu den kisi moro leki san den ben fruwakti. Te fu kaba, a masra ben aksi: „Mi no abi a reti fu du san mi wani nanga mi eigi sani?”

Kon meki wi taki dati a man di ben luku den moni afersi fu a masra, ben pai a fosi grupu fu wrokoman fosi, èn taki den wrokoman dati ben gowe wantewante baka di den kisi a moni.  Den wrokoman ben o prisiri. Ma na di den si taki den trawan kisi a srefi pai aladi den no ben wroko so langa, dan den bigin firi wan fasi. A sani disi meki taki den no ben de nanga tangi moro gi a masra di ben teki den na wroko, ma den ben atibron so te, taki den bigin krutu nanga en.

Na agersitori disi e sori krin san e pasa te wi e teki wisrefi gersi nanga trawan. Te yu e prakseri dipi fu a banti di yu abi nanga Yehovah, èn te yu de nanga tangi taki a e blesi yu, dan yu sa de koloku. No teki a situwâsi fu yu gersi nanga a di fu trawan. Efu a de so taki Yehovah bosroiti fu du moro gi trawan, dan yu musu breiti gi den èn yu musu prisiri nanga den.

Ma Yehovah e fruwakti taki yu du wan sani. San na a sani dati? Galasiasma 6:4 e taki: „Meki ibri sma ondrosuku san na den sani di a e du, dan dati sa meki taki a e prisiri nanga san ensrefi e du.” Sobun, poti marki gi yusrefi di yu man doro. Luku sortu marki yu kan doro trutru, èn meki muiti fu doro den marki dati. Efu yu poti marki di yu man doro, èn yu e doro den marki dati trutru, ’dan dati sa meki taki yu e prisiri’. Iya, yu sa de koloku.

Yu sa abi bun bakapisi

Den dri gronprakseri di wi luku, e sori taki te wi e gebroiki Bijbel gronprakseri, dan wi kan de koloku trutru srefi na ini den lasti dei disi pe libisma no de volmaakti. Te yu e leisi Bijbel ibri dei, dan a ben o bun fu suku den sortu gronprakseri disi. Sonwan fu den gronprakseri disi yu kan si wantewante èn trawan fu den yu musu pruberi fu frustan baka te yu leisi wan tori noso wan agersitori.

Efu yu feni taki dei fu dei yu e lasi prisiri na ini a libi, dan meki muiti fu kon sabi fa dati du kon. Te yu sabi dati kaba, dan suku gronprakseri di yu kan gebroiki fu kenki a situwâsi fu yu. Fu eksempre, kande yu kan luku „De gehele Schrift is door God geïnspireerd en nuttig”, * bladzijde 110, 111. A pisi disi e taki fu a buku Odo, èn yu sa feni furu gronprakseri nanga rai di skrifi na ini 12 ondro-edeprakseri. Yu kan feni bun rai tu na ini na Index van Wachttoren-publikaties * nanga a Watchtower Library na tapu CD-ROM. * Te yu e gebroiki den yepisani disi furu tron, dan yu sa man feni gronprakseri di yu kan gebroiki.

A ten e kon te Yehovah sa gi têgo libi na den wan di warti fu kisi dati, so taki den kan de volmaakti na tapu wan paradijs grontapu. Na a ten dati den sa de koloku trutru.

[Futuwortu]

[Prenspari pisi na tapu bladzijde 12]

„Ala sma sondu èn den no man doro a glori fu Gado”.—Romesma 3:23

[Prenspari pisi na tapu bladzijde 13]

Fu di ’pina miti Yesus meki a leri fu gi yesi’.—Hebrewsma 5:8, 9

[Prenspari pisi na tapu bladzijde 15]

Wan sma sa „prisiri nanga san ensrefi e du, èn no fu di a e teki ensrefi gersi nanga tra sma”.—Galasiasma 6:4