„Na den frumane fu yu mi lobi”

„Ala sani di sma skrifi fositen, ben skrifi fu leri wi wan sani.”—ROMESMA 15:4.

1. Na sortu fasi Yehovah e gi wi frumane, èn fu san ede wi abi den fanowdu?

YEHOVAH e gi a pipel fu en frumane, so taki den kan sabi san fu du te den e kisi tesi na ini den muilek ten disi. Wi kan feni sonwan fu den frumane disi te wi e leisi Bijbel, ma wi e kon sabi trawan fu den te wi e arki den lezing noso den piki di sma e gi na den Kresten konmakandra. Furu fu den sani di wi e leisi noso e yere na den okasi disi, na sani di wi sabi kaba. Kande wi ben poti prakseri na sonwan fu den sani dati kaba. Ma fu di wi gwenti fu frigiti sani, meki ibri tron baka wi musu poti prakseri na den sani di Yehovah abi na prakseri fu du, den wet fu en, èn den rai di a e gi. Wi musu warderi den frumane fu Gado. Den e gi wi deki-ati fu di den e yepi wi fu tan poti prakseri na den reide di meki taki wi go libi akruderi a wani fu Gado. Fu dati ede a psalm skrifiman ben singi gi Yehovah: „Na den frumane fu yu mi lobi.”—Psalm 119:24.

2, 3. (a) Fu san ede Yehovah sorgu taki wi na ini a ten disi kan leisi den ondrofenitori na ini Bijbel? (b) Na sortu Bijbel tori wi sa poti prakseri na ini na artikel disi?

² Aladi a Wortu fu Gado ben skrifi furu hondro yari pasa, toku a abi krakti ete (Hebrewsma 4: 12). Na ini Bijbel wi kan feni tru ondrofenitori. Aladi sma na ini Bijbel ten ben abi heri tra gwenti nanga denki leki wi na ini a ten disi, toku a de so furu tron taki wi e kisi den srefi sortu problema leki den sma na ini a ten dati. Furu fu den tori na ini Bijbel skrifi fu a bun fu wi, èn a e naki wi ati te wi e leisi den ondrofenitori fu sma di ben lobi Yehovah, èn di ben e dini en na wan getrow fasi aladi den ben de na ini muilek situwâsi. Yehovah ben meki sma skrifi ala den ondrofenitori disi na ini Bijbel fu leri wi san bun èn san no bun. A de neleki fa na apostel Paulus ben skrifi: „Ala sani di sma skrifi fositen, ben skrifi fu leri wi wan sani, so taki a fasi fa wi e horidoro èn a trowstu di Gado Buku e gi, kan gi wi howpu.”—Romesma 15:4.

³ Meki wi poti prakseri na dri Bijbel tori, namku: A tori di e sori fa David ben handri nanga Saul, a tori fu Ananias nanga Safira, èn a tori di e sori fa Yosef ben handri nanga a wefi fu Potifar. Wi kan leri wan prenspari sani fu ibriwan fu den tori disi.

Wi musu lespeki den seti fu Gado

4, 5. (a) Fa Kownu Saul ben e si David? (b) Fa David handri di Saul ben sori taki a ben e teige en?

⁴ Kownu Saul no ben de getrow na Yehovah, èn fu dati ede a no ben bun nofo fu tiri a pipel fu En. Dati meki Gado drai baka gi en, èn a taigi a profeiti Samuel fu salfu David leki a kownu fu Israel. Di David ben sori taki a ben de wan koni fetiman di ben abi deki-ati, dan a kisi prèise fu a pipel, èn a sani dati meki taki Saul bigin teige David. Ibri tron baka Saul pruberi fu kiri en. Na ala den okasi dati David no dede fu di Yehovah ben de nanga en.—1 Samuel 18:6-12, 25; 19:10, 11.

⁵ Furu yari langa, David ben musu libi leki wan loweman. Den mati fu David ben gi en deki-ati fu kiri Saul di na okasi ben de fu du dati, èn den taigi David taki Yehovah ben e gi en na okasi fu kiri a feanti fu en. Toku David weigri fu du dati. Fu di a ben de loyaal na  Yehovah, èn fu di a ben e lespeki a posisi di Saul ben abi leki a salfu kownu fu Gado en pipel, meki a handri na a fasi dati. Na Yehovah ben poti Saul leki kownu fu Israel, a no so? We, dan Yehovah ben o puru en tu na a ten di a ben feni bun. David ben feni taki a no ben abi a reti fu puru Saul leki kownu. Baka di David du ala san a ben man du na ini a situwâsi disi fu meki taki Saul no atibron moro nanga en, dan a taki: „Yehovah srefi sa naki en; noso a dei sa kon te a abi fu dede, noso a sa go na feti, èn den sa wai en puru trutru. Soleki fa Yehovah e si en, dan fu mi sei a no kan kwetikweti taki mi e langa mi anu fu du a salfuwan fu Yehovah wan ogri!”—1 Samuel 24:3-15; 26:7-20.

6. Fu san ede wi musu poti prakseri na a tori fu David nanga Saul?

⁶ Wi kan leri wan tumusi prenspari sani fu a tori disi. Oiti yu aksi yusrefi fu san ede son problema e opo kon na ini a Kresten gemeente? Kande na fu di wan sma e handri na wan fasi di no fiti. Kande a sani di a sma disi e du no de wan bigi sondu, ma toku a sani dati e trobi yu. San yu musu du? Fu di yu lobi yu Kresten brada nanga sisa, èn fu di yu wani de loyaal na Yehovah, meki yu kan bosroiti fu taki na wan switi fasi nanga a sma dati fu wini en. Ma san yu o du te a problema no e lusu? Te yu du ala san yu man du, dan a bun fu libi a tori disi gi Yehovah. Na dati David ben du.

7. Te sma no e handri bun nanga wi, noso te den e krutu wi, dan fa wi kan handri neleki David?

⁷ A kan de so tu taki sma na ini a libimakandra no e handri bun nanga yu, noso taki sma e krutu yu fu a bribi fu yu ede. Kande yu no man du noti na a sani dati nownowde. A kan muilek srefisrefi fu horidoro na ini so wan situwâsi, ma wi kan leri wan sani fu a fasi fa David ben handri di sma no ben handri bun nanga en. Den psalm di David skrifi e naki wi ati, èn den psalm disi no e sori nomo fa a ben e begi Gado nanga en heri ati fu kibri en gi Saul, ma den e sori sosrefi fa a ben de loyaal na Yehovah, èn fa a ben e du muiti fu meki a nen fu Gado kisi glori (Psalm 18:1-6, 25-27, 30-32, 48-50; 57:1-11). David tan loyaal na Yehovah, aladi Saul ben e tan handri takru nanga en omeni yari langa. Sosrefi wi musu tan getrow na Yehovah èn na a organisâsi fu en, awansi trawan no e handri bun nanga wi, èn awansi san trawan e du. Wi abi a dyaranti taki Yehovah sabi heri bun san e pasa.—Psalm 86:2.

8. Fa Kotoigi fu Yehovah na ini Mosambik tan loyaal na Yehovah aladi den kisi tesi?

⁸ Kresten na ini Mosambik de wan bun eksempre na ini a ten disi, fu di sonwan fu den ben tan loyaal na Yehovah na a ten di den ben e kisi tesi. Na ini 1984 ogri-ati fetiman ben e broko kon ibri tron baka na ini den dorpu fu den fu fufuru sma sani, fu bron den oso, èn fu kiri den. A ben gersi leki den tru Kresten disi no ben man du noti na a situwâsi disi. Den ogri-ati fetiman disi ben e pruberi fu meki  den sma fu a kontren disi tron memre fu a grupu fu den, èn den ben e dwengi sma fu horibaka gi den na tra fasi. Yehovah Kotoigi ben feni taki den no ben kan teki prati na feti, fu di den na Kresten. A sani disi meki taki a grupu fu fetiman atibron nanga den. Den fetiman kiri sowan 30 Kotoigi na ini a bruya ten dati, ma aladi sma ben e suku fu kiri den, toku den no brokokindi, ma den tan loyaal na Gado. * Neleki David, den horidoro di sma no ben e handri bun nanga den, ma te fu kaba, den ben man tan loyaal na Gado.

Wan eksempre di de wan warskow gi wi

9, 10. (a) Sortu wini wi kan kisi fu son Bijbel eksempre? (b) Fu san ede a fasi fa Ananias nanga Safira handri ben tyari takru bakapisi gi den?

⁹ A fasi fa son sma na ini Bijbel tyari densrefi de wan warskow gi wi, èn na so fasi wi e kon sabi fa wi no musu handri. Iya, Bijbel abi furu tori fu sma, srefi fu futuboi fu Gado, di no ben handri bun èn di ben ondrofeni den bakapisi fu dati (1 Korentesma 10:11). Wán fu den tori disi na a di fu Ananias nanga Safira, wan trowpaar di ben de memre fu a fosi yarihondro Kresten gemeente na ini Yerusalem.

¹⁰ Baka a Pinksterfesa fu 33 G.T., den nyun bribiman ben tan na ini Yerusalem fu kisi wini fu a demakandra di den ben abi nanga den apostel, èn den bribiman disi ben abi nyanyan nanga tra sani fanowdu. Sonwan fu den memre fu a gemeente seri den gron fu den so taki den ben kan gebroiki a moni dati fu yepi den wan di ben de na nowtu (Tori fu den Apostel 2:41-45). Ananias nanga Safira seri wan gron èn den tyari soso wan pisi fu a moni gi den apostel, aladi den taki dati den ben gi ala a moni di den ben kisi fu a gron. A no de fu taki dati Ananias nanga Safira ben abi a reti fu gi omeni moni den ben wani, ma den no ben du dati nanga wan krin ati, èn den ben bedrigi sma. Den ben wani abi wan bun nen na den apostel, èn den ben wani meki sma denki taki den ben du bun furu, aladi dati no ben de so. Nanga yepi fu a santa yeye, na apostel Petrus tyari kon na krin taki den ben de bedrigiman èn taki den ben de hoigriman, èn fu dati ede Yehovah kiri den.—Tori fu den Apostel 5:1-10.

11, 12. (a) Fa Bijbel e frumane wi fu de opregti? (b) Sortu wini wi sa kisi te wi de opregti?

¹¹ Efu oiti wi wani lei fu kan abi wan bun nen na sma, dan meki a de so taki a tori fu Ananias nanga Safira de wan seryusu warskow gi wi. Kande wi man kori tra sma, ma wi no  man kori Yehovah (Hebrewsma 4:13). Ibri tron baka Bijbel e gi wi deki-ati fu no kori trawan, bika leiman no sa de na grontapu moro te Yehovah o puru ala onregtfardikifasi (Odo 14:2; Openbaring 21:8; 22:15). Wi kan frustan fu san ede dati o de so. A sma di e gi trawan deki-ati fu lei, na Satan Didibri.—Yohanes 8:44.

¹² Te wi e libi na wan opregti fasi, dan dati sa meki wi kisi furu wini. Wan fu den wini disi na wan krin konsensi, èn wi sa abi wan bun firi fu di trawan e frutrow wi. Nofo tron a de so taki fu di Kresten ben de opregti, meki den feni wroko, noso den no lasi den wroko fu di den ben opregti. Ma a moro prenspari wini di wi sa kisi, na taki wi sa abi wan bun banti nanga na Almakti Gado fu di wi de opregti.—Psalm 15:1, 2.

Tan tyari yusrefi na wan krin fasi

13. Na ini sortu situwâsi Yosef ben de, èn fa a handri?

¹³ Di Yosef, wan manpikin fu a famiri-edeman Yakob, ben abi 17 yari, dan sma seri en leki srafu. Te fu kaba a ben de na ini na oso fu Potifar, wan heiman fu Egepte, èn drape a wefi fu Potifar bigin poti prakseri na en. Na uma disi ben wani abi seks demakandra nanga Yosef di ben de wan moi yonkuman. Ibri dei baka a ben e tan dwengi en: „Kon didon nanga mi.” Yosef ben de farawe fu en famiri, na ini wan kondre pe nowan sma ben sabi en. A ben o makriki gi Yosef fu abi seks demakandra nanga na uma disi, sondro taki sma ben o sabi fu dati. Ma di a wefi fu Potifar grabu en te fu kaba, dan Yosef lowe.—Genesis 37:2, 18-28; 39:1-12.

14, 15. (a) Fu san ede wi musu poti prakseri na a tori fu Yosef? (b) Fu san ede wan Kresten uma ben de nanga tangi taki a ben gi yesi na den warskow fu Gado?

¹⁴ Yosef ben kweki na ini wan famiri di ben e anbegi Gado, èn a ben frustan taki tu sma di no trow nanga makandra, no mag abi seks demakandra. „Fa mi kan du so wan bigi ogri? A no sondu mi ben o sondu teige Gado?”, na so Yosef ben aksi. Yosef ben kan denki so fu di a ben sabi a markitiki di Gado ben poti gi libisma na ini Eden, namku taki wan uma noso wan man musu abi wán patna nomo (Genesis 2:24). Na ini a ten disi, a pipel fu Gado kan leri wan sani fu a fasi fa Yosef ben handri na ini a situwâsi dati. Na ini son kontren, sma no e si en leki wan ogri kwetikweti taki trawan abi seks demakandra sondro fu trow. Dati meki a de so taki te yonguwan e weigri fu du hurudu, dan den speri fu den e spotu den. A de wan aladei sani taki sma di trow abi seks demakandra nanga tra sma. Fu dati ede, a tori fu Yosef e memre wi na wan prenspari sani na ini a ten  disi. Na ini Gado ai, a de so ete taki wan sma e sondu te a e du hurudu èn te a e du sutadu (Hebrewsma 13:4). Furu sma di brokokindi gi tesi di den ben kisi fu abi seks demakandra nanga wan sma di no de a trowpatna fu den, kon kisi na overtoigi taki a no bun fu du a sondu disi. Den takru bakapisi kan de taki sma e firi syen, den e kisi konsensi fonfon, den e kon dyarusu, den e hori bere, èn den kan kisi siki leki bakapisi fu a seks demakandra di den abi nanga trawan. A de soleki fa Bijbel e memre wi, taki wan sma di e du hurudu „e sondu teige en eigi skin”.—1 Korentesma 5:9-12; 6:18; Odo 6:23-29, 32.

¹⁵ Jenny, * na wan Kotoigi fu Yehovah, èn a no trow. A yongu-uma disi de nanga tangi gi a fasi fa Yehovah memre en san fu du. Na en wrokope, wan moi yonkuman ben e suku en. Di Jenny sori en taki a no ben wani, dan a yonkuman disi du moro muiti fu sori Jenny taki a ben wani hori nanga en. Jenny e taki: „Mi ben e feti nanga misrefi fu no fadon na ini hurudu, bika wan uma e firi bun te wan man e poti prakseri na en.” Ma a kon sabi taki a man dati ben pruberi nomo fu abi seks demakandra nanga en, neleki fa a ben du dati kaba nanga furu tra uma. Di Jenny si taki a no ben man kakafutu moro gi a tesi disi, dan a begi Yehovah fu yepi en fu tan getrow na En. Jenny ben kon si taki fu di a ondrosuku sani na ini Bijbel èn na ini den Kresten publikâsi, meki den sani dati ben e warskow en ibri tron baka fu tan na ai. Wan fu den warskow dati ben de a tori fu Yosef nanga a wefi fu Potifar. Jenny e taki: „Solanga mi e tan prakseri o tranga mi lobi Yehovah, mi no abi fu frede taki mi sa du a bigi ogri di sa meki mi sondu teige en.”

Gi yesi na den frumane fu Gado

16. Sortu wini wi kan kisi te wi e leisi èn e denki dipi fu den ondrofenitori di skrifi na ini Bijbel?

¹⁶ Wi alamala kan kisi moro warderi gi den markitiki fu Yehovah te wi e meki muiti fu frustan fu san ede a ben meki sma skrifi spesrutu tori na ini Bijbel so taki wi kan leisi den. San wi e leri fu den tori dati? Sortu fasi noso denki di den sma na ini Bijbel ben abi, bun fu teki abra, èn sortuwan fu den no bun? Gado Wortu e taki fu hondrohondro sma. Ala sma di lobi a tiri fu Gado kan kisi wini te den e angri fu kon kisi a koni di e gi libi. Wán fasi fa wi kan kisi a koni disi, na te wi e leri wan sani fu den tori di Yehovah meki sma skrifi na ini Bijbel, so taki wi na ini a ten disi kan leisi den. Nofo tron, a tijdschrift disi abi ondrofenitori na ini di e leri wi wan sani. Fu san ede yu no e teki ten fu leisi den tori disi?

17. Fa yu e denki fu den frumane fu Yehovah, èn fu san ede yu e denki so?

¹⁷ Wi kan de nanga tangi trutru taki Yehovah e broko en ede nanga den wan di e meki muiti fu du a wani fu en! A no de fu taki dati den man nanga uma na ini Bijbel no de volmaakti, èn wi no de volmaakti tu. Ma wi kan leri wan sani fu a fasi fa den ben handri. Te wi e gi yesi na den frumane fu Yehovah, dan wi no sa meki seryusu fowtu, èn wi kan teki den moi eksempre fu den wan di ben waka tapu a pasi fu regtfardikifasi. Te wi e du dati, dan wi sa abi a srefi denki leki a psalm skrifiman di ben singi: „Koloku fu den sma di e hori densrefi na den frumane fu en; den e tan suku en nanga den heri ati. Mi sili hori ensrefi na den frumane fu yu, èn mi lobi den pasa marki.”—Psalm 119:2, 167.

[Futuwortu]

San yu ben sa piki?

• San wi kan leri fu a fasi fa David handri nanga Saul?

• San wi e leri fu a tori fu Ananias nanga Safira?

• Fu san ede a de tumusi prenspari na ini a ten disi fu poti prakseri na a ondrofenitori fu Yosef?

[Aksi fu a tori disi]

[Prenki na tapu bladzijde 26]

Fu san ede David ben weigri fu gi pasi taki sma kiri Saul?

[Prenki na tapu bladzijde 27]

San wi e leri fu a tori fu Ananias nanga Safira?

[Prenki na tapu bladzijde 28]

Fu san ede Yosef no ben wani abi seks demakandra nanga a wefi fu Potifar?