„A moro bun fasi fa mi ben kan klari a middelbaar skoro”

WAN skoromeester fu wan middelbaar skoro na ini Spanyorokondre ben skrifi: „Moro leki wán hondro yari langa, Yehovah Kotoigi sori taki den de na ini wánfasi trutru, èn taki den no abi nowan enkri bedrigifasi. Ma san de moro prenspari, na taki den abi wan bribi di tranga fu tru.” Fu san ede a skoromeester disi di e bribi taki wan Gado no de, ben taki a sani disi?

A ben de so taki Noemí, di ben de wan studenti na wan middelbaar skoro èn wan Yehovah Kotoigi sosrefi, ben musu skrifi wan tori fu man meki examen fu klari a skoro. A bosroiti fu skrifi fu a tori „A persi dri-uku ondro a Nazi tirimakti”.

Fu san ede a ben skrifi fu a tori dati? Noemí e taki: „Fu di wan skoromeester ben o luku a sani di mi skrifi, meki mi ben prakseri fu teki na okasi dati fu gi en kotoigi. A ben naki mi ati di mi kon sabi fa Yehovah Kotoigi tan hori den soifri retifasi na ini Doisrikondre na a ten fu a Nazi tirimakti. Mi ben bribi taki a sani disi ben o naki na ati fu trawan tu.”

A tori di Noemí ben skrifi, ben naki na ati fu moro sma leki san a ben fruwakti. Studenti fu a heri kondre ben skrifi wan tori di ben abi fu du nanga sabidensi noso nanga prenspari sani di sma du na ini a historia, èn tapu 5 oktober 2002, Noemí wini wan prijs nanga a tori di a ben skrifi. Wan grupu fu 20 professor fu den moro prenspari heiskoro na ini Spanyorokondre, ben bosroiti suma ben o wini den prijs.

Noemí ben kisi a prijs fu Pilar del Castillo, a minister fu skoro-afersi na ini Spanyorokondre. Noemí teki na okasi disi fu gi a minister a video di nen Jehovah’s Getuigen — Standvastig onder nazi-terreur. A minister ben breiti nanga a video disi.

Na ini Manresa, a foto pe Noemí e libi, a koranti ben taki fa a klari a skoro nanga bun bakapisi, èn a taki sosrefi fu a tori di Noemí ben skrifi. A driktoro fu en skoro, aksi en wan kopi fu a tori di a skrifi, fu di a ben o gebroiki en te a skoro ben o tapu 75 yari.

Noemí e taki: „Disi na a moro bun fasi fa mi ben kan klari a middelbaar skoro. Mi ben breiti srefisrefi di mi leisi den bigin wortu di mi skoromeester, Meneer Jorge Tomás Calot, ben skrifi na ini mi skoro raportu:

Aladi mi e bribi taki wan Gado no de, toku mi ben sa wani kon sabi efu a de so trutru taki A Moro Hei Sma disi de, di e meki taki den anbegiman fu en e sori nanga den heri ati taki den ’lobi trawan’.”