Den e prisiri fu du a wani fu Gado

YESUS ben gi ala Kresten wan moi eksempre di a begi en Tata: „A no mi wani musu pasa, ma yu wani” (Lukas 22:42). A sani disi di a taki e sori taki a ben saka ensrefi na ondro Yehovah, èn na ini a ten disi milyunmilyun futuboi fu Gado e du a srefi. Wan tu fu den futuboi disi na den 52 studenti fu a di fu 120 klas fu a Waktitoren Bijbelskoro Gilead. Tapu 11 maart 2006, den studenti disi di ben kaba a skoro, ben e prisiri fu di den ben o go du a wani fu Gado na ini difrenti kondre, iya srefi na ini kondre pe den o kisi fu du nanga situwâsi di sa de wan tyalensi gi den.

San e meki taki den studenti disi e si en leki wan moro prenspari sani fu du a wani fu Yehovah, leki fu poti prakseri na den eigi afersi? Chris nanga Leslie, wan trowpaar di o go dini leki zendeling na ini Bolifia, ben taki fu san ede den du a sani disi: „Fu di wi no e libi gi wisrefi moro, meki wi de klariklari fu du iniwan sani di abi fu du nanga Yehovah en organisâsi” (Markus 8:34). Jason nanga Chere, di o go dini na Albania, e taki: „Ibri wroko di wi kisi fu Yehovah èn organisâsi, abi en tyalensi. Ma wi kon si taki wi musu frutrow tapu Yehovah dorodoro.”

Den kisi deki-ati fu du a wani fu Yehovah

George Smith, di de wan memre fu a Bethelfamiri èn di e wroko na a afdeling pe den e sreka prenki nanga fowtow gi publikâsi, ben bigin a programa nanga begi. Stephen Lett, wan memre fu a Tiri Skin fu Yehovah Kotoigi èn sosrefi a fesiman fu a programa, ben gi ala den sma drape wan switikon. Fisitiman fu 23 kondre ben kon na a Waktitoren Skoro Centrum na ini Patterson, New York, fu de na a prisiri okasi disi. Brada Lett taigi a klas taki den o go du „wan tumusi bigi sani”. A poti prakseri na ’sani di tanapu steifi’, namku sani soleki falsi leri, èn a ben sori taki den nyun zendeling o man broko den sani dati puru nanga yepi fu a krakti fu Bijbel (2 Korentesma 10:4, 5). A ben taki te fu kaba: „Yu sa de koloku trutru fu di Yehovah e gebroiki yu fu broko den sani puru di tanapu steifi na ini na ati fu den opregtisma di yu sa miti na ini yu wroko!”

Harold Jackson, wan fu den sma di e wroko na a edekantoro, ben hori a lezing „Wan tu sani fu hori na prakseri”. A ben taki dati den nyun zendeling noiti no musu frigiti fu ’suku a kownukondre nanga Gado en regtfardikifasi fosi’ (Mateyus 6:33). Den musu hori na prakseri taki „lobi e gi sma deki-ati”, èn taki a de tumusi prenspari fu abi lobi, fu man kisi bun bakapisi (1 Korentesma 8:1). A brada ben taki: „Meki a de so ala ten, taki te yu e handri nanga trawan, yu e du dati nanga lobi.”

Baka dati, Geoffrey Jackson, di de wan memre fu a Tiri Skin èn di ben dini leki zendeling fu 1979 te go miti 2003, hori wan lezing. A aksi den studenti: „San na yu frantwortu?” A sori den zendeling krin taki den no musu fruwakti tumusi furu fu densrefi èn fu a diniwroko fu den. A frantwortu di  Kresten abi, na taki den musu wroko tranga fu prani èn fu gi watra na den siri fu waarheid. Ma a no den e meki a wroko go na fesi na yeye fasi. Dati na Yehovah en frantwortu, fu di na ’Gado e meki sani gro’ (1 Korentesma 3:6-9). Brada Jackson ben taki tu: „Yehovah e fruwakti taki yu e tan tranga na yeye fasi. Ma san na a moro bigi frantwortu di yu abi? Dati na fu lobi Yehovah èn fu lobi den sma di yu e go dini.”

Lawrence Bowen, wan leriman fu a Gileadskoro, ben hori a lezing „Sabi fa yu musu tyari yusrefi”. A ben memre den studenti taki Yehovah ben tiri èn ben kibri den Israelsma di den ben e waka na ini a sabana, na wan wondrufasi (Exodus 13:21, 22). Wan fu den sani di a e gebroiki na ini a ten disi fu tiri èn fu kibri wi, na a gemeente fu salfu Kresten. A gemeente disi na „wan pilari èn wan stonfutu fu a waarheid”  (1 Timoteyus 3:14, 15). Den nyun zendeling musu hori densrefi soifri na a waarheid, fu di dati e tiri èn e kibri sma di abi sakafasi.

Wallace Liverance, wan tra leriman fu a Gileadskoro, ben frumane den studenti fu no frigiti taki a wortu fu Gado de ’na den baka’. A ben sori den nanga dati taki a heri Bijbel ben kaba skrifi hondrohondro yari pasa. Neleki fa wan skapuman e tanapu na bakasei fu den skapu fu en èn e kari den, na so Yehovah de na baka en pipel, èn a e tiri den nanga yepi fu „a getrow èn koni srafu” (Yesaya 30:21; Mateyus 24:45-47). A Gileadskoro yepi den studenti fu kisi moro warderi gi a srafu-grupu dati. A „srafu” gi wi a Nieuwe-Wereldvertaling van de Heilige Schrift srefi. A takiman gi den studenti a rai disi: „Teki a gudu disi di e leri wi furu sani, èn gebroiki en fu gi trawan leri.”—Mateyus 13:52.

Du a wani fu Yehovah na ini a preikiwroko

Mark Noumair, wan leriman fu a Gileadskoro, ben poti prakseri na wan tu fu den sani di den studenti ben ondrofeni na ini a preikiwroko, di den ben de na a Gileadskoro. A nen fu a lezing dati ben de „Den de fayafaya fu meki a bun nyunsu bekènti” (Romesma 1:15). Na ini a takimakandra di a brada ben abi nanga wan tu fu den studenti, a kon na krin taki den ben de fayafaya trutru fu preiki na ibri okasi.

Kenneth Flodin hori wan lezing di gi den studenti moro deki-ati. Na ini a lezing disi a ben abi wan takimakandra nanga dri kring-opziener di e dini now na ini Amerkankondre. Richard Keller di ben dini na ini Zuid-Amerika, nanga Alejandro Lacayo di ben dini na ini Mindri-Amerika, ben fruteri san den du di den kisi difrenti tesi. Den taki sosrefi fu wan tu fu den blesi di den kisi na a ten di den ben e dini leki zendeling. Moacir Felisbino, taki fu den sani di a ben leri na a ten di a ben e wroko makandra nanga zendeling na ini Brasyonkondre, pe a gro kon bigi.

David Schafer ben abi wan takimakandra nanga dri zendeling di abi furu ondrofeni. Den zendeling disi na Robert Jones, Woodworth Mills, nanga Christopher Slay. Den dri brada disi ben e fruteri fa den leri fu frutrow tapu Yehovah di den ben de na ini muilek situwâsi. Den gi a klas a dyaranti taki a leri di den kisi fu Yehovah en organisâsi, sreka den bun gi a zendelingwroko di den o du. Brada Mills taki: „A moro prenspari sani di yepi mi, a no a Bijbel leri di mi kisi na a Gileadskoro, ma na a leri di a skoro leri mi fu abi sakafasi nanga lobi.”

Guy Pierce, wan memre fu a Tiri Skin, ben hori a moro prenspari lezing di nen „Den prakseri fu Yehovah e kon tru ala ten”. Adam no ben du san Gado ben fruwakti fu en, ma dati ben wani taki dati Gado en prakseri no ben kon tru? A de so taki Gado no ben meki Adam sondro fowtu, soleki fa son sma e taki? Kwetikweti, fu di „a tru Gado meki libisma opregti” (Preikiman 7:29). A fasi fa Yesus hori en soifri retifasi di a kisi bun hebi tesi na grontapu, ben e sori taki „Adam no ben abi leti fu sondu, èn a no ben abi nowan reide tu fu du dati”, na so a brada ben taki. Di Adam kisi tesi na ini a dyari fu Eden, fu sori efu a ben o gi yesi na Gado, dan a tesi dati no ben hebi so, leki a tesi di Yesus ben kisi sondro fu brokokindi. Ma toku, Adam sondu. Awansi fa a no fa, noti sa man tapu Yehovah fu du san a abi na prakseri. Den sani di Yehovah abi na prakseri sa kon tru (Yesaya 55:11). Brada Pierce ben taigi den nyun zendeling: „Yu kan gi grani na Yehovah te yu de klariklari fu du sani gi trawan. Meki a de so taki Yehovah de nanga ibriwan fu unu awansi pe unu e dini en leki zendeling.”

Baka di Brada Lett, a fesiman ben tyari na odi fu den difrenti bijkantoro fu Yehovah Kotoigi, a gi den studenti a diploma fu den, èn a taigi den na sortu kondre den o go. Vernon Wisegarver, wan brada di de wan memre fu a Bethelfamiri langa ten kaba, tapu a programa nanga begi.

Den 6872 sma di ben kon na a programa, ben kisi deki-ati fu du a wani fu Gado fayafaya (Psalm 40:8). Den studenti Andrew nanga Anna ben taki: „Wi gi wi libi abra na Yehovah. Wi pramisi Yehovah taki wi sa du iniwan sani di a e aksi wi fu du. Now Yehovah aksi wi fu go na Kamerun na ini Afrika.” Den studenti disi nanga den trawan fu a klas, de fayafaya fu bigin nanga wan wroko di sa meki taki den de koloku èn di sa gi den prisiri. Iya, den e prisiri fu du a wani fu Gado.

[Prenki na tapu bladzijde 17]

WAN TU SANI FU A KLAS

A nomru fu den kondre pe den studenti komoto: 6

A nomru fu kondre pe den studenti o go: 20

A nomru fu studenti: 52

Gemiddeld yari di den abi: 35,7

Gemiddeld yari di den de na ini a waarheid: 18,3

Gemiddeld yari di den de na ini a furuten diniwroko: 14,5

[Prenki na tapu bladzijde 18]

A di fu 120 klas fu a Waktitoren Bijbelskoro Gilead

Den nen di de fu si na ondrosei, poti na ini rei di nomru fu fesisei go na bakasei, èn den nen poti fu a kruktu-anusei go na a reti-anusei na ini ibri rei.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.