Ondrofenitori

Mi kisi prisiri fu di mi horidoro

SOLEKI FA MÁRIO ROCHA DE SOUZA FRUTERI

„Soleki fa a sori, dan Masra Rocha o dede efu a du wan oparâsi.” Aladi mi sari di a datra taigi mi a sani disi, toku tide na a dei, sowan 20 yari baka dati, mi e dini ete leki wan furuten preikiman fu Yehovah Kotoigi. San yepi mi fu horidoro ala den yari disi?

MI GRO kon bigi tapu wan burugron krosibei fu Santo Estêvão, wan dorpu na ini a distrikt Bahia, na a noord-owstusei fu Brasyonkondre. Di mi ben abi seibi yari, mi bigin yepi mi papa fu wroko tapu a burugron. Ibri dei te mi ben komoto na skoro, a ben e gi mi wan wroko fu du. Baka wan pisi ten, mi ben abi fu luku a heri burugron te mi papa ben e go du bisnis na ini Salvador, a mamafoto fu a distrikt drape.

Aladi wi no ben abi stroom, kranwatra, noso den difrenti sani di e meki a libi moro makriki na ini a ten disi, toku wi ben de koloku. Mi ben gwenti seti frigi, noso prei nanga oto di mi nanga mi mati ben e meki fu udu. Boiti dati, mi ben e prei a klarinet na ini a kerki grupu di ben e waka e prei poku na strati tapu spesrutu fesadei. Mi ben de wan memre fu a grupu fu singiman fu a kerki drape, èn na drape mi si wan buku di nen História Sagrada (Santa Historia). A buku disi meki taki mi ben wani sabi moro fu Bijbel.

Na ini 1932, di mi ben abi 20 yari, wan bigi dreiten kon na a noord-owstusei fu Brasyonkondre, èn a dreiten disi hori bun langa. Di den meti fu wi, èn den sani di wi ben prani, kon dede, dan mi froisi go na Salvador, pe mi feni wroko fu rèi wan loko. Bakaten, mi yuru wan oso èn mi tyari mi famiri fu kon tan nanga mi. Na ini 1944, mi papa dede, èn mi ben musu sorgu gi mi mama, aiti sisa, nanga dri brada.

 Fosi mi ben e rèi wan loko, ma now mi e preiki a bun nyunsu

Wán fu den fosi sani di mi du di mi doro na ini Salvador, na taki mi bai wan Bijbel. Mi ben e go wan tu yari kaba na a Baptist kerki, di mi tron mati nanga Durval, wan man di ben e rèi wan fu den loko. Nofo tron mi nanga Durval ben abi langa takimakandra fu Bijbel tori. Wán dei a gi mi wan pikin buku di nen Where Are the Dead? (Pe den Dedewan de?) * Aladi mi ben e bribi taki libisma abi wan sili di no man dede, toku mi ben wani sabi trutru efu den bijbeltekst di ben kari na ini a pikin buku ben skrifi na ini Bijbel trutru. Mi ben fruwondru fu si taki Bijbel e sori krin taki a sili di sondu o dede.—Esekièl 18:4.

Di Durval si taki mi ben wani sabi moro, dan a aksi Antônio Andrade, wan furuten preikiman fu Yehovah Kotoigi, fu kon na mi na mi oso. Baka di Antônio ben kon na mi fu a di fu dri leisi, dan a aksi mi fu go makandra nanga en fu go leri trawan moro fu Bijbel. Baka di a taki nanga den sma na den fosi tu oso, dan a taigi mi: „Now yu o taki.” Mi ben e senwe srefisrefi, ma di wan osofamiri arki a bun nyunsu nanga ala den prakseri èn den teki den tu buku di mi gi den, dan mi ben breiti fu tru. Te na a dei fu tide, mi e prisiri srefisrefi te mi e miti wan sma di wani sabi moro fu a Bijbel waarheid.

Tapu 19 april 1943, a dei di a Memrefesa fu Krestes en dede ben e hori a yari dati, mi teki dopu na ini na Atlantisch Se, na a syoro fu Salvador. Fu di nofo lepi Kresten mansma no ben de, meki mi kisi a grani fu yepi wan grupu Kotoigi di ben e konmakandra na ini na oso fu Brada Andrade. Na oso fu en ben de na ini wan fu den smara pasi di e waka fu a hei pisi go na a lagi pisi fu a foto Salvador.

Sma e bigin gens a preikiwroko

Na ini den yari fu a di fu Tu Grontapufeti (1939-1945), sma no ben lobi a wroko di wi leki Kresten ben e du. Fu di moro furu fu den publikâsi fu wi ben e komoto fu Amerkankondre, meki sonwan fu den lantiman ben feni taki wi ben e wroko kibrikibri gi Amerkankondre. Fu dati ede den ben e sroto furu fu den Kotoigi, èn den ben e poti furu aksi gi wi. Te wan Kotoigi no ben e drai kon baka fu a preikiwroko, dan wi ben sabi taki skowtu ben hori en. Te dati ben pasa, dan wi ben e go na a skowtu-oso fu taki nanga den skowtu, so taki den kan lusu a Kotoigi.

Na ini augustus 1943, Adolphe Messmer, wan Kotoigi fu Doisrikondre, doro na ini Salvador fu yepi wi orga a fosi kongres fu wi. Baka di wi kisi primisi fu lanti fu hori a kongres disi, wi bigin meki bekènti taki a publikitaki di nen „Wi sa de fri na ini a nyun grontapu”, ben o hori. Wi meki a sani disi bekènti na koranti, èn wi plak papira na den fensre fu wenkri èn na den loko fu meki sma kon sabi fu a publikitaki disi. Ma tapu a di fu tu dei fu a kongres fu wi, wan skowtu kon taigi wi taki wi no ben abi primisi moro fu hori a kongres. A gran-beskopu fu Salvador ben dwengi na edeman fu skowtu fu tapu a kongres fu wi. Ma na ini april fu a tra yari, wi ben man kisi primisi te fu kaba fu hori a publikitaki di wi ben meki bekènti.

 Wan marki di mi ben wani doro

Na ini 1946, mi kisi kari fu go na a Theocratische Congres der Verheugde Natiën (Theokrasia Kongres fu Prisiri Nâsi), na ini a foto São Paulo. A kapten fu wan bigi boto di e tyari lai na ini Salvador, ben de klariklari fu tyari wan tu fu wi go drape nanga a boto fu en, ma wi ben o musu sribi na tapusei fu a boto. Di wan bigi winti ben wai, dan wi alamala kon siki fu di a boto ben e sekiseki. Ma aladi dati ben pasa, toku wi doro na ini a foto Rio de Janeiro baka fo dei, sondro taki wan ogri ben miti wi. Kotoigi na ini Rio de Janeiro kari wi kon na den oso fu rostu wan tu dei, fosi wi go moro fara nanga loko. Di a loko fu wi doro na ini São Paulo, dan wan pikin grupu sma gi wi wan switikon nanga yepi fu den bigi duku di den ben e hori, èn na tapu den duku disi ben skrifi „Wan switikon Yehovah Kotoigi”.

Di mi ben doro baka na ini Salvador, dan syatu baka dati mi taki nanga Harry Black, wan zendeling fu Amerkankondre, èn mi taigi en taki mi ben wani tron wan pionier, soleki fa wi e kari wan furuten preikiman fu Yehovah Kotoigi. Harry memre mi taki mi ben musu sorgu ete gi mi famiri, èn a taigi mi fu abi pasensi. Te fu kaba, na ini yuni 1952, den brada nanga sisa fu mi ben man sorgu gi densrefi, èn mi kisi a grani fu dini leki pionier na ini wan pikin gemeente na ini a foto Ilhéus. A foto disi de sowan 210 kilometer go na a zuidsei fu Salvador.

Wan tumusi moi seti

A yari baka dati, mi ben musu go dini na ini Jequié, wan bigi foto na ini a hei kontren fu Bahia, pe nowan Kotoigi ben de. A fosi sma pe mi go preiki, ben de a priester fu a presi drape. A taigi mi taki na en wawan ben mag preiki gi sma na ini a foto dati, èn taki mi no ben mag preiki drape. A warskow den sma fu en kerki taki wan „falsi profeiti” ben doro na ini a foto, èn a poti wan tu sma fu luku san mi ben e du. Ma toku, mi prati moro leki 90 Bijbel publikâsi a dei dati, èn mi bigin fo bijbelstudie. Tu yari baka dati, a foto Jequié ben abi wan Kownukondre zaal pe 36 Kotoigi ben e kon makandra! Tide na a dei, aiti gemeente èn sowan 700 Kotoigi de na ini Jequié.

Di mi ben doro na ini Jequié, dan mi ben e tan wan tu mun na ini wan pikin kamra di mi ben yuru na wan boitipresi fu a foto. Na a ten dati mi miti Miguel Vaz de Oliveira, na eiginari fu a Hotel Sudoeste. A hotel disi ben de wan fu den moro bun hotel na ini Jequié. Miguel bigin studeri Bijbel, èn a ben de nomonomo taki mi froisi kon tan na ini wan fu den kamra fu a hotel fu en. Bakaten, Miguel nanga en wefi tron Kotoigi.

Wan tra moi sani di mi man memre fu a ten di mi ben de na ini Jequié, abi fu du nanga Luiz Cotrim. A man disi ben de wan skoromeester na wan middelbaar skoro, èn mi ben e studeri Bijbel nanga en. Luiz ben wani yepi mi fu kon sabi Potogisitongo nanga wiskunde moro bun. Mi ben go soso na lagiskoro, èn fu dati ede mi ben feni en bun taki a yepi mi. Ibri wiki baka a bijbelstudie Luiz ben e gi mi leri, èn a sani dati sreka mi gi tra grani di mi kisi fu Yehovah en organisâsi syatu baka dati.

Mi e kisi fu du nanga wan nyun tyalensi

Na ini 1956, mi kisi wan brifi di ben e gi mi a kari fu go na a bijkantoro di ben de na ini Rio de Janeiro na a ten dati. Drape mi ben o kisi leri fu dini leki kring-opziener, soleki fa Yehovah Kotoigi e kari den opziener di e reis. Mi nanga aiti tra brada kisi leri pikinso moro langa leki wán mun. Di wi kaba kisi leri, dan mi ben musu go dini na ini São Paulo, èn a sani dati meki taki mi bigin broko mi ede. Mi ben aksi misrefi: ’San mi leki blakaman o go du drape na mindri den someni Italiasma? Den sma o lobi mi?’ *

 Na a fosi gemeente pe mi go na ini a distrikt Santo Amaro, mi kisi deki-ati di mi si taki a Kownukondre zaal ben lai nanga brada nanga sisa, èn nanga sma di ben wani sabi moro fu Bijbel. Di ala den 97 sma na ini a gemeente go makandra nanga mi na ini a preikiwroko a satra nanga a sonde dati, dan dati sori mi taki mi ben e broko mi ede fu soso. ’Den na mi brada nanga mi sisa trutru’, na so mi ben e prakseri na misrefi. Na a switifasi fu den lobi brada nanga sisa dati gi mi deki-ati fu horidoro na ini a kringwroko.

Buriki, asi, nanga tamanuwa

Wán fu den moro bigi tyalensi di ben e miti kring-opziener na ini a ten dati, na taki den ben musu waka langa pasi fu doro den gemeente nanga den grupu fu Kotoigi di ben de na den farawe presi. Na den sortu presi dati, yu no ben man feni bus noso wagi makriki, èn furu fu den pasi ben de smara santi pasi.

Den brada fu wan tu fu den kring, ben lusu a problema disi, fu di den bai wan buriki noso wan asi di a kring-opziener ben kan gebroiki. Furu leisi, tapu munde, mi ben e poti a sadri na tapu na asi noso a buriki fu mi, mi ben tai den sani fu mi na tapu, èn mi ben e rèi sowan 12 yuru langa go na a tra gemeente. Na ini Santa Fé do Sul, den Kotoigi ben abi wan buriki di ben nen Dourado, èn a buriki disi ben sabi a pasi fu go na den farawe presi pe den grupu ben de di ben e studeri Bijbel makandra. Dourado ben gwenti fu stop na fesi den portu fu den burugron, èn a ben e wakti nanga ala pasensi teleki mi opo a portu gi en. Te mi ben fisiti a grupu kaba, dan mi nanga Dourado ben e go na wan tra grupu.

Wan tra sani di ben meki taki a kringwroko ben de wan tyalensi, na taki yu no ben man seni boskopu go so makriki na den difrenti presi. Fu eksempre, te mi ben musu go fisiti wan pikin grupu Kotoigi di ben e kon makandra na a burugron na ini a distrikt Mato Grosso, dan mi ben musu abra na Araguaia-liba nanga boto, èn mi ben musu rèi pasa na ini a busi sowan 25 kilometer, nanga asi noso buriki. Wan leisi mi ben seni wan brifi gi a grupu disi fu taigi den taki mi ben o fisiti den. Ma soleki fa a sori dan den no kisi a brifi dati, bika di mi ben abra a liba, dan nowan sma ben e wakti mi. Fu di a ben de latilati bakadina, meki mi aksi na eiginari fu wan pikin sopiwenkri, efu mi ben kan libi den tas fu mi drape. Na so mi bigin waka nanga wán fu den tas fu mi nomo.

Fosi yu denki, neti fadon. Di mi ben e suku fu feni mi pasi na ini a dungru, dan mi yere a hebi bro fu wan tamanuwa. Sma ben taigi mi taki wan tamanuwa kan opo tanapu na tapu en tu futu èn a kan kiri wan sma srefi nanga den tranga fesi futu fu en. Sobun, ibri leisi te mi ben e yere wan sani na ini den busibusi, dan mi ben e luku bun pe mi ben e waka, aladi mi ben e hori a tas fu mi na mi fesi fu kibri misrefi. Baka di mi ben waka wan tu yuru, mi doro na wan pikin kriki. Mi dyompo abra a kriki, ma fu di a ben dungru tumusi fu si taki makamaka isri draad ben de na a tra sei fu a kriki, meki mi fadon tapu a makamaka isri draad, èn mi koti misrefi!

Te fu kaba mi doro na a burugron, èn den dagu bigin bari di den si mi. Na a ten dati, fufuruman  ben lobi fu kon fufuru den skapu fu sma na neti. Dati meki di mi si taki wan sma opo a doro, dan mi taigi en wantewante suma na mi. A ben musu de so taki den brada skreki fu si mi na ini pritipriti krosi di ben flaka nanga brudu, ma toku den ben breiti fu si mi.

Aladi den problema disi ben miti mi, toku mi ben de koloku na ini a ten dati. Mi ben lobi fu rèi nanga asi èn waka nanga futu tapu den langa pasi. Son leisi mi ben e rostu na ondro wan bon, èn mi ben e arki fa den fowru e singi. Mi ben lobi fu luku den krabudagu di mi ben e si te mi ben de mi wawan na tapu den pasi. Wan tra sani di ben e gi mi prisiri, na fu sabi taki te mi ben e fisiti den sma, dan dati ben e yepi den trutru. Furu sma ben e skrifi brifi gi mi fu taigi mi taki den ben warderi a fisiti fu mi. Trawan baka, ben e taigi mi tangi te mi nanga den ben e miti na den bigi konmakandra. A ben gi mi trutru prisiri fu si fa sma ben man drai den libi, èn fa den ben e go na fesi na yeye fasi!

Mi feni wan patna te fu kaba

Na ini den yari dati di mi ben e du a kringwroko, furu tron mi ben de mi wawan, èn a sani disi leri mi fu frutrow tapu Yehovah fu di mi ben kon si en leki ’mi klepston di e tanapu leti-opo èn leki mi fortresi’ (Psalm 18:2). Boiti dati, mi ben kon frustan taki fu di mi no ben trow, meki mi ben man poti ala mi prakseri na Kownukondre afersi.

Ma na ini 1978, mi miti wan pionier sisa di nen Júlia Takahashi. A sisa disi ben e sorgu gi sikisma na ini wan bigi ati-oso na ini São Paulo, èn a wroko disi ben e pai bun. Toku a gowe libi a wroko disi fu go dini na wan presi pe moro Kownukondre preikiman ben de fanowdu. Den Kresten owruman di ben sabi en, prèise en fu di a abi yeye fasi, èn fu di a abi bun bakapisi leki pionier. Yu kan frustan taki, son sma ben fruwondru di den yere taki mi ben o trow, baka di mi ben de mi wawan someni yari langa. Wán bun mati fu mi no ben man bribi a tori, èn a pramisi mi taki a ben o gi mi wan mankaw fu 270 kilo, efu mi ben o trow trutru. Wi losi a mankaw dati tapu a trowfesa fu wi di hori tapu 1 yuli 1978.

Mi horidoro aladi mi kon siki

Júlia go makandra nanga mi na ini a kringwroko, èn na ini den aiti yari baka di wi trow, wi ben e fisiti den gemeente na a zuidsei èn na a zuid-owstusei fu Brasyonkondre. Na ini a pisi ten dati mi kon siki na mi ati. Tu leisi mi flaw di mi ben e taki nanga sma na ini a preikiwroko. Fu di mi no man du so furu moro, meki wi bosroiti fu go dini leki spesrutu pionier na ini Birigüi, na ini a distrikt São Paulo.

Di wi ben de drape, dan den Kotoigi na ini Birigüi tyari mi nanga oto go na wan datra na ini a foto Goiânia, di de sowan 500 kilometer moro fara. Di a ben e go pikinso moro betre nanga mi, dan mi du wan oparâsi na mi ati. Dati ben de sowan 20 yari pasa. Aladi mi du ete tu oparâsi baka dati, toku mi e tan teki prati na a wroko fu meki disipel. Neleki fa a de nanga furu tra getrow Kresten wefi, na so Júlia e tan gi mi deki-ati.

Fu di mi e sikisiki, meki mi no man du so furu now, èn a san disi e meki mi lasi-ati son leisi. Ma toku mi man pionier ete. Mi e tan memre misrefi taki noiti Yehovah pramisi wi taki a libi na ini na owru sistema disi ben o de sondro problema. Efu na apostel Paulus nanga tra getrow Kresten fu owruten ben musu horidoro, dan wi na ini a ten disi musu horidoro tu, a no so?—Tori fu den Apostel 14:22.

No so langa pasa, mi feni a fosi Bijbel di mi ben abi na ini a pisi ten baka 1930. Na a inisei kafti fu a Bijbel, mi ben skrifi a nomru 350. Dati ben de a nomru fu Kownukondre preikiman di ben de na ini Brasyonkondre na a pisi ten di mi bigin go na den Kresten konmakandra na ini 1943. Mi no man bribi taki now moro leki 600.000 Kotoigi de na ini Brasyonkondre. Mi e si en leki wan bigi grani taki mi ben man yepi pikinso fu meki a wroko go na fesi! Iya, Yehovah blesi mi bogobogo fu di mi horidoro. Neleki a psalm skrifiman, mi kan taki: „Yehovah du wan bigi sani nanga san a du nanga wi. Wi kon de nanga prisiri.”—Psalm 126:3.

[Futuwortu]

[Prenki na tapu bladzijde 9]

Kotoigi e meki bekènti taki a publikitaki o hori na a fosi kongres na ini a foto Salvador, na ini 1943

[Prenki na tapu bladzijde 10]

Kotoigi di ben e doro na ini São Paulo gi a Prisiri Nâsi kongres na ini 1946

[Prenki na tapu bladzijde 11]

Na ini a kringwroko na ini den yari baka 1950

[Prenki na tapu bladzijde 12]

Mi nanga mi wefi Júlia