Wi kan kon sabi san tru

A BEN de 18 december 1810. Neti ben e fadon. A se ben krasi srefisrefi, èn a HMS Pallas, wan srudati sipi fu Ingrisikondre di ben de krosibei fu a syoro na a zuid-owstusei fu Skotland, ben lasi na se. A ben e kon moro dungru, èn fu di furu snew ben e fadon, meki a ben de moro muilek gi den sma tapu a sipi fu si den leti na syoro di ben musu sori den pe fu tyari a sipi. Yu kan frustan taki den ben breiti di den si leti na syoro, èn den tyari a sipi go na a sei pe den leti ben de! Ma a de wan sari sani taki den leti disi no ben sori den a yoisti presi pe den ben musu go. Fu taki en leti, den ben si den faya di wrokoman ben meki na syoro. A sani disi meki taki a Pallas go naki panya na den bigi ston na syoro. Erfu sipiman dede. Dati ben de wan sari sani trutru!

A sipi Pallas ben go naki panya fu di sma ben meki wan fowtu. Ma na ini tra situwâsi, moro bigi ogri ben kan miti sipiman, iya, sma ben kan poti leti fu kori sipiman so taki den ben e tyari den sipi go naki na den bigi ston na syoro. Te dati ben pasa, dan sma ben e go furufuru sani na ini den sipi di ben naki panya, na so a buku Wrecks, Wreckers and Rescuers e taki.

’Santa buku di kan meki yu kisi frulusu’

Te yu e suku fu kon sabi san tru, dan den srefi ogri di miti den sipiman kan miti yu tu. Kande yu sa bribi sani di no tru, noso kande wan sma e kori yu fu espresi. Den sani disi kan meki taki sani no e waka bun gi yu kwetikweti. San yu kan du fu kibri yusrefi? Sorgu taki a buku di yu e gebroiki fu kon sabi san tru, na wan buku di no e fruteri lei. Moro leki 125 yari kaba, a tijdschrift disi e sori taki a Wortu fu Gado, Bijbel, na a moro bun buku di kan sori wi san tru, fu di a ’santa buku disi kan meki yu kon koni so taki yu kan kisi frulusu’.—2 Timoteyus 3:15-17.

A no de fu taki dati te yu wani kisi na overtoigi taki Bijbel na a moro bun buku di kan sori wan sma san tru, dan a bun fu ondrosuku san skrifi na ini, èn suma skrifi a buku dati  (Psalm 119:105; Odo 14:15). Yu kan skrifi den sma di tyari a tijdschrift disi kon na doro efu yu wani kon sabi moro fu den sani di overtoigi milyunmilyun sma taki na Gado meki sma skrifi Bijbel. Fu eksempre, leisi a brochure di nen Een boek voor alle mensen (Wan buku gi ala sma). * A brochure disi e sori krin taki den sani di skrifi na ini Bijbel de soifri, den pasa trutru, èn na Gado meki sma skrifi den.

Prenspari tru tori

Ma san na wan tu fu den prenspari tru tori di skrifi na ini a „santa buku” disi? Luku den eksempre di e kon now.

Wán Almakti Gado de, èn wán Mekiman de di meki ala sani (Genesis 1:1). Wi de na libi soso „fu di [Gado] meki ala sani”, èn fu di a gi wi libi (Openbaring 4:11). Fu dati ede, wi musu anbegi en wawan. A Mekiman na a wan-enkri Sma di kan meki wi kon sabi ala san tru (Psalm 36:9; Yesaya 30:20, 21; 48:17, 18). A abi wan nen èn a wani taki wi gebroiki a nen dati (Exodus 3:15). A nen dati di ben skrifi na ini Hebrewtongo, vertaal leki YHWH, èn a de fu feni sowan 7000 leisi na ini Bijbel. Na ini Sranantongo, a nen disi na „Yehovah”.—Psalm 83:18.

Yehovah ben meki mansma nanga umasma fu libi fu têgo na ini wan Paradijs leti dyaso na grontapu. A gi libisma den srefi fasi di a abi. A gi den koni, so taki den ben o man nyan bun fu a libi na grontapu, èn so taki den ben o man de koloku fu têgo (Genesis 1:26-28). Gado no ben meki grontapu leki wan presi pe a ben kan luku efu mansma nanga umasma e doro den markitiki fu man tron wan yeye na ini hemel, neleki na drape wawan libisma kan abi wan bun banti nanga Gado.

Gado no ben meki nowan ogri libisma. Ogri kon de fu di sonwan fu den mekisani fu Gado, namku libisma nanga yeye, gebroiki a fri-wani fu den na wan fowtu fasi, èn fu di den opo densrefi teige Gado (Deuteronomium 32:5). Wi fosi papa nanga mama ben denki taki den ben abi a reti fu bosroiti san bun èn san ogri (Genesis 2:17; 3:1-5). A sani dati tyari dede kon gi libisma (Genesis 3:19; Romesma 5:12). Fu piki den prenspari aksi di opo kon baka di sma ben opo densrefi teige Yehovah, meki a bosroiti fu gi pasi fu wan pisi ten taki ogri de. Ma a sani di Gado ben abi na prakseri gi grontapu èn gi libisma, no kenki (Yesaya 45:18). Iya, mansma nanga umasma sa libi fu têgo na ini wan Paradijs grontapu pe nowan ogri sa de.—Mateyus 6:10; Openbaring 21:1-5.

Yesus Krestes no de na Almakti Gado, ma a de a Manpikin fu Gado. Yesus Krestes srefi ben leri den bakaman fu en fu begi: „Wi Tata na hemel, meki yu nen kon santa” (Mateyus 6:9). Noiti a ben taki dati en nanga Gado na wán. Na presi fu dati, a ben taki: „A Tata bigi moro mi.”—Yohanes 14:28.

Yesus na wan tumusi prenspari sma di Gado e gebroiki fu meki a prakseri fu En kon tru. Gado ben seni en kon „leki wan leti na grontapu, so taki ibri sma di e bribi na ini [en], no sa tan na ini a dungru” (Yohanes 12:46).  Soleki fa na apostel Petrus ben taki, dan „nowan tra sma kan gi wi frulusu” (Tori fu den Apostel 4:12). A sani disi tru fu di wi kan kisi frulusu soso nanga yepi fu a warti brudu fu Krestes (1 Petrus 1:18, 19). Yesus Krestes ben gi a libi fu en leki wan frulusu-ofrandi fu frulusu libisma fu a sondu di den kisi fu wi fosi papa nanga mama, Adam nanga Eva (Mateyus 20:28; 1 Timoteyus 2:6). Boiti dati, Gado gebroiki Yesus fu meki sma kon sabi a wani nanga a prakseri fu En.—Yohanes 8:12, 32, 46, 47; 14:6; Tori fu den Apostel 26:23.

Gado seti wan Kownukondre, noso tirimakti na hemel, èn Yesus Krestes nanga den wan di Gado teki puru na mindri libisma sa tiri na ini a kownukondre dati. A tori disi de fu feni na difrenti presi na ini Bijbel. Gado ben seti a tirimakti disi fu sorgu taki a wani fu en e pasa na grontapu soleki fa dati e pasa na ini hemel (Mateyus 6:10). Na a bigin, Gado no ben meki libisma fu go na hemel. Den ben musu libi na grontapu. Ma di libisma sondu, meki Gado bosroiti fu du wan tra sani. A teki sma „komopo fu ibri lo, tongo, pipel, nanga kondre” fu ’tiri leki kownu’ makandra nanga Krestes na ini wan tirimakti na hemel (Openbaring 5:9, 10). Heri esi a Kownukondre tirimakti dati sa ’broko ala den kownukondre fu libisma na pisipisi, èn a sa tyari wan kaba kon na den’, fu di den meki libisma ondrofeni bun furu pina nanga sari.—Danièl 2:44.

A sili man dede. A prenspari tru tori disi fu Bijbel e tyari kon na krin fa wi libi sa waka na ini a ten di e kon. A e tyari kon na krin tu taki den sani di sma e bribi te a abi fu du nanga den dedewan, no tru.

A fosi buku fu Bijbel e taki: „Yehovah Gado teki doti fu a gron, a meki libisma èn a bro a libibro na ini en noso-olo, èn a libisma tron wan libi sili” (Genesis 2:7). Yu e frustan san dati wani taki? A sili a no wan dyumbi na ini wan libisma en skin. Libisma no abi wan sili. Libisma na wan sili, èn dati wani taki dati den meki fu „a doti fu a gron” èn den kisi libi fu Gado. A sili man dede. Te wan sma dede, dan a sili dede tu.—Genesis 3:19; Preikiman 9:5, 10.

Den wan di dede kan kisi libi baka. A ten di Gado e gi pasi taki ogri de, sa kon na wan kaba. Te dati pasa, dan „ala den sma di de na ini den grebi o yere [Yesus] en sten, èn den o komopo drape; den sma di du bun sani, o opo baka fu kisi libi èn den sma di du takru sani, o opo baka fu kisi krutu” (Yohanes 5:28, 29; Tori fu den Apostel 24:15). Te libisma kisi wan opobaka dan den o libi na ini wan paradijs na grontapu, soleki fa Gado ben abi na prakseri gi libisma na a bigin.

 Ondrosuku den Buku fu Bijbel finifini ala dei

Te yu sabi den prenspari tru tori disi, dan dati kan yepi yu, a no so? Na ini den bruya ten disi di muilek fu pasa, a sabi disi kan kibri yu gi ’den tori di sma e kari sabi, aladi den tori disi na soso lei, èn Satan Didibri na a sma di e panya den lei disi na ala sei. Satan e du neleki en na „wan engel fu leti” èn den wan di e horibaka gi en e du neleki den na „dinari di e du san regtfardiki” (1 Timoteyus 6:20; 2 Korentesma 11:13-15). Soifri sabi fu Bijbel kan kibri yu gi a sokari tru sabi. A sabi disi e komoto fu den filosofia fu den ’koniwan èn fu den sma di abi frustan’ fu grontapu sani, ma di „e weigri fu teki a wortu fu Yehovah”.—Mateyus 11:25; Yeremia 8:9.

Na ini a ten fu na apostel Yohanes, furu falsi leri nanga filosofia ben de, èn fu dati ede a ben warskow den fosi Kresten: „No bribi ala sani di gersi leki den e kon fu Gado en yeye.” A ben taki: „Ondrosuku den sani disi fu si efu den e kon fu Gado trutru” (1 Yohanes 4:1). Luku na agersitori disi. Efu yu ben kisi wan boskopu di ben kan kenki yu libi, dan yu ben bribi en wantewante, soso fu di a gersi leki a sma di seni en gi yu na wan sma di yu kan frutrow? Yu no ben o du dati kwetikweti. Yu ben o luku suma seni en gi yu, èn yu ben o suku fu kon sabi efu a tru, fosi yu e bribi en.

Fu di Gado meki sma skrifi den prenspari tru tori na ini Bijbel, meki wi man ’ondrosuku finifini’ efu den sani di wi e kon sabi de tru, neleki fa den sipiman ben musu luku bun efu den leti di ben musu sori den pe den musu go, ben de den yoistiwan (1 Tesalonikasma 5:21). Na ini a fosi yarihondro, yu ben abi sma di ben de klariklari fu teki leri, èn Bijbel e prèise den sma disi di „ben e ondrosuku Gado Buku finifini ibri dei”, fu kon sabi efu den sani di den ben e leri ben tru (Tori fu den Apostel 17:11). Yu kan teki na eksempre fu den sma dati tu. Meki Bijbel sori yu a yoisti pasi, neleki fa „wan lampu di e skèin na ini wan dungru presi” e sori yu pe yu musu go (2 Petrus 1:19-21). Te yu e du dati, dan „yu sa feni a sabi fu Gado srefi”, di e sori wi san tru.—Odo 2:5.

[Futuwortu]

[Prenki na tapu bladzijde 4]

Gado Wortu de leki wan lampu

[Prenki na tapu bladzijde 5]

San na a nen fu Gado?

[Prenki na tapu bladzijde 5]

Fa a libi sa de na ini a ten di e kon?

[Prenki na tapu bladzijde 6]

Yesus na a Almakti Gado?

[Prenki na tapu bladzijde 6]

Pe den dedewan de?

[Prenki na tapu bladzijde 7]

Na opobaka fu den dedewan na wan fu den prenspari tru tori di Bijbel e leri wi