Yonguwan, teki a bosroiti fu dini Yehovah
Yonguwan, teki a bosroiti fu dini Yehovah
„Bosroiti gi unsrefi suma unu sa dini.”—YOSUA 24:15.
1, 2. Na sortu fowtu fasi den sma fu Krestenhèit dopu trawan?
„MEKI pikin-nengre tron Kresten te den kon sabi Krestes.” Wan skrifiman di nen Tertullianus, ben skrifi den wortu dati na a kaba fu a di fu tu yarihondro G.T. A ben de teige a dopu di sma ben e dopu beibi. Na ini a ten fu en, a sani disi ben e kon tron wan gwenti gi Kresten di ben fadon komoto na bribi. Kerki Tata Augustinus no ben e agri nanga Tertullianus, fu di a ben feni taki te beibi ben e dopu, dan dati ben o puru a sondu di den kisi, èn a ben feni tu taki te wan beibi dede sondro fu dopu, dan a beibi dati ben o bron na ini helfaya. A denki disi meki taki moro nanga moro sma no ben e draidrai fu dopu den beibi fu den te den ben gebore.
2 Na ini furu fu den bigi kerki fu Krestenhèit, sma e dopu beibi te now ete. Boiti dati, na ini den hondrohondro yari di pasa, tiriman nanga kerki fesiman fu den pipel di ben e kari densrefi Kresten ben e fruplekti den wan di den ben wini na ini wan feti, fu teki dopu, fu di den ben e si den sma disi leki heiden. Ma nowan presi na ini Bijbel skrifi taki beibi musu dopu èn taki sma musu dwengi trawan fu dopu.
Na ini a ten disi sma no kan dwengi trawan fu gi densrefi abra na Gado
3, 4. San kan yepi pikin fu Kresten papa nanga mama fu gi densrefi abra na Yehovah fu di densrefi wani du dati?
3 Bijbel e sori taki Gado e si pikin-nengre leki santa sma, srefi efu soso a papa, noso a mama fu den na wan getrow Kresten (1 Korentesma 7:14). A sani disi wani taki dati den pikin disi na futuboi fu Yehovah di gi densrefi abra na en? Nôno. Ma pikin di abi papa nanga mama di gi densrefi abra na Yehovah, e kisi leri di kan meki taki densrefi e bosroiti fu gi densrefi abra na Yehovah. A koni Kownu Salomo ben skrifi: „Mi manpikin, arki den komando fu yu tata èn no poti den wet fu yu mama na wan sei. . . . Te yu e waka, a sa tiri yu, te yu e didon, a sa de leki wan waktiman gi yu, èn te yu wiki, dan ensrefi sa broko en ede nanga yu. Bika a komando na wan lampu, èn a wet na wan leti, èn den piri-ai fu trangaleri na a pasi fu libi.”—Odo 6:20-23.
4 A leri di Kresten papa nanga mama e gi den pikin fu den, kan kibri den yonguwan disi efu den de klariklari fu teki den leri dati. Salomo ben taki sosrefi: „Na wan koni manpikin e gi wan papa prisiri, èn wan don manpikin e meki en mama sari.” „Yu, o mi manpikin, yere èn kon tron wan koni sma, èn tyari yu ati go na tapu a reti pasi” (Odo 10:1; 23:19). Iya, fu man kisi wini fu a leri di papa nanga mama e gi, dan unu leki yonguwan musu de klariklari fu teki rai, nanga trangaleri. Yu no gebore leki wan koni sma, ma yu kan „tron wan koni sma”, èn yusrefi kan bosroiti fu waka na tapu „a pasi fu libi”.
San a wani taki fu frumane pikin, so taki den kan kisi a denki fu Gado?
5. Sortu rai Paulus ben gi pikin nanga papa?
5 Na apostel Paulus ben skrifi: „Un pikin, gi yesi na un papa nanga mama soleki fa Masra wani, bika disi de regtfardiki: ’Lespeki yu papa nanga yu mama’; disi na a fosi komando pe Gado e pramisi: ’Dan a sa go bun nanga yu èn yu kan tan langa ten na grontapu.’ Un papa, no tanteri den pikin fu unu, ma tan kweki den nanga a leri fu Yehovah èn frumane den, so taki den kan kisi a denki fu en.”—Efeisesma 6:1-4.
6, 7. San a wani taki fu kweki pikin ’nanga a leri fu Yehovah èn fu frumane den, so taki den kan kisi a denki fu En’? Fu san ede disi no wani taki dati papa nanga mama e du sani di abi wan takru krakti tapu den pikin?
6 A de so taki te Kresten papa nanga mama e kweki den pikin ’nanga a leri fu Yehovah èn te den e frumane den, so taki den kan kisi a denki fu En’, dan dati abi wan takru krakti na tapu den pikin disi? Nôno. Suma kan krutu papa nanga mama te den e leri den pikin fu den san bun èn san fiti? Te papa nanga mama di e bribi taki Gado no de, e leri den pikin fu den san den e bribi, dan sma no e krutu den. Lomsusma feni taki den musu kweki den pikin fu den nanga a Lomsu bribi, ma pikinmoro noiti sma e krutu den fu di den e pruberi fu kweki den pikin na a fasi disi. Dati meki, te Yehovah Kotoigi e leri den pikin fu kon abi a srefi denki leki Yehovah te a abi fu du nanga san tru èn san fiti, dan sma no musu taki dati a sani disi abi wan takru krakti na tapu a frustan fu den pikin.
7 Soleki fa wi si na ini Efeisesma 6:4, dan papa nanga mama musu frumane den pikin fu den so taki den kan kisi a denki fu Yehovah. Soleki fa wan buku e sori, dan dati wani taki dati papa nanga mama musu pruberi fu meki den pikin fu den kisi wan yoisti denki fu sani, den musu gi den trangaleri, èn den musu yepi den fu kisi wan bun banti nanga Gado (Theological Dictionary of the New Testament). Ma fa a de te wan yonguwan no wani teki a leri fu en papa nanga mama, fu di den speri fu en abi krakti na en tapu, iya, fu di a wani du san den speri fu en e du? Suma abi takru krakti tapu a yonguwan? En papa nanga mama, noso den speri fu en? Efu den speri fu en e dwengi en fu gebroiki drugs, fu dringi sopi pasa marki, noso fu tyari ensrefi na wan fasi di no fiti, dan sma musu krutu a papa nanga mama fu di den e pruberi fu kenki a denki fu a pikin fu den? Sma musu krutu den fu di den e pruberi fu yepi a pikin fu frustan sortu takru bakapisi a kan kisi te a e tyari ensrefi na so wan fasi?
8. San Timoteyus en mama nanga en granmama du fu ’overtoigi en, so taki a ben kan kisi tranga bribi’ na ini Gado?
8 Na apostel Paulus ben skrifi a yonkuman Timoteyus, taki: „Yu musu tan du den sani di yu leri èn di yu kon bribi fu di sma overtoigi yu, bika yu sabi fu suma yu leri den, èn yu ben sabi den santa buku kaba sensi di yu ben de wan beibi, èn den buku dati kan meki yu tron wan koni sma, so taki yu kan kisi frulusu fu di yu e bribi na ini Krestes Yesus” (2 Timoteyus 3:14, 15). Sensi di Timoteyus ben yongu, en mama nanga en granmama gi en leri fu den Santa Buku fu Bijbel, èn na so a kon kisi tranga bribi na ini Gado (Tori fu den Apostel 16:1; 2 Timoteyus 1:5). Bakaten, di den tron Kresten, den no dwengi Timoteyus fu poti bribi na ini Gado, ma den taki-go-taki-kon nanga en fu den sani di den ben sabi fu Bijbel, èn na so den ben man „overtoigi” en.
Yehovah e aksi yu fu teki wan bosroiti
9. (a) Sortu grani Yehovah gi wi di a meki wi, èn fu san ede a du dati? (b) Fa a wan-enkri gebore Manpikin fu Gado gebroiki a reti di a ben abi fu teki en eigi bosroiti?
9 Yehovah ben kan meki wi leki masyin di e du nomo san a wani, èn di no man teki den eigi bosroiti. Na presi fu dati, a gi wi a grani fu teki wi eigi bosroiti. A Gado fu wi, wani taki wi dini en fu di wisrefi wani du dati. A lobi fu si taki libisma, owruwan nanga yonguwan, e dini en fu di den lobi en. A moro moi eksempre fu wan sma di du a wani fu Gado fu di a lobi En, na di fu a wan-enkri gebore Manpikin fu Gado. Yehovah ben taki fu en: „Disi na mi Manpikin, a lobiwan di mi feni bun” (Mateyus 3:17). A fosi gebore Manpikin disi, ben taigi en Tata: „Mi prisiri fu du yu wani, o mi Gado, èn yu wet de na ini den inisei pisi fu mi.”—Psalm 40:8; Hebrewsma 10:9, 10.
10. San de fanowdu efu wi wani dini Yehovah na wan fasi di a feni bun?
10 Yehovah e fruwakti taki den wan di e dini en na ondro a tiri fu en Manpikin, musu de klariklari fu du a wani fu En, neleki fa en Manpikin ben de klariklari fu du dati. A psalm skrifiman ben taki a profeititori disi: „A pipel fu yu sa de klariklari fu gi densrefi tapu a dei te yu sa tyari yu srudati legre go na feti. Yu abi yu grupu yongu sma di moi densrefi nanga santafasi, èn den de neleki dowdropu fu musudei” (Psalm 110:3). Yehovah en heri organisâsi, namku a pisi di de na hemel èn a pisi di de na grontapu, e du Gado wani fu di ala den memre fu na organisâsi disi lobi Gado.
11. Sortu bosroiti yonguwan srefi musu teki te den abi Kresten papa nanga mama?
11 Sobun, yonguwan, un musu frustan taki un papa nanga mama, noso den Kresten owruman na ini a gemeente no o dwengi unu fu teki dopu. Yusrefi musu abi na angri fu dini Yehovah. Yosua fu owruten, ben taigi den Israelsma: „Dini [Yehovah] sondro fowtu èn ini waarheid . . . Bosroiti gi unsrefi suma unu sa dini” (Yosua 24:14-22). Na so a de tu taki yusrefi musu bosroiti efu yu o gi yusrefi abra na Yehovah, èn efu yu o du a wani fu en nanga un heri ati.
Teki yu frantwortu na yu tapu
12. (a) A tru taki papa nanga mama kan gi den pikin fu den leri, ma san den no kan du gi den pikin fu den? (b) O ten wan yonguwan sa musu gi frantwortu na Yehovah fu den bosroiti di a e teki?
12 A ten e kon te unu di yongu ete, no sa kisi kibri moro leki bakapisi fu a getrowfasi fu un papa nanga mama (1 Korentesma 7:14). A disipel Yakobus ben skrifi: „Efu wan sma sabi fa fu du bun, ma toku a no e du dati, dan na wan sondu a du” (Yakobus 4:17). Neleki fa pikin no kan dini Gado gi a papa nanga mama fu den, na so papa nanga mama no kan dini Gado gi den pikin fu den (Esekièl 18:20). Yonguwan, yu kon sabi sani fu Yehovah, èn den sani di a abi na prakseri fu du? Yu owru nofo fu frustan den sani di yu leri èn yu kon abi wan banti nanga en? A no de fu taki dati Gado e si yu leki sma di man teki a bosroiti fu dini en, a no so?
13. San yonguwan di no dopu ete musu aksi densrefi?
13 Yu na wan yonguwan di abi papa nanga mama di e anbegi Gado, èn yu no dopu ete? Yu e go na den Kresten konmakandra, èn yu e preiki a bun nyunsu fu a Kownukondre tu? We efu dati de so, dan aksi yusrefi nanga wan krin ati: ’Fu san ede mi e du disi? Mi e go na den konmakandra, èn mi e du a preikiwroko, soso fu di mi papa nanga mama e fruwakti dati fu mi, noso mi e du den sani disi fu di mi wani plisi Yehovah?’ Yu kon sabi „Gado en wani di bun, di e plisi en, èn di de volmaakti”?—Romesma 12:2.
Fu san ede yu e draidrai fu teki dopu?
14. Sortu Bijbel eksempre e sori taki wan sma no musu draidrai fu teki dopu?
14 „San e tapu mi fu dopu?” Na Etiopiaman di ben poti na aksi disi gi na evangelie preikiman Filipus, ben kon sabi syatu na fesi taki Yesus ben de a Mesias. Ma toku na Etiopiaman ben abi nofo sabi fu Bijbel fu frustan taki a no ben musu draidrai fu meki sma kon sabi taki na a momenti dati a bigin dini Yehovah leki wan memre fu a Kresten gemeente, èn a sani dati gi en furu prisiri (Tori fu den Apostel 8:26-39). Na so a ben de tu nanga wan uma di nen Lidia. Na uma disi ben opo en ati „so taki a ben kan poti prakseri na den sani di Paulus ben e taki”, èn wantewante en nanga en osofamiri „teki dopu” (Tori fu den Apostel 16:14, 15). Na so yu ben abi a strafuman tu na ini Filipi. A man disi ben e arki Paulus nanga Silas di den ben e ’fruteri en a wortu fu Yehovah’, èn „en nanga ala den sma fu en osofamiri teki dopu wantewante” (Tori fu den Apostel 16:25-34). Fu dati ede, efu yu sabi den moro prenspari sani fu Yehovah èn den sani di a abi na prakseri, efu yu wani dini en nanga yu heri ati, efu yu abi wan bun nen na ini a gemeente, èn efu yu e go na den konmakandra èn e preiki a bun nyunsu fu a Kownukondre doronomo, dan fu san ede yu e draidrai fu teki dopu?—Mateyus 28:19, 20.
15, 16. (a) Sortu fowtu denki kan meki taki son yonguwan e draidrai fu teki dopu? (b) Fa yonguwan kan kisi kibri te den gi densrefi abra na Yehovah èn e teki dopu?
15 A de so taki yu e draidrai fu teki a tumusi prenspari bosroiti disi fu di yu no wani tyari a frantwortu efu yu du wan sani di no fiti? Efu disi de so, dan hori a sani disi na prakseri: Yu ben o weigri fu leri rèi oto, soso fu di yu frede taki wan dei yu kan kisi mankeri? Kwetikweti! Na so yu no musu draidrai tu fu teki dopu te yu doro den markitiki. A no de fu taki dati, te yu gi yu libi abra na Yehovah èn te yu bosroiti fu du a wani fu en, dan yu sa du tranga muiti fu no du ogri (Filipisma 4:13). Yonguwan, no denki kwetikweti taki te yu e draidrai fu teki dopu, dan yu no abi fu gi frantwortu fu den sani di yu e du. Te yu owru nofo fu tyari frantwortu, yu sa musu gi frantwortu na Yehovah fu den sani di yu e du, awansi yu dopu noso efu yu no dopu.—Romesma 14:11, 12.
16 Furu Kotoigi na heri grontapu feni taki a bosroiti di den teki fu dopu di den ben yongu ete, yepi den. Teki leki eksempre wan Kotoigi di abi 23 yari, èn di e libi na West-Europa. A e fruteri taki a teki dopu di a ben abi 13 yari, èn dati yepi en fu luku bun taki „den lostu di yongusma abi”, no ben abi krakti na en tapu (2 Timoteyus 2:22). Yonguyongu kaba, a ben abi leki marki fu tron furuten preikiman. Tide na a dei, a breiti fu dini na wan fu den bijkantoro fu Yehovah Kotoigi. Ala den yonguwan di bosroiti fu dini Yehovah, sa kisi blesi bogobogo, èn yu kan kisi den blesi dati tu.
17. Na ini sortu afersi fu wi libi wi musu tan si krin san na „a wani fu Yehovah”?
17 Te wi gi wisrefi abra na Gado èn e teki dopu, dan wi e bigin wan nyun libi, fu di wi e hori a wani fu Yehovah na prakseri na ini ala san wi e du. Fu di wi gi wisrefi abra na Gado, meki wi musu „bai ten”. Fa wi e du dati? Wi no musu gebroiki wi ten moro gi soso sani, èn wi musu gebroiki a ten dati fu studeri Bijbel seryusu, fu go na den konmakandra doronomo, èn fu preiki ’a bun nyunsu fu a kownukondre’ so furu leki wi man (Efeisesma 5:15, 16, futuwortu; Mateyus 24:14). A gi di wi gi wisrefi abra na Yehovah èn a dini di wi wani dini en, sa abi bun krakti tapu ibri afersi fu wi libi. Iya, wi sa abi prisiriten na wan fasi di fiti, wi no sa nyan èn dringi pasa marki, èn wi no sa arki poku di no fiti. Fu san ede yu no e bosroiti fu abi prisiriten di sa gi yu prisiri fu têgo? Furu dusundusun koloku yongu Kotoigi sa taigi yu taki difrenti bun fasi de fu abi prisiriten, sondro taki yu e frigiti „a wani fu Yehovah”.—Efeisesma 5:17-19.
„Wi wani go nanga unu”
18. Sortu sani yonguwan musu aksi densrefi?
18 Fu 1513 b.G.T. te go miti a Pinksterfesa fu 33 G.T., Yehovah ben abi wan pipel na grontapu, èn a pipel disi ben orga. A ben teki a pipel disi fu anbegi en, èn fu de kotoigi fu en (Yesaya 43:12). Den yonguwan fu a pipel fu Israel ben gebore na ini a nâsi dati. Sensi a Pinksterfesa, Yehovah abi wan nyun „nâsi” na grontapu, namku na Israel na yeye fasi, di de ’wan pipel di musu tyari en nen’ (1 Petrus 2:9, 10; Tori fu den Apostel 15:14; Galasiasma 6:16). Na apostel Paulus ben taki dati Krestes krin ’wan pipel di ben o de spesrutu fu en, èn a pipel disi ben o de fayafaya fu du bun wroko’ (Titus 2:14). Un yonguwan, unsrefi kan taki suma na a pipel dati. Suma na ini a ten disi na „a regtfardiki nâsi, di e tan tyari ensrefi na wan getrow fasi”, di e libi akruderi Bijbel gronprakseri, di de getrow Kotoigi fu Yehovah, èn di e meki bekènti taki a Kownukondre fu en na a wan-enkri howpu gi libisma? (Yesaya 26:2-4) Luku fa den sma fu den kerki fu Krestenhèit nanga tra kerki e tyari densrefi, èn teki dati gersi nanga a fasi fa tru futuboi fu Gado musu tyari densrefi, soleki fa Bijbel e taki.
19. Sortu overtoigi milyunmilyun sma na heri grontapu kon kisi?
19 Milyunmilyun sma na heri grontapu, sosrefi furu yonguwan, kisi na overtoigi taki a salfu fikapisi fu Yehovah Kotoigi na a „regtfardiki nâsi” dati. Den sma disi e taigi den Israelsma na yeye fasi: „Wi wani go nanga unu, fu di wi yere taki Gado de nanga unu” (Sakaria 8:23). Fu tru, wi e howpu èn wi e begi taki un yonguwan sa bosroiti fu tron wan fu den sma fu a pipel fu Gado, èn na so fasi unu sa „teki a libi”, iya a têgo libi na ini a nyun grontapu fu Yehovah.—Deuteronomium 30:15-20; 2 Petrus 3:11-13.
Luku baka san wi leri
• San a wani taki fu frumane pikin, so taki den e kisi a denki fu Yehovah?
• Fa wi musu dini Yehovah, efu wi wani taki a feni wi bun?
• Sortu bosroiti yonguwan srefi musu teki te den abi Kresten papa nanga mama?
• Fu san ede wan sma no musu draidrai fu teki dopu?
[Aksi fu a tori disi]
[Prenki na tapu bladzijde 26]
Suma yu sa arki?
[Prenki na tapu bladzijde 28]
Fa yu kan kisi kibri te yu e gi yusrefi abra na Yehovah èn e teki dopu?
[Prenki na tapu bladzijde 29]
San e tapu yu fu teki dopu?