„Fu di Gado na wi tiriman, meki wi musu gi yesi na en na presi fu libisma”

’A Gado fu wi man frulusu wi’

NA TAPU na opo presi fu Dura, di ben de krosibei fu a foto Babilon kande, sma ben meki wan bun bigi popki fu gowtu. Den ben o hori wan spesrutu seremonia, pe den heiheiman fu a kondre ben musu saka kindi èn boigi gi a popki fu a fosi leisi. Den ben o musu du dati te den ben e yere a poku e prei. A seremonia dati ben musu de wan kefalek bigi seremonia. A kownu ben gi a komando taki iniwan sma di no ben e anbegi a popki ben musu dede na ini wan bun faya onfu. Suma ben o prefuru fu no gi yesi na a komando disi?

Den sma di ben de drape ben fruwondru fu si taki dri anbegiman fu Yehovah, namku Sadrak, Meisak, nanga Abedneikow, no ben e boigi gi a popki. Den yonkuman disi ben sabi taki te den ben o du dati, den no ben o de getrow na Yehovah Gado (Deuteronomium 5:8-10). Di Nebukadnesar komanderi den fu taki fu san ede den ben e weigri fu anbegi a popki, dan den taigi en sondro fu frede: „Efu a musu de so, dan a Gado fu wi di wi e dini, man frulusu wi. A sa frulusu wi fu a bun faya onfu èn fu yu anu, o kownu. Ma efu dati no pasa, dan yu musu sabi, o kownu, taki den gado fu yu a no den wan di wi e dini, èn wi no sa anbegi a gowtu popki di yu poti.”—Danièl 3:17, 18.

Di sma trowe den dri Hebrew yonkuman na ini a bun faya onfu, dan wan wondru wawan ben kan meki taki den no dede. Gado seni wan engel fu kibri den getrow futuboi fu En. Ma den ben teki a bosroiti kaba taki den no ben o trangayesi Yehovah, awansi den musu dede. * A bosroiti di den ben teki de a srefi leki a di fu den apostel fu Yesus Krestes. Moro leki siksi hondro yari baka di a sani disi pasa nanga den Hebrew yonkuman, den apostel fu Krestes ben taigi a Dyu hei krutubangi: „Fu di Gado na wi tiriman, meki wi musu gi yesi na en na presi fu libisma.”—Tori fu den Apostel 5:29.

Wi kan leri tumusi prenspari sani fu a tori disi

Sadrak, Meisak, nanga Abedneikow, na bun eksempre gi wi, fu di den ben abi bribi, den ben gi yesi na Yehovah, èn den ben de loyaal na en. Den dri Hebrew yonkuman disi ben sori taki den abi bribi na ini Yehovah. Fu di a konsensi fu den ben e wroko akruderi Bijbel gronprakseri, meki den no teki prati na iniwan sani di abi fu du nanga falsi anbegi, èn den no sori na nowan enkri fasi taki den lobi a kondre dati moro leki iniwan tra kondre. Na ini a ten disi, Kresten e frutrow tapu a tru Gado dorodoro tu. Fu di a konsensi fu den e wroko akruderi Bijbel gronprakseri, meki den e weigri fu teki prati na sani di abi fu du nanga falsi anbegi, noso na seremonia di no e kruderi nanga den wet nanga gronprakseri fu Gado.

Den dri getrow Hebrew yonkuman ben e frutrow tapu Yehovah, èn den ben abi a fasti bosroiti fu gi yesi na en, awansi sortu biginen, posisi, noso grani den sma fu a Gran Kownukondre Babilon ben wani gi den. Den yonkuman dati ben de klariklari fu nyan pina èn dede, na presi fu pori a banti di den ben abi nanga Gado. Neleki Moses di ben e libi bifo den, den ’tan tanapu kánkan leki den ben e si a Sma di wi no man si nanga ai’ (Hebrewsma 11:27). Awansi Yehovah ben bosroiti fu kibri den dri yonkuman, noso fu  gi pasi taki den dede, toku den ben abi a fasti bosroiti fu tan getrow na en, na presi fu suku wan fasi fu kibri den libi. Soleki fa a sori, dan na apostel Paulus ben abi den yonkuman disi na prakseri, di a taki dati ’faya no ben man du noti nanga den getrow-wan’ (Hebrewsma 11:34). Te den futuboi fu Yehovah na ini a ten disi e kisi tesi tapu a getrowfasi fu den, dan den e sori tu taki den abi bribi èn taki den e gi yesi na Yehovah.

Na ondrofenitori fu Sadrak, Meisak, nanga Abedneikow, e leri wi tu taki Gado e blesi den wan di de loyaal na en. A psalm singiman ben e singi: „Yehovah . . . no sa gowe libi den loyaalwan fu en” (Psalm 37:28). Na ini a ten disi, wi no kan fruwakti taki Gado o frulusu wi na wan wondru fasi, neleki fa a ben frulusu den dri Hebrew yonkuman. Ma wi kan de seiker taki awansi sortu tesi wi e kisi, a hemel Tata fu wi sa yepi wi. Gado kan puru a problema na pasi gi wi, a kan gi wi a krakti fu horidoro, noso a kan gi wi wan opobaka te wi e tan getrow na en te dede (Psalm 37:10, 11, 29; Yohanes 5:28, 29). Ibri leisi te wi e kisi tesi tapu a getrowfasi fu wi èn te wi e bosroiti fu gi yesi na Gado na presi fu libisma, dan wi kan sori taki wi abi bribi, taki wi e gi yesi na Yehovah, èn taki wi de loyaal na en.

[Futuwortu]

[Faki/​Prenki na tapu bladzijde 9]

YU BEN SABI DISI?

• Den dri Hebrew yonkuman ben pasa 25 yari di den kisi tesi tapu a getrowfasi fu den.

• Soleki fa a sori dan sma ben meki na onfu kon faya srefisrefi.—Danièl 3:19.