„Bigin fu tide, mi e bribi taki wan Gado de”

ALEXANDRA, na wan uma fu Ukraini, èn a e libi na ini a foto Praag, na ini a Tyekia Republiek. Wan dei di a ben komoto na wroko, a ben de na a presi pe den loko e stop. Drape a si fa sma di ben e waka pasa ben e skopuskopu wan pikin tas di ben de na gron, sondro taki den ben e poti prakseri na a tas disi. Di Alexandra teki a tas, a luku na inisei, èn a no ben man bribi san a ben e si. Wan bondru nanga moni ben de na ini a tas! A no ben gersi leki wan sma ben e suku a tas. Fu di Alexandra na wan trakondresma di kon libi na ini Tyekia Republiek, meki a musu wroko tranga fu feni a moni di a abi fanowdu. San a ben o du?

Di Alexandra doro na oso, dan a sori en umapikin Victoria a tas. Den luku na ini a tas efu den ben o feni wan nen noso wan adres fu a sma di abi a tas, ma den no feni noti. Ma den feni wan pisi papira pe wan tu nomru ben skrifi na tapu. Na a wán sei fu a papira a nomru fu wan bangi rekening ben skrifi na tapu, èn na a tra sei wan tu tra nomru ben skrifi. Na ini a tas den feni wan papira tu pe ben skrifi na tapu fa fu doro na wan bangi na ini a kontren drape, èn sosrefi wan tra papira pe „330.000 koruny” (dati na sowan 8000 euro) ben skrifi na tapu. Dati ben de soifri a moni di den ben feni na ini a tas.

Alexandra meki muiti fu bel a bangi nanga yepi fu wán fu den nomru di ben gersi wan telefon-nomru, ma a no kisi den sma fu a bangi. Fu dati ede, en nanga en umapikin go na a bangi èn den fruteri wán fu den sma di e wroko drape san ben pasa. Den aksi en efu a bangi rekening di den ben feni na ini a tas, ben de fu wán sma di ben poti en moni na a bangi dati. Ma nowan sma ben abi a bangi rekening dati. A tamara fu en, Alexandra go baka na a bangi nanga a tra nomru di a ben feni na ini a tas. Iya, a nomru dati ben de fu wan uma di ben abi wan bangi rekening drape. Alexandra nanga Victoria bel fu aksi na uma efu a lasi moni, èn na uma taigi taki dati de so. Di den miti na uma te fu kaba, dan na uma taigi den tangi nanga en heri ati, èn a aksi den: „Omeni mi musu pai unu fu a moni di unu tyari kon baka gi mi?”

Victoria piki en taki: „Yu no abi fu pai wi noti. Efu wi ben wani a moni dati, dan wi ben o hori en.” Victoria taigi na uma na ini brokobroko Tyekiatongo: „Wi e gi yu a moni baka, fu di wi na Yehovah Kotoigi. Fu di a konsensi fu wi e wroko akruderi Bijbel gronprakseri, meki wi no kan teki wan sani di no de fu wi” (Hebrewsma 13:18). Na uma ben breiti, èn a taki: „Bigin fu tide, mi e bribi taki wan Gado de.”