Na tapu wan ston fu owruten wan sani skrifi fu wan pipel di nen Israel

NA INI a Cairo Museum na ini Egepte, yu abi wan graniet-ston pe skrifi na tapu sortu feti Farao Merneptah ben wini. Soleki fa sabiman e denki, dan a di fu 13 manpikin disi fu Ramses II ben e tiri na ini a pisi ten fu 1212 b.G.T. te go miti 1202 b.G.T. Disi ben de a kaba pisi fu a pisi ten di den Krutuman ben e tiri na ini owruten Israel. Den lasti tu lin fu a ston disi e taki: „Wi teki ala sani tyari gowe fu Kanan. Wi wini Askelon, wi teki Geser abra, èn wi pori Yano’am dorodoro. Israel kon tron wan brokopresi, èn a no abi nowan bakapikin moro.”

San a wortu „Israel” wani taki dyaso? Na ini owruten, sma ben e gebroiki spesrutu skrifimarki fu sori san son wortu ben wani taki. Wan buku e taki: „Den skrifimarki di sma gebroiki fu taki fu Askelon, Geser, nanga Yanoam, e sori taki den wortu disi abi fu du nanga foto. . . . Ma a skrifimarki di sma gebroiki fu taki fu Israel, e sori taki a wortu dati abi fu du nanga wan pipel” (The Rise of Ancient Israel).—Na wi skrifi den wortu skoinsi.

San den sani di skrifi na tapu a ston wani taki? Hershel Shanks, di de wan skrifiman, e piki: „A ston pe a tori fu Merneptah skrifi na tapu, e sori taki na ini 1212 b.G.T. wan pipel ben de di nen Israel. A ston e sori tu taki a farao fu Egepte ben sabi a pipel disi, èn taki a ben de nomonomo fu meki bigi taki a ben wini a pipel disi.” William G. Dever, wan professor di e ondrosuku owruten sani fu a Mindri-Owstusei e taki: „A ston pe a tori fu Merneptah skrifi na tapu e sori wi krin taki: A de so trutru taki na ini Kanan wan pipel ben de di ben e kari densrefi ’Israel’, èn na fu dati ede meki den Egeptesma ben kari a pipel disi ’Israel’. Èn fu di a de so taki den Egeptesma no e bribi na ini Bijbel, dan den no ben o man meki bigi taki den ben wini so wan prenspari pipel leki ’Israel’, efu a pipel dati no ben de trutru.”

A fosi leisi di Bijbel e taki fu Israel, dan dati abi fu du nanga a nen di a famiri-edeman Yakob ben kisi. Sma kon sabi den bakapikin fu den 12 manpikin fu Yakob, leki „den manpikin fu Israel” (Genesis 32:22–28, 32; 35:9, 10). Furu yari baka dati, a profeiti Moses nanga Farao fu Egepte gebroiki a wortu „Israel” fu taki fu den bakapikin disi fu Yakob (Exodus 5:1, 2). A ston pe a tori fu Merneptah skrifi na tapu, na a moro owru sani di e taki fu wan pipel di nen Israel.

[Prenki na tapu bladzijde 24]

A ston pe a tori fu Merneptah skrifi na tapu

Den lasti dri skrifimarki, (fu a reti-anusei go na a kruktu-anusei) namku wan tiki, èn wan man nanga wan uma di e sidon, e sori taki Israel ben de wan pipel fu wan tra kondre

[Sma di abi a reti fu a prenki]

Egyptian National Museum, Cairo, Egypt/Giraudon/The Bridgeman Art Library