Poti prakseri na den bun sani fu Yehovah en organisâsi
Poti prakseri na den bun sani fu Yehovah en organisâsi
„Seiker wi sa de tevrede nanga den bun sani fu na oso fu yu.”—PSALM 65:4.
1, 2. (a) Sortu wini a pipel fu Gado ben o kisi fu a tempel èn fu a wroko di sma ben o du drape? (b) Fa David horibaka gi a bow-wroko fu a tempel?
DAVID, fu owruten Israel, na wan fu den sma na ini den Hebrew Buku fu Bijbel di e hari wi prakseri trutru. A man disi ben de wan skapuman, wan pokuman, wan profeiti, nanga wan kownu, èn a ben e frutrow tapu Yehovah Gado dorodoro. Fu di David ben abi so wan bun banti nanga Yehovah, meki a ben wani bow wan oso gi Gado. Bakaten, na oso, noso a tempel dati, tron a moro prenspari presi fu a tru anbegi na ini Israel. David ben sabi taki a tempel èn a wroko di sma ben o du drape ben o gi a pipel fu Gado prisiri, èn den ben o kisi blesi. Fu dati ede David ben singi: „Koloku fu a sma di yu [Yehovah] e frukisi èn di yu e meki kon krosibei na yu, so taki a kan tan na ini den fesidyari fu yu. Seiker wi sa de tevrede nanga den bun sani fu na oso fu yu, a santapresi fu a tempel fu yu.”—Psalm 65:4.
2 Yehovah no ben gi David primisi fu bow na oso fu En. Na presi fu dati, Salomo, a manpikin fu David, kisi a grani dati. David no ben e krutukrutu fu di wan tra sma ben kisi a grani di ensrefi ben e angri fu kisi. A sani di ben de moro prenspari gi David, na taki a tempel ben musu bow. A ben e horibaka gi a bow-wroko nanga en heri ati, èn fu dati ede a meki Salomo kon sabi fa na oso ben musu bow, akruderi a fasi fa Yehovah ben taigi en. Boiti dati, David seti dusundusun Leifisma na ini grupu fu du diniwroko, èn a gi bun furu gowtu nanga solfru, so taki a tempel ben kan bow.—1 Kroniki 17:1, 4, 11, 12; 23:3-6; 28:11, 12; 29:1-5.
3. Sortu denki den futuboi fu Gado abi te a abi fu du nanga den sani di seti fu a bun fu a tru anbegi?
3 Den getrow Israelsma ben e horibaka gi den sani di ben seti fu a bun fu a tru anbegi na ini na oso fu Gado. Wi leki disiten futuboi fu Yehovah, e horibaka tu gi den sani di seti fu a bun fu na anbegi fu Yehovah en organisâsi na grontapu. Na so fasi wi e sori taki wi abi a srefi denki leki David. Wi a no sma di lobi krutukrutu. Na presi fu dati wi e poti prakseri na den bun sani fu Gado en organisâsi. Yu prakseri den someni bun sani di e gi wi reide fu de nanga tangi trutru? Meki wi go luku wan tu fu den sani dati.
Wi de nanga tangi taki wi abi sma di e teki fesi
4, 5. (a) Sortu wroko „a getrow èn koni srafu” e du? (b) Fa son Kotoigi feni a yeye nyanyan di den e kisi?
4 Wi abi bun reide fu de nanga tangi gi den sani di wi kisi fu „a getrow èn koni srafu” di Yesus Krestes poti fu luku den sani fu en na grontapu. A srafu-grupu fu Kresten di salfu nanga santa yeye e teki fesi na ini a preikiwroko fu a bun nyunsu, den e seti sani fu hori konmakandra pe wi kan anbegi Gado, èn den e tyari Bijbel publikâsi kon na doro na ini moro leki 400 tongo. Milyunmilyun sma na heri grontapu e teki a yeye ’nyanyan disi na a reti ten’, èn den de nanga tangi gi dati (Mateyus 24:45-47). A no de fu taki dati wi no abi nowan reide fu krutukrutu fu a yeye nyanyan disi.
5 Furu yari langa Elfi, wan owru Kotoigi fu Yehovah, kisi trowstu nanga yepi, fu di a teki a Bijbel rai di de fu feni na ini den publikâsi di a srafu-grupu e tyari kon na doro. Fu di Elfi de nanga tangi trutru, meki a skrifi: „San mi ben o du sondro na organisâsi fu Yehovah?” Peter nanga Irmgard e dini Gado furu yari langa tu. Irmgard e taki dati a de nanga tangi gi ala den publikâsi di „Yehovah en organisâsi meki gi wi na wan lobi-ati fasi, fu sorgu taki sani e waka bun nanga wi”. Na organisâsi e meki publikâsi sosrefi gi sma di no man si èn di no man yere bun.
6, 7. (a) Fa sani seti fu tiri den gemeente na heri grontapu? (b) San sma ben taki fu a pisi fu Yehovah en organisâsi na grontapu?
6 A Tiri Skin fu Yehovah Kotoigi, di e teki presi gi a ’getrow srafu’, na wan pikin grupu fu mansma di salfu nanga santa yeye, èn di e dini na a edekantoro fu Yehovah Kotoigi na ini Brooklyn, New York. A Tiri Skin e poti lepi futuboi fu Yehovah fu dini na den bijkantoro di e tiri a wroko na ini moro leki 98.000 gemeente na heri grontapu. Mansma di doro den Bijbel markitiki e kisi a grani fu dini leki owruman nanga dinari ini a diniwroko na ini den gemeente dati (1 Timoteyus 3:1-9, 12, 13). Den owruman e teki fesi na ini a gemeente, èn den e luku den skapu fu Gado na wan lobi-ati fasi. A de wan blesi trutru, fu de na ini na ipi dati. Èn a de wan blesi tu fu firi taki lobi nanga wánfasi de na mindri „ala den brada”!—1 Petrus 2:17; 5:2, 3.
7 Furu sma no e krutukrutu fu a tiri di den e kisi fu den owruman, ma na presi fu dati den e sori taki den de nanga tangi gi a lobi-ati fasi fa den owruman e tiri den na yeye fasi. Luku na eksempre fu Birgit, wan Kresten wefi di pasa 30 yari. Di a ben de wan tini, a ben abi takru kompe, èn pikinmoro a sondu. Ma fu di den owruman sori en krin rai fu Bijbel, èn fu di tra brada nanga sisa horibaka gi en, meki a ben man komoto na ini wan situwâsi di ben o tyari takru bakapisi gi en. Fa Birgit e denki now? A e taki: „Mi de nanga tangi na ati taki mi de wan memre ete fu a tumusi moi organisâsi fu Yehovah.” Andreas, di abi 17 yari, e taki: „Disi na Yehovah en organisâsi trutru, iya, a moro bun organisâsi na heri grontapu.” Wi musu de nanga tangi gi den bun sani fu a pisi fu Yehovah en organisâsi na grontapu, a no so?
Den wan di e teki fesi no de volmaakti
8, 9. Fa son sma fu a ten fu David ben handri, èn san David du di dati pasa?
8 A no de fu taki dati den wan di poti na wroko fu teki fesi na ini a tru anbegi, no de volmaakti. Den alamala e meki fowtu, èn sonwan fu den e tan meki tranga muiti fu wini den swakifasi fu den. Wi musu broko wi ede nanga a sani disi? Nôno. Srefi den wan di ben abi bigi frantwortu na ini owruten Israel, ben meki seryusu fowtu. Fu eksempre, di David ben yongu ete, dan a ben musu go prei poku gi Kownu Saul di ben de nanga broko-ede, so taki a kownu disi ben kan firi korostu baka. Bakaten, Saul pruberi fu kiri David, èn te fu kaba David ben abi fu lowe.—1 Samuel 16:14-23; 18:10-12; 19:18; 20:32, 33; 22:1-5.
9 Tra Israelsma ben tori makandra. Fu eksempre, Yoab, a komandanti fu den srudati fu David, ben kiri Abner, wan famiriman fu Saul. Absalom ben span anu makandra nanga trawan fu teki a kownumakti abra fu en papa David. Èn Akitofel, a raiman di David ben e frutrow, tori David (2 Samuel 3:22-30; 15:1-17, 31; 16:15, 21). Ma David no krutukrutu, a no kisi bita-ati, èn a no drai baka gi a tru anbegi. Fu taki en leti David handri na wan heri tra fasi. Fu di David ben e kisi tesi, meki a tai hori na Yehovah, èn a tan abi wan bun denki fu sani, neleki fa a ben abi dati di a lowe gowe fu di Saul ben wani kiri en. Na a ten dati, David ben singi: „Sori bun-ati gi mi, o Gado, sori bun-ati gi mi, bika na yu mi sili go suku kibri, na ini a skaduw fu yu frei mi suku kibri teleki den problema pasa.”—Psalm 57:1.
10, 11. San wan Kresten di nen Gertrud ben ondrofeni di a ben yongu, èn san a ben taki fu den swakifasi fu en brada nanga sisa?
10 Na ini a ten disi, wi no abi reide fu krutukrutu taki sma e tori trawan na ini na organisâsi fu Gado. Yehovah, no e gi pasi kwetikweti taki ogri-ati bedrigiman de na ini a Kresten gemeente, èn den engel fu en nanga den skapuman na yeye fasi no e gi pasi tu taki dati pasa. Ma toku, wi alamala e kisi fu du nanga den swakifasi fu libisma, iya, nanga wi eigi swakifasi, èn di fu tra futuboi fu Gado.
11 Di Gertrud, wan uma di e anbegi Yehovah wan langa pisi ten kaba, ben yongu ete, dan sma taki dati a de wan bedrigiman èn taki a no de wan furuten preikiman fu a Kownukondre. San a sisa disi du? A bigin krutukrutu fu di sma ben e handri so nanga en? Nôno. Syatu bifo a dede na ini 2003, di a ben abi 91 yari, a ben e memre fa en libi waka, èn a taki: „Den sani disi di mi ondrofeni, èn sosrefi tra sani di mi ondrofeni bakaten leri mi taki aladi sma e meki fowtu, toku Yehovah e tiri a tumusi prenspari wroko fu en, èn a e gebroiki wi leki onvolmaakti libisma fu du a wroko dati.” Di Gertrud ben kisi fu du nanga den swakifasi fu tra futuboi fu Gado, dan a begi Yehovah nanga en heri ati.
12. (a) Sortu takru eksempre sonwan fu den fosi Kresten ben gi? (b) Na sortu sani wi musu tan poti prakseri?
12 Soleki fa wi si, dan den moro loyaal èn getrow Kresten no de volmaakti. Dati meki, te wan fu den futuboi di abi frantwortu na ini a gemeente e meki wan fowtu, dan wi musu tan du „ala sani sondro fu krutukrutu” (Filipisma 2:14). A ben o de wan sari sani efu wi ben o teki a takru eksempre fu wan tu fu den sma na ini a fosi Kresten gemeente! Soleki fa a disipel Yudas taki, falsi leriman fu a ten dati ’no ben abi lespeki gi den wan di kisi makti fu tiri, èn den ben e taki ogri fu den wan di kisi glori’. Boiti dati, den sma di ben e du den fowtu sani dati, ben de ’sma di ben gwenti krutukrutu èn di ben e kragi fu a fasi fa a libi fu den ben e waka’ (Yudas 8, 16). Meki a de so taki wi e weigri fu de leki den sma di ben e krutukrutu, èn meki wi tan poti prakseri na den tumusi bun sani di wi e kisi nanga yepi fu a ’getrow srafu’. Meki wi warderi den bun sani fu Yehovah en organisâsi, èn meki wi „tan du ala sani sondro fu krutukrutu”.
„A sani di a taki e gi groskin”
13. San son sma du di den yere sonwan fu den sani di Yesus Krestes ben e leri?
13 A tru taki sonwan fu den sma fu a fosi yarihondro ben e krutukrutu fu di den no ben agri nanga den futuboi di ben abi frantwortu, ma yu ben abi trawan tu di ben e krutukrutu fu di den no ben e agri nanga den leri fu Yesus. Soleki fa skrifi na ini Yohanes 6:48-69, dan Yesus ben taki: „A sma di e nyan mi skin èn di e dringi mi brudu o kisi têgo libi.” Di den disipel yere den wortu disi, dan „furu fu den . . . taki: ’A sani di a taki e gi groskin; suma kan tan arki den sani disi?’” Yesus ben sabi taki den ’disipel fu en ben e krutukrutu fu a sani disi’. Boiti dati, „na fu a sani disi ede, meki furu fu den disipel fu en gowe fu go du den sani baka di den ben libi èn den no ben wani waka moro nanga en”. Ma a no ala den disipel ben e krutukrutu. Luku san pasa di Yesus aksi den 12 apostel fu en: „Unu no wani gowe tu?” Na apostel Petrus ben piki: „Masra, na suma wi musu go? Yu abi wortu di e gi sma têgo libi; wi e bribi èn wi kon sabi taki yu na a Santawan fu Gado.”
14, 15. (a) Fu san ede wan tu sma no e agri nanga son sani fu a Kresten leri? (b) San wi kan leri fu a tori fu Emanuel?
14 Na ini a ten fu wi, yu abi wan tu sma nomo fu Gado en pipel di no e agri nanga son sani fu a Kresten leri. Den sma disi e krutukrutu fu di den no e agri nanga son sani fu Yehovah en organisâsi na grontapu. Fu san ede disi e pasa? Nofo tron den sma disi e krutukrutu fu di den no e frustan a fasi fa Gado e du sani. A Mekiman fu wi e meki a pipel fu en kon sabi a waarheid safrisafri. Dati meki, ten na ten a sa de fanowdu taki wi e kon frustan son sani fu Bijbel moro bun. A moro bigi pisi fu Yehovah en pipel e prisiri taki den e kon frustan den sani disi moro bun. Ma wan tu sma e kon de „tumusi regtfardiki”, èn den no e agri kwetikweti nanga den kenki di e kon (Preikiman 7:16). Kande dati e kon fu di den abi heimemre, èn sonwan fu den e fadon na ini wan trapu, fu di den abi den eigi denki fu sani. Awansi fa a no fa, te wi e krutukrutu fu den sani disi, dan dati sa tyari takru bakapisi kon gi wi, fu di a kan meki taki wi e tron wan grontapu sma baka, di e tyari ensrefi akruderi den denki fu grontapu.
15 Emanuel, fu eksempre, ben de wan Kotoigi di no ben e agri nanga wan tu sani di a ben leisi na ini den publikâsi fu „a getrow èn koni srafu” (Mateyus 24:45). A no leisi den Kresten publikâsi moro èn te fu kaba a taigi den owruman fu a gemeente fu en taki a no ben wani de wan Kotoigi fu Yehovah moro. Ma baka wan syatu pisi ten, Emanuel kon frustan taki tra fasi leki fa a ben denki, den leri fu Yehovah en organisâsi ben tru. A go na den Kotoigi, a taigi den taki a ben meki wan fowtu, èn a tron wan Kotoigi fu Yehovah baka. Leki bakapisi fu dati, a kon de koloku baka.
16. San kan yepi wi fu no tweifri moro na son sani fu a Kresten leri?
16 Ma san wi musu du te wi wani krutukrutu fu di wi e tweifri na son leri fu Yehovah en organisâsi? Te dati de so, dan wi musu abi pasensi. Kande a ’getrow srafu’ sa tyari wan sani kon na doro te fu kaba di e gi piki tapu den aksi di wi abi, so taki wi no e tweifri moro. A de wan koni sani fu suku yepi na den Kresten owruman (Yudas 22, 23). Te wi e begi, te wi e studeri, èn te wi abi demakandra nanga brada nanga sisa di e poti yeye afersi na a fosi presi, dan dati kan yepi wi tu fu no tweifri moro. Den sani dati kan meki tu taki wi e kisi moro warderi gi den tru tori fu Bijbel di wi kon sabi nanga yepi fu Yehovah en organisâsi, èn di e tranga a bribi fu wi.
Tan abi wan bun denki fu sani
17, 18. Na presi fu krutukrutu, sortu denki wi musu abi, èn fu san ede wi musu abi a denki dati?
17 A no de fu taki dati onvolmaakti libisma gebore nanga a firi fu sondu, èn kande son sma de gaw fu krutukrutu fu sani, aladi dati no de fanowdu (Genesis 8:21; Romesma 5:12). Ma efu wi ben o kisi a gwenti fu krutukrutu, dan a banti di wi abi nanga Yehovah Gado kan kon pori. Fu dati ede, te wi wani krutukrutu, dan wi musu dwengi wisrefi fu no du dati.
18 Na presi fu krutukrutu fu sani na ini a gemeente, wi musu tan abi wan bun denki fu sani èn wi musu libi na wan fasi di sa tyari wini kon gi wi. Na so fasi wi sa tan abi furu fu du, wi sa de nanga prisiri, wi sa tyari wisrefi na wan lespeki fasi, wi sa si sani na a yoisti fasi, èn wi sa abi wan tranga bribi (1 Korentesma 15:58; Titus 2:1-5). Yehovah e tiri ala sani na ini en organisâsi, èn Yesus Krestes sabi san e pasa na ini ibri gemeente, neleki fa a ben sabi dati na ini a fosi yarihondro (Openbaring 1:10, 11). Hori pasensi èn wakti tapu Gado nanga Krestes, na Ede fu a gemeente. Kande Gado sa gebroiki lepi skapuman fu tyari kenki kon te dati de fanowdu.—Psalm 43:5; Kolosesma 1:18; Titus 1:5.
19. Na sortu sani wi musu tan poti prakseri teleki a ten doro taki a Kownukondre sa tiri ala den afersi fu libisma?
19 Heri esi na ogri grontapu sistema sa kon na wan kaba, èn a Mesias Kownukondre sa tiri ala den afersi fu libisma. Teleki a ten dati doro, a de tumusi prenspari taki ibriwan fu wi e tan abi wan bun denki fu sani! Disi sa yepi wi fu si den bun fasi fu den brada nanga sisa fu wi, na presi fu tan poti prakseri na den fowtu di den e meki. Te wi e tan poti prakseri na den bun fasi fu den, dan wi sa de koloku. A sani dati sa gi wi deki-ati èn a sa tranga wi na yeye fasi, na presi taki wi e firi brokosaka fu di wi e krutukrutu.
20. Sortu blesi wi sa kisi te wi e tan abi wan bun denki fu sani?
20 Te wi abi wan bun denki fu sani, dan dati sa yepi wi tu fu memre den someni blesi di wi kisi fu di wi de wan memre fu na organisâsi fu Yehovah na grontapu. Disi na a wan-enkri organisâsi na grontapu di de loyaal na A Moro Heiwan fu hemel nanga grontapu. Fa yu feni a sani dati? Èn fa yu feni en taki yu abi a grani fu anbegi a wan-enkri tru Gado, Yehovah? Meki a de so taki yu abi a srefi denki leki David, di ben singi: „O Yereman fu begi, iya, na yu ala sortu sma sa kon. . . . Koloku fu a sma di yu e frukisi èn di yu e meki kon krosibei na yu, so taki a kan tan na ini den fesidyari fu yu. Seiker wi sa de tevrede nanga den bun sani fu na oso fu yu.”—Psalm 65:2, 4.
Yu e memre disi ete?
• Fu san ede wi musu de nanga tangi taki wi abi sma di e teki fesi na ini a gemeente?
• San wi musu du te brada di abi frantwortu e meki fowtu?
• Fa wi musu si en te Yehovah e meki wi frustan son sani fu Bijbel moro bun?
• San kan yepi wan Kresten fu no tweifri moro?
[Aksi fu a tori disi]
[Prenki na tapu bladzijde 20]
David sori Salomo fa fu bow a tempel, èn a horibaka gi a tru anbegi nanga en heri ati
[Prenki na tapu bladzijde 23]
Kresten owruman lobi fu yepi trawan na yeye fasi