WAN tumusi ogri sani ben pasa nanga libisma di Gado ben meki den na a bigin! Wán engel opo ensrefi teige a Sma di meki en, èn di abi a reti fu tiri en. Na engel disi kori a fosi uma, Eva, fu nyan a froktu di a no ben mag nyan. Na engel ben taigi Eva, nanga a masra fu en, Adam: „Unu no sa dede kwetikweti. Bika Gado sabi taki na a dei di unu o nyan fu den froktu, un ai o opo èn unu o de leki Gado. Unu o sabi san na bun èn san na ogri” (Genesis 2:16, 17; 3:1-5). Na engel di ben opo ensrefi teige Gado, kon kisi a nen Didibri nanga Satan.—Openbaring 12:9.

Eva ben poti prakseri na san Satan ben taki? Bijbel e fruteri wi: „Na uma kon si taki den froktu fu a bon ben bun fu nyan èn a ben lobi fu luku a bon, iya, a bon ben moi fu si. Ne a puru wan froktu fu a bon, dan a nyan fu en. Baka dati a gi en masra wan pisi tu di a ben de nanga en, èn a masra srefi nyan tu” (Genesis 3:6). Iya, a fosi trowpaar, Adam nanga Eva, opo densrefi teige Gado, neleki fa Satan ben du dati. Leki bakapisi fu dati, den nanga den bakapikin fu den no ben mag libi moro na ini a Paradijs. Pikin no ben o gebore leki volmaakti libisma, soleki fa dati ben musu pasa, èn den no ben o abi a howpu tu fu libi fu têgo. Na presi fu dati den ben o kisi sondu nanga dede fu den papa nanga mama.—Romesma 5:12.

San Yehovah Gado, A Moro Hei Tiriman fu hemel nanga grontapu, du? A bigin seti sani so taki libisma ben kan kisi pardon fu den sondu fu den (Romesma 5:8). Yehovah Gado seti sosrefi wan tirimakti fu tyari wan kenki kon na ini a takru situwâsi disi. Bijbel e kari a seti disi „a kownukondre fu Gado” (Lukas 21:31). Gado leki tiriman fu hemel nanga grontapu, seti a kownukondre disi fu di a ben o gebroiki en fu du wan spesrutu sani.

San a Kownukondre fu Gado o du? San na wan tu moi sani fu a Kownukondre disi, èn fa den sani dati e difrenti fu libisma tirimakti? O ten a Kownukondre disi ben o bigin tiri? Wi sa go luku den aksi disi na ini na artikel di e kon now.