Wi no musu de sma di e „krutukrutu”
Wi no musu de sma di e „krutukrutu”
„Tan du ala sani sondro fu krutukrutu.”—FILIPISMA 2:14.
1, 2. Sortu rai na apostel Paulus ben gi den Kresten na ini Filipi nanga Korente, èn fu san ede a ben gi den a rai dati?
NANGA yepi fu santa yeye, na apostel Paulus ben skrifi wan brifi gi a fosi yarihondro Kresten gemeente na ini Filipi. Na ini a brifi dati a prèise a gemeente gi furu sani. A prèise den brada nanga sisa fu en na ini a foto dati, fu di den ben lobi fu gi sani, èn fu di den ben de fayafaya. A taigi den tu taki den bun wroko fu den ben e gi en prisiri. Ma toku Paulus memre den fu „tan du ala sani sondro fu krutukrutu” (Filipisma 2:14). Fu san ede na apostel gi den a frumane disi?
2 Paulus ben sabi san kan pasa te sma e krutukrutu. Wan tu yari na fesi, a ben memre den sma na ini a gemeente Korente, taki bigi problema kan kon te sma e krutukrutu. Paulus ben sori taki di den Israelsma ben de na ini a sabana, dan den ben meki Yehovah atibron ibri tron baka. Fa den ben du dati? Den ben e angri fu du sani di no bun, den ben e anbegi kruktugado, den ben e du hurudu, den ben e tesi Yehovah, èn den ben e krutukrutu. Paulus ben gi den Korentesma a rai fu teki leri fu den eksempre dati. A ben skrifi: „Wi no musu de sma tu di e krutukrutu, soleki fa sonwan fu den ben e krutukrutu, bika disi ben meki taki na engel kiri den.”—1 Korentesma 10:6-11.
3. Fu san ede wi na ini a ten disi musu poti prakseri na a krutukrutu di sma e krutukrutu?
3 A de krin fu si taki wi leki disiten futuboi fu Yehovah, de leki den sma na ini a gemeente Filipi. Wi de fayafaya fu du bun wroko, èn wi lobi makandra (Yohanes 13:34, 35). Ma te wi e luku sortu ogri bakapisi a krutukrutu fu den fositen pipel fu Gado tyari kon, dan dati e sori wi krin fu san ede wi musu gi yesi na a rai disi: „Tan du ala sani sondro fu krutukrutu.” Meki wi go luku wan tu Bijbel eksempre fosi, fu sma di ben e krutukrutu. Baka dati, wi sa taki fu wan tu sani di wi na ini a ten disi kan du, fu sorgu taki wi no e kisi takru bakapisi fu di wi e krutukrutu.
Wan ogri-ati pipel e krutukrutu nanga Yehovah
4. Na sortu fasi den Israelsma ben e krutukrutu na ini a sabana?
4 Na ini Bijbel, a Hebrew wortu di vertaal leki ’krutukrutu, noso kragi’, abi fu du nanga den sani di ben e pasa na ini den 40 yari di den Israelsma ben de na ini a sabana. Ten na ten, den Israelsma no ben de tevrede nanga a situwâsi fu den, èn a sani dati meki taki den bigin krutukrutu. Fu eksempre, wan tu wiki nomo baka di den komoto na ini katibo na Egepte, „ala den manpikin fu Israel bigin krutu nanga Moses èn nanga Aron”. Den Israelsma ben e krutukrutu fu a nyanyan. Den ben e taki: „A ben o moro bun efu Yehovah ben kiri wi na ini a kondre Egepte di wi ben e sidon na den patu nanga meti, èn di wi ben e nyan brede teleki wi bere furu, bika unu tyari wi kon na ini a sabana fu meki a heri pipel dede fu angri.”—Exodus 16:1-3.
5. Di den Israelsma ben e krutukrutu, dan nanga suma den atibron trutru?
5 Fu taki en leti, Yehovah ben e gi den Israelsma san den ben abi fanowdu na ini a sabana, èn a ben e gi den nyanyan nanga watra na wan lobi-ati fasi. Noiti a ben kon so fara taki a pipel Israel ben o dede fu angri na ini a sabana. Ma fu di den no ben de tevrede, meki den taki dati a situwâsi fu den ben de moro ogri leki fa a ben de trutru, èn dati meki den bigin krutukrutu. A tru taki den ben e krutukrutu fu di den ben atibron nanga Moses èn nanga Aron, ma na ini Yehovah ai den ben e atibron nanga En. Moses taigi den Israelsma: ’Yehovah yere fa unu ben e krutu nanga en. Ma suma na wi? Unu no e krutu nanga wi, ma nanga Yehovah.’—Exodus 16:4-8.
6, 7. Fa a denki fu den Israelsma ben kon kenki, soleki fa Numeri 14:1-3 e sori?
6 Syatu baka dati den Israelsma bigin krutukrutu baka. Moses ben seni 12 man fu go luku a Pramisi Kondre. Di den drai kon baka, dan tin fu den man no taki bun fu a kondre. San ben de a bakapisi? „Ala den manpikin fu Israel bigin krutu Moses nanga Aron, èn a heri pipel bigin taigi den: ’A moro bun wi ben dede na ini a kondre Egepte, noso a moro bun wi ben dede na ini a gran sabana disi! Èn fu san ede Yehovah e tyari wi go na a kondre disi fu sma kiri wi nanga feti-owru? Sma sa teki den wefi nanga den pikinwan fu wi tyari gowe. A no ben o moro bun efu wi drai go baka na Egepte?’”—Numeri 14:1-3.
7 A no de fu taki dati den Israelsma ben kon kisi wan heri tra denki! Na a bigin, di Yehovah ben puru den na ini katibo na Egepte èn di A ben tyari den pasa a Redi Se, dan den ben de nanga so furu tangi taki den singi prèisesingi gi En (Exodus 15:1-21). Ma fu di a pipel fu Gado kisi fu du nanga wan tu fruferi sani na ini a sabana, èn fu di den ben e frede den Kanansma, meki den no ben de nanga tangi moro gi san Gado ben du gi den, ma den ben atibron. Na presi taki den ben e taigi Gado tangi fu di a ben meki den kon fri, den ben abi a fowtu denki taki na Gado ben e meki den pina. Sobun a krutukrutu di den ben e krutukrutu, ben de wan buweisi taki den no ben abi warderi gi den sani di Yehovah ben gi den. Fu dati ede a no e fruwondru wi taki Yehovah ben taki: „O langa a pipel o tan krutukrutu fu di den e atibron nanga mi?”—Numeri 14:27; 21:5.
Sma di ben e krutukrutu na ini a fosi yarihondro
8, 9. Taki fu wan tu eksempre na ini den Kresten Griki Buku fu Bijbel, di e sori fa sma ben e krutukrutu.
8 Den eksempre di wi luku, e sori fa grupu sma ben e krutukrutu meki trawan yere, fu di den no ben feni wan sani bun. Ma di Yesus Krestes ben de na ini Yerusalem gi a Wiwirikampu-fesi na ini 32 G.T., dan „furu fu den sma ben e taki fu en, ma den no ben taki tranga” (Yohanes 7:12, 13, 32). Den sma disi ben e syusyu, èn sonwan fu den ben e taki dati a de wan bun sma, trawan baka ben e taki a sani dati a no ben tru.
9 Na wan tra okasi, Yesus nanga den disipel fu en ben de na a oso fu Leifi, noso Mateyus, di ben e teki belasting moni gi lanti. „Den Fariseiman nanga den leriman fu Wet bigin krutu nanga den disipel fu en, taki: ’Fu san ede unu e nyan èn e dringi nanga den sma di abi a wroko fu teki belasting moni gi lanti èn nanga den sondari?’” (Lukas 5:27-30) Wan pisi ten baka dati, na ini Galilea, ’den Dyu bigin krutu nanga [Yesus], fu di a ben taki: „Mi na a brede di komoto fu hemel”’. Srefi wan tu fu den bakaman fu Yesus ben atibron taki Yesus ben taki so wan sani, èn den ben bigin krutu fu a sani disi.—Yohanes 6:41, 60, 61.
10, 11. Fu san ede den Dyu di ben e taki Grikitongo ben e krutukrutu, èn san den Kresten owruman kan leri fu a fasi fa den apostel handri di den yere a kragi?
10 Syatu baka a Pinksterfesa fu 33 G.T., sma ben e krutukrutu tu, ma dati ben abi bun bakapisi. Furu nyun disipel fu tra kondre ben e nyan bun fu a switifasi di den brada nanga sisa fu den na ini Yudea ben e sori den. Ma problema ben kon fu di den ben feni taki sani no ben e prati nanga reti. A tori e taki: „Den Dyu di ben e taki Grikitongo bigin krutu nanga den Dyu di ben e taki Hebrewtongo, fu di den uma fu den di lasi den masra na ini dede no ben e kisi a nyanyan di ben e prati ibri dei.”—Tori fu den Apostel 6:1.
11 Den sma disi di ben e krutukrutu, no ben de leki den Israelsma na ini a sabana. Den Dyu di ben e taki Grikitongo no ben e krutukrutu fu di den no ben de tevrede nanga den eigi situwâsi. Den ben wani sma fu kon sabi taki sonwan fu den uma di lasi den masra na ini dede no ben e kisi san den ben abi fanowdu. Boiti dati, den sma di ben e krutukrutu no ben e meki trobi, èn den no ben atibron nanga Yehovah. Den go kragi na den apostel, èn wantewante den apostel du wan sani fu lusu a problema disi, fu di den sma ben abi leti fu kragi. Dati trutru na wan bun eksempre di den apostel e gi Kresten owruman na ini a ten disi! Den skapuman disi e luku bun fu no ’tapu den yesi gi a kragi di a mofinawan e kragi’.—Odo 21:13; Tori fu den Apostel 6:2-6.
Wi sa kisi takru bakapisi te wi e krutukrutu
12, 13. (a) Sori nanga yepi fu wan agersitori san kan pasa te wan sma e krutukrutu. (b) Sortu sani kan meki taki wan sma e bigin krutukrutu?
12 Furu fu den Bijbel eksempre di wi luku e sori taki a krutukrutu fu a owruten pipel fu Gado tyari bun furu takru bakapisi kon. Fu dati ede wi musu prakseri bun sortu takru bakapisi wi na ini a ten disi kan kisi te wi e krutukrutu. Kande wan agersitori sa yepi wi fu frustan a sani disi moro bun. Furu isri sani kan kon frustu makriki. Te yu e si taki wan isri sani e bigin frustu, èn yu e libi en meki a frustu go moro fara, dan te fu kaba yu no sa man gebroiki en moro. Son leisi te yu e si taki sma no e gebroiki wan oto moro, dan dati no e kon fu di na oto no e drai bun, ma fu di a frustu so te taki wan sma kan kisi mankeri te a e rèi en. Fa na agersitori disi e fiti wan sma di lobi krutukrutu?
13 Neleki fa son isri sani kan frustu makriki, na so a sondu libisma kan kisi a gwenti makriki fu krutukrutu. Wi musu luku bun taki a sani disi no e pasa nanga wi. Alen, dow, nanga tra sani, kan meki taki wan isri sani e frustu moro esi. Na so wi kan bigin krutukrutu tu te wi e kisi gens. Te wi de nanga broko-ede, dan wan pikin sani di e fruferi wi, kan kon tron wan bigi sani gi wi. Fu di a situwâsi na ini den lasti dei fu a sistema disi e kon takru moro nanga moro, meki moro sani sa de di kan meki taki wi e krutukrutu (2 Timoteyus 3:1-5). Na so a kan pasa taki wan futuboi fu Yehovah e bigin krutukrutu fu di a e atibron nanga wan trawan. Kande na fu wan pikin sani ede, iya, kande a no man frudrage den swakifasi fu wan trawan, kande a e dyarusu fu di a trawan man du spesrutu sani, noso fu di a trawan abi spesrutu grani na ini a diniwroko.
14, 15. Fu san ede wi musu luku bun taki wi no e kisi a gwenti fu krutukrutu?
14 Awansi sortu sani e trobi wi, te wi de gaw fu krutukrutu fu den sani dati, dan wi no sa de koloku, èn wi kan kon tron wan sma di lobi krutukrutu. Iya, te wi abi a gwenti fu krutukrutu, dan safrisafri dati kan pori a yeye fasi fu wi, teleki Gado no sa feni wi bun moro. Di den Israelsma ben e krutukrutu fu a libi fu den na ini a sabana, dan den prefuru srefi fu krutu Yehovah (Exodus 16:8). Meki a sani disi no pasa nanga wi noiti!
15 Fu sorgu taki wan isri sani no e frustu dorodoro, sma kan ferfi en nanga wan spesrutu sortu ferfi, èn den no musu draidrai fu du wan sani na den presi di e bigin frustu kaba. Te wi e si taki wi lobi krutukrutu, dan wi no musu draidrai tu fu aksi Yehovah fu yepi wi, so taki a sani disi no e kon tron wan gwenti. Fa wi kan du dati?
Si sani soleki fa Yehovah e si den
16. Efu a de so taki wi abi a gwenti fu krutukrutu, dan fa wi kan tapu nanga a gwenti dati?
16 Te wi e krutukrutu, dan wi e poti prakseri na wisrefi nomo èn na den problema fu wi. A sani disi e meki taki wi e frigiti den furu blesi di wi kisi leki Kotoigi fu Yehovah. Efu a de so taki wi abi a gwenti fu krutukrutu èn wi wani tapu nanga a gwenti dati, dan den blesi disi na den moro prenspari sani di wi musu hori na prakseri. Fu eksempre, ibriwan fu wi abi a tumusi moi grani fu tyari a nen fu Yehovah (Yesaya 43:10). Wi kan kisi wan bun banti nanga en, èn wi kan taki nanga a „Yereman fu begi” o ten wi wani (Psalm 65:2; Yakobus 4:8). Wi abi wan trutru marki na ini wi libi, fu di wi e frustan suma na a moro hei tiriman fu hemel nanga grontapu, èn wi e hori na prakseri taki a de wan grani fu tan getrow na Gado (Odo 27:11). Wi kan teki prati doronomo na a Kownukondre preikiwroko (Mateyus 24:14). Fu di wi poti bribi na ini a frulusu-ofrandi fu Yesus Krestes, meki wi man abi wan krin konsensi (Yohanes 3:16). Disi na den blesi di wi e kisi, awansi sortu tesi e miti wi.
17. Fu san ede wi musu pruberi fu si sani soleki fa Yehovah e si den, srefi te wi abi leti fu kragi fu wan sani?
17 Meki wi pruberi fu no abi wi eigi denki fu sani, ma meki wi pruberi fu si sani soleki fa Yehovah e si den. „Meki mi kon sabi den pasi fu yu, o Yehovah; leri mi den pasi fu yu”, na so a psalm skrifiman David singi (Psalm 25:4). Efu wi abi leti fu kragi fu wan sani, dan a no de fu taki dati Yehovah sabi fu a sani dati. A ben kan tyari wan kenki kon na ini a situwâsi dati wantewante. Ma fu san ede A e gi pasi son leisi taki problema e tan? Kande a e du dati fu yepi wi fu kweki bun fasi. Iya, wi kan leri fu abi pasensi, fu horidoro, fu abi bribi, nanga langa pasensi.—Yakobus 1:2-4.
18, 19. Sori nanga yepi fu wan eksempre san kan de a bakapisi te wi no e krutukrutu te fruferi sani e miti wi.
18 Te wi no e krutukrutu te fruferi sani e miti wi, dan dati sa yepi wi fu tron moro bun sma, èn a fasi fa wi e tyari wisrefi kan naki na ati fu trawan. Na ini 2003, wan grupu Yehovah Kotoigi komoto na Doisrikondre nanga bus fu go na wan kongres na ini Hongaria. A man di ben e rèi a bus no ben de wan Kotoigi, èn fu taki en leti, a no ben wani de makandra nanga den Kotoigi tin dei langa. Ma di den doro na ini Hongaria, a man disi kon kisi wan heri tra denki fu Kotoigi. Fu san ede?
19 Di den ben de na pasi, dan wan tu fruferi sani pasa. Ma noiti den Kotoigi krutukrutu. A man di ben e rèi a bus ben taki dati noiti bifo a ben prisiri so fu rèi wan grupu sma, leki di a rèi a grupu disi! Fu taki en leti, a pramisi taki wan tra leisi te den Kotoigi ben o kon na en oso, dan a ben o kari den kon na inisei èn a ben o arki bun san den abi fu taki. A bun taki a grupu ben „tan du ala sani sondro fu krutukrutu”, fu di a sani dati naki na ati fu a man trutru!
Te wi e gi trawan pardon, dan dati e meki wi de na ini wánfasi
20. Fu san ede wi musu gi makandra pardon?
20 Ma san wi musu du te wi abi reide fu kragi fu wan brada noso wan sisa? Efu a de wan seryusu afersi, dan wi musu handri akruderi a gronprakseri di wi kan feni na ini den wortu di Yesus ben taki, soleki fa skrifi na ini Mateyus 18:15-17. Ma disi no sa de fanowdu ala ten, fu di nofo tron den sani di e meki wi krutu, na pikinpikin sani. A ben o bun te wi e si a situwâsi disi leki wan okasi fu gi trawan pardon, a no so? Paulus ben skrifi: „Tan frudrage makandra èn gi makandra pardon nanga un heri ati te wan sma feni taki wan trawan du en wan ogri. Soleki fa Yehovah e gi unu pardon nanga en heri ati, na so unu musu du tu. Ma boiti den sani disi, un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán” (Kolosesma 3:13, 14). Wi de klariklari fu gi trawan pardon? Yehovah abi reide fu kragi fu sani di wi du, a no so? Ma toku, ibri tron baka a e sori sari-ati gi wi èn a e gi wi pardon.
21. Sortu krakti a kan abi tapu trawan te den e arki fa wi e krutukrutu?
21 Awansi san trawan du nanga wi, wi no sa lusu a problema te wi e krutukrutu. A Hebrew wortu di wani taki „krutukrutu”, kan abi fu du sosrefi nanga „a kosi di wan sma e kosi”. A no de fu taki, dati wi sa feni en wan fruferi sani fu de makandra nanga wan sma di lobi krutukrutu, èn wi sa pruberi fu no bumui so furu nanga en. Kande den sma di e arki fa wi e krutukrutu noso fa wi e kosi, e firi fruferi tu te den de makandra nanga wi. Fu taki en leti, den kan firi so fruferi taki den no sa wani bemui moro nanga wi! Te wi e kosi, dan dati kan hari a prakseri fu trawan, ma a no sa meki taki trawan lobi wi.
22. San wan meisje ben taki fu Yehovah Kotoigi?
22 Te wi de klariklari fu gi trawan pardon, dan dati e meki wi de na ini wánfasi, èn a pipel fu Yehovah lobi fu de na ini wánfasi (Psalm 133:1-3). Na ini wan kondre na Europa, wan Lomsu meisje di ben abi 17 yari, ben skrifi wan brifi gi a bijkantoro fu Yehovah Kotoigi, fu fruteri den taki a abi lespeki gi den Kotoigi. A ben taki: „Disi na a wan-enkri organisâsi di mi sabi, pe pratifasi no de na mindri den memre. Iya, den sma disi lobi makandra, den no abi bigi-ai, den man frudrage makandra, den no e denki densrefi nomo, èn den de na ini wánfasi.”
23. Na sortu tori wi sa poti prakseri na ini na artikel di e kon?
23 Te wi leki anbegiman fu a tru Gado, Yehovah, de nanga tangi gi ala den blesi di wi e kisi na yeye fasi dan dati sa yepi wi fu de na ini wánfasi. Boiti dati, wi sa luku bun fu no krutukrutu te a abi fu du nanga den afersi fu trawan. A tra artikel di e kon, sa sori wi fa den fasi di Gado e leri wi fu abi, o yepi wi fu no krutukrutu te a abi fu du nanga a pisi fu Yehovah en organisasi na grontapu, bika a sani dati kan tyari moro takru bakapisi kon gi wi.
Yu kan memre disi ete?
• San a wani taki te wan sma e krutukrutu?
• Sortu agersitori yu kan gi fu sori san na den bakapisi te wan sma e krutukrutu?
• San kan yepi wi te wi wani tapu nanga a gwenti di wi abi fu krutukrutu?
• Te wi de klariklari fu gi pardon, dan fa dati kan yepi wi fu no krutukrutu?
[Aksi fu a tori disi]
[Prenki na tapu bladzijde 14]
Fu taki en leti, den Israelsma ben e krutu nanga Yehovah!
[Prenki na tapu bladzijde 17]
Yu e pruberi fu si sani soleki fa Yehovah e si den?
[Prenki na tapu bladzijde 18]
Te wi leki Kresten e gi trawan pardon dan dati e meki wi de na ini wánfasi