Abi frede gi Yehovah, so taki yu kan de koloku!
Abi frede gi Yehovah, so taki yu kan de koloku!
„Koloku fu a man di abi frede gi Yehovah.”—PSALM 112:1.
1, 2. Sortu wini wi kan kisi te wi abi frede gi Yehovah?
KOLOKU no de wan sani di e kon fu ensrefi. Fu man de koloku trutru, wan sma musu teki den yoisti bosroiti, a musu du san bun, èn a musu wai pasi gi san ogri. Yehovah, wi Mekiman, gi wi a Wortu fu en, Bijbel, fu leri wi fa wi kan abi a moro bun libi. Te wi e suku a tiri fu Yehovah èn te wi e teki a tiri dati tu, dan wi e sori taki wi abi frede gi Gado. Na so wi sa man de koloku trutru.—Psalm 23:1; Odo 14:26.
2 Na ini na artikel disi, wi sa luku wan tu eksempre fu Bijbel èn fu a ten disi. Den eksempre disi sa sori wi fa sma di abi frede gi Gado man kakafutu te den e kisi tesi fu du sani di no bun, èn fa den e kisi deki-ati fu du san bun. Wi sa si taki te wi abi frede gi Gado, dan wi sa sori berow fu den sondu di wi du, neleki fa Kownu David ben musu du dati, èn a sani dati sa meki wi de koloku. Wi sa si tu taki papa nanga mama kan leri den pikin fu den fu abi frede gi Gado, èn a sani dati de leki wan trutru warti gudu di den kan gi den pikin fu den. Iya, Gado Wortu e gi wi a dyaranti disi: „Koloku fu a man di abi frede gi Yehovah.”—Psalm 112:1.
Wi kan de koloku baka
3. Baka di David sondu, dan san yepi en fu kisi wan bun banti baka nanga Yehovah?
3 Soleki fa wi si na ini na artikel na fesi, dan na dri prenspari okasi David no ben sori taki a abi frede gi Gado, èn a bakapisi ben de taki a sondu. Ma a teki di a teki a trangaleri fu Yehovah, e sori taki aladi a ben du den sondu disi, toku a ben de wan sma di ben abi frede gi Gado. A lobi nanga a lespeki di a ben abi gi Gado, meki taki a teki frantwortu fu a sondu di a du, a kenki a pasi fu en, èn a du muiti fu kisi wan bun banti baka nanga Yehovah. Den sondu fu en ben abi takru bakapisi gi en nanga trawan, ma fu di David ben abi trutru berow, meki Yehovah tan yepi en èn a tan blesi en. A no de fu taki dati na ini a ten disi, na eksempre fu David kan gi deki-ati na Kresten di du seryusu sondu kande.
4. Fa a frede di wan sma abi gi Gado kan yepi a sma dati fu kon de koloku baka?
4 Luku a tori fu Sonja. * Aladi Sonja ben de na ini a furuten diniwroko, toku a go moksi nanga takru kompe. A bigin tyari ensrefi na wan fasi di no fiti wan Kresten, èn a sani disi meki taki den ben musu puru en fu a Kresten gemeente. Di Sonja kon frustan sortu fowtu a ben meki, a du ala san ben de fanowdu fu kisi wan bun banti baka nanga Yehovah. Baka wan pisi ten, a tron wan memre fu a gemeente baka. Aladi ala den sani disi ben miti Sonja, toku a ben tan abi a winsi fu dini Yehovah. Te fu kaba, a go na ini a furuten diniwroko baka. Bakaten, a trow nanga wan Kresten owruman di de wan bun eksempre, èn now a e prisiri fu dini makandra nanga en na ini a gemeente. Aladi Sonja e sari taki a ben gowe libi a Kresten gemeente wan pisi ten, toku a breiti taki a frede di a abi gi Gado, yepi en fu drai kon baka na En.
A moro bun fu nyan pina, leki fu du sondu
5, 6. Fa David meki taki Saul tan na libi, aladi okasi ben de fu kiri en, èn fu san ede David du dati?
5 A no de fu taki, dati a moro bun te a frede di wi abi gi Gado, e yepi wi fu no du sondu. Na disi ben pasa nanga David. Wan leisi di Saul nanga dri dusun srudati ben de na David baka, dan Saul go na ini wan bergi-olo, a srefi bergi-olo pe David nanga den man fu en ben e kibri. Den man fu David gi en deki-ati fu kiri Saul. Den ben feni taki na Yehovah ben e gi David na okasi disi fu kiri a moro bigi feanti fu en. David kroipi go na Saul, sondro fu meki a yere en, èn a koti wan pisi fu en dyakti puru. Fu di David ben abi frede gi Gado, meki srefi a pikin sani dati gi en konsensi fonfon. Den man fu David ben atibron fu a sani disi, ma den gowe di David taigi den: „Mi fu mi sei, no man denki taki mi ben sa du a sani disi nanga mi masra, a salfuwan fu Yehovah.” *.—1 Samuel 24:1-7.
6 Wan tra leisi, Saul nanga ala den man fu en ben seti kampu fu pasa a neti, èn ’Yehovah meki den fadon na ini wan dipi sribi’. David nanga Abisai, a deki-ati manpikin fu en sisa, sroipi go na a mindrisei pisi fu a kampu, èn den ben e tanapu leti na fesi Saul di ben e sribi. Abisai ben wani kiri Saul, ma David tapu Abisai fu no du dati, èn a aksi en: „Suma langa en anu fu du ogri nanga a salfuwan fu Yehovah, èn a sma dati tan sondro fowtu?”—1 Samuel 26:9, 12.
7. San tapu David fu no du sondu?
7 Fu san ede David no kiri Saul den tu leisi di a ben abi na okasi fu du dati? Fu di a ben abi moro frede gi Yehovah leki gi Saul. A frede di David ben abi gi Yehovah, meki taki a ben de klariklari fu nyan pina, na presi fu du sondu (Hebrewsma 11:25). David ben abi a fasti frutrow taki Yehovah ben e broko en ede nanga En pipel, èn taki Yehovah ben e broko en ede nanga en sosrefi. David ben sabi taki efu a ben o gi yesi na Gado, èn efu a ben o frutrow na en tapu, dan dati ben o meki a de koloku, èn a ben o kisi furu wini. Ma efu a no ben o gi yesi na Gado, dan Gado no ben o feni en bun (Psalm 65:4). David ben sabi tu taki Gado ben o meki a tron kownu soleki fa A ben pramisi dati, èn taki Gado ben o puru Saul na wan ten èn na wan fasi di Ensrefi ben feni bun.—1 Samuel 26:10.
Wi sa de koloku te wi abi frede gi Gado
8. San wi kan leri fu a fasi fa David tyari ensrefi di a ben e kisi tesi?
8 Leki Kresten, wi kan fruwakti taki sma sa spotu wi, taki den sa frufolgu wi, èn taki tra tesi sa miti wi (Mateyus 24:9; 2 Petrus 3:3). Son leisi, wi kan kisi problema srefi nanga Kresten brada nanga sisa. Ma wi sabi taki Yehovah e si ala sani, a e arki den begi fu wi, èn na a reti ten a sa meki sani kon bun baka na wan fasi di ensrefi feni bun (Romesma 12:17-21; Hebrewsma 4:16). Fu dati ede, wi no musu frede den gensman fu wi, ma na presi fu dati, wi musu abi frede gi Gado èn wi musu suku yepi na en. Neleki David, wi no e du ogri baka nanga den sma di e du wi ogri, èn wi no e poti regtfardiki gronprakseri na wan sei soso fu no nyan pina. Te wi abi a denki disi, dan wi sa de koloku te fu kaba. Fa so?
9. Gi wan eksempre di e sori taki sma di abi frede gi Gado kan de koloku, aladi sma e frufolgu en.
9 Wan brada di e dini bun langa kaba leki zendeling na ini Afrika, ben fruteri: „Mi e memre wan mama nanga en tini umapikin di ben weigri fu bai karta fu wan politiek partij. Fu di den tu sma disi na Kresten, meki den no ben e teki sei na ini politiek afersi. Wan grupu mansma fon a mama nanga en umapikin, èn den taigi den fu go na oso. Di den ben e waka go na oso, a mama pruberi fu trowstu en umapikin di ben e krei. A meisje no ben man frustan fu san ede den sma fon den. Den no ben e prisiri a pisi ten dati, ma a konsensi fu den ben krin. Bakaten, den ben breiti srefisrefi taki den gi yesi na Gado. Efu den ben bai den partij karta, dan den sma ben o prisiri srefisrefi. Den man ben o gi den batra nanga soft, èn den ben o dansi na den lontu a heri pasi go na oso. Ma a meisje nanga en mama ben sabi taki efu den ben bai den karta, dan den no ben o de koloku kwetikweti.” Fu di den ben abi frede gi Gado, meki den tan koloku.
10, 11. San ben de a bun bakapisi di wan uma sori taki a abi frede gi Gado?
10 Te wi abi frede gi Gado, dan wi no sa brokokindi te wi e kisi tesi di abi fu du nanga a santafasi fu a libi, èn a sani disi sa meki tu taki wi de koloku. Di Mary ben de nanga bere fu a di fu dri pikin fu en, dan a datra gi en a rai fu puru a bere. „Sani no sa waka bun nanga yu efu yu e kisi a pikin disi”, na so a datra ben taki. „A problema fu yu kan kon moro ogri wantronso, èn yu kan dede a srefi dei. Efu dati pasa, dan a beibi o dede tu. Awansi fa a no fa, mi no sabi efu a beibi o de gosontu.” Mary ben e studeri Bijbel nanga Yehovah Kotoigi, ma a no ben dopu ete. „Toku”, na so Mary e taki „mi ben bosroiti fu dini Yehovah, èn mi ben abi a fasti bosroiti fu tan gi yesi na en, awansi san pasa.”—Exodus 21:22, 23.
11 Na a ten di a ben de nanga bere, Mary tan studeri Bijbel, èn a tan sorgu gi en osofamiri. Te fu kaba, a beibi gebore. Mary e fruteri: „Mi ben abi pikinso moro problema fu kisi a pikin disi, leki di mi ben kisi den tu trawan, ma bigi problema no ben de.” Fu di Mary ben abi frede gi Gado, meki a ben kan tan abi wan bun konsensi, èn syatu baka dati a teki dopu. Di a beibi dati gro kon bigi, dan ensrefi leri tu fu abi frede gi Yehovah, èn now a manpikin disi e dini na wan fu den bijkantoro fu Yehovah Kotoigi.
’Suku krakti na Yehovah’
12. Fa David kisi krakti fu di a ben abi frede gi Gado?
12 A frede di David ben abi gi Yehovah no tapu en nomo fu no du ogri. A gi en deki-ati tu fu handri èn fu sori koni te a ben de na ini muilek situwâsi. Wán yari nanga fo mun langa, David nanga den man fu en ben e kibri gi Saul na ini Ziklag, wan boitipresi di ben de na ondro a tiri fu den Filistiasma (1 Samuel 27:5-7). Wan leisi di den mansma no ben de, dan den Amaleksma broko kon na ini a foto, den bron en plata, èn den tyari ala den wefi, den pikin, nanga den meti fu den gowe. Di David nanga den man fu en drai kon baka, dan den krei di den si san ben pasa. Den man fu David ben e sari na ini a bigin, ma a no langa baka dati, den kisi atibron, èn den ben wani ston David kiri. Aladi a sani disi gi David bigi broko-ede, toku a no bruya (Odo 24:10). Fu di a ben abi frede gi Yehovah, meki a suku yepi na en, èn a „go suku krakti na Yehovah”. Gado yepi David, èn na so en nanga den man fu en go teki ala den sani baka di den Amaleksma ben fufuru fu den.—1 Samuel 30:1-20.
13, 14. Fa wan Kresten ben man teki bun bosroiti fu di a ben abi frede gi Gado?
13 Na ini a ten disi, den futuboi fu Gado e kisi fu du nanga situwâsi tu pe den musu abi frutrow na ini Yehovah, èn pe den musu abi deki-ati fu handri. Teki fu eksempre, a tori fu Kristina. Di Kristina ben yongu ete, dan a ben e studeri Bijbel nanga Yehovah Kotoigi. Ma a ben wani tron wan sma di e prei piano na fesi ipi-ipi sma, èn sani ben e waka bun gi en. Fu di a ben e syen fu go na ini a preikiwroko, meki a ben frede fu teki den frantwortu di ben o kon na en tapu efu a ben o dopu. Di Kristina studeri Gado Wortu moro nanga moro, a bigin ondrofeni a krakti di a Wortu disi ben abi na en tapu. A ben e leri fu abi frede gi Yehovah, èn a kon si taki Yehovah e fruwakti fu den futuboi fu en taki den lobi en nanga den heri ati, den heri frustan, den heri sili, nanga den heri krakti (Markus 12:30). A sani disi meki taki a gi ensrefi abra na Yehovah, èn a teki dopu.
14 Kristina aksi Yehovah fu yepi en so taki a ben kan go na fesi na yeye fasi. Kristina e fruteri: „Mi ben sabi taki wan sma di e prei piano gi ipi-ipi sma, musu go fu a wan presi na trawan doronomo, èn a musu hori ensrefi na den kontrakti di a meki fu prei sowan 400 leisi wán yari. Fu dati ede mi bosroiti fu no tron wan pokuman, ma fu tron wan leriman, so taki mi ben kan abi moni fu sorgu misrefi èn so taki mi ben kan du a furuten diniwroko.” Na a ten dati, sani ben seti kaba taki Kristina ben o prei piano fu a fosi leisi na ini a moro pôpi presi pe sma ben e prei poku. „A fosi leisi di mi prei gi so furu sma ben de sosrefi a lasti leisi di mi du dati”, na so a e fruteri. Now, Kristina trow nanga wan Kresten owruman. En nanga en masra e dini now na wan fu den bijkantoro fu Yehovah Kotoigi. A breiti taki Yehovah gi en a krakti fu teki den yoisti bosroiti, èn a breiti tu taki a kan gebroiki en ten nanga en krakti fu dini Gado.
Wan tumusi warti gudu
15. San David ben wani gi den pikin fu en, èn fa a du dati?
15 „Kon, un manpikin, arki mi”, na so David ben skrifi. „Mi sa leri unu fu abi frede gi Yehovah” (Psalm 34:11). David ben de wan papa, èn a ben angri fu gi den pikin fu en wan tumusi warti gudu. Iya, a ben wani meki den kon abi trutru frede gi Yehovah, bika dati ben o tyari wini kon gi den, èn a ben o abi bun krakti tapu a libi fu den. Den sani di David ben e taki èn ben e du, meki taki den pikin fu en no kon si Yehovah leki wan takru Gado di e aksi tumusi furu fu sma. Den no kon si en tu leki wan Gado di de klariklari fu krutu sma ibri leisi te den ben pasa a wet fu en. Na presi fu dati, den pikin fu David kon si Yehovah leki wan lobi-ati Papa di e broko en ede nanga den pikin fu En na grontapu, èn di de klariklari fu gi den pardon. David ben poti na aksi disi: „Fowtu, suma kan sabi den alamala?” Baka dati, David taki moro fara: „No hori mi frantwortu gi sani di mi no si.” Nanga dati a ben e sori taki a ben sabi seiker taki Yehovah no e poti prakseri na ibri fowtu di wi e meki. David ben de seiker taki efu a ben e du ala san a man, dan a ben kan plisi Yehovah nanga den sani di a ben e taki èn ben e prakseri.—Psalm 19:12, 14.
16, 17. Fa papa nanga mama kan leri den pikin fu den fu abi frede gi Yehovah?
16 David de leki wan eksempre gi papa nanga mama na ini a ten disi. Ralf di e dini makandra nanga en pikin brada na wan bijkantoro fu Yehovah Kotoigi, e taki: „A fasi fa wi papa nanga mama kweki wi, meki taki wi ben prisiri fu de na ini a tru anbegi.” A e fruteri moro fara: „Di wi ben yongu, dan wi papa nanga mama ben e taki nanga wi tu fu den sani di den ben musu du na ini a gemeente, èn na so wi kisi a srefi faya di den abi gi a tru anbegi. Den kweki wi na so wan fasi taki wi kisi na overtoigi taki wi ben kan du bun sani na ini a diniwroko fu Yehovah. Fu taki en leti, wan tu yari langa wi osofamiri ben e tan na ini wan kondre pe bun furu Kownukondre preikiman ben de fanowdu, èn wi yepi fu seti nyun gemeente drape.
17 A sani di meki taki wi tan na tapu a yoisti pasi, a no fu di wi papa nanga mama ben poti wan lo wet gi wi, ma na fu di den ben e si Yehovah leki wan trutru sma di abi switifasi nanga bunfasi pasa marki. Den ben wani kon sabi Yehovah moro bun èn den ben wani plisi en. Wi leri furu fu den fu di den ben abi trutru frede nanga lobi gi Gado. Srefi te wi ben du wan sani di no bun, dan wi papa nanga mama no ben e gi wi a firi taki Yehovah no lobi wi moro. Den no ben e strafu wi nanga atibron. Nofo tron den ben e poti wi sidon èn den ben e taki nanga wi. Son leisi mi mama ben e krei te a ben e taki nanga wi, fu di a ben pruberi fu doro wi ati. Èn a ben abi bun bakapisi. Den sani di mi mama nanga mi papa ben e taki èn ben e du, meki wi kon si taki a de wan tumusi moi sani fu abi frede gi Yehovah. Wi kon si tu taki a no de wan hebi fu de wan Kotoigi fu Yehovah, ma taki a de wan prisiri.”—1 Yohanes 5:3.
18. San wi sa kisi te wi abi frede gi a tru Gado?
18 Wan tu fu „den lasti wortu fu David” na: „Te wan sma di e tiri libisma de regtfardiki, te a e tiri nanga frede gi Gado, dan dati de leki a mamanten leti, te a son e skèin” (2 Samuel 23:1, 3, 4). A ben de krin taki Salomo, David en manpikin di tron kownu baka David, ben e frustan a sani disi. Wi kan si dati, fu di a ben aksi Yehovah fu gi en „wan ati di e gi yesi”, èn sosrefi koni „fu man si krin san bun èn san ogri” (1 Kownu 3:9). Salomo ben frustan taki te wan sma abi frede gi Yehovah, dan a sma dati o handri nanga koni èn a o de koloku. Bakaten, a tyari a moro prenspari penti fu a buku Preikiman kon na krin nanga den wortu disi: „A bosroiti fu a tori, now di sma yere ala sani, na disi: abi frede gi a tru Gado, èn hori den komando fu en. Bika disi na a heri plekti fu libisma. Bika a tru Gado srefi sa krutu ibri sortu wroko di abi fu du nanga ibri sani di kibri, fu si efu a bun noso efu a takru” (Preikiman 12:13, 14). Te wi e gi yesi na a rai dati, dan trutru wi sa si taki „a bakapisi fu sakafasi nanga a frede di wi abi gi Yehovah”, no sa meki nomo taki wi sa abi koni èn taki wi sa de koloku, ma wi sa kisi „gudu nanga glori nanga libi” sosrefi.—Odo 22:4.
19. Fa wi kan kon frustan „san a wani taki fu abi frede gi Yehovah”?
19 Te wi e luku den eksempre na ini Bijbel, èn sosrefi den ondrofenitori fu a ten disi, dan wi e si taki te tru futuboi fu Yehovah abi frede gi Gado, dan dati abi wan bun krakti tapu a libi fu den. Te wi abi a frede dati, dan dati no sa tapu wi nomo fu du san wi hemel Tata no feni bun, ma a kan gi wi deki-ati sosrefi fu no frede den feanti fu wi, èn a kan gi wi a krakti fu horidoro te wi e kisi tesi nanga problema. Fu dati ede, yonguwan nanga owruwan, meki wi studeri Gado Wortu fayafaya, meki wi denki dipi fu den sani di wi e leri, èn meki wi kon krosibei na Yehovah fu di wi abi a gwenti fu begi en nanga wi heri ati. Te wi e du den sani disi, dan boiti taki wi sa feni „a sabi fu Gado srefi”, wi sa frustan tu „san a wani taki fu abi frede gi Yehovah”.—Odo 2:1-5.
[Futuwortu]
^ paragraaf 4 Wi kenki den nen.
^ paragraaf 5 Kande disi ben de wan fu den ondrofeni di meki taki David skrifi Psalm 57 nanga Psalm 142.
Yu kan tyari disi kon na krin?
Fa a frede di wi abi gi Gado kan
• yepi wi fu kon abi wan bun banti baka nanga Gado te wi du wan seryusu sondu?
• meki wi de koloku aladi wi e kisi tesi nanga frufolgu?
• gi wi deki-ati fu du a wani fu Gado?
• de leki wan tumusi warti gudu di wi e gi den pikin fu wi?
[Aksi fu a tori disi]
[Prenki na tapu bladzijde 26]
Fu di David ben abi frede gi Yehovah, meki a no kiri Kownu Saul
[Prenki na tapu bladzijde 29]
Wan tumusi warti gudu di papa nanga mama kan gi den pikin fu den, na fu abi frede gi Gado