Aksi fu leisiman

Fa wi du sabi taki den sani di Odo 8:22-31 e taki fu koni, abi fu du nanga Yesus Krestes bifo a ben tron wan libisma?

Na ini a buku Odo wi e leisi san a Bijbel skrifiman e taki fu koni: „Yehovah srefi ben meki mi. Mi ben de a fosi sani di a meki langa ten pasa. . . . Bifo a ben meki den bergi, bifo a ben meki den pikin bergi, a ben meki mi . . . Di a ben sreka den hemel, mi ben de drape; . . . ne mi ben tron leki wan tumusi bun wrokoman na en sei, èn mi ben tron a wan di a ben kon lobi moro nanga moro ibri dei. Te mi ben de nanga en, mi ben breiti ala ten, . . . èn san mi ben lobi trutru, ben de den manpikin fu libisma.”

A no kan taki a tekst disi e taki fu a koni fu Gado. A no e taki sosrefi fu a koni fu libisma. Fu san ede wi kan taki dati? Bika a koni di Bijbel e taki fu en dyaso, na wan sani di Yehovah meki bifo a meki ala tra sani. Yehovah Gado ben de ala ten. Sobun, a ben abi koni ala ten tu (Psalm 90:1, 2). A no sma gi en a koni. A koni fu en no meki soleki fa wan mama e meki wan pikin. Moro fara, Bijbel e agersi a koni disi nanga wan libisma di e taki èn e du sani.—Odo 8:1.

A Bijbel buku Odo e agersi koni nanga wan sma. A e taki dati bun langa pasa a sma disi ben de makandra nanga Yehovah, a Mekiman. A ben agersi en tu nanga „wan tumusi bun wrokoman”. A no de fu taki dati disi e sori go na Yesus. Langa ten bifo Yesus ben kon na grontapu, a ben wroko skinskin nanga Yehovah. Fu dati ede a Wortu fu Gado e taki: „A ben de fosi ala tra sani, èn ala tra sani ben kon de nanga yepi fu en.”—Kolosesma 1:17; Openbaring 3:14.

A fiti fu agersi a Manpikin fu Gado nanga koni, bika en na a Sma di tyari kon na krin san na den koni bosroiti fu Yehovah èn san A abi na prakseri fu du. Di Yesus ben libi na ini hemel bifo a tron wan libisma, dan a ben de a Wortu fu Gado, noso a Takiman fu Gado (Yohanes 1:1). Bijbel e taki fu en dati a de „a krakti nanga a koni fu Gado” (1 Korentesma 1:24, 30). Fu tru, disi na wan moi fasi fu agersi a Manpikin fu Gado. Fu di a ben lobi libisma trutru, meki a gi en libi leki wan lusu-paiman gi den!—Yohanes 3:16.

[Prenki na tapu bladzijde 31]

„Bifo a ben meki den bergi . . . a ben meki mi”