Sori taki yu koni, iya, abi frede gi Gado!

„A frede gi Yehovah na a bigin fu koni.”—ODO 9:10.

1. Fu san ede furu sma no man frustan san a wani taki fu abi frede gi Gado?

WAN ten ben de di sma ben e si en leki wan grani te trawan ben e taki dati wan sma abi frede gi Gado. Na ini a ten disi, furu sma feni taki frede gi Gado na wan sani fu fositen. Boiti dati, den no man frustan san dati wani taki. Kande den sma disi e aksi densrefi: ’Efu Gado na lobi, dan fu san ede mi musu abi frede gi en?’ Den sma disi feni taki a no bun te wan sma frede, fu di a firi dati kan meki srefi taki wan sma no abi deki-ati fu handri. Ma te wan sma abi trutru frede gi Gado, dan dati no abi fu du nomo nanga wan firi di wan sma abi. Soleki fa wi sa si, dan a tori disi abi fu du nanga moro sani.

2, 3. San a wani taki fu abi trutru frede gi Gado?

² Bijbel e sori taki te wan sma abi frede gi Gado, dan dati na wan bun sani (Yesaya 11:3). Wan sma di abi frede gi Gado, abi bigi warderi nanga dipi lespeki gi En, iya, a sma no wani du nowan enkri sani di Gado no feni bun (Psalm 115:11). Te wan sma abi frede gi Gado, dan a sa hori ensrefi soifri na den markitiki fu En. Boiti dati, a abi a tranga winsi fu gi yesi na den wet fu Gado di e sori san bun èn san ogri. Wan buku e taki dati wan sma di abi a frede disi, e sori taki „a e hori Gado na prakseri, èn disi e meki taki a e tyari ensrefi na wan koni fasi èn taki a e wai pasi gi iniwan sortu ogri”. Fu dati ede Gado Wortu e taigi wi: „A frede gi Yehovah na a bigin fu koni.”—Odo 9:10.

³ Iya, te wan sma abi frede gi Gado, dan dati sa abi krakti tapu en heri libi. Te wan sma abi frede gi Gado, dan a sa abi koni, prisiri, vrede, sani sa waka bun gi en, a sa abi wan langa libi, wan howpu, wan tranga bribi, nanga wan tranga overtoigi (Psalm 2:11; Odo 1:7; 10:27; 14:26; 22:4; 23:17, 18; Tori fu den Apostel 9:31). Frede gi Gado abi furu fu du nanga bribi èn nanga lobi. Fu taki en leti, a frede disi abi fu du nanga a banti di wi abi nanga Gado èn nanga trawan (Deuteronomium 10:12; Yob 6:14; Hebrewsma 11:7). Moro fara, wan sma di abi frede gi Gado, abi a fasti overtoigi taki en hemel Tata e broko en ede nanga en, èn taki a de klariklari fu gi en pardon fu den sondu fu en (Psalm 130:4). Na soso ogrisma musu beifi na fesi Gado. *—Hebrewsma 10:26-31.

Wi musu leri fu abi frede gi Yehovah

4. Fa wi kan ’leri fu abi frede gi Yehovah’?

⁴ Soleki fa wi si, dan a de tumusi prenspari fu abi frede gi Gado efu wi wani teki koni bosroiti èn efu wi wani kisi blesi fu Gado. Ma fa wi kan ’leri fu abi a yoisti frede gi Yehovah’? (Deuteronomium 17:19). Bijbel abi furu eksempre fu man nanga uma di ben abi frede gi Gado, èn den tori disi ben skrifi „fu leri wi wan sani” (Romesma 15:4). Fu man frustan moro bun san a wani taki trutru fu abi frede gi Gado, dan wi sa luku a libi fu wan fu den sma dati, namku Kownu David fu owruten Israel.

5. Fa a skapuman-wroko ben yepi David fu kon abi frede gi Yehovah?

⁵ Yehovah ben drai en baka gi Saul, a fosi kownu fu Israel, fu di a kownu disi ben frede a pipel, èn a no ben abi frede gi Gado (1 Samuel 15:24-26). Na a tra sei, a fasi fa David ben e tyari ensrefi na ini en aladei libi, èn a tranga banti di a ben abi nanga Yehovah, e sori taki a ben abi frede gi Yehovah trutru. Leki yongu boi, David ben gwenti fu de na ini den wei, pe a ben e sorgu den skapu fu en papa (1 Samuel 16:11). Nofo tron te David ben de na dorosei na neti fu du a wroko disi, dan a no de fu taki dati a sani disi yepi en fu kon abi frede gi  Yehovah. Aladi David ben kan si wan pikin pisi nomo fu a bun bigi hemel, toku a kon frustan wán sani bun: A kon frustan taki ala libisma musu lespeki Gado èn taki den musu lobi en. „Te mi e si yu hemel, den wroko fu yu finga, a mun nanga den stari di yu sreka”, na so David ben skrifi bakaten, „dan san na libisma di man dede, taki yu hori en na prakseri, èn libisma manpikin, taki yu e sorgu gi en?”—Psalm 8:3, 4.

6. Fa David ben e firi di a kon frustan o bigi Yehovah de?

⁶ A no de fu taki, dati a naki David en ati di a kon frustan o pikin a ben de te a ben e luku a bun bigi hemel di lai nanga stari. Di David kon sabi dati, dan a no kon frede, ma na presi fu dati, a prèise Yehovah, taki: „Den hemel e meki a glori fu Gado bekènti; èn a loktu e fruteri fu a wroko fu en anu” (Psalm 19:1). Fu di David ben abi so wan lespeki gi Yehovah, meki a kon moro krosibei na En. A sani disi meki taki David ben wani kon sabi den volmaakti wet fu Gado èn a ben wani hori ensrefi na den. Prakseri fa David ben e firi di a singi gi Yehovah: „Yu bigi èn yu e du wondru sani; yu na Gado, yu wawan. Leri mi, o Yehovah, fu den pasi fu yu. Mi sa waka na ini yu waarheid. Meki mi ati kon de wán fu man frede yu nen.”—Psalm 86:10, 11.

7. Fa a frede di David ben abi gi Gado, yepi en fu feti nanga Goliat?

⁷ Di den Filisteasma broko go na ini a kondre Israel, dan Goliat, a moro tranga fetiman fu den di ben langa sowan 3 meter, wisiwasi den Israelsma. Fu taki en leti, a ben taigi den: ’Seni wan man kon fu feti nanga mi! Efu a wini mi, dan wi sa dini unu’ (1 Samuel 17:4-10). Saul nanga a heri legre fu en ben e frede, ma David no ben e frede. A ben sabi taki na gi Yehovah a ben musu abi frede, èn taki a no ben musu frede nowan libisma, awansi o makti a sma dati ben de. „Mi e waka kon miti yu na ini a nen fu Yehovah fu den legre”, na so David taigi Goliat, „èn ala den sma disi di kon makandra sa sabi taki te Yehovah e frulusu sma, dan a no e du dati nanga feti-owru noso nanga lansri, bika a feti na fu Yehovah.” David kiri a langa bigi-skin man nanga yepi fu en slenger èn nanga wan-enkri ston, ma a no de fu taki dati Yehovah ben yepi en tu.—1 Samuel 17:45-47.

8. San wi kan leri fu sma na ini Bijbel di ben abi frede gi Gado?

⁸ Kande wi abi problema noso feanti di bigi neleki den wan di David ben abi. San wi kan du dan? A srefi sani di ben yepi David nanga tra getrow sma fu owruten, kan yepi wi tu, iya, wi musu abi frede gi Gado. Te wan sma abi frede gi Gado, dan a no sa frede libisma. Di den Israelsma ben e kisi kwinsi fu gensman, dan Nehemia, a getrow futuboi fu Gado, gi den a rai disi: „No frede den. Prakseri Yehovah, a Wan di bigi èn di e gi sma frede” (Nehemia 4:14). Fu di Yehovah ben e horibaka gi David, Nehemia, nanga tra getrow futuboi fu en, meki den sma disi ben man du a wroko di Yehovah ben gi den fu du. Wi kan du dati tu te wi abi frede gi Gado.

Wi musu abi frede gi Gado te problema e miti wi

9. Na ini sortu situwâsi David ben de di a sori taki a abi frede gi Gado?

⁹ Baka di David kiri Goliat, dan Yehovah meki a wini moro feti. Ma Saul ben dyarusu tapu David, èn a pruberi fu kiri en. A fosi leisi, a du dati sondro taki David ben fruwakti dati. Bakaten, Saul pruberi fu kiri en na wan triki fasi, èn te fu kaba a ben wani du dati nanga yepi fu wan legre. Aladi Yehovah ben gi David a dyaranti taki a ben o tron kownu, toku David ben musu lowe, a ben musu feti, èn a ben musu wakti furu yari langa teleki a ten doro taki Yehovah meki a tron kownu. Aladi ala den sani disi miti David, toku a sori taki a ben abi frede gi a tru Gado.—1 Samuel 18:9, 11, 17; 24:2.

10. Fa David ben sori taki a abi frede gi Gado na a ten di ogri ben kan miti en?

¹⁰ Wan leisi, David go suku kibri na Akis, a kownu fu a Filistijn foto Gat, a presi pe Goliat ben e tan (1 Samuel 21:10-15). Den futuboi fu a kownu krutu David fu di den ben feni taki a ben de wan feanti fu a pipel fu den. San David du na ini a situwâsi disi pe sma ben kan du en ogri? A begi Yehovah fayafaya (Psalm 56:1-4, 11-13). David ben musu du neleki a law, so taki sma no ben o du en ogri. Aladi a ben abi bun bakapisi di a du dati, toku a ben sabi taki trutru na Yehovah ben yepi en. David ben e suku yepi na Yehovah doronomo,  èn a ben e frutrow na en tapu nanga en heri ati tu. A sani dati e sori taki David ben abi frede gi Gado trutru.—Psalm 34:4-6, 9-11.

11. Te problema e miti wi, dan fa wi kan sori taki wi abi frede gi Gado, neleki fa David ben du dati?

¹¹ Neleki David, wi kan sori taki wi abi frede gi Gado, te wi e frutrow na ini a pramisi fu en di e taki dati a sa yepi wi nanga den problema fu wi. „Lolo yu pasi go na tapu Yehovah, èn frutrow na en tapu, èn ensrefi sa handri”, na so David ben taki (Psalm 37:5). Disi no wani taki dati wi musu libi den problema fu wi gi Yehovah meki a lusu den, sondro taki wisrefi e du muiti fu lusu den problema disi. David no ben begi Gado fu yepi en, aladi ensrefi no du noti. David gebroiki a krakti nanga a koni di a ben kisi fu Yehovah, èn a suku wan fasi fu lusu a problema. Toku, a ben sabi taki a no ben o man lusu a problema en wawan. Na so a musu de nanga wi tu. Te wi du ala san wi man du, dan wi musu libi a tori gi Yehovah. Fu taki en leti, nofo tron a de so taki a wan-enkri sani di wi man du, na fu frutrow tapu Yehovah. Na den momenti dati, iniwan fu wi sa abi fu sori taki wi abi frede gi Gado. Wi kan kisi trowstu fu den wortu di David ben taki na wan opregti fasi: „Yehovah abi wan tranga banti nanga den wan di e frede en, èn a e meki den kon sabi sosrefi a frubontu fu en.”—Psalm 25:14.

12. Fu san ede wi musu si den begi fu wi leki wan seryusu sani, èn sortu denki wi no musu abi noiti?

¹² Dati meki wi musu si den begi fu wi, èn sosrefi a banti di wi abi nanga Gado, leki wan seryusu sani. Te wi e begi Yehovah, dan wi musu „bribi taki a de trutru, èn taki a sa pai den sma di e suku en fayafaya” (Hebrewsma 11:6; Yakobus 1:5-8). Èn te a e yepi wi, dan wi musu ’sori taki wi de nanga tangi’, soleki fa na apostel Paulus ben taigi wi fu du (Kolosesma 3:15, 17). Wan salfu Kresten di abi ondrofeni ben taki: „Son sma e si Gado leki wan sortu futuboi na hemel. Te den abi wan sani fanowdu, dan den wani Gado fu lon kon wantewante fu yepi den. Èn te a yepi den kaba, dan a musu gowe.” Noiti wi musu abi a denki disi, bika dati ben o sori taki wi no abi frede gi Gado.

Te wi no abi frede gi Gado moro

13. O ten David no ben sori lespeki gi a Wet fu Gado?

¹³ Fu di David ben ondrofeni fa Yehovah yepi en di a ben de na ini banawtu, meki a kon abi moro frede gi Gado, èn a kisi moro frutrow na ini en (Psalm 31:22-24). Ma na dri prenspari okasi, David no ben sori taki a abi frede gi Gado, èn a sani dati tyari bun takru bakapisi kon gi en. A fosi okasi na di a ben seti sani fu tyari na ark fu  Yehovah en frubontu go na Yerusalem. Ma na presi fu meki den Leifisma tyari na Ark na tapu den skowru, soleki fa a Wet fu Gado ben taki, a meki den tyari en na tapu wan wagi. Di na Ark ben e suku fu fadon, dan Usa, di ben e waka na fesi a wagi, grabu na Ark hori. A dede leti drape, fu di a sani di a ben du ’ben sori taki a no ben abi lespeki gi Gado’. Iya, Usa ben du wan seryusu sondu, ma fu taki en leti, a man disi ben lasi en libi fu di David no ben sori nofo lespeki gi a Wet fu Gado. Te wi abi frede gi Gado, dan dati wani taki dati wi musu du sani soleki fa Gado wani.—2 Samuel 6:2-9; Numeri 4:15; 7:9.

14. San ben de a bakapisi di David teri den man fu Israel?

¹⁴ Bakaten, Satan gi David deki-ati fu teri den fetiman fu Israel (1 Kroniki 21:1). Di David du dati, dan a sori taki a no ben abi frede gi Gado, èn a sani dati meki taki 70.000 Israelsma dede. Aladi David sori Yehovah taki a ben abi berow, toku en nanga a pipel fu en ben musu pai wan hebi paiman.—2 Samuel 24:1-16.

15. Fa a du kon taki David du hurudu?

¹⁵ Ete wan okasi ben de pe David ben sori taki a no ben abi frede gi Gado. A sani dati meki taki a go du hurudu nanga Batseiba, a wefi fu Uria. David ben sabi taki a no ben bun fu du hurudu, noso fu abi tranga lostu srefi gi a wefi fu wan tra man (Exodus 20:14, 17). A problema bigin di David si fa Batseiba ben e wasi en skin. Efu a ben abi frede gi Gado, dan a ben o drai en fesi wantewante, èn a no ben o tan prakseri a sani di a si. Na presi fu dati, David ’tan luku’ na uma, teleki a tranga lostu fu en kon tranga moro a frede di a ben abi gi Gado (Mateyus 5:28; 2 Samuel 11:1-4). David ben frigiti taki Yehovah ben sabi ala sani di ben e pasa na ini en libi.—Psalm 139:1-7.

16. Sortu sani miti David leki bakapisi fu a sondu di a du?

¹⁶ Baka di David du hurudu nanga Batseiba, den kisi wan manpikin. Syatu baka dati, Yehovah seni en profeiti Natan fu go taigi David fu a sondu di a du. Di David kon frustan san a du, dan a kon abi frede gi Gado baka, èn a sori berow. A begi Yehovah fu no drai baka gi en èn fu no puru En santa  yeye na en tapu (Psalm 51:7, 11). Yehovah gi David pardon, èn aladi a sorgu taki David no kisi a hebi strafu di a ben musu kisi, toku a no kibri en gi ala den takru bakapisi fu a sondu di a du. David en manpikin dede, èn sensi a ten dati, soso sari nanga problema miti a famiri fu en. Dati ben de wan hebi paiman di a ben musu pai fu di a no ben sori taki a abi frede gi Gado!—2 Samuel 12:10-14; 13:10-14; 15:14.

17. Gi wan eksempre fu sori fa den sondu di wi e du kan meki tra sma sari.

¹⁷ Na ini a ten disi, seryusu problema kan miti wi te wi e tyari wisrefi na wan fasi di e sori taki wi no abi frede gi Gado, èn den problema disi kan tan wan heri pisi ten. Prakseri fa a ben hati wan yongu wefi di a kon sabi taki a Kresten masra fu en ben du hurudu di a masra ben e wroko na ini wan tra kondre. Fu di a no ben man bribi taki a sani disi miti en, meki a tapu en fesi nanga en anu, èn a bari krei. O langa a ben o teki fosi a kan frutrow èn lespeki en masra baka? Te sma abi trutru frede gi Gado, dan den sari sani disi no abi fu pasa.—1 Korentesma 6:18.

Frede gi Gado e tapu wi fu no du sondu

18. San Satan wani du, èn fa a e du dati?

¹⁸ Dei fu dei, Satan e meki taki den sma fu grontapu e tyari densrefi na wan moro takru fasi, èn a wani pori tru Kresten spesrutu. Fu dati ede a e suku fu abi krakti tapu wi ati èn tapu wi frustan, èn a e du dati nanga yepi fu den sani di wi e si èn e yere (Efeisesma 4:17-19). San yu o du te wantronso yu e si noso e yere sani di no fiti, noso te yu e kisi fu du nanga sma di no e tyari densrefi na wan fasi di fiti?

19. Fa a frede di wan Kresten abi gi Gado, ben yepi en fu pasa wan tesi?

¹⁹ Prakseri a tori fu André * di e tan na Europa. A man disi na wan Kresten owruman, wan papa, èn sosrefi wan datra. Te André ben e wroko fu neti teleki mamanten na ati-oso, dan den umasma di ben e wroko drape tu ben gwenti fu poti pikin pisi papira na en kunsu. Den ben e teken sani na tapu den papira disi fu sori taki den lobi en, èn den ben e skrifi aksi en fu abi seks demakandra nanga den. André weigri krinkrin fu du dati. Boiti dati, a go wroko na wan tra presi, so taki a no ben abi fu wroko nanga sma di ben e tyari densrefi na wan fasi di no fiti. A ben de wan koni sani taki André ben abi frede gi Gado, èn a sani dati tyari bun bakapisi kon gi en, bika tide na a dei André e wroko wan tu dei na ini a wiki na a bijkantoro fu Yehovah Kotoigi na ini a kondre fu en.

20, 21. (a) Fa a frede di wi abi gi Gado kan yepi wi fu no du sondu? (b) San wi sa go luku na ini na artikel di e kon?

²⁰ Te wan sma e tan prakseri sani di no bun, dan dati kan abi so wan krakti tapu a denki fu en, taki a no o abi trobi efu a prenspari banti di a abi nanga Yehovah e pori, solanga leki a e kisi a sani di a no abi reti na tapu (Yakobus 1:14, 15). Na a tra sei a de so, taki te wi abi frede gi Yehovah, dan wi sa tan fara fu sma, fu presi, fu sani di sma e du, èn fu prisiriten di kan meki taki wi e tyari wisrefi na wan fasi di no fiti. Iya, wi sa waka gowe srefi fu den sani dati (Odo 22:3). Awansi sortu syen wi e kisi leki bakapisi fu dati, noso awansi san wi e lasi, toku dati no hebi so leki te Gado no feni wi bun moro (Mateyus 5:29, 30). A no de fu taki, dati te wi abi frede gi Gado, dan noiti wi sa luku sani di no fiti, te wi sabi taki den sani dati no bun. Iya, wi no sa luku seksfelem nanga seksbuku. Na presi fu dati, wi sa ’drai wi ai gowe so taki den no e si sani di no warti noti’. Te wi e du dati, dan wi kan abi a frutrow taki Yehovah sa ’hori wi na libi’, èn taki a sa gi wi ala sani di wi abi fanowdu trutru.—Psalm 84:11; 119:37.

²¹ Iya, a de wan koni sani ala ten te wi e handri na wan fasi di e sori taki wi abi frede gi Gado. Boiti dati, wi sa de koloku trutru (Psalm 34:9). Disi sa kon na krin na ini na artikel di e kon.

[Futuwortu]

Yu kan tyari disi kon na krin?

• Sortu fasi wan Kresten sa sori te a abi frede gi Gado?

• Fa a frede di wi abi gi Gado e yepi wi fu no frede libisma?

• Fa wi kan sori taki wi e si a begi di wi e begi Gado leki wan seryusu sani?

• Fa a frede di wi abi gi Gado kan yepi wi fu no du sondu?

[Aksi fu a tori disi]

[Prenki na tapu bladzijde 23]

Di David ben e luku den sani di Yehovah meki, dan dati yepi en fu kon abi frede gi Gado

[Prenki na tapu bladzijde 24]

San yu sa du te wantronso yu de na ini wan situwâsi di de wan tesi gi yu?