Wan bosroko fu krabita wiwiri kan meki taki Gado feni wi bun?

KOWNU LODEWIJK IX fu Fransikondre ben weri wan fu den bosroko disi. Di Sir Thomas More ben e studeri fu tron wan afkati, dan a bosroko disi di a ben weri, yepi en fu tan na ai 19 noso 20 yuru langa ibri dei, èn a du dati wan tu mun langa. Iya, sma e taki dati Sir Thomas More ben weri a bosroko disi pikinmoro en heri libi langa. Di sma kiri Thomas Becket, a Gran Beskopu fu Canterbury, na ini a kathedraal fu Canterbury, dan sma no ben fruwakti fu si taki a ben e weri wan fu den bosroko disi na ondro en tra krosi. Fu san ede den fositen sma disi ben e weri na ondro-bosroko disi? Den ben du dati fu kisi skin-ati, bika na so fasi den ben wani basi den takru firi nanga den lostu fu den.

A bosroko disi ben de wan grofu krosi di ben meki fu krabita wiwiri. Sma ben weri a krosi disi leki ondro-bosroko na den skin, so taki a ben kan krasi den teleki a skin fu den ben e kon sorosoro. A sani disi ben gi den furu skin-ati. A bosroko disi ben e kisi loso makriki tu. Sma e taki dati Thomas Becket ben e weri na ondro-bosroko fu en makandra nanga wan langa ondro-bruku di ben meki fu a srefi sortu krosi, èn a ben e weri en teleki „a ben kon lai nanga loso”. Baka a di fu 16 yarihondro, dan na presi fu weri wan ondro-bosroko fu krabita wiwiri, son sma ben e weri wan ondro-bosroko di meki fu fini isri titei di abi isri maka, èn den maka disi ben e dyukudyuku a skin fu den. A bosroko disi ben gi sma moro skin-ati srefi.

Wán wortubuku e taki dati na ondro-bosroko di ben meki fu krabita wiwiri, èn sosrefi den tra sani di sma ben e du fu pina densrefi, ben de fu „basi den takru firi nanga den lostu fu a skin. Na so fasi wan sma ben o man libi moro leki fa Gado wani”. A no soso moniki ben e weri a krosi disi. Sosrefi tra kerkisma nanga sma di ben abi wan hei posisi, ben weri en tu. Srefi na ini a ten disi, son bribi e hori densrefi na a gwenti disi.

Ma a de so taki Gado e feni wan sma bun, fu di a sma weri so wan ondro-bosroko, noso fu di a e pina a skin fu en? Nôno, a no te wan sma e du den sortu sani disi, dan Gado e feni a sma bun. Fu taki en leti, na apostel Paulus ben de teige ’a pina di sma ben e pina den skin’ (Kolosesma 2:23). * Na presi fu dati, efu wan sma wani poti prakseri na sani di abi fu du nanga Gado èn efu a wani taki Gado musu feni en bun, dan a sma musu studeri En Wortu fayafaya, èn a musu du san a e leri.

[Futuwortu]

[Sma di abi a reit fu a prenki na tapu bladzijde 32]

Kownu Lodewijk IX, na tapusei: Fu a buku Great Men and Famous Women; Thomas Becket, na mindrisei: Fu a buku Ridpath’s History of the World (Vol. IV); Thomas More, na ondrosei: Fu a buku Heroes of the Reformation, 1904