A ben owru, ma a no ben firi leki a de na strafu

TE SMA kon owru, dan furu tron den no man komoto na oso fu di den siki, èn disi e meki taki den no abi demakandra nanga trawan na ini a libimakandra. Ma a no ben de so nanga Fernand Rivarol. A man disi di ben e libi na ini Genève, na ini Switserland, dede di a ben abi 95 yari. A ben e tan en wawan fu di en wefi dede, èn en umapikin di trow, ben e tan na ini en eigi oso. Aladi a ben de so nofo tron taki a no ben man komoto na oso, toku a no ben e firi leki a ben de na strafu. A ben gwenti sidon na wan tafra na ini a foroisi, èn a ben e bel sma fu taki nanga den fu Bijbel.

Furu sani ben pasa na ini a libi fu Fernand, èn wan pisi ten a ben de na strafu trutru. Fu san ede? Syatu baka di Fernand nanga en wefi tron Kotoigi fu Yehovah na ini 1939, a di fu Tu Grontapufeti bigin na ini Europa. Fernand ben tan hori ensrefi na a bosroiti di a ben teki akruderi Bijbel gronprakseri, fu no du nowan sma ogri. A sani disi meki taki a lasi en wroko èn a ben musu koti strafu wan tu leisi. Ala nanga ala a koti strafu feifi nanga afu yari langa, èn na a ten dati a no ben de makandra nanga en wefi nanga en yongu umapikin.

Di Fernand ben e memre a ten dati, dan a taki: „Furu sma ben feni taki mi gowe libi wan bunbun wroko, èn taki mi gowe libi mi famiri sondro fu sorgu gi den. Sma ben e wisiwasi mi èn den ben handri nanga mi neleki mi ben de wan ogriman. Ma toku, te mi e prakseri den muilek ten dati, mi e memre bun ete fa Yehovah ben e sorgu gi wi èn fa a ben e yepi wi. Furu yari pasa sensi a ten dati, ma te now ete mi abi a srefi tranga frutrow na ini Yehovah leki na ini en na a ten dati.”

Fu di Fernand ben abi so wan tranga bribi, meki a ben e bel trawan fu fruteri den fu a Bijbel howpu di a ben abi. Efu a ben abi wan bun takimakandra nanga wan sma, dan a ben e seni Bijbel publikâsi gi a sma dati. Bakaten, a ben e bel a sma dati baka fu yere efu a sma ben lobi a publikâsi. Son tron sma ben e seni wan brifi gi en fu taigi en taki den ben de nanga tangi, èn disi ben gi Fernand furu prisiri.

A ben kan pasa na ini a kontren pe yu e tan, taki wan sma leki Fernand e bel yu. Fu san ede yu no e arki san a abi fu taki fu a bribi fu en? Ala ten Yehovah Kotoigi e prisiri fu fruteri yu san den e bribi.