A wroko fu Yehovah Kotoigi e gro na tapu wan moi èilanti

TAPU a heri èilanti Taiwan, difrenti sortu bon nanga tra sortu nyanyan e gro. A sani disi e naki na ati fu den sma di e go drape. Den moi grun kloru fu den yongu aleisi prani e kenki kon tron geri te a ten doro fu koti na aleisi. Den sei-bergi lai nanga bigi busi. Tra fasi leki den foto di lai nanga sma, den bon nanga tra sani di e gro so moi na ini den gron èn na tapu den bergi e meki sma firi bun. Fu taki en leti, di a fosi sma fu west Europa ben kon na a èilanti disi, dan na den sani disi a si. Fu dati ede a gi na èilanti a nen Ilha Formosa, noso „Moi Èilanti”.

Iya, Taiwan na wan moi èilanti, ma a pikin fu di a langa 390 kilometer nomo, èn a moro bradi pisi na sowan 160 kilometer. Wan bigi pisi fu na èilanti lai nanga hei bergi. A bergi Yü Shan (Morrison-bergi) hei moro leki a Fuji-bergi na Yapan, noso a Cook-bergi na Nyun Zeeland. Lontu den bergi na a mindrisei pisi fu Taiwan, te go miti a sesyoro, yu abi smara opo presi pe bun furu sma e libi, èn nownowde dati na moro leki 22 milyun sma.

Wan tra sani e gro

Ma wan tra sani e gro tu na ini Taiwan, èn dati de fu si moro nanga moro. A sani dati na a wroko fu Yehovah Kotoigi. A de fu si na den yonguwan nanga den owruwan, di de fayafaya te den kon sabi a tru Gado, Yehovah. A no de fu taki dati a moi fu si fa moro nanga moro sma e wroko fayafaya fu yepi trawan fu kon sabi Yehovah, èn sosrefi den sani di a abi na prakseri.

Fu di a wroko e gro, meki Yehovah Kotoigi drape abi wan moro bigi bijkantoro fanowdu. Na ini december 1990, den Kotoigi bai wan pisi gron fu bow a bijkantoro dati. A fosi bijkantoro di ben de na ini Taipei, ben kon pikin tumusi fu man tiri a wroko fu den 1777 Kownukondre preikiman di ben de na ini Taiwan na a ten dati. Yonguwan nanga owruwan fu tra kondre èn fu na èilanti srefi, ben de klariklari fu du a wroko disi. Den wroko fayafaya wan tu  yari langa, èn na ini augustus 1994, den Kotoigi ben kan bigin gebroiki a moi nyun bijkantoro na ini Hsinwu. Na a ten dati, 2515 sma ben e preiki a bun nyunsu fu Gado Wortu, Bijbel. Now, pikinmoro tin yari baka dati, moro leki 5500 preikiman de, èn ibri mun sowan 1300 preikiman de na ini a furuten preikiwroko. Ma a moro moi sani di e hari wi prakseri, na den yonkuman nanga den yongu uma di de leki „dowdropu” fu musudei di e meki sma firi bun baka.—Psalm 110:3.

Moro nanga moro yonguwan e du diniwroko gi Yehovah

Furu fu den fayafaya preikiman fu a bun nyunsu, na yonguyongu sma. Sonwan fu den e go na lagiskoro. Fu eksempre, na ini wan foto na noordsei fu Taiwan, wan trowpaar ben kisi a kari fu a fosi leisi fu kon na a Theokrasia Diniwroko-skoro, pe Yehovah Kotoigi e leri fa den kan meki trawan kon sabi den tru tori fu Bijbel. A trowpaar ben fruwondru fu si fa wan pikin boi, di nen Weijun, ben e leisi Bijbel na tapu a podium, èn a boi ben e du dati moro bun leki furu bigisma. Di den ben de na den tra konmakandra bakaten, dan a naki den ati trutru fu si fa yosiyosi pikin e gi bun piki na den konmakandra. A trowpaar disi taki dati den yongu pikin ben e tyari densrefi na wan bun fasi na ini a Kownukondre zaal.

Fu san ede den yonguwan disi e poti ala den prakseri na Bijbel leri, aladi furu sma na ini a kondre dati abi a Buda bribi èn a Tao bribi? Disi de so, fu di den Kresten papa nanga mama fu den gebroiki Bijbel gronprakseri fu kon abi wan koloku osofamiri-libi, èn a moro prenspari sani gi den na a banti di den abi nanga Yehovah. A papa nanga mama fu Weijun e pruberi fu meki ala sma na ini na osofamiri nyan bun fu na osofamiri-studie èn fu a preikiwroko. Dati meki taki a brada nanga a sisa fu a pikin boi disi na dopu Kotoigi kaba. Di Weijun aksi fu teki prati na a preikiwroko no so langa pasa, dan en mama taki dati na ini a mun dati, a boi ben prati moro tijdschrift kaba leki san a heri osofamiri ben prati. A de krin fu si taki a lobi taki fu a waarheid, a lobi gi piki na den konmakandra, èn a lobi fruteri trawan san a leri.

Te den yonguwan kon moro bigi

San den yonguwan disi e du te den kon moro bigi? Furu fu den e tan sori taki den lobi Yehovah nanga a diniwroko trutru. Fu eksempre, Huiping na wan studenti. Wan dei, a leriman fu en ben taki dati memre fu wan kerki no e teki brudu, ma taki a no ben sabi suma na den sma dati. Baka a les dati, a yongu Kresten disi fruteri a leriman fu en taki den sma dati na Yehovah Kotoigi, èn a fruteri en tu fu san ede den no e teki brudu.

Wan tra leriman, namku wan umasma, sori a klas wan video di abi fu du nanga siki di sma kan kisi fu seks. A video ben poti prakseri na 1 Korentesma 6:9, ma na uma disi taki dati Bijbel no e krutu homo-sekslibi. Agen, Huiping ben man sori a skoromisi fa Gado e denki fu a tori disi.

Di Shuxia, wan skoromati fu Huiping, ben e skrifi wan pisi tori di ben abi fu du nanga den ogri di e pasa na ini na osofamiri, dan Huiping gi en na Ontwaakt! fu 8 november 2001, di nen „Hulp voor mishandelde vrouwen” (Yepi gi den umasma di trawan e meshandri). Huiping fruteri en taki a tijdschrift e sori krin san Bijbel e taki fu a tori disi. Baka wan pisi ten, Shuxia tron wan preikiman di no dopu ete. Now, en nanga Huiping, e preiki a bun nyunsu gi tra sma.

Furu Kresten di de na skoro, feni taki a no makriki te trawan sabi taki den e libi akruderi Bijbel gronprakseri. Disi de so spesrutu na ini pikin foto na den boitipresi. Den speri fu Zhihao ben muilek en fu di a ben abi wan tra bribi èn fu di a ben e preiki a bun nyunsu. A e taki: „A sani disi ben fruferi so te, taki mi ben e frede fu miti den skoromati fu mi na ini a preikiwroko. Son leisi, na tin fu den ben e bari sani gi mi!” Wan dei, a skoromeester taigi Zhihao fu hori wan taki gi a klas, èn a taki disi ben  musu abi fu du nanga a bribi fu en. „Mi bosroiti fu bigin a taki fu mi nanga Genesis kapitel 1 èn baka dati mi taki fu aksi soleki: Suma meki grontapu nanga ala den sani na tapu? Fa a du kon taki libisma de? Di mi bigin leisi fu Bijbel, dan sonwan fu den pikin bigin lafu mi, èn den taki dati mi abi kruktubribi. Ma toku mi taki go doro teleki mi kaba nanga a taki fu mi. Baka dati, mi kisi na okasi fu taki fu a wroko èn fu a bribi fu wi, nanga wan tu fu den pikin na ini mi klas. Now, te den e si mi na ini a preikiwroko, den no e lafu mi moro!”

Zhihao e taki moro fara: „Fu di mi papa nanga mama na Kotoigi, meki wi e taki fu a deitekst ibri mamanten. Wi e studeri Bijbel tu, èn wi e go na den konmakandra doronomo. Den sani disi e yepi mi fu kakafutu gi iniwan sma di sa suku fu spotu mi ete te mi e pruberi fu fruteri trawan den tru tori fu Bijbel di e gi sma trowstu.”

Tingmei, na wan studenti na wan technisch skoro. Wan leisi wan tu skoromati fu en kari en fu go koiri nanga den, makandra nanga wan tu boi fu wan tra skoro. Tingmei, ben frustan taki efu a ben o go nanga den, dan dati ben kan meki taki a tyari ensrefi na wan fasi di no fiti. Fu dati ede a bosroiti fu no go. Aladi a ben taki nanga den skoromati fu en fu den moi sani di skrifi na ini a buku Wat jonge mensen vragen— Praktische antwoorden, toku den kari en wan tu leisi fu go koiri nanga den. * Den meisje spotu en, èn den taigi en taki a e du leki wan granmama. Ma heri esi a kon na krin taki a de wan koni sani fu libi akruderi Bijbel gronprakseri, fu di wan fu den meisje kon de nanga bere, èn puru a bere. Tingmei e taki: „Fu di mi du san Yehovah e taki, meki mi abi wan krin konsensi. Leki bakapisi fu dati, mi abi wan korostu firi, èn mi e prisiri trutru.”

Den no e meki noti tapu den fu gro na yeye fasi

Wan fu den bun mati fu Tingmei, na Ruiwen. Di Ruiwen ben moro yongu, a ben si en leki wan hebi fu go na den Kresten konmakandra ala ten, èn fu teki prati na a preikiwroko. Ma di a kon si taki den sma na ini a gemeente lobi en trutru, èn taki den skoromati fu en ben e du neleki den ben de en trutru mati, dan dati overtoigi en taki a ben musu tyari wan tu kenki kon na ini en libi. Ruiwen bigin preiki gi den skoromati fu en, èn heri esi a kon frustan moro krin san a musu du. Ruiwen go na ini a yepi-pionierwroko, èn a ben e preiki moro leki 50 yuru na ini wan mun. Baka dati a go dini leki gewoon pionier, èn a e  preiki moro leki 70 yuru na ini wan mun. Ruiwen e taki: „Mi de Yehovah tangi trutru. Noiti a libi mi. Aladi mi du sani di a no ben feni bun, toku a tan lobi mi. Neleki Yehovah, mi mama nanga tra sma na ini a gemeente ben sori mi tu taki den lobi mi. Now mi abi feifi bijbelstudie, èn mi feni taki mi e du a moro bun wroko di de.”

Tu yongu Kotoigi fu wan middelbaar skoro di de na wan boiti presi, ben musu teki prati gi a skoro fu den na wan streidansi di ben o hori na mindri difrenti skoro. Den ben o musu dansi kulturu dansi. Di den yongu Kotoigi kon sabi fu san ede a strei ben o hori, dan den feni taki den no ben kan teki prati na a strei disi, fu di dati ben o trobi a konsensi fu den di e wroko akruderi Bijbel gronprakseri. Den pruberi fu sori den leriman fu san ede den no ben kan teki prati na a strei èn den aksi den fu puru den na ini a strei, ma den leriman no ben wani. Na presi fu dati, den leriman taigi den taki a skoro ben bosroiti taki na den ben musu go teki prati na ini a strei, èn fu dati ede den ben musu fu go. Den yongu Kotoigi no ben wani brokokindi gi a tesi disi, sobun den go tapu Internet, èn den seni wan brifi go gi a kantoro fu skoro afersi. Na ini a brifi den skrifi sortu problema den ben abi. Aladi den yongu Kotoigi disi no kisi piki baka, toku syatu baka dati a skoro kisi wan brifi di ben sori taki den leriman no musu dwengi nowan sma fu teki prati na so wan strei. Den tu yonguwan disi ben breiti srefisrefi taki a leri di den kisi fu Bijbel ben abi krakti tapu a konsensi fu den, èn a sani dati gi den deki-ati tu fu du san bun!

Srefi den wan di siki lobi fu fruteri trawan fu a howpu di Bijbel e gi. Minyu, lan sensi di a gebore. Fu di a no man gebroiki en anu, meki a e drai den bladzijde fu Bijbel nanga en tongo, èn na so fasi a e feni den tekst di a wani leisi. Te a musu hori lezing tapu a Theokrasia Diniwroko-skoro di e hori na ini a Kownukondre zaal, dan a e didon na tapu wan lagi bangi. A sisa di musu de na ososma e sidon na tapu wan lagi sturu, èn a e hori a mikrofon gi en. A e naki sma ati trutru fu si omeni muiti Minyu e meki fu hori den lezing disi!

Di Minyu ben wani tron wan Kownukondre preikiman, dan wan tu sisa na ini a gemeente leri fa fu gi kotoigi nanga yepi fu telefon, so taki den ben kan yepi en. Minyu e druk den telefon-nomru nanga en tongo, èn den sisa e yepi en fu skrifi suma a bel èn fu sortu sani a taki nanga a sma. Minyu lobi a diniwroko so te taki a go dini leki yepipionier. Ibri mun a e preiki sowan 50 te go miti 60 yuru fu Gado Kownukondre, èn a e du dati nanga yepi fu telefon. Sonwan fu den sma dati wani Bijbel publikâsi, èn den wani taki a bel den baka. Now a e studeri Bijbel nanga dri sma di a ben bel.

Iya, a no de fu taki dati den yonkuman nanga den yongu uma na ini den 78 gemeente fu Yehovah Kotoigi na ini Taiwan de leki dowdropu di e meki sma firi bun. Dati de so fu di den de klariklari èn fayafaya fu tyari a Kownukondre bun nyunsu di e hori sma na libi, gi den milyunmilyun sma na tapu a pikin èilanti disi. Wan Bijbel profeititori e taki: „A pipel fu yu sa de klariklari fu gi densrefi tapu a dei te yu sa tyari yu srudati legre go na feti. Yu abi yu grupu yongu sma di moi densrefi nanga santafasi, èn di de neleki dowdropu fu musudei” (Psalm 110:3). Den sani di e pasa na ini Taiwan, na wan pikin pisi nomo fu a kontru fu a profeititori disi. Den owruwan di e preiki e kisi deki-ati trutru fu den yongusma disi, èn san moro moi, na taki den yongusma e gi den hemel Tata, Yehovah Gado, prisiri trutru!—Odo 27:11.

[Futuwortu]

[Faki/Prenki na tapu bladzijde 10]

MORO KOWNUKONDRE ZAAL DE FANOWDU

Fu di Taiwan kon kisi moro preikiman, meki moro Kownukondre zaal de fanowdu, ma a sani dati na wan problema. Fu san ede? Fu di a muilek srefisrefi fu feni bun gron fu bow Kownukondre zaal, boiti na wan tu presi di de farawe fu den bigi foto. Wan tra problema na taki den gron diri srefisrefi, èn lantiwet no e gi pasi taki sma e bow na ala presi. A wan-enkri fasi fa den brada man feni presi na ini den bigi foto, na fu bai kantoro èn fu kenki den kon tron Kownukondre zaal. Ma toku a de so taki nofo tron den plafon fu den kantoro disi lagi, den brada musu pai furu moni fu ondrow den presi disi, èn sma musu kisi primisi fosi fu go na ini den gebow disi. Den sani disi èn tra sani sosrefi, e meki taki den presi disi no fiti fu den brada gebroiki den leki Kownukondre zaal.

Aladi dati de so, toku Yehovah Kotoigi na ini Taiwan ben man bow wan tu nyun Kownukondre zaal na ini den yari di pasa. Te now ete den Kotoigi e suku tra presi, èn den de klariklari fu gi bijdrage fu pai den hei kostu fu dati, èn den de klariklari tu fu leri fu bow Kownukondre zaal.