Den safri-atisma sa kisi grontapu

„Mi denki taki a naturu sa kenki dorodoro èn taki a sa kon bun baka. . . . Dati no o pasa wantewante, ma baka wan bun langa pisi ten te wi sa abi wan nyun hemel nanga wan nyun grontapu.”—Jean-Marie Pelt, wan Fransi sabiman di e ondrosuku a naturu.

FU DI furu sma e broko den ede nanga a fasi fa sani e waka na ini a naturu èn na ini a libimakandra, meki den ben o breiti efu a grontapu fu wi ben o kenki kon tron wan paradijs. Ma disi a no wan winsi di sma fu a ten disi wawan abi. Langa ten pasa, Bijbel ben pramisi taki grontapu o tron Paradijs baka. Yesus ben taki dati „den safri-ati sma, . . . o kisi grontapu” èn a ben taki sosrefi „meki yu wani pasa na grontapu soleki fa a e pasa na hemel”. Disi na tu fu den tekst na ini Bijbel di furu sma sabi (Mateyus 5:5; 6:10). Ma na ini a ten disi, furu sma no e bribi taki grontapu sa tron wan paradijs pe safri-atisma o libi na tapu. Furu sma di e taki dati den na Kresten, no e bribi moro taki grontapu sa tron wan Paradijs.

A Fransi tijdschrift La Vie, di e kon na doro ibri wiki, e fruklari fu san ede sma no e bribi moro taki wan paradijs sa kon, awansi dati de na grontapu noso na hemel. Moro furu na sma fu a Lomsu Kerki e bribi a sani disi. A tijdschrift e taki: „Sowan 1900 yari kaba, a leri di e taki fu wan paradijs, ben de a moro prenspari leri fu a Lomsu Kerki. Ma tide na a dei, a de so taki te kerkisma e teki ten fu begi makandra èn fu denki dipi fu sani di abi fu du nanga a bribi fu den, dan den no e poti prakseri na a leri disi moro. Dati de so tu te den e hori preiki na ini kerki tapu sonde, te den e gi sma leri fu a Lomsu bribi, èn te sma e kisi leri fu tron memre fu a kerki.” Sma no sabi srefi san a wortu ’paradijs’ wani taki. Son domri no e gebroiki a wortu disi fu espresi, fu di den feni taki „a e gi sma a denki taki den sa de koloku na grontapu trutru”.

Frédéric Lenoir, wan sabiman di e ondrosuku fa kerki abi krakti tapu a libimakandra, feni taki den sani di kerki e leri fu wan paradijs, „no abi nowan enkri krakti tapu sma”. Jean Delumeau, wan historia sabiman di skrifi difrenti buku di e taki fu a tori disi, e feni tu taki den pramisi fu Bijbel sa kon tru na agersi fasi nomo. A skrifi: „Te sma wani kon sabi efu a Paradijs sa kon trutru, dan a Kresten bribi e taki: Na fu di wi Frulusuman kisi wan opobaka, meki wan dei wi alamala sa de na ini wánfasi, èn wi sa de koloku.”

Wi kan bribi ete taki grontapu sa tron wan paradijs? San o pasa nanga grontapu na ini a ten di e kon? Wi kan kon sabi krin san o pasa na ini a ten di e kon? Na artikel di e kon sa gi piki tapu den aksi disi.

 [Sma di abi a reti fu a prenki na tapu a kafti]

COVER: Emma Lee/Life File/Getty Images